Markosi Phrinzangpo 1
1
1Ashipi Rshras Yeshu Masihi phrinzangi ryaḵẖsao. 2Esayah nang khyenkhanuni shoqbiang zbriskhanpo na zomse : Ltosang, ngares yeranga lam chhetaq bakhan ngi khamskad tangkhanpo yeri dunla tanged. 3Thang stongeang kus tabkhani skadpo in : Ashipi lampo chhetaq bashik, khoe lamun trangmo base rchoshik!
4Yoannas thangstongeang Baptisma (zerkhan chhuxrshkyal) tangen yang nyespauni skyonzod bachukchi gyodluksi chhurshkyal gochukgen skyods. 5Yang Yudaya-i yul gangma nang Yerushalempaun ? huri der bingen yongs, yang khongi nyespaun sal phese zeren Yordan zerkhan ltsangspoeang khores Chhurshkyal tsoqa tangs. 6Yang Yoannas rslmgabongi bali gonchas gone yodpin, yang phaqspi skyeraqs rangi skyedpaola chingse yodpin, yang tsatipalun nang ri-i zbrangrtsi zen yodpin. 7Yang khos gochugen zes : Nga basang ngadchan yodkhanpo ngi rgyrabla skyoded, nga zgusena rangi kili rshtingmi brangmao krolcha nga byormoek men. 8Chhadkhika ngares khyentanga chhui Baptisma na tangs amma, khores khyentanga Rtsangma Semszangi Baptisma salcha in.
9Yang de Jaquniangnuk ḏinḏek song; Yeshu Galilayasi Nazarethiangna skyods, yang Yoannasis Khoa Yordaniangnuk Baptisma tangs. 10Yang kho chhuikana khrile phyista-a skyodpachikna, khoa rshnampo twar nyisika shaqse ben thong, yang Semspo qondil natsoḵẖs khoeka babsen thong. 11Yang rshnamuniangna skad chikchik bings Khyerang Ngi rchespa buthsao in, Nga khyeriang thade yod.
12Yang dyana thooka Semspos kho strule phyista-a thangstongeangnuk chhachuged. 13Yang kho thangstongeangnuk Jaqma jibchu thsaqpa Satanosi thikshadiang lus, yang kho thangstongi byolthsongsun nanyambo Juks; yang Ashipi tangskhanunis khoe jabsthoq ben duks.
14Ni, Yoannas zunchukse Jukna Yeshu Ashipi Rgyastridi Phrinzangpo gochugen Galilayasiang skyods. 15Yang molen duspo gangrgya songsod yang Ashipi Rgyastridpo nyemor yongsed, gyodshik, yang phrinzangpeka chheshik.
16Ni, Galilayasi rgyamthsozuris skyodtsana khoa Simonis nang Simoni phono Andreasis rgyamthsoeang chhopo nyadolchik khorpeka phangen ziks, chiazerbana khong nyapa inmin. 17Yang Yeshus khonga mols: Ngi rjesla lza-a yongshik yang ngas khyentang miuni nyapa ldanchuktuk. 18Yang khong dyana bangs khurika rangi nyadolun phangse khoe lza-a song. 19Yang rdzashik etsarek skyodena khoa Zebedayaspi Yaqobos nang khoe phono Yoannes ziks, yang khong nayoeka dukse nyadolun zbranen yodpin. 20Yang dyana tho khurika Khos khonga yongshik mols; yang khong rangi ata Zebedayos nayoeka hlapa nanyambo phangse Khoe lza-a song.
21Yang khong Kapernahumiang skyoded, yang dyana bangs khurika Sabbati Jaqa (Dalmo be Jaqa) Sunagogeang (Sharbadusi malsa) Jukse khos ltsabs. 22Yang khong Khoe ltsabchaola rgyal, chiazerbana khongunla khonti chhos zbrikhanun natsoḵẖs men dobasang bashan yodkhan natsoḵẖsben ltsabkhan inmin.
23Yang dyana tho khurika khonti sunagogeang nganpa sems Jukse yodkhan mik yodpin. Yang khos kus tabse: 24Dyu zeren yodpin: Kasa Le, Nazarethpa Yeshu, ngacha na yerang nadrese chi ? Yerang ngacha shik a skyodse ina ? Yerang su in zerchao nga-a rshtaḵẖspa yod : Yerang Ashipi Rtsangmao in!
25Yang Yeshus khoa ziksen mols : Thek song wa! Yang khoeangna bingse yong! 26Yang nganpa semspo khoa ljud chikchik tangse yang thonmo skadika kus taben khoeangna bingse yongs. 27Yang jung dyatsek rgyale khontang chikchiga dyu zeren thabs : Dyu chi in ? Di ltsabjoqspo soma insuk! Khos nganpa semsunla bashan nadrese moled yang khongis khoe tamnyanpo bed. 28Ni dyana tho khurika kho mingchan songse Galilayasi de Khridkhori yulun Jungeang khyede ngons.
29Yang sunagogeangna bingse skyodpi tho khurika Yakobos nang Yoannes nanyambo Simoni nang Andreasi khangmeang juks. 30Yang Simoni ama zgyukmo thsadnadiang phoqse yodpin; yang dyana tho khurika de rshmangeang khoa spera bas. 31Yang Kho shitia skyode khoe laqpaola thamse kho ltsangs. Yang thsadnadpo khoeangna dyana bangs khurika bings, yang khos khongi jabsthoq bas. 32Ni rgongsika nyima rgasena khongunis nadpaun Jung nang drebyarun saq Khoe shitia khyongs. 33Yang rgyalsa gangma duse zgoeka dukso yodpin. 34Yang khos nadriks michikpi naduniang phoqse yodkhan mangmo noro chhachuks; yang dre mangmo phingse tangs, yang dreunla tam zermachuks chiazerbana khongunla kho ngozin yodpin.
35Yang mana motuk thsan yodtsana, kho Jangsena thangstong malsa chiga skyods, yang deka kho laqpa zunen yodpin. 36Ni, Simon nang khoe phropaun khoe kangrjesika khoe rgyabpoa song. 37Yang kho thobana khongis khoa Jus: Cna, Jungis yerang tsalen yod. 38Yang khos khonga mols: Khridskorla yodkhan grong katoeang-ang nga phrinzang hagochukpa dongshik, chiazerbana nga di phya bingskhan in. 39Yang kho khonguni sunagoguniang Galilayasi thsangmeang skyode Phrinzang hagochugen yang dreun phingen Juks.
40Yang rdzenjan chik khoe shitia yonged, Ju namzi ben yang khoe dunla phuksmoun thsukse yang khoa dyu Juin : Kasa Ju, taqdir yerang ran narek yeranga nga rtsangma rtsangdaq ba nyaned. 41Ni, Yeshua khoeka zdikpa thsore laqpa rshkyangse khoa laqpa na tus bas yang khoa moled: Nga raned, khyerang rtsangma rtsangdaq songshik! 42Yang khos dyu molena dyana bangs khurika khoe rdzeo bings, yang kho rtsangma rtsangdaq songsuk. 43Yang khos khoa song mole thsathsa base dyana tho khurika kho tanged. 44Dyu khoa moled : Nyonang, sua chang mazer, dobasang, song, rangi rgo kohenla ston, yang rang rdze daqskhani luksiang khonguni phya chhebjiji chha Moshes skalskhanun nazomse tong. 45Amma, kho phyista-a songse di sperao khyedchukpa ryaḵẖs yang di laspo dyatesk ngone Jukspa manyan, dobasang phyista-a thangstonuniang Juks. Yang khong ngos saqikana khoe shitia yongedpin.
Actualmente seleccionado:
Markosi Phrinzangpo 1: SOMA
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Société Biblique de Genève