मर्कुस 12
12
अङ्गुरबारि कामाइनारको उखान
(मति २१:३३-४६; लुका २०:९-१२)
1येसुन होल्काइ उखाननाइ इत्तिके बाजइ लाग्ले,“एउटो मानुसिन अङ्गुर लाइके वरिपोरि बार लाइले र एउटो खाल्टो खनिके अङ्गुर पेलइलाइ कोल बानाइले। अनि अङ्गुर रुँगइकर लागि एउटो ढाङ्गो छाप्रो बानाइले र किसानकाइ अद्यानाइ कामाइ दिके आफिचाइ पर्देस जाइले। #यस ५:१-२ 2अङ्गुर टुन्नार बेला हक्लपछि मालिकिन एउटो नोकरलाइ आफ्ने भाग अङ्गुर लेइ पाठाल्ते। 3तर होल्किन नोकरलाइ आठाइके ठाटाइला र सुदे हात फर्काइदिल्याक। 4मालिकिन फेरि अर्को नोकरलाइ पाठाल्ते, तर होल्किन होलाइ पुनि कापालनाइ हिर्काइला र होक्र बिजेत गर्ला। 5मालिकिन अजइ अर्कोलाइ पाठाल्ते, तर होल्किन होलाइ मार्ला। इत्तिके मालिकिन धेराइ नोकरकाइ पाठाइल्याक, तर होल्किन कत्ताल्काइ ठाटाइल्याक र कत्ताल्काइ मार्ल्याक। 6अब अन्तिमनाइ मालिककर एउटो मात्र प्यारो बेटाक बाकि रइल। मालिकिन ‘मोर बेटाकलाइ ता पक्कइ होल्किन आदर गर्छत हक्ति’ बाजिके होल्कोनाइ पाठाइले। 7तर ह्व किसानकिन आपसनाइ बाज्ला, ‘ह्य ता बारि धनिकर हकवाला हो। अब हाइ ह्यलाइ मारु अनि हेक्र सम्पति हाम्रो हक्नारआछि।’ 8अनि होल्किन मालिककर बेटाकलाइ हिर्काइके मार्ला र अङ्गुर बारिबान बाइर लाकाइके फ्याङ्ला।
9 “अब अङ्गुरबारिकर मालिकिन होल्काइ केति गर्छइ ते? मालिक आफि आइके दुस्ट किसानकाइ मार्नारआछ र आफ्ने अङ्गुर बारि आनेल्काइ कामाइ दिनारआछ। 10केति तोराल्किन धर्मसास्तरनाइ लेख्ल ह्य कुरो पढ्लाछो?
‘घर बानाइनाराइ कर्मिकिन काम बइलागि बाजिके फ्याङ्ल पाथर ने,
घर बानाइतिन मुख्य सुरे पाथर हकल्ते।
11 ह्य परमपर्भु आफिन गर्ल हो,
ह्य काम हाम्रो नजरनाइ अचम्मकर आछि।’” #भजन ११८:२२-२३
12येसुन ह्य कुरो हाम्रे बिरुद्दनाइ बाज्ल हो बाजिके यहुदि अगुवाल्किन बुज्ला र येसुलाइ पक्रइ आट्ला तर होलत मान्छेल्को भिडसिन डाराइल कारनिन येसुलाइ पक्रइ बइसक्ला र छाडिके जाइला।
कर तिर्नार बारेनाइ परस्न
(मति २२:१५-२२; लुका २०:२०-२६)
13ह्व पछि होल्किन कुरइ-कुरोनाइ येसुलाइ फसाइ बाजिके फरिसिलत र हेरोद राजाकराइ केइ मान्छेल्काइ पाठाइल्याक। 14होलत आइके येसुलाइ सोद्ला, “गुरु, हाइलाइ था आछ, तुइ सत्य कुरो बाज्छस, आनेल्किन केति बाज्छत बाजिके वास्ता बइगरस। कुनुल्को मुख हेरिकइ काम बइगरस, परमेसोरकर बाट साँच्चिसिन देखाइछस। हाइलाइ बल, परमेसोरकर नियम अन्सार कइसरलाइ कर तिरइ ठिक आछ, कि बइने? 15हाइ कर तिरइ कि बइतिरइ?”
येसुन होल्को छलि बिचार बुजिकइ होल्काइ बल्-ल्याक,“तोरा किनारे मुइलाइ परिछ्या गर्छो? मुइलाइ एउटो सिक्का देखाओ।”
16होल्किन येसुलाइ एउटो सिक्का आनिकइ दिल्याक।
अनि येसुन होल्काइ सोद्ल्याक,“हेइनाइ कुनकर नाउँ र छाप आछि।”
होल्किन बाज्ला, “कइसरकर।”
17येसुन होल्काइ बल्-ल्याक,“होइहुदान जे कइसरकर हो ह्व कइसरलाइ देओ र जे परमेसोरकर हो ह्व परमेसोरलाइ देओ।”
येसुकर इन्खा जबाफ सुनिके होलत छक्क पर्ला।
पुनरुत्थान र ब्याहा
(मति २२:२३-३३; लुका २०:२७-३८)
18मर्लपछि पुनरुत्थान बइहकि बाज्नाराइ सदुकिलत येसु हक्लनाइ आइला, अनि होल्किन येसुलाइ सोद्ला,#पे २३:८ 19“गुरु, मोसान हाइलाइ लेख्दिल परमेसोरकर नियम अन्सार कुनइ मानुसकर दाजेककर सन्तान नहकिके मर्ले भने दाजेककर लागि सन्तान हक्दिक बाजिके भाएकिन भोजेकसिन ब्याहा गरइपर्छि।#बेब २५:५ 20एउटो परिवारनाइ सात भाइ रइला। जेड्काइनिन ब्याहा गर्ले तर सन्तान नहकिके मर्ले। 21उन्खाए माइलान भोजेकलाइ ब्याहा गर्ले, होक्र पुनि सन्तान नहकिके मर्ले। र साइलार पुनि उन्खाए हकल्ते। 22उन्खाए गरिके साते भाइकिन भोजेकसिन ब्याहा गर्ला र सन्तान नहकिके मर्ला। पछि ह्व बेटि पुनि मर्लि। 23अब मर्लबान पुनरुत्थान हक्तिन ह्व बेटि कुनकरि बोहेक हक्छइ? किनारइभने होलाइ ता साते भाइकिन ब्याहा गर्लाइ रइला।”
24येसुन होल्काइ बल्-ल्याक,“तोरा ता भुलनाइ रइलोसइ, किनारइभने तोराल्किन न ता धर्मसास्तर न ता परमेसोरकर सक्तिलाइ ने बुज्लाछो। 25मर्लबान पुनरुत्थान हक्लपछि होलत न ता ब्याहा गर्छत न ता होल्को ब्याहा ने हक्छि। तर होलत ता स्वर्गदुत जिन्खाए हक्छत। 26मर्लाइ मान्छेलत जिउँते हकिके उठ्नार बारेनाइ तोराल्किन मोसाकर किताबनाइ पढ्लाइ बइने? परमेसोरिन मोसालाइ जिगिधर्ल पोथ्राबान इनिखे बल्लाछि, ‘मुइ अब्राहामकर परमेसोर, इसहाककर परमेसोर र याकुबकर परमेसोर हो।’#पर ३:६ 27परमेसोर मर्लाल्को परमेसोर बया, तर ह्व जिउँताल्को परमेसोर हो। तोरा बड्खो भुलनाइ पर्लाछो।”
सेब्बे भन्दा बड्खो आग्या
(मति २२:३४-४०)
28एउटो धर्म-गुरुन उछि हक्ल सेब्बे कुरो सुनिधर्ल रइल। येसुन मान्छेल्काइ ठिक जबाफ दिल देखिके धर्म-गुरुन येसुलाइ सोदल्ते, “परमेसोरकर आग्यालत मद्दे सेब्बे भन्दा बड्खो आग्या चाइ कुन्टो हो?”
29येसुन जबाफ दिल्ते,“सेब्बे भन्दा बड्खो आग्या ह्य हो, ‘हे इज्राएलि हो, सुनो! परमपर्भु हाम्रो परमेसोर एउटे मात्र परमपर्भु हो। 30तुइनिन परमपर्भु आफ्ने परमेसोरलाइ तोर सेब्बे हिर्दयनिन, तोर सेब्बे परानिन, तोर सेब्बे मनिन र तोर सेब्बे सक्तिन मया गर।’#बेब ६:४-५ 31दोस्रो चाइ ह्य हो, ‘तुइनिन आफ्ने छिमेकिलाइ आफिलाइ जिन्खाए मया गर।’ ह्य भन्दा बड्खो आग्या आने बइने।”#ले १९:१८
32ह्य सुनिके धर्म-गुरुन येसुलाइ बलल्ते, “गुरु, तुइनिन ठिक बाज्लइ, परमेसोर एउटे आछ, ह्व बाएक आने कोइ बइनेत।#बेब ४:३५ 33परमेसोरलाइ सेब्बे हिर्दयन, सेब्बे मनिन, सेब्बे सक्तिन मया गरइ र आफ्ने छिमेकिकाइ आफिलाइ जिन्खाए मया गरइ सेब्बे किसिमकर बलि र होमबलि भन्दा महत्तोपुर्न कुरो हो।”#हो ६:६
34होक्र बुद्दिमानि जबाफ सुनिके येसुन बाज्ले,“तुइ परमेसोरकर राज्यबान बद्दुर बइने।”
ह्व पछि कुन्नुल्किन पुनि येसुलाइ परस्न सोदइ आँट बइगर्ला।#लुक १०:२५-२८
खिरिस्ट कुनकर बेटाक?
(मति २२:४१-४६; लुका २०:४१-४४)
35मन्दिरनाइ सिकाइधर्ल बेलानाइ येसुन बाज्ले, “परमेसोरकर नियम सिकाइनाराइ धर्म-गुरुल्किन किनिखे खिरिस्टलाइ दाउदकर बेटाक हो बाज्छत? 36किनारइभने दाउद आफिन पबित्र आत्माबान बाज्लाछ,
‘परमपर्भुन मोर पर्भुलाइ बलल्ते,
“तुइ मोर दाइने हात पटि बस।
जब सम्म मुइ तोर सतुरकाइ तोर पइतला हेठ्ठान बइपारु।”’ #
भजन ११०:१
37 जब दाउद आफिन खिरिस्टलाइ ‘पर्भु’ बल्ल पछि, फेरि किनिखे खिरिस्ट दाउदकर बेटाक हक्ले?”
मान्छेल्को भिडिन येसुकर सिछ्यालाइ ध्यान दिके सुन्ला।
धर्म-गुरुल्कोबान होसियार
(मति २३:१-३६; लुका २०:४५-४७)
38फेरि येसुन सिछ्या दितिन बाज्ले,“धर्म-गुरुल्कोसिन होसियार हकिके बसो! होलत ता लामो लुगा लाइके घुमइ मन पराइछत र बजारकराइ मान्छेल्किन आदर सत्कार गर्ल चाइछत, 39अनि सभाघरनाइ मुख्य ठउँनाइ र भोज-भतेरनाइ आदर पाइनार ठउँनाइ बसइ मन पराइछत। 40होल्किन बिद्दुइको घरबार खोस्छत र देखावटि लामो पार्थना गर्छत। इन्खाएल्किन झन बढ्ता सजाय पाइनारआछत।”
बिद्दुइकर भेटि
(लुका २१:१-४)
41मन्दिरनाइ येसु दान हाल्नार बाक्सा छेउनाइ बसिके मान्छेल्किन भेटि हाल्ल हेरिधर्ल रइल। धेराइ धनि मान्छेल्किन धेरइ-धेरइ पइसा चाराइला। 42र एउटि गरिब बिद्दुइनिन आइके तामाकर दुइटो सिक्का, अर्थात लगभग एक रुपया चाराइलि। 43अनि येसुन आफ्ने चेलाल्काइ आफि हक्लनाइ बालाइके बल्-ल्याक,“साँच्चि मुइ तोराल्काइ बल्छु, ह्य गरिब बिद्दुइनिन आने सेब्बाल्किन भन्दा धेरे भेटि चाराइलाछि। 44किनारइभने आनेल्किन ता आफिसिन हक्ल पर्सस्तबान केइ भेटि चाराइलाछत तर ह्य बिद्दुइ गरिब हक्तिन पुनि आफिसिन हक्ल सेब्बे जिबिका चालाइनार पइसा चाराइलाछि।”
Actualmente seleccionado:
मर्कुस 12: MAJH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.