الإنجيل زي ما كتبه مَتَّى 5
5
مقدمة للموعظة على الجبل
1و لما شاف ناس واجد، ركب فوق الجبل. وبس قعد، جو له تلاميده. 2و قام يسولف وياهم و قام يعلمهم.
البركات
قال: 3" هنيئا لـ الفقراء بالروح، لأن ليهم ملكوت السماوات. 4هنيئا لـ الحزينين، لأنهم بيتعزوا. 5هنيئا لـ المتواضعين، لأنهم بيورثوا الأرض. 6هنيئا لـ الجوعانين والعطشانين للبر، لأنهم بيشبعوا. 7هنيئا لـ الرحيمين، لأنهم بينرحموا. 8هنيئا للي قلوبهم طاهره، لأنهم بيشوفوا الله. 9هنيئا للساعيين للسلام، لأنهم بينقال عنهم أولاد الله. 10هنيئا لـ المضطهدين عشان الحق، لأن ليهم ملكوت السماوات. 11هنيئا ليكم لما يذلوكم الناس ويضطهدوكم، و يتكلموا عنكم بالشر بسببي و هم چدابين. 12أفرحوا وهللوا، لأن مكافئتكم في السما عظيمة. لأنهم بعد أضطهدوا الأنبياء قبلكم!
ملح الأرض ونور العالم
13أنتون ملح الأرض إدا أخترب الملح كيف ترجع له ملوحته؟ فهو چدي يصير ما يصلح لشيء إلا أنه ينرمى برا وينداس!
14أنتون نور العالم. ما تقدر تخبي مدينة مبنية على جبل 15ولا الناس يقوموا يشبوا فانوس و بعدين يخشوه تحت الطاوله، لكن لازم يحطوه في مكان عالي عشان يضوي لكل الناس في البيت. 16وبچدي لازم نوركم يضوي قدام الناس، عشان يشوفوا أعمالكم الخير ويمجدوا أبوكم إلا في السماوات.
تحقيق وتكميل الشريعة
17لا تفكروا إني جيت عشان الغي الشريعة أو رسالة الأنبياء. أنا ما جيت عشان الغي شي، لكن جيت عشان أكمل كل شي. 18بأمانة أقول ليكم: لحد ما السما و الأرض يزولوا، ما بيزول حرف واحد أو نقطة وحدة من الشريعة، لين يتم كل شي أنكتب فيه. 19أي واحد يخالف وحدة من هالوصايا الصغيرة، ويعلم الناس أنهم يسووا زيه، بيتسمى الأصغر في ملكوت السماوات. و ألا يتبع الوصايا و يعلمها الناس، بيتسمى عظيم في ملكوت السماوت. 20أنا أقول ليكم: إدا ما زاد صلاحكم على صلاح الكتبة و الفريسيين (القادة المتعصبين)، ما بتدخلوا أبد ملكوت السماوات.
القتل
21سمعتوا إنه أنقال في شريعة موسى للأوليين : لا تقتل! و ألا يقتل يستاهل المحاكمة. 22أما أنا أقول ليكم: كل من يعصب على أخوه يستاهل المحاكمة، و ألا يقول لأخوه: يا تافه! يستاهل أن يوقف قدام المجلس الأعلى؛ و ألا يقول: يا غبي! يستاهل نار جهنم! 23إدا جيت بخروف أضحيتك إلى المدبح، وتدكرت هناك إن عليك لأخوك شي، 24أترك خروف أضحيتك قدام المدبح، وروح أول شي وصالح أخوك، و بعدين أرجع وقدم أضحيتك. 25أسرع في أنك تراضي خصمك وأنت وياه في الطريق إلى المحكمة، قبل ما يسلمك الخصم إلى القاضي، بعدها بيسلمك القاضي إلى الشرطي، وبتنرمى في السجن. 26وبأمانة أقول لك إنك ما بتطلع من السجن إلين ترجع الفلس الأخير!
الزنا
27وسمعتوا إنه أنقال: لا تزني! 28أما أنا فأقول ليكم: كل من يطالع في مره و يشتهيها، فكأنما هو زنى بها في قلبه! 29و إدا كانت عيونك اليمين بتخليك ترتكب الخطية، أقلعها وأرميها بعيد عنك، أحسن لك تخسر عضو من جسمك ولا ينرمى جسمك كله في نار جهنم! 30و إدا كانت إيدك اليمين بتخليك ترتكب الخطية، أقطعها وأرميها بعيد عنك، أحسن لك تخسر عضو من جسمك ولا ينرمى جسمك كله في نار جهنم!
الطلاق
31و قالوا بعد: إلا يطلّق مرته، لازم يعطيها ورقة الطلاق. 32لكن أنا أقول ليكم: كل من طلق مرته لسبب غير الزنا، فهو يجبرها على فعل الزنا. و ألا يتزوج بمطلقة، فهو زاني.
الحلف
33وسمعتوا أنه أنقال للأوليين: لا تخالف حلفتك، و أوفي ندورك للرب. 34لكن أنا أقول ليكم: لا تحلفوا أبد، لا بالسما لأنها عرش الله، 35ولا بالأرض لأنها مداس رجوله، ولا بأورشليم لأنها مدينة الملك العظيم. 36ولا تحلف براسك لأنك ما تقدر أن تخلي فيه شعرة بيضة أو سودة 37و لكن خل يكون كلامكم: أي نعم، إدا أي؛ أو: لا، إدا كان لا. والكلام الزايد من الشرير.
عين بعين
38وسمعتوا أن أنقال: العين بالعين والسن بالسن. 39لكن أنا أقول ليكم: لا تقاوموا الشر بشر زيه، لكن من عطاك كف على خدك اليمين، أعطيه الخد الثاني؛ 40و ألا يمبى يوديك المحكمة عشان ياخد ثوبك، أترك له رداك بعد؛ 41و ألا يجبرك تمشي وياه كيلومتر، أمشي وياه كيلومترين. 42و ألا يطلب منك شي، أعطيه. و ألا يتسلف منك، لا ترده خايب!
محبة الأعداء
43وسمعتوا إنه أنقال: حب جارك وأبغض عدوك. 44لكن أنا أقول ليكم: حبوا أعدائكم، و باركوا ألا يلعنوكم، و صلوا للي يضطهدوكم و يأدوكم، 45فتصيروا أولاد أبوكم إلا في السماوات: لأنه يشرق بشمسه على الشرانيين والأبرار، و يمطر على الصالحين و الطالحين. 46و إدا حبيتوا إلا يحبوكم، فويش جزاكم على هالشي؟ مو حتى إلا يشتغلوا في الضرايب يسووا هالشي! 47و إدا رحبتوا بس بأخوتكم، فويش سويتوا زيادة على المعتاد؟ مو حتى الوثيين يسووا هالشي؟ 48صيروا أنتون الكاملين، زي ما أبوكم السماوي كامل!
Actualmente seleccionado:
الإنجيل زي ما كتبه مَتَّى 5: QNAV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Qatifi New Arabic Version © 2024 Strategic Resource Group