Yohannis 1
1
Yeesus umman geedit Aniinah Waanitta kinni
1Erherhih Waanitta tine. Amaa Waanitta Yallaalih tine. Amaa Waanitta lel Yalla kuuk tine. 2Ishi erherhih Yallaalih tine. 3Ummannim lel tee araxah tekke. Umbuka tunkhulluqhemko lel tee araxah akkinnixemko walaa inkim adde mitane. 4Teyadde aniina tine, aniina lel xiyaw ifo kuuk tine. 5Ifi ditedde ifisha, dite lel kaa tiscireh mitane.
6Wuli Yalli farriime Yohannis akko yarhxin xiyawti yine. 7Ummanti kaa araxah yaamano ciloh lel shaahid yekkeyaako ifi zacabah yashhado yemeete. 8Usuk isheh ifo kuuk miyine, ifi zacabah yashhado laakin yemeete.
9Rummaahit ifi umman tiyah ifishaya lel caalamalle amiituk yine. 10Usuk caalamalle yine, caalam lel Kaa araxah tekke. Yakko kibah laakin caalam kaa maarhaginna. 11Usuk ishimille yemeete, kaa mari laakin kaa mikabbaatinnooni. 12Inkoh kaa kabbattem kee kaa migacah teemenemih laakin Yallih cindham yakkoona xaqqe akah yoxoye. 13Ta mari lel biilooko hido xazottat farhiiko hido labhatti farhiiko akkekkah Yallaako toobokem kinon.
14Waanitta xazotta tekkeh lel ni fanadde sigte. Yallaako inketta bisa kin Barha hi nabenta, nicma kee rummaako yemmeegeyahi nabne lel nubleh nane. 15Yohannis lel kaa zacabah yishhideyaako, taginah zeere: “Tatiya kinni tamaa anu, ‘Yi sarralle amiituk yaneti, yi basolle yinemhi sabbatah lel yottaako naba’ akko erhxeti”. 16Kaa migeeko lel nicma nicmat bukalle inkoh kabbatneh nane. 17Tayim lel, sercat Moosat araxah yomxoye, nicma kee rumma lel Yeesus Masiix araxah yemeetemhi zacabah kinni. 18Yalla yubleti inkinnah miyane; Inketta bisa isheh Yalla kinya, Abbat galedde yaneya, Yalli miyatto kinam yiyshidhdhige.
Yaythimmiqhe Yohannis shahaada
(Maatiyos 3:1-2; Markos 1:1-8; Luukas 3:1-8)
19Yahuud: “Miyatto kito?” yerhxiinih kaa esseroona sheekha kee Leewiiti xiyaw Yerusaalemko alle faren gedda, Yohannis shahaada tatiya kinni. 20Usuk yishhide, mixinooki yishhideh: “Anu Masiix makiyo”. 21Usun lel: “Miyatto kito haye? Eliyaas kito?” yerhxiinih kaa esseren. Usuk: “Makiyo” yerhxe. “Amaa yamaato-le Nabii kito?” Usuk lel: “Maale”. 22Amaydo: “Miyatto kito? Ni fare marah radde naxaw nolle tane. Atu ishi zacabah ayim tarhxe?” akko yerhxin. 23Usuk: “Anu zibolle zeerak yane tiyahi dhaw kiyo, nabii Isayas akah yerhxeekah: ‘Maddari arax rig-ishanta’” akko yerhxe.
24Kado lel Faarisiin faren mari, 25kaa esseren: “Atu Masiix makito, Eliyaas makito, Nabii makito hanuk aymih aythimmiqhuk tanito?” 26Yohannis radde akah yoxoye: “Anu layeh aythimmiqhe, sin fanadde laakin atin aarhige waytantii daw-yarhxeya yane. 27Yi sarralle yamiiteti anu kaa kabelhi ragad gantah akko aftaxo yoh eedinnixiyo tiya kinni.” 28Tayim lel amaa Yohannis alle aythimmiqhuk yine Beetcaniya akko yarhxin Yordaanos gadehi tabsolle tekkem kinni.
Ubula, Yallih Leema!
29Leddi max Yeesus kaa gabolle amiituk yubleyaako lel: “Ubula, caalamti zambe kala, Yallih Leema! 30Tati, tamaa anu: ‘Yi sarralle yamiite xiyawti yi basolle yinemhi zacabah yottaako naba’ akko erhxe tiya kinni. 31Anu inneh kaa maarhagiyo, laakin usuk Israa-eelih yamadhdhago ciloh anu layeh aythimmiqhuk emeete” yerhxe. 32Yohannis lel yishhide: “Ufayi carsheeko xamaamatto balih alle oobeh kayyak asak uble. 33Anu inneh kaa maarhagiyo, layeh aythammaqho yi fareti laakin: ‘Tamaa Ufayi oobeyaako akko aseh tableti, tatiya kinni amaa Quddus kin Ufayeh yaythimmiqheti’ yok yerhxe. 34Anu lel kaa uble. Yallih Barha kinamah lel ashhide.”
Yeesus afti katattaynit doora
35Leddi max gantah Yohannis ishi lamma katattaynaalih daw-arhxuk, 36Yeesusudde kulux-yerhxeyaako tillaabak kaa yubleh: “Ubula, Yallih Leema!” yerhxe. 37Lamma katattayni tayim arhxuk kaa yoobbiinih Yeesusudde katayen. 38Yeesus ufkun-yerhxih kayyadde kataa ten yuble gedda: “Ayim farhak taniini?” akko yerhxe. Usun lel, “‘Rabbi!’ (Mudarris, yarhxiinim kinni), awla sigteh tanito?” akko yerhxin. 39Usuk: “Amowa, tabloona kinnik” akko yerhxe. Usun lel yemeetiinih usuk alle yemseefereh yinekke yublin. Amaa gedda kasit saaca afar kuuk tinemhi sabbatah lel amaa lellec kaalih asen. 40Amaa lammaako wuliti, Yohannis waanishak yoobbeh Yeesus katattayeti lel Indiryaas, Simcoon Bithroos sacal kuuk yine. 41Erherhih ishi sacal Simcoon geyeyaako: “Nanu Masiix geyne” (Kiristoos yarhxiinim kinni) akko yerhxe. 42Yeesus fanah kaa baahe. Yeesus lel kulux adde yerhxeyaako: “Amaydo atu Simcoon Yohannis barha kito. Ku migac Keefa (Bithroos yarhxiinim kinni) yakko kinni” akko yerhxe.
Yeesus Filibboos kee Natnaa-eelih deecima
43Leddi max Yeesus Galiila yadaw abayshe. Filibboos geyeyaako lel: “Yi katattaa” akko yerhxe. 44Kado, Filibboos, Indiryaas kee Bithroos daafo kin Beet-saydaako kuuk yine. 45Filibboos Natnaa-eel kaa geyeyaako: “Tamaa Moosat sercatadde amayim balih Nobowa kaa zacabah akko yuktubin Yoosuf barha kin Naazret Yeesus, kaa geyne” akko yerhxe. 46Natnaa-eel: “Naazretko mecem akko tawco dhicta?” akko yerhxe. Filibboos lel: “Amowaaki ubul” akko yerhxe. 47Yeesus lel Natnaa-eel kaa gabolle amiituk yubleyaako kaa zacabah: “Ubula, doolab adde anniinnixe rummaahit Israa-eelto!” 48Natnaa-eel lel: “Aaginah yi teerhege?” akko yerhxe. Yeesus lel: “Filibboos kottaalih abekkah, amaa indacartot rigidille anituk ku uble” yerhxeh alle yedebbe. 49Natnaa-eel: “Mudarris, atu Yallih Barha kito, atu Israa-eel Nugus kito!” yerhxeh alle yedebbe. 50Yeesus: “‘Indacartot rigidille ku uble’ kok erhxemhi sabbatah taamine? Tayimko nabam tablo kito” yerhxeh alle yedebbe. 51“Carshi fakkiteyaako Yallih malaykut Xiyawti Barhalle oobak kee korak tabloona kitiinim, rummah rummah sinak arhxiyuk ane” lel akko yerhxe.
Actualmente seleccionado:
Yohannis 1: SCC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2024 Wycliffe Ethiopia