San Juan 11
11
Lázaro 'corupäi'inö huȩnȩ
1Ya̧tȩ na̧'ä̧chö̧mä̧, Lázaro pä'ö mi̧cua̧, Betania ötahuiyänä ki̧nö̧do. María, kuböa Martacu ju̧huȩnȩ ötahuiyänä ka̧cui̧nä̧tö̧do. 2Ya̧ju̧tä̧ María, Lázaro na̧'ä̧chi̧nö̧ uböamä, amehuoya Jesús ö̧jä̧pö̧nä̧ da'epäjä'caju, kuhuo'chenä 'ca̧'i̧nä̧ju̧ pi̧nä̧ju̧do. 3Ja̧'hua̧nö̧ ja̧'a̧ttö̧ jahuätömä, Martacu, Maríacu, Jesúsru jittähua pä'ö hue'inätödo. Pä'inätödo:
—Tu̧ru̧hua̧, cua̧hua̧ru̧hua̧ na̧'ä̧chö̧ rö̧.
4Jesús ja̧'hua̧nö̧ ä̧ju̧cuo̧mȩnä̧, pä'inödo:
—Ja̧u̧ na̧huä̧cho̧mȩnä̧, 'corupä'i'ocö. Dios adihuä öadihuä'inä, Dios I̧tti̧ adihuä öadihuä'inä i̧jȩcua̧ pä'ö na̧'ä̧chö̧ ja̧u̧mä̧.
5-6Jesús Martarö'inä, köjähuajuru'inä, kö̧jä̧hua̧ Lázarorö'inä rö̧ȩnä̧ repea'anä, Lázaro na̧huä̧cha̧'a̧ jittähuäji o'ca'a, ji̧nä̧ todäre mo̧ro̧ päi'önä ki̧nö̧do ö̧jo̧mȩtä̧. 7Ja̧u̧nu̧ o'ca'a u̧huo̧juȩtä̧u̧ru̧ pä'inödo:
—Pä'äji ta'anö Judea rȩjȩra̧'a̧ ti̧'chä̧tu̧cua̧.
8Ja̧'hua̧nö̧ päomenä, u̧huo̧juȩtä̧u̧ ädätinätödo:
—Huo̧juȩcuä̧ I̧sa̧, ni̧po̧ ja̧'a̧cu̧ juhua'attö judíos ttö̧ja̧ ido'qui icu, ucuru cuä'ö tticua pä'inätödo. ¿Jitämä pä'äji ta'anö juhua'atä cui̧'cha̧ pä'öjä tä̧ji̧?
9Jesús päinä̧u̧do:
—¿Ya'ute mo̧ro̧ ttö̧jä̧pö̧ttö̧nö̧ todäre horas ka̧'a̧ tä̧ji̧? Ya̧tȩ mo̧ro̧ cue'ächömä, koro juäinä dö'ö ma̧'o̧cö̧, pi̧jä̧ tȩa̧u̧nä̧ topö cueächa'attö. 10Ja̧'hua̧nö̧ ja̧'a̧nä̧ ya̧tȩ yodo cue'ächömä, tȩa̧u̧ juiya'attö koro juäinä dö'ö ma̧'ö̧.
11Ja̧u̧nu̧ o'ca'a Jesús jahuätörö pä'inödo:
—Ta̧hua̧ru̧hua̧ Lázaro ä'ö icuäja'a. Ttötä ja̧u̧ ö'orächi'a pä'ö chi̧'chä̧cua̧sä̧.
12Ja̧'hua̧ ja̧'a̧ttö̧ u̧huo̧juȩtä̧u̧ pättinäcudo:
—Tu̧ru̧hua̧, ä'ö icuäja'attömä, adiu ö̧'i̧pä̧cua̧'a̧nö̧.
13Jesús ja̧'hua̧nö̧ päomenä, Lázaro 'corupä'i'äji pä'ö pä'inödo. Ja̧'hua̧nö̧ ja̧'a̧nä̧ chutä u̧huo̧juȩtä̧u̧ amönä ä'öcö̧ pä'ö amöcuädinätödo. 14Ja̧'hua̧ ja̧'a̧ttö̧ Jesús jueönä pä'inödo jahuätörö:
—Lázaro 'corupä'i'äji. 15'Corupäi'omenä, kara'a chö̧ja̧'a̧ttö̧ eseusä. Ja̧'hua̧nö̧ ja̧'a̧ ucutumä adiu cuesetätucuäcua'a̧nö̧, ja̧u̧ru̧ tota ti̧'chä̧tu̧cua̧.
16Ja̧u̧nu̧ o'ca'a Tomás, Ta̧ju̧hui̧nö̧ pättinäcumä, pä'inödo korotö ahuaruhuärö:
—Ujutu'inä ti̧'chä̧tu̧cua̧ ja̧u̧tä̧cu̧ ji̧nä̧ yo̧mȩtȩnä̧ 'corupäti'ätucua.
Jesús Ttoädäcuähuä I̧sa̧
17Lázarorö idoränä pa̧ja̧cuä̧nö̧ mo̧ro̧ ttötäji o'ca'a, 'chä̧hui̧'i̧nö̧do Jesús. 18Betania ötahuiyä, Jerusalén ötahuiyättö dos kilómetros y medio jo̧mȩnä̧ tö'cönänö ji̧na̧'a̧do. 19Lázaro 'corupäi'omenä, recuätö judíos ttö̧ja̧ Martarö'inä, Maríarö'inä tta̧'cua̧ tta̧nö̧ amöcuädö topö 'chi̧nä̧tö̧do. 20Marta Jesús icha'a kä̧ju̧cuo̧mȩnä̧, rä'opächinäjudo ja̧u̧ru̧ toja pä'ö. Maríatä isodenä ki̧'i̧nä̧ju̧do. 21Marta pä'inäjudo Jesúsru:
—Chu̧ru̧hua̧, pȩnȩ cu̧ju̧ttu̧mä̧, chö̧jä̧hua̧ 'corupä'i'ocö paji. 22Ja̧'hua̧nö̧ ja̧'a̧nä̧ o'ca juiyönä jäcuhue'ömä, Dios iyäcujä huo̧jua̧ju̧sä̧.
23Jesús jahuäjuru pä'inödo:
—Cu̧jä̧hua̧mä̧ pä'äji ta'anö ö̧jä̧cua̧.
24Marta ädätö pä'inäjudo:
—Iso päi'önä, röji mo̧ro̧ päi'omenä, 'corupättinomettö ttottächomenä, pä'äji ta'anö ö̧jä̧cua̧ huo̧jua̧ju̧sä̧.
25Ja̧'hua̧ ja̧'a̧ Jesús pä'inödo jahuäjuru:
—Ttötäsä Ttoädäcuähuä I̧sa̧mä̧. Ttötäsä tta̧'cua̧rö̧mä̧ iyähuä i̧sa̧mä̧. Ttörö esetömä, hua'ö icuipö'inä, pä'äji ta'anö ö̧jä̧cua̧. 26Ya̧tȩ a̧'cua̧rö̧ ku̧nä̧rö̧mä̧ ttörö esetö, yoröiso hua'ö icuocö juhua'a yabomä. ¿Pi̧yȩ esetäjujä tä̧ji̧?
27Jahuäju pä'inäjudo:
—A̧'a̧, Chu̧ru̧hua̧. Ucumä Cristojä, Dios I̧tti̧ pi̧jä̧ra̧'a̧ i̧chä̧cua̧ pättinäcu esetäjusä.
Lázarorö ttötinome topö Jesús ajuähuinö huȩnȩ
28Ja̧u̧ jijähuäji o'ca'a, Marta köjähuaju Maríarö huopö 'chi̧nä̧ju̧do. Yä̧huä̧i̧nä̧ päjinäcuado:
—Huo̧juȩcuä̧ I̧sa̧ ichäji. Ucuru huopö.
29María ja̧'hua̧nö̧ kä̧ju̧cuo̧mȩnä̧, yotäcu ä̧rä̧mi̧'ö̧, Jesúsru topö 'chi̧nä̧ju̧do. 30Jesús ötahuiyära̧'a̧ ji̧nä̧ 'chä̧hui̧'o̧cö̧ pi̧nö̧do. Marta ja̧u̧ru̧ kö̧'o̧cui̧'ä̧jo̧mȩtä̧ ki̧nö̧do. 31Jahuätö judíos ttö̧ja̧ tta̧'cua̧ tta̧nö̧ amöcuädö ichäjätömä, Maríacu isodenä ka̧cuä̧tö̧mä̧, yajutä o'ca päi'önä ä̧rä̧mi̧'ö̧ räjopächomenä topö, jahuäju ko'ca'anä 'chi̧nä̧tö̧do. Kö̧jä̧hua̧rö̧ ttötäjome ajuäu 'chä̧jä̧ju̧cö̧ pä'ö amöcuädinätödo.
32Ja̧'hua̧ ja̧'a̧ María Jesús ö̧ja̧'a̧ 'chä̧hui̧'ö̧, ä'ca jo̧mȩttö̧ kihue'quiyunä kä̧mä̧dö̧ pä'inäjudo:
—Chu̧ru̧hua̧, pȩnȩ cu̧ju̧ttu̧mä̧, chö̧jä̧hua̧ 'corupä'i'ocö paji.
33-34Maríacu, korotö judíos ttö̧ja̧ jahuäjucu ichäjätö ttajuähua'a topö, Jesús a̧'cua̧ tta̧'ȩcui̧nö̧do. Ami iso'quinä a̧'cua̧ tta̧nö̧ amöcuädö, jahuätörö jä'epinödo:
—¿To cutäjätucuäröttö?
Ädätinätödo:
—Tu̧ru̧hua̧, topächi.
35Jesús ajuähuinödo. 36Ja̧'hua̧nö̧ tottomenä, judíos ttö̧ja̧ ju̧huȩnȩ ka̧cuä̧tö̧ pä'inätödo:
—Topätucui. Rö̧ȩnä̧ repeinäcu.
37Ja̧'hua̧nö̧ ja̧'a̧nä̧ korotö pä'inätödo:
—Pidemä ä̧to̧cä̧tö̧rö̧ aditö icuinömä, ¿Lázaro 'corujuoächö juiya pä'ö jȩpo̧cö̧ paji tä̧ji̧?
Lázarorö ttoädinö huȩnȩ
38Jesús pä'äji ta'anö a̧'cua̧ tta̧nö̧ amöcuädö, Lázarorö ttötäjome topö 'chi̧nö̧do. Idorä ji̧na̧'a̧do. Idorä ä'ca ido'qui rö̧o'qui mö̧ȩcui̧na̧'a̧do. 39Jesús pä'inödo:
—Ido'qui mö̧ȩcuo'qui pporädö icuätucui.
Marta, 'corupä'i'inö uböa, pä'inäjudo:
—Tu̧ru̧hua̧, täcö huahua'a a̧'cua̧ra̧'a̧, ttötäja'a pa̧ja̧cuä̧nö̧ mo̧ro̧ päi'äja'attö.
40Ja̧'hua̧ ja̧'a̧nä̧ Jesús päinäcuado:
—Adiu cuesetöttömä, Dios adihuä öadihuä tocu'äcuajujä ¿ucuru pä'ocö päjisä tä̧ji̧?
41Ja̧'hua̧nö̧ päomenä, ido'qui pporädinätödo. Jesús mo̧ro̧jä̧ra̧'a̧ topö, ucuocuinödo:
—Chä'o, ttörö cuä̧ju̧cuä̧ja̧'a̧ eseusä ucuru. 42Ttörö 'cuäopönä ä̧ju̧cu̧jä̧ huo̧jua̧sä̧. Ja̧'hua̧nö̧ ja̧'a̧nä̧ pitö, pȩnȩ ka̧cuä̧tö̧, ttörö huecuhuina'a tteseta pä'ö ucuocusä jitä.
43Ja̧'hua̧nö̧ ucuocuäji'ca̧, pä̧i̧cu̧nä̧ huopinödo:
—¡Lázaro, juhua'attö rä'opi!
44Ja̧'hua̧nö̧ päomenä, ja̧u̧ 'corupä'i'äjimä rä'opinödo u̧mö̧pi̧yä̧'i̧nä̧, ö̧jä̧pi̧yä̧'i̧nä̧ pö̧jä̧ta̧nä̧ juähua'a. Ö'ä'inä pö̧jä̧ta̧nä̧ juähuina'ado. Jesús ju̧huȩnȩ ka̧cuä̧tö̧rö̧ pä'inödo:
—Ejädo icuätucuirö i̧'cha̧.
Jesúsru cuä'ö tticua pä'inätödo
45Ja̧'hua̧nö̧ 'cuäopa'a topö, recuätö judíos ttö̧ja̧ Maríacu ka̧cuä̧tö̧ Jesús jȩa̧'a̧ tottomenä, esetinätödo Jesúsru. 46Ja̧'hua̧nö̧ ja̧'a̧nä̧ korotömä, fariseos huotörö topö 'chä̧nö̧, o'ca juiyönä Jesús jȩa̧'a̧ tottäji ji'ähuinätödo. 47Ja̧'hua̧ ja̧'a̧ttö̧ fariseos huotö'inä, sacerdotes ruhuotö'inä, judíos ttö̧ja̧ ji̧nä̧ isocu ruhuotöcu, ca̧ca̧cui̧pö̧ pä'inätödo:
—¿Tta̧'a̧nö̧ jȩtä̧cua̧'a̧jä̧ttö̧? Ja̧u̧ ubomä ttö̧ja̧ ttieru juäi rö̧ȩnä̧ jȩpö̧. 48Ja̧'a̧tä̧ to̧tä̧rö̧ttö̧mä̧, o'ca toi'önä ja̧u̧ru̧ ttesetäcuotö. Ja̧u̧nu̧ o'ca'a romanos ttö̧ja̧ tturuhuotö ichi'ö ujuturu'inä, Diosrö ucuocuäcuähuode'inä be'epö tticu'a̧nö̧ ja̧'a̧.
49Ja̧'hua̧nö̧ ja̧'a̧nä̧ jahuätöttö ya̧tȩ Caifásmä, ja̧u̧nu̧ pä̧nä̧ sacerdotes ttu̧ru̧hua̧mä̧, pä'inödo jahuätörö:
—Ucutumä yoröiso jerupätöjä. 50Ucutu amöcuädocotöjä. Ya̧tȩtä̧ o'ca toi'önärö ppäda pä'ö 'corupäi'omenä, o'ca toi'önärö be'epö tticuomettö'inä abonänö adihua'a ujuturu.
51Caifás ja̧'hua̧nö̧ päomenä, chutä amöcuädötä pä'ocö pi̧nö̧do. Chutä ja̧u̧nu̧ pä̧nä̧ sacerdotes ttu̧ru̧hua̧ ö̧ja̧'a̧ttö̧, Dios huo̧juȩcuä̧nä̧ pä'inödo:
—Jesús 'co̧ru̧pä̧i̧'ä̧cua̧ judíos ttö̧ja̧rö̧ ppäda pä'ö. 52Ja̧'hua̧ta̧nö̧ jahuätötämäcö̧. O'ca toi'önä Dios i̧tti̧mö̧ kara'a ka̧cuä̧tö̧rö̧'i̧nä̧ u̧ca̧ca̧ta̧ pä'ö 'co̧ru̧pä̧i̧'ä̧cua̧, —pä'inödo.
53Ja̧'hua̧nö̧ ja̧'a̧ttö̧ ja̧u̧nu̧ mo̧ro̧ kä̧mä̧dö̧ judíos ttö̧ja̧ tturuhuotö Jesúsru iso päi'önä cuä'ö tticuarö pä'ö ucuocuinätödo. 54Ja̧'hua̧nö̧ ja̧'a̧ttö̧ ja̧u̧nu̧ o'ca'a o'ca toi'önä ttu̧huo̧juo̧mȩcu̧ Jesús cue'ächocö pi̧nö̧do judíos ttö̧ja̧ ttö̧'quȩtȩnä̧. Judea rȩjȩttö̧ rä'opö, Efraín ötahuiyära̧'a̧, de'a tö'cönänö ji̧no̧mȩ 'chi̧nö̧do. Juhua'atä u̧huo̧juȩtä̧u̧cu̧ ki̧nö̧do.
55Judíos ttö̧ja̧ pascua fiesta jȩttä̧cua̧'a̧ mo̧ro̧ tö'cöhuächina'ado. Recuätö ttö̧ja̧ korome ötahuiyä ppo̧ö̧ttö̧ 'chi̧nä̧tö̧do Jerusalén ötahuiyära̧'a̧, pascua fiesta jȩttä̧cua̧'a̧ ä'canä suronä jȩtti̧nö̧ töcäu tticua pä'ö Diosrö ucuocuäcuähuodenä. 56Jahuätömä Jesúsru usinätödo. Diosrö ucuocuäcuähuodettö ttamönä jä'epäcuähuinätödo:
—¿Tta̧'a̧nö̧ cuamöcuädätucuättö? ¿Fiesta jȩa̧ pä'ö i̧chä̧cua̧ tä̧ji̧?
57Fariseos huotöcu, sacerdotes ruhuotöcu hue'inätödo ttö̧ja̧rö̧ Jesús ö̧jo̧mȩ ttu̧huo̧ju̧ttu̧mä̧, jahuätörötä jittähua pä'ö. Jahuätö cärenä ttöta pä'inätödo Jesúsru.
Actualmente seleccionado:
San Juan 11: PIDNT86
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Nuevo Testamento en Piaroa © Sociedades Biblicas Unidas, 1986.