मर्कुस 3
3
हाथ सुख्ल मानुस राम्रो भेल
(मत्ति १२:९-१४; लुका ६:६-११)
1येसु फेरि सभाघरै जाइलक्। ओछि एकजेना हाथ सुख्ल मानुस रैल्हक्। 2येसुइ बिसारिक दिनै ओक्रालाइ राम्रो पारैस् ना बाजिहिन् दोस लागाबालाइ फरिसिलके येसुक् चिवा कर्तिहि रैल्हुहुन्। 3येसुइ हाथ सुख्ल उ मानुसलाइ हाँख्राहिन् बोल्लोकुन्, “तुँइ उठिहिन् आगारि आहिन् ठड्ध्याउ।” 4तसौ येसुइ उखर्ह्वानि बोल्लाहा, “बिसारिक दिनै हाम्रा नियम अनुसार कुनसेहे काम कर्बाक् राम्रो भेला? राम्रो काम कर्बाक् ना नराम्रो काम कर्बाक्? पारान बाँचाबाक् ना नास कर्बाक्?” तर उ मानुसलक् नहिंसाराहिने चुप्चाप बस्लुहुन्।
5उखर्ह्वाक् कठोर मन देखिहिन् येसुक् मन सार्होय दुख्लकुन्। तसौ ओहिं जम्माहिंलाइ रिसाइबानाइ दिठालाहा। आउँ येसुइ उ हाथ सुख्ल मानुसलाइ बोल्लोकुन्, “तोरा हाथ तनक्क काराउ।” तसौ ओहिं हाथ तन्कालक् आउँ ओक्राक् हाथ राम्रो भेइहाल्लकुन्! 6ओट्का भेनेसौ फरिसिलक् सभाघरक्भटे निस्किहिन् जाइलुहुन्, तसौ तुरुन्ते हेरोद राजाक् मानुसलकक्सङ्हिं येसुलाइ कहने मार्बा बाजिहिन् साल्हा कर्बा ठाल्लुहुन्।
मानुसलकक् धुइरो येसुक्पाछु लाग्ल
7तसौ येसु आफ्निक् चेलालकक्सङ्हिं गालिल तालावक् छेंओइ जाइलक्। ओछि थुप्रोय मानुसलक् ओक्राक्पाछु लागिहिन् आइलुहुन्। 8येसुइ कर्ल अचम्मक् कामलकक् बिसइमा सुनिबानाइ मानुसलक् गालिल इलाकाक्भटे, यहुदिया इलाका आउँ यरुसलेम सहरक्भटे इदुमिआ इलाका आउँ यर्दन खोलाक् ओसाक्पारक्भटे तसौ टुरोस आउँ सिदोन सहरक् इलाकाक् चारौपटिक्भटे धुइरो लागिहिन् आइलुहुन्। 9यरङ् धुइरो देखिहिन् मानुसलके आफ्निक्ठालाइ ठेलामठेल् कर्बा बुन् आउस् बाजिबानाइ येसुइ चेलालकलाइ एक्टा डोङा आन्बा लागालाहा।#मर्कुस ४:१; लुका ५:१-३ 10ओहिं थुप्रोय मानुसलकलाइ राम्रो काराल धर्लाहा। उहेसैर्हे बेरामिलके ओक्रानि छुबाक्लाइ ठेलामठेल् कर्तिहि रैल्हुहुन्। 11भुत लाग्ल मानुसलके ओक्रानि देखेहे बिट्के ओक्राक् पाओइ घोप्टो पोरिहिन् बारा चोटे चिच्याहिन् यन्हिं बाज्लुहुन्, “तुँइ ता परमेस्वरक् बेटायक रहस्ला।”
12तर येसुइ “मुँइ कुनजेना बाज्बाक् कहिन् मानुसलकलाइ बुन् जानाहो” बाजिहिन् उ भुत आत्मालकलाइ करा आग्या देलाहा।
येसुइ बार्हजेना प्रेरितलकलाइ चुन्ल
(मत्ति १०:१-४; लुका ६:१२-१६)
13ओक्राक्पाछु येसु एक्टा डाँराइ उक्लिहिन् जाइलक्, आउँ आफ्निलाइ चाइल्ह जट्का चेलालकलाइ हाँख्रालक्। तसौ उखर्ह्वा ओछि येसुक्ठालाइ आइलुहुन्। 14-15आफ्निक्सङ्हिं बसुस् आउँ मानुसलकलाइ खुसिक् खभर सुनाउस् आउँ भुत-आत्मा निस्काबाक् अधिकार पाउस् बाजिहिन् ओहिं बार्ह जेनालाइ प्रेरित भेबाक् चुन्लक्,
16उ बार्हजेना प्रेरितलकक् नाउँ यिहे हो– सिमोन, जक्राक् नाउँ येसुइ पत्रुस धरिदेलकुन्, 17जब्दियाक् दुइ जेना बेटायक याकुब आउँ यहुन्ना, पाछु इखर्ह्वाक् नाउँ येसुइ “बोअनर्गेस” बाजिहिन् धरिदेलाहा, यक्राक् अर्थसेहे गर्जनक् बेटायकलक्#३:१७ गर्जनक् बेटायकलक्: मुल गिरिक भासाइ यक्रालाइ “गर्जनक् बेटायकलक्” बाजेला। यक्राक् मतलब उखर्ह्वा बादर गर्जलक् परौ रैल्हुहुन्, सायद उखर्ह्वाक् स्वभाब छिटो रिस उठ्लाहार आउँ जोसिलो रैल्हुहुन् (मर्कुस ९:३८; १०:३५-३९ दिठाहो)। हो। 18आउँ अन्द्रियास, फिलिप, बारथोलोमाइ, मत्ति, थोमा, अल्फयसक् बेटायक याकुब, आउँ थेदियस, देसभक्त बाज्ल समुहक् सिमोन, 19आउँ यहुदा इस्करियोत जैहिंपाछु येसुलाइ धोखा देहिन् पक्रालकुन्।
येसु आउँ बालजिबुल
(मत्ति १२:२२-३२; लुका ११:१४-२३; १२:१०)
20ओक्राक्पाछु येसु घरक्पटि जाइलक्। फेरि ओच्छुहु थुप्रोय मानुसलक् जउर भेलुहुन् यरङ् सम्मकि येसु आउँ ओक्राक् चेलाहिकेलके खाबाहुक् फुर्सट नहिंपाइलुहुन्। 21यरङ् कहिन् सुनिबानाइ ओक्राक् घरक् मानुसलके ओक्रानि लेबाक्लाइ आइलुहुन्, किसाबुने मानुसलके ओक्रानि बौलाल बाजिहिन् बाज्बाठाल्ल रैल्हुहुन्।
22यरुसलेमक्भटे आइल कुन्हुँ-कुन्हुँ धर्म-गुरुलकेसेहे येसुक् बिसइमा यन्हिं बाज्बा ठाल्लुहुन्, “यक्राक्ठालाइ बालजिबुल#३:२२ बालजिबुल: बालजिबुल सैतानक् ओर्को नाउँ हो। बाज्ल भुत पोस्लो रहेक्ला, उहे भुतलकक् राजाक् सक्तिक्भटे यहिं भुतलक् निस्काइस्।”#मत्ति ९:३४; १०:२५; लुका ११:२५
23उहेसिहिरे येसुइ उ धर्म-गुरुलकलाइ हाँख्राइबानाइ यि कहिनक् बिसइमा एक्टा खिसा लेइबानाइ यन्हिं बोल्लाहा, “सैताने कहने सैतानक्लाइ निस्काबा पारैस् भेकाते? 24कुन्हुँ राज्जे भिट्रै फुट रैल्ह भेइबुने उ राज्जे आफ्नि नास भेहिन् जायला। 25आउँ कुन्हुँ घरै घरक् मानुसलकक् बिचिहिमा फुट भेइबुने उ घर आको नास भेहिन् जायला। 26उहेरङ् करिहिन् सैतानक् राज्जेहुँमा फुट आइबुने ता उहौ आको टिक्बा नाप्पारेक् आउँ नास भेहिन् जायला।
27 “कुन्हुँहि आफ्निसौ बल्यो मानुसक् घरै पोसिबानाइ ओक्राक् धन-सम्पति लुट्बा नाप्पारेक्, जख्निसम्म पैल्हा ओहिं उ बल्यो मानुसलाइ नाँबार्है। तसौ माटेन् ओहिं ओक्राक् घर लुट्बा पारैस्।
28 “साँच्चिय मुँइ तोहोरानि बोल्मेहेंर्ला, मानुसलके कर्ल सेब्भ्रोउ पाप आउँ परमेस्वरलाइ बदनाम कर्ल पाप बरुस छेमा भेबा पारेला। 29तर पबित्र आत्माक् बिरोधै बदनाम कर्लाहारक् कख्नुहुँय छेमा नाभेक्, किसाबुने उ मानुसलाइ कख्नुहुँय नहिंमेट्लाहार पापक् दोस लागेक्ला।”#लुका १२:१० 30उखर्ह्वाइ येसुक्ठालाइ भुत-आत्मा पोस्लो रहेक्ला बोल्लो सिहिरे येसुइ यि कहिन् बोल्लो धर्लाहा।
येसुक् माँयक आउँ भायकलक्
(मत्ति १२:४६-५०; लुका ८:१९-२१)
31उहेबेलाइ येसुक् माँयक आउँ भायकलक् आइलुहुन्, उखर्ह्वा बाहारिहिमा ठड्ध्याहिन् येसुलाइ हाँख्राबा लागालुहुन्। 32येसुलाइ वरिपोरिक्भटे मानुसलकक् धुइरोइ घेर्ल धर्लिहिंक्। तसौ मानुसलके ओक्रालाइ जानालिहिंक्, “गुरु, तोरा माँयर आउँ भायरलके तोरालाइ भेंटाबाक्लाइ बाहारै अस्याहिन् बस्ल रहट्थ्ला।”
33तसौ येसुइ जुबाप देहिन् बोल्लाहा, “कुन्ग्वासेहे मोरा महँटार आउँ कुन्ग्वासेहे मोरा भाइलक्?” 34येसुइ आफ्निक् वरिपोरि रैल्ह मानुसक् धुइरोलाइ दिठाइबानाइ बोल्लाहा, “दिठाहो, मोरा महँटार आउँ मोरा भाइलक् यिहेखर्ह्वाय हो। 35किसाबुने जैहिं परमेस्वरक् आग्या मानट्थ्ला, उहेय मोरा महँटार आउँ भाइ-बैन्हिलक् हो।”
Actualmente seleccionado:
मर्कुस 3: DEWZ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.