Yohannis 13
13
Yeesus katattaynitti iba cakalisha
1 Faasigi cidko basolle, Yeesus ta caalamko ishi Abba fanah adde yadiye saaca guftem yeerhege gedda, ta caalamalle tine kixina ishi mara, abayshima fanah yikxine. 2Addiriruk lel ibliis Simcoon barha kin Iskariyoot Yahuudaako kayya yasxaynim mece geddaakoh afcaadodde akko hayeh yine. 3Yeesus lel Abba umbukaahim kaa gabadde akah hayem, usuk Yallaako yemeetem kee Yalla fanah aduuk yanem yeerhege. 4Dirarko uguteh lel ishi natsala oobisheh wuli sareena yooqhoceh yikkitiye. 5Sarrah laye wuli shaxanadde hayeh, amaa katattaynit hi iba wadisheyaako, amaa yikkitiyeh yine sareenah xishiye. 6“Maddara, yi iba cakalishsho?” akko yerhxe Simcoon Bithroosulle gufe gedda. 7Yeesus: “Anu abak anem kado mitaarhige, sarrah laakin taarhago kito” yerhxeh alle yedebbe. 8Bithroos lel: “Yi iba caduruh cakalishsho makito” yerhxe. Yeesus: “Anu ku cakalishe wayemko, yottaalih gide malito” yerhxeh alle yedebbe. 9Simcoon Bithroos lel: “Maddara, yi amo kee yi gabub gantah kibah, yi iba bisa makiiki” akko yerhxe. 10Yeesus: “Cakaliteti inkoh qarce-le tiya kinamhi sabbatah, ibi wadooko beexin cakalso kaa mifarhshishsha. Atin qarce-le mara kitin, laakin inkoh makitiini” akko yerhxe. 11Tamaa kaa yasxaw le tiya aarhiguk yinemhi sabbatah kinni: “Inkoh qarce-lem makitiini” yerhxem.
12Ten iba cakalisheh, ishi natsala hashshiiteyaako ishi caralle gaxe gedda: “Ta sinah abeh aniyom teerhegiini? 13‘Mudarris, Maddara’ yok tarhxin, meceetih tanin, kiyom kinni. 14Amaydo anu sin Maddara kee Mudarrisik sin iba akko cakalishaya, atin gantah iba sittah cakalishshoona sinalle tane. 15Anu misaal sinah oxoyeh aniyomhi sabbatah, anu akah sinah abeh aniyookah abtoona sinalle tane. 16Garuzzi ishi maddaraako minaba, luukti kaa fare tiyaako minabam rummah, rummah sinak arhxiyuk ane. 17Tayim teerhegiinimko kee abteenimko, baraka-lem kitin. 18Umman sinhi sabbatah waanishak maaniyo, miya dooreh aniyom aarhige. ‘Yi folo yottaalih beeteti yi diddeh ugute’ yarhxe Kutuub yakmalo kinni. 19Tayim akkekkah, Anu Kayya kiyom taamanoona ciloh tayim kado sinak arhxiyuk ane. 20Anu farinnan tiya kabbaatinnanti, yotta kabbaata, yotta kabbaatinnanti lel yotta fare tiya kabbaatam rummah, rummah sinak arhxiyuk ane” akko yerhxe.
Sinko wuliti yi yayrhabarho kinni
(Maatiyos 26:20-25; Markos 14:17-21; Luukas 22:21-23)
21Tayim yerhxemko sarrah, Yeesus ufayi adde yomroocodeh: “Rummah, rummah, sinko wuliti yi yasxaw kinam sinak arhxiyuk ane” yerhxeh yimmiskire. 22Katattaynit lel miyatti zacabah waanishak yanem sorheenih sinne-sinnedde kulux-yerhxin. 23Yeesus kixin kaa katattaynitko wuliti Yeesus agaagalle thawlalle cikkishiteh beetak yine. 24Amaymih, Simcoon Bithroos Yeesus miyatti sabbatah waanishak yanem kaa essero akah yiymikniye. 25Amaa Yeesus agaagalle cikkishiteh yine katattayni lel Yeesusuk: “Maddara, miyatto kinni?” akko yerhxe. 26Yeesus: “Anu tekerisheyaako ta folottah dhacto akah axawo liyo tiya kinni” yerhxeh alle yedebbe. Sarrah amaa dhacto tekerishek sarrah, Simcoon Iskariyoot barha kin Yahuudah yoxoye. 27Sarrah usuk amaa dhacto beetek sarrah Sheethan adde orobe. Yeesus lel: “Tamaa abto litom, afitteh ab” akko yerhxe. 28Kado, tayim aymih akko yerhxem amaa thawlalle cikkishiteh beetak yine maraako walaa inketti maarhago. 29Yahuuda maxfuda kaalih tinemhi sabbatah gari, Yeesus: “Cidih farhshishsham noh dham” akko arhxuk yinem, hido lel baaxentitih wulim yaxaw akah warishak yane yekkelin. 30Amaymih usuk amaa folottat dhacto kabbaatek sarrah akkanih irolle yewce. Bar lel kuuk yine.
Cusub amre
31Usuk irolle yewce gedda Yeesus: “Kado kinni Xiyawti Barhi yenebem, Yalli lel kayyadde yenebe. 32Yalli kayyadde yenebemko, Yalli gantah kayya ishedde yaynabo kinni. Akkanih lel kaa yaynabo kinni. 33Cindha cindhaamo, kaddih dago waqhteh sinlih aniyo. Yi goronishshoona kitin. Tamaa Yahuuduk akah erhxeekah lel kado: ‘Anu alle adiyuk anelle tamaatoona mirhictaana’ sinak arhxiyuk ane. 34Sittiya takxanoona cusub amre sinah axawuk aniyo. Anu akah sin ikxineekah, sitta ikxina atin gantah. 35Tayimko, sitta tikxiniinimko xiyaw inkoh yi katattaynit kitiinim yaarhagoona kinon” yerhxe.
Yeesus Bithroos xinnan yaakumeh
(Maatiyos 26:31-35; Markos 14:27-31; Luukas 22:31-34)
36Simcoon Bithroos: “Maddara, awlalle aduuk tanito?” akko yerhxe. Yeesus: “Anu alle adiyuk aniyolle, kado yi katayto mirhicta, sarrah laakin katayto kito” yerhxeh alle yedebbe. 37Bithroos: “Aymih kado ku kataw mirhiicam? Anu inni aniina kottah arhxuk tillaabisho kiyo” akko yerhxe. 38Yeesus: “Atu ishi aniina yottah arhxuk tillaabishsho kito? Atu adooxa gedda yi xintandah dor-hotti andhaxo makinam rummah, rummah, kok arhxiyuk ane.
Actualmente seleccionado:
Yohannis 13: SCC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2024 Wycliffe Ethiopia