Matyo 8
8
Jesu nen wo tɨ yo
Mrk 1.40-44; Luk 5.12-14
1Gorne Jesu jir tɨ nan sul gɨna, bi dɨbla si tɨ ər lɔ. 2Wo tɨ yo hina tɨ ər ndɔ, ər ha̰w ər ɗa̰y tɨ ər kwi la ər ja gɨ ər ɓə: «Baali, jo əm hul taam gɨna ən ndula ɓə ndeeri.» 3Jesu wur daa do ər la ja gɨ ər ɓə: «M, ən taam, ka əm ndula ndeeri!» Tɨ daamu yo nɨm ər. 4La Jesu ja gɨ ər cam: «Ka gɨ wo jak in wa̰y ne lɔ jul lo, lɛ əm si əm ɓla əm ndula gɨ wo tɨ hima ɓina la, əm naa əm wa̰y tɨ daa sul ne Moys naa gṵ tɨ kar nɨ ka bi gun jaa ja tuna əm ndula ndeeri sul.»
Jesu nen əli ɗəng na wo tɨ cida
Luk 7.1-10; Ja̰ 4.43-54
5Gorne Jesu wur tɨ Kapɛrnom gɨna, eli ɗəng ɓudu, ne tɨ wo tɨ Rom, ər kori tɨ ər ndɔ ər ka gɨ ər kɔgri ka ər yar ər. 6Ər ja gɨ ər ɓə: «Baali, ən wo tɨ cida tɨ mo̰y, ər ley wo tɨ gə̰y. Ər ndula uy la pɛw ər nari la.» 7Jesu duga gɨ ər: «Ən ɓə saal ər nina.» 8Gɨna eli ɗəng duga gɨ ər ɓə: «Baali, ən jaal hul ndini ne yim ɓə wur tɨ nin lo lɛ əm ja jaa ji ɓudu ngoy gɨna, ən wo tɨ cida kar ɓə nina tina. 9Kəysul yin na bi nii tɨ ən sul la ən na əli tɨ ən lɔ la. Gorne ən ja gɨ wo ɓudu tɨ a daan “əm si gɨna”, ər si, la gorne ən ja gɨ paa jak “hina”, gɨna ər hina la, gorne ən ja gɨ ən wo tɨ cida: “Ka wa̰y ne”, gɨna ər ka la.» 10Gorne Jesu laa jaa ne wag tɨ ɓər ne mu gɨna, ɓɔr ər ji la ər ja gɨ bi ne si tɨ ər lɔ ɓə: «Kuri ən ja gɨ i tɨ bayri, ən ten hul kula kuna ne tɨ wo ɓudu in ndɔ lo. Tɨ bi tɨ Israhel daan kaw ən ten hul kula ɗəng kuna paa ne lo. 11Ən ja gɨ i ɓə bi ɓə o̰ tɨ lula lɔ tɨ wag la, lula lɔ tɨ tɨba la, a ɓə tɨm tɨ tudi mu na Abraham la, Isak la, Jakob la tɨ Ndɨla waan hul. 12Lɛ Juyb tapeer dɨbla ton ilgɨ ɓə ya̰ ɓə wur tɨ Ndɨla waan kəysul ya̰ tɨ Ndɨla na ɓimi, Ndɨla ɓə i kun tɨ bayri tɨ un ɗoyri. Tɨ un ne bi ɓə cḛy la, a ɓə a ɗəngni lɔ tudi ngɛr-ngɛr tɨ nin.» 13La Jesu ja gɨ əli ɗəng ɓə: «Duga tɨ əm gə̰y, ka Ndɨla ka gɨ əm wa̰y ne əm ɓiri na əm hul kula!» Tɨ daamu ər wo tɨ cida nen.
Jesu nen bi dɨbla
Mrk 1.29-34; Luk 4.38-41
14Jesu si tɨ Piyɛr maan. Ər ləg Piyɛr na mo̰ tɨ mo̰y. Ər ndula sila nari. 15Ər do ər na daa la, tɨ daamu ər ndula sila nɨm ər la, ər o̰ ndal ər ka gɨ ər cida.
16Na jeel, a hina na bi tɨ lal ɓijim dɨbla tɨ Jesu ndɔ. Ər kun lal ɓijim na jaa ne wag tɨ ər mu, la ər nen bi tɨ mo̰y gun la. 17Wa̰y ne ka paa ka jaa ne nebi Esay ja ɓə: «Ər so ī pɛw la ər yəg ī mo̰y gun tɨ ər sul la» ti kuri.
Ul sula tɨ Jesu lɔ
Luk 9.57-62
18Gorne Jesu ləg bi dɨbla ne yeri ər sul gɨna, ər naa ər gṵ gɨ ər bi tɨ wa̰y edɨ ka a ɗen na ər tɨ ɗaglə ɗəng tapaa. 19Wo tɨ gṵ hul ɓla paa kori tɨ ər ndɔ la ja gɨ ər ɓə: «Wo tɨ wo wa̰y ɓla, ən taam ul sula tɨ əm lɔ na un gun.» 20Jesu duga gɨ ər: «Ngrəngɨ-a na tori la, ɗḭ tɨ ndɨlasul na ləgɨ la, lɛ Yin, Wo Ɓa̰ ən na un tɨ sul wur tɨ nin lo.» 21Ər wo tɨ wa̰y edɨ paa tɨ peer daan ja gɨ ər: «Baali, naa gɨ ən ul mu ka ən si ən bili ən ba bari.» 22Lɛ Jesu duga gɨ ər: «Hina tɨ ən lɔ, nɨm bi ton ka ndɔ bi tɨ ulu ka a bili a ulu.»
Saaw təw na ɗigli
Mrk 4.35-41; Luk 8.22-25
23Jesu ɗɔl tɨ kwa̰r ɗəng hul la ər bi tɨ wa̰y edɨ ɗol tɨ ər lɔ. 24Gɨna, saaw ɗəng tɨba tɨ larɨm ɓɔ hul la ndu diri təgɨm tɨ kwa̰r ɗəng hul. Lɛ Jesu ley lom. 25Jesu na bi tɨ wa̰y edɨ kori tɨ ər ndɔ a jar ər na jaa tɨ a mu ɓə: «Baali nen i! Yini wo ulu!» 26Jesu duga gɨ a: «Kəyjaa jo ayri ka i kuna paa ne a? I ko Ndɨla hul lo a?» Gɨna ər o̰ ndal la ər meer saaw la ɗaglə ɗəng la, gɨna un ɗigli ɗruu. 27Ɓɔr bi gun ji la a ja ɓə: «Kəy wo jo kuna paa ne, ta saaw la ɗaglə ɗəng kaw a wur a sul tɨ ər lɔ!»
Jesu nen bi tɨ ndidi ne Sidan par a
Mrk 5.1-20; Luk 8.26-39
28Jesu an tɨ ɗaglə ɗəng tapaa tɨ lɔr nəgri tɨ Gadara, gorne ər an gɨna, bi tɨ ndidi ne lal ɓijim par a wag tɨ ngəlɨm sul a tung ər kwi. Wo lɛm ɗira na ul ne lo kəysul ya̰ tɨ bi ne a ka bi ayri nari. 29A ɗolɔ tɨ ngɔr kar: «Kəyjo əm taam tɨ i ndɔ, Ndɨla na ɓa̰. Pay əm hina le i pɛw kar toni tɨ ɗa̰y ne Ndɨla kay kwi a?»
30Ɓag ɓa̰ ndḛ tɨ a taal, kosong kur dɨbla lor wo wa̰y tudi. 31Jins-a ka gɨ Jesu kɔgri, a ja gɨ ər ɓə: «Jo əm taam i kun gɨna, toon i tɨ kosong kur hul.» 32Ər ja gɨ a: «I si!» A wag a wur tɨ kosong-a hul. La kosong gun o̰ tɨ nan ɗa̰y a jir na yaal a bɛgɨ tɨ ndu la a uy ɗad-ɗad. 33Bi tɨ kosong ɓaw yerɨm na ayri a si na tomni tɨ lɔr nii hul. A ja gɨ bi wa̰y ne ka paa tuna bi tɨ ndidi ton lal ɓijim par a. 34Bi tɨ lɔr hul gun wag, a tung Jesu kwi, gorne a ləg ər gɨna, a ka gɨ ər kɔgri ka ər nɨm a lɔr nəgri sul#8.34 A ka ayri kəysul Jesu na mum tɨ kar ɓɔrji. Nejo a ilgɨ ɓə jo Jesu ti tɨ a lɔr nəgri ka ɗa̰y cam gɨna, a mum tɨ tina gun ɓə yunga kuna a kosong kur la..
Actualmente seleccionado:
Matyo 8: nie
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, ATALTRAB