लुका 11
11
येसुन सिकाइल पार्थना
(मति ६:९-१३;७:७-११)
1एक दिन येसु एक ठउँनाइ पार्थना गरिधर्ल रइल। पार्थना गरिसक्ल पछि चेलालत मद्दे एउटोन बाज्ले, “पर्भु, युहन्नान आफ्ने चेलाल्काइ पार्थना गरइ सिकाइल जिन्खाए हाइलाइ पुनि पार्थना गरइ सिकाइदेउ।”
2येसुन होल्काइ बल्-ल्याक, “तोराल्किन इनिखे पार्थना गरो,
‘हे परमेसोर ब्वा,
तोर नाउँ पबित्र हक्किधर्दिक,
तोर राज्य आइदिक।
3हाइलाइ चाइनार खाइनार कुरो दिन-दिने जुटाइदेउ।
4हाइनिन गर्ल पाप माफ गर्देउ,
किनारइभने हाइनिन पुनि हाम्रो बिरुद्दनाइ अपराध गर्नाल्काइ माफ गर्छे,
हाइलाइ परिछ्यानाइ परइबान जोगाउ।’”
5अनि येसुन होल्काइ बल्-ल्याक, “मानिलेओ, तोरा मद्दे कसइको कोइ एउटो साथि हक्ति। आदा रातनाइ ह्व साथेककर उछि जाइके बाज्छइ, ‘साथि, मुइलाइ तिन्टो पिठो पइचो देउ न। 6किनारइभने मोर एउटो साथि बद्दुरबान आइलाछ, र होलाइ खाइ देइलाइ मुइसिन केइ कुरो बइने।’ 7ह्व साथेकिन भित्रबान बाज्ले, ‘मुइलाइ दुख जुनदेउ। दइलो लाइसक्नाइ, अनि मोराइ छानाछुनिलत मुइसिन ओछ्याननाइ आछत। अखन मुइ उठिके तुइलाइ केइ पुनि देइ बइसकु।’ 8मुइ तोराल्काइ बल्छु, होइनिन साथेक सम्जिकइ बइदितिन पुनि होइनिन एकोरो मागिधर्ले भने ह्व उठ्नारआछ र माग्ल जत्ता सेब्बे होलाइ दिनारआछ। 9होइ हुदान मुइ तोराल्काइ बल्छु, मागो, ता पाइनारआछो, हेरो, ता भेट्टाइनारआछो, ढक्ढकाओ, ता तोराल्को लागि दइलो उघ्रिनारआछि। 10किनारइभने माग्नारिन पाइछइ, हेर्नारिन भेट्टाइछइ र ढक्ढकाइनारकर लागि दइलो उघ्रिनारआछि। 11तोरा मद्दे कुन्टो ब्वाक हुदो, आफ्ने बेटाकिन माछ माग्तिन सापा दिछि?#११:११ कुनइ-कुनइ सोरोतनाइ इन्खा लेख्लाछि, कुन्टो ब्वाक हुदो आफ्ने बेटाकिन पिठो माग्तिन होवलाइ पाथर दिछि, कि माछ माग्तिन माछकर साटो सापा दिछि र? 12वा डिमा माग्तिन होलाइ बिच्छि दिछि? 13तोरा दुस्ट हकिके पुनि आफ्ने बेटाक-बेटेककाइ मजार कुरो देइ जान्छो भने, तोराल्को स्वर्गनाइ हक्नार ब्वान आफिसिन माग्नारकाइ झन धेरइ पबित्र आत्मा दिनारआछ।”
येसुउप्रान सङ्का
(मति १२:२२-२९,४३-४५; मर्कुस ३:२०-२७)
14एउटो मानुसलाइ भुतिन गुँगो बानाइल रल्ति। येसुन ह्व भित्र हक्ल भुत निस्काइल पछि ह्व मानुस बाजइ थाल्ले। ह्य देखिके मान्छेल्को भिड छक्क पर्ला। 15तर होलत मद्दे कत्ताल्किन बाज्ला, “हेइनिन ता भुतकर राजा बालजिबुलकर#११:१५ बालजिबुल दुस्ट आत्मा, भुत आत्मा र असुद्द आत्मा सेब्बाको राजा हो, ह्यलाइ सइतान, दियाबलस र बेलिआल पुनि बाज्छे। सक्तिबान भुत निकाल्ल हो।”#मति ९:३४;१०:२५; मर्क ३:२२
16कत्ताल्किन चाइ येसुकर परिछ्या गर्तिन बाज्ला, “ह्य काम परमेसोरकर सक्तिन गर्ल हो भने हाइलाइ स्वर्गबान एउटो चिन्न देखाउ।”#मति १२:३८;१६:१; मर्क ८:११ 17होल्को बिचार था पाइके येसुन होल्काइ बल्-ल्याक, “कुनइ देसनाइ फुट हक्छि भने ह्व देस आफि नास हक्छि अनि आफ्ने परिवारभित्र फाटो हक्ल घर पुनि नास हक्छि। 18इन्खाए गरिके दियाबलसिन आफ्ने बिरोद आफि गर्छइ भने होक्र राज्य किनिखे टिक्छि र? तोराल्किन मुइलाइ भुतकर राजा बालजिबुलकर सक्तिन भुत निस्काइछइ बाज्छो। 19मुइ बालजिबुलकर सक्तिन भुत निकाल्छु भने, तोराल्को चेलाल्किन कुनकर सक्तिबान होल्काइ निस्काइस्याक? तोराल्को आफ्ने सन्तानकिन ने तोराल्किन गर्ल गल्ति देखाइनार आछत। 20तर मुइ परमेसोरकर सक्तिन भुत निस्काइछु भने परमेसोरकर राज्य तोराल्कोनाइ आइसक्लाछि।”
21“हातहतियार बोक्ल बलियो मानुस घर रुँगइ बस्ले भने घरकर सेब्बे सम्पति सुरछित हक्छि। 22तर ह्व भन्दा बलियो मानुस आइके होलाइ जितल्ते भने होइनिन भर पर्ल सेब्बे हातहतियारलत खोस्छइ अनि सेब्बे सम्पति पुनि लुटिकइ लाकाइछइ र आफिलाइ सघाइनारकोसिन बाड्छइ।
23“जुन मोर पछ्यनाइ बइने, ह्व मोर बिरुद्दनाइ आछ। जुनिन मुइसिन बइबटुल, होइनिन छरपस्ट पार्छइ।#मर्क ९:४०
भुत आत्मा फर्किके आइल
(मति १२:४३-४५)
24“भुत आत्मा मानुसबान निस्काइलपछि ह्व केइ बइहक्नार उजाड ठउँनाइ जाइके आराम गरइकर लागि ठउँ हेर्तिन हिन्छइ, र कत्थुनि ठउँ नभेट्टाइकइ होइनिन बाज्छइ, ‘मुइ निस्किके आइल पइलाकर घरनाइ ने फर्किके जाइछु।’ 25उछि आइपुग्तिन होइनिन ह्व घर सफा गरिके सजाइल भेट्टाइछइ। 26अनि ह्व जाइके आने झन दुस्ट सातुटाइ भुत आत्माल्काइ सँगिन लिके आइछइ। ह्व सेब्बाइ भुत आत्मालत ह्व मानुसभित्र पोस्छत र उछि बास बस्छत अनि ह्व मानुसकर अबस्ता पइलाकर भन्दा झन डरलाग्दो हक्छि।”
परमेसोरकर आसिस
27येसुन ह्य कुरो बाज्तिन गर्तिन मान्छेल्को भिडबान एउटि बेटिन बड्खो सोरिन बाज्लि, “तुइलाइ जन्म दिनारि र आफ्ने दुत चुसाइनारि आमेर आसिसित हो।”
28तर येसुन बलल्ते, “जुनिन परमेसोरकर बचन सुन्छइ र पालन गर्छइ होइ ने आसिसित हो।”
योनाकर चिन्न
(मति १२:३८-४२)
29जब मान्छेल्को भिड धेराइ हक्ला येसुन फेरि बाज्ले, “ह्य पुस्ताकराइ मान्छेलत दुस्ट आछत। हेल्किन सक्तिसालि चिन्न हेरइ चाइछत, तर हेल्काइ अगमबक्ता योनाकर चिन्न बाएक आने चिन्न दिनार बइने।#मति १६:४; मर्क ८:१२ 30योना निनबे सहरकराइ मान्छेल्को लागि चिन्न हक्ल जिन्खाए, मानुसकर बेटाक पुनि ह्य पुस्ताकराइ मान्छेल्को लागि चिन्न हक्नारआछ।#योना ३:४ 31न्यायकर दिननाइ दछिन सेबा देसकरि रानिन ठडाइके ह्य पुस्ताकराइ मान्छेल्काइ दोस लाइनारआछि किनारइभने ह्व सोलोमन राजाकर ग्यान बुद्दिकर कुरो सुनइ धेरइ बद्दुरबान आइलि रइलि, तर हेरो, सोलोमन भन्दा पुनि महान एउटो इछि आछ।#१रा १०:१-१०; २इति ९:१-१२ 32न्यायकर दिननाइ निनबे सहरकराइ मान्छेल्किन ह्य पुस्ताकराइ मान्छेल्काइ दोस लाइनाराइआछत, किनारइभने योनान परमेसोरकर बारेनाइ सुनाइतिन होल्किन आफ्ने पापलाइ मानिलिके छाड्ला तर योनाभन्दा पुनि महान एउटो इछि आछ।”#योना ३:५
सरिरकर बत्ति
(मति ६:२२-२३)
33“कुन्नुल्किन पुनि बत्ति जिगाइके भाडान बइछोपत अनि नुकाइके पुनि बइधरत, तर घरभित्र आइनार मान्छेल्काइ उज्यालो हक्दिक बाजिके ढाङ्गो ठउँनाइ धर्छत।#मति ५:१५; मर्क ४:२१; लुक ८:१६ 34तोर सरिरकर बत्ति तोर आँखि हो। तोर आँखि ठिक आछि भने तोर सेब्बे सरिर उज्यालो हक्छि तर तोर आँखि खराब आछि भने तोर सेब्बे सरिर आँधारि हक्छि। 35होइ हुदान होसियार हको, तोराल्कोनाइ हक्ल उज्यालो आँधारि जुनहक्दिक। 36तोर सेब्बे सरिर उज्यालोनाइ आछि र कुनइ अङ्ग आँधारिनाइ बइने भने, ह्व बत्तिकर उज्यालो चम्किल जिन्खाए सेब्बे सरिर चम्किछि।”
फरिसि र धर्म-गुरुल्काइ येसुकर चेतावनि
(मति २३:१-३६; मर्कुस १२:३८-४०)
37येसुन ह्य कुरो बाजिसक्ल पछि एउटो फरिसिन येसुलाइ आफ्ने घरनाइ भात खाइ बोलाल्ते। येसु होक्र घरनाइ जाइके खाइ बस्ले। 38येसुन खाइ अगाडि धार्मिक नियम अन्सार हात बइधोइल देखिके फरिसि छक्क पर्ले। 39तर पर्भुन होलाइ बलल्ते, “तोरा फरिसिलत थाल र कचउराकर बाइरपटि ता माज्छो, तर तोराल्को भित्र मन चाइ लोब र दुस्ट कुरोन भरिलाइ आछो। 40ए मुर्ख हो, जुनिन बाइरकर भाग बानाइले होइनिन ने भित्रकर भाग पुनि बानाइल बया र? 41तोराल्को मन भित्र हक्ल कुरो गरिबकाइ दान दिखन र तोराल्को लागि सेब्बे कुरो चोखो हक्नारआछि।”
42तोरा फरिसिल्काइ धिक्कार! पतेना, आरुद र सेब्बे जडिबुट्टिकर दसाङ्स परमेसोरलाइ दिछो, तर न्याय र परमेसोरकर मया गर्नार कुरोलाइ चाइ वास्ता बइगरो। ह्य कामसगिँन तोराल्किन न्याय र मया पुनि गर्नार गरो।#ले २७:३०
43“तोरा फरिसिल्काइ धिक्कार! किनारइभने सभाघरनाइ आदर पाइनार ठउँनाइ र बजारनाइ आनेल्किन सेवाढोग गर्ल मन पराइछो। 44‘तोराल्काइ धिक्कार! किनारइकि तोरा ता बइदेख्नार चिहान जिन्खाए आछो। इन्खा बइदेख्नार चिहानबान मान्छेलत था नपाइके हिन्छत।’”
45एउटो धर्म-गुरुन येसुलाइ बलल्ते, “गुरु, इन्खा कुरो गरिके तुइनिन ता हाम्रो पुनि बिजेत गर्तिनआछस।”
46येसुन बलल्ते, “तोरा धर्म-गुरुल्काइ पुनि धिक्कार! किनारइकि तोराल्किन मान्छेल्काइ रितिथितिकर गरुङ्गो भारि बोकाइछो, तर तोरा आफि चाइ एउटो अउलान पुनि ह्व भारि बइछुओ। 47तोराल्काइ धिक्कार! किनारइकि तोराल्को पुर्खाल्किन मार्लाइ अगमबक्ताल्को चिहान तोरा बानाइछो। 48इत्तिके तोराल्किन आफ्ने पुर्खाल्किन गर्ल कामनाइ सहमति हक्छो, किनारइभने होल्किन अगमबक्ताल्काइ मार्ला अनि तोराल्किन चाइ होल्को चिहान बानाइछो। 49होइ हुदान परमेसोरकर बुद्दिन इत्तिके बाज्छइ, ‘तोराल्कोउछि मुइनिन अगमबक्तालत र पेरितलत पाठाइनारआछु। तोराल्किन होलत मद्दे कत्ताल्काइ मार्नारआछो र कत्ताल्काइ सताइनारआछो।’ 50होइ हुदान सन्सारकर सिरिस्टिसिन अखनसम्म सेब्बाइ अगमबक्ताल्काइ मार्ल रकतकर लेखा ह्य पुस्ताकराइ मान्छेल्किन देइ पर्नारआछ। 51मुइ तोराल्काइ बल्छु, मार्ल हाबिलकर रकतदेखि लिके मन्दिर र थानकर माजनाइ मार्ल जकरियासम्मकर रकतकर लेखा ह्य पुस्ताराइ मान्छेल्किन देइ पर्नारआछ।#उत ४:८; २इति २४:२०-२१
52“तोरा धर्म-गुरुल्काइ धिक्कार! किनारइकि तोराल्कोसिन ग्यान र बुद्दिकर ढोका उघार्नार साँचो ता आछि तर तोरा आफि पुनि भित्र पोस्लाइ बइने अनि आनेल्काइ पुनि पोसइ दिलाइ बइने।”
53येसु उछ्यान जाइलपछि धर्म-गुरु र फरिसिल्किन येसुलाइ एकदम बिरोद गरइ थाल्ला र येसुलाइ फसाइनार बिचारिन धेरइ परस्न गरइ लाग्ला। 54येसुन जबाफ दितिन कतइ गल्ति गर्छइ कि बाजिके दाउ हेरइ थाल्ला।
Actualmente seleccionado:
लुका 11: MAJH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.