Awaruumi 12
12
Omukristo asugaane akorre Katonda mu engira empia
1Kutio waamwifu, nikulondokana na amasaasra amangi aga Katonda amiire okutuambra, mbaisasaama mbwe mufumizie Katonda emiwiri giinyu#12:1 Nakuwa owulamu wuinyu wuona. giwe ki omusango omulamu kandi omweru ogwa Katonda asangaala nagwo. Eyo nie engira endamu eya musugaane mukorre nayo Katonda.#Awaru 6:13; 1Pet 2:5 2Mutagia emberi okulonda enkola ezia awantu awa ekialo, ni mureke Katonda agalusie owulamu wuinyu na awa-aa amaingirizio amayia. Ekio kiiza okugera mumanye engira eya okugeezaania kandi okugawula ewintu ewia Katonda aagala mbwe mukole, ewintu ewisugre emberi waae kandi ewia asangaarre nawio.#1Kori 1:20; Efee 4:22–24; 5:17; 1Thes 5:21; 1Pet 1:14; 1Yow 2:15 3Kutio ku emirimo egia owutumwa egia Katonda amiire okumpa ku owusiza wuae, ndaga omuntu ki omuntu ku inywe mbwe omuntu ataaza yaingirizia mbwe ari kungulu okukira kiomo ari. Ni mu amaingirizio giinyu musugaane muiwone mu engira endootu, owuagani no okuganya okwa Katonda aeere omuntu ki omuntu.#Mari 10:43; 1Kori 12:11, 28; Efee 4:7 4Kuri mala kiomo omuwiri ogwa omuntu guri ne ewiimo ewingi, kandi ekiimo ki ekiimo kiri no omurimo gwakio. 5Nintio lwona turi omuwiri omulala oguri ne ewiimo ewingi ewikola alala, ifwe awari ku *Kristo kukawa mbwe turi awantu awangi.#1Kori 12:27 6Turi ne empanwa ezigawuke-gawuuke, nikulondokana no owusiza owua Katonda aeere omuntu ki omuntu. No omuntu aeerwe empanwa eya okugamba amangʼana agaemere ku Katonda, asugaane agambe owuagani no okuganya okwa ari nakwo. 7Ni kuri okukorra awandi emirimo, asugaane akole emirimo no omwoyo gwae gwona. Ni, ni kuri okugerera, ka-agerere geeza. 8Lwona ni kuri mbwe omuntu aeerwe empanwa eya okuambia awiina waae amaani, reka a-ambie awantu amaani. Oeerwe okuesania ewintu ku awataka, reka akole otio no omwoyo gwae gwona. Oeerwe okukangatra awandi, ka-akole otio na amaani gaae goona. Lwona ni kuri mbwe omuntu aeerwe empanwa eya okulagana owusiza ku awandi, ka-akole otio no owusangaavu.#1Kori 12:4–11; 14:12; 1Pet 4:10
9Olugonzi lwinyu ku awantu paka luwe olugonzi oluri kuwuene. Murege ewintu ewiwiiwi, ni muande ku ewintu ewilootu.#1Kori 13:4–7; 2Kori 6:6; 8:24; 1Timo 1:5; 1Pet 1:22 10Muwe no olugonzi agati iinyu ki awada ku Kristo, kandi omuntu ki omuntu awe mbwe ni iye osooka okutoola omwina waae ki osugre okueewua owuti okumukira iye omwene.#Yowa 13:14–15; Gala 5:13; 6:3; Efee 4:2; Filiip 2:3 11Muwe awantu awakalangufu mu emirimo, awatari awendeevu. Ni mukorre *Omwami Yesu kandi no *Omwoyo Omweru aema mu emioyo giinyu ki omurro. 12Muwe awusangaavu okurindirra ewia Katonda awateeriire emberi, awooreevu namba mu eminyako-nyaako kandi awasawa Katonda enyinga ziona.#Luuk 18:1; 1Kori 15:58; Awaib 10:36 13Mugawire awantu awa Katonda awawula nawio ewintu wiinyu, kandi muwe awantu awagonziizie okuingizia awageni mu emigizi giinyu.#Awaib 13:2 14Musereke awawaingizia mu eminyako-nyaako ku okuganya okwa muri nakwo ku Kristo. Mutawafuuwa yaaya, ni muwasereke.#Math 5:44 15Musangaale na awantu awasangaarre, ni murre na awarra.#Ayub 30:25; 1Kori 12:26; 2Kori 11:29 16Mumenye no owuolu na awiina wiinyu. Mutaitumbula, ni muwe owuyanga okuwa mu owulala na awantu awari ansi. Mutaaza mwaitoola mbwe muri awaganga.#1Kori 1:10–11; 8:1 17Otaaza waoloola omuntu okukoriire uwiiwi no okumukorra uwiiwi oona. Wona mbwe okola ewintu ewia awantu woona waganyire nawio mbwe wilootu.#Emfu 20:22; 1Kori 6:7; 1Thes 5:15; 1Pet 3:9 18Ku oluwega lwao, kola wukalu na amaani gaao goona kiomo kuesekana, owone mbwe omenyere na awantu woona no owuolu.#Mari 9:50; Awaru 14:19; 1Kori 7:15; Kolo 3:15 19Awiiko wange awa ngonziizie, no omuntu awakoriire uwiiwi, mutaaza mwamuoloola no okuwakorra uwiiwi mwona. Ni murekere Katonda iwaga awe mbwe nio omuoloola ku owuwi owua awakoriire. Aeniki kwajojwa mu endagano mbwe,
“Omwami Katonda awoola otino,
‘Inze ni inze ooza okuwaoloola ku ewintu ewiwiiwi ewia wakola.
Kandi kuwuene nyiza okuwaoloola.’#Owuiz 32:35 ”#Math 5:39
20Ni musugaane mukole kiomo endagano ewoola mbwe,
“No omuzigu waao awurra enzala, mu-ee okuria arie.
Lwona na awurra owulwo, mu-ee amanzi anywe.
No omukoriire otio, aaza okufwa ne ensuuko.”#Emfu 25:21, 22#Math 5:44
21Mutaaza mwaganya owuoni wuawakira, ni mukire owuoni ne enkola endootu.
Actualmente seleccionado:
Awaruumi 12: sxb
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2010, Bibe Translation and Literacy.