मत्ती 14
14
युहन्ना बप्तीस्की गो दुम्ब १-१२
1हुगी यङ्ल पो़न् हेरोद्गी इक् येशुगी ढीक्की केच्च्य घयेत् ॱह घोव बेत्। 2हुनी हुगी रोरङ्गी खोयोक्प घयेत् दील हुगी मी हुगो युहन्ना बप्तीस् ॱस्यीन खुर दी यङ् ॱसोम्बुल लोङ हीङ्गो़प्पेत्। हुगो झ्यीनी हुगी ॱस्यीक् छ्यीम्मी़ ले घयेत् झ्यीक्केन् हीङ्गो़प्पेत् झ्यीब बेत्। 3-4हेरोद्गी म दी रोरङ्गी पी़न् फीलीप्की नङ्जङ् हेरोदीयस् दी ठोन ॱनमल ठीक्प हीङ्गो़प्प बेत्। हुगो झ्यीनी युहन्नागी हेरोद्ल हुन्दुक् झ्यीन रङ्गी पी़ङ्गी नङ्जङ् ॱनमल ठीक्च्ये मीत् युङ्गेन् बेत् सीन्न झ्यीबल, हेरोद्गी युहन्ना सुङ्न कीङ्न चो़ल्ल ॱलुक् तङ हीङ्गो़प्प बेत्। 5झ्युङ्न, म दी हेरोद्गी युहन्ना ॱसो़च्च्ये ॱनो़ब झ्यीब बेत्। ॱनी मी घयेत्ल ज्यीब बेत्। घन्ड हीन् सीन्न मी घयेक्की युहन्ना कलुङ् ॱस्यो़क्केन् च्यीक् बेत् सीन्न ॱसम्गो़प्प बेत्।
6तीङ्ला हेरोद् कीये कीजी़गी ङीन् दी ॱलीत्नी, हुगी ङीन् दी ॱसम्बे यङ्ल हुदु हेरोद्गी भो़बे डोम्बु घयेत् दीबे दोङ्दु हेरोदीयस्की भुमु दी युङ्न स्यप्र फक्न टेप्प बेत्। ॱनी हुल हेरोद् म दीरङ् गन्दीक्म गुव बेत्। 7हुनी भुमु दील रङ्गी घङ् ॱनङ् सीर ङे रङ्ल टेत् योङ् सीन्न ॱमीत् टो़त् रीगी ॱन झ्यीब बेत्। 8ॱनी हुगी भुमु दील रोरङ्गी आम दीगी युहन्ना बप्तीस्की गो दी हुन्दो थारल ॱलुक्न ॱनङ् झ्यीज्यीत् सीक्केङ्गी ढो़ टेत्नी, हुनी भुमु दीगी हुगोरङ् लीम्ब बेत्। 9ॱनी हील हेरोद् घङ् झ्यीबे च्यीरक् झ्युङ बेत्। ॱनी हीन्न अक्, डोम्बु घयेत् दीगी दोङ्दु ॱमीत् टो़त् रीगी ॱन झ्यीनी, टो़त् गो़ ॱस्यर बेत्। 10हुनी हेरोद्गी ॱमक्मी च्यीक्ल युहन्नागी गो दी दुम्न खुर्लेत् सीन्न क टेत्न तङ बेत्। हुनी हुगी ॱमक्मी दी चो़ङ्गङ्ल फीन्न युहन्नागी गो दी दुम्ब बेत्। 11दुम्नी गो दी थारल ॱलुक्न खुर्न युङ्न हुनी हुगी भुमु दील टेप्प बेत्। ॱनी भुमु दीगी यङ् रोरङ्गी आम दील खुर्न टेप्प बेत्।
12हुनी युहन्नागी ॱलोप्टुक् दीब युङ्न हुबे खोङ्गी कुबुर् दी खुर्न रो बेक्सल ॱलुक्न स्यक्प बेत्। हुनी हुब फीन्न हीगी केच्च्य हीगो येशुल ॱस्येत्न टेप्प बेत्।
मी तोङ्डक् ॱङल सम टेप्प १३-२१
13ॱनी हीगी केच्च्य हीगो येशुगी घोनी खोङ् ढुल स्युन ॱयोङ्ल मी मीस्से ॱसने च्यीक्ल फीम्ब बेत्। हुनी खोङ् ढुल स्युन डोव दी मी घयेत् दीगी ॱह घोनी सार् ख ख ॱसोस्सोनी मी गज्येन् खोङ्गी तीङ्ल तीङ् दीत्न छो़ छीगनी छुल्ल कङ्दङ् कोर्न युङ बेत्। 14ॱनी येशुसो पारीगी हुगी ॱसने दील ॱलीत्न ढु दीनी छ्यील थो़न्न फीन्नी, उन मी छेत्मीत् ॱलीत्न यो़प्प ठेप्प बेत्। ॱनी खोङ् हुब घयेत्ल ॱङीङ् छन उन घङ् यो़प्पे नेप्प घयेत् दी ढक्तु ची़प्प बेत्।
15ॱनी गोङ्ज्यो दी ॱलोप्टुक् दीब खोङ्गी लोल फीन्न हीन्दुक् झ्यीब बेत्। ह ङीम गज्येन् यो़सोङ्। हीगो मी मीस्से ॱसने बेत्। हीगी मी घयेत् हीब रोरङ्सोल गो़बे सम नो़न सदु युगङ् घयेत्ल तोङ्रो झ्यी सीन्न झ्यीब बेत्। 16हीगी लेल्ल खोङ्गी हीब घयेत् डो मीत् गो़ब, हीब घयेत्ल गो़बे सम खीत्रङ्गी टो़त् सीन्न ॱसुङ बेत्। 17ॱलोप्टुक् दीबे खोङ्ल हीन ङीत्ल ढोप्ची ॱङ धङ् न ॱङीरङ् यो़त् झ्यीब बेत्। 18हील येशुगी हुगो ङे लक्ल खुर्लेत् सीन्न लीन्नी 19खोङ्गी हुगी मी घयेत् दी पङ्जे थोक्ल दो़त् झ्यी सीक्केङ्गी खक्को़ ज्यब बेत्। हुनी खोङ्गी ढोप्ची ॱङबु दी धङ् न ॱङीबु दी छ्यक्ल ॱनम्न इगी तेङ् यी़ ङो़ल तेन को़न्ज्योक्ल थु छ्यी पुब बेत्। हुनी ढोप्ची दी च्यक्न मी घयेत् दील गो़न टो़त्लेत् सीन्न ॱलोप्टुक् दीबे लक्ल टेप्प बेत्। हुनी ॱलोप्टुक् दीबे मी घयेत् दील टेप्प बेत्। 20ॱनी मी कुरीक्की हुगो ढोप्प डङ् डङ् सेब बेत्। ॱनी स ॱमत् छुबे ॱल्हक्टो़ फरक् फीरुक् घयेत् दी ॱलोप्टुक् दीबे डुनी, हुगो डालो च्युन्नी घेङ बेत्। 21तोम्दु उन सगेन् घयेत् दी भुमु धङ् भीजल ॱमत् चीये, छ्योगो घयेत् दीरङ् तोङ्डक् ॱङजो़त् च्यीक्की ची यो़प्प बेत्।
येशु छो़ थोक्ल छ्यम्ब २२-३३
22हुनी ॱलोप्टुक् दीब येशुगी ढुल ॱलुक्न फल्ल ॱलोक्न तङ बेत्। ॱनी खोङ् रोरङ् हुदुरङ् देत्न हुगी मी घयेत् दी पीद तङ्नी 23हुनी खोङ् रोरङ्रङ् च्यीक्पु लदोक् च्यीक्ल ॱसुव तोप्तु झ्यो़म्ब बेत्। ॱनी नम् ॱरो़नी इक्, येशु हुदुरङ् च्यीगी च्यीक्पु स्युब बेत्। 24ॱनी ॱलोप्टुक् दीब ढु ज्यप्न धोबा च्यीक् थुक् ॱसोङ् छर हीङ्गो़प्प बेत्। ॱनी हुगी यङ्ल छो़ थोक्नी छुल्ल ॱलुङ्बु ज्यप्न युङ्नी, छो दी भङ्ज्यीत् ॱलोङ्ज्यीत् झ्यीन युङ्नी ढु ज्यप्न डोवल घासी झ्युङ बेत्।
25ॱनी छेङ्गी घुङ् यो़जो़त्ल येशु ढु दी झ्यीस्सल छो़ थोक्नी छुल्ल कङ्दङ् झ्यो़म्ब बेत्। 26ॱनी ॱलोप्टुक् दीबे खोङ् छो़ थोक्नी छुल्ल झ्यो़म्ब थोङ्नी, टक्प सेत्न ॱल्हेन्डी बेत् सीन्न ज्यीबे ओ़लोक् ॱस्योर बेत्। 27ॱनी खोङ्गी ॱस्यरी हुबल ज्यीक्टक् मत् झ्यीत्। ङ हीन्। ॱलो दीरी झ्यी झ्यीब बेत्। 28हील पत्रुस्की नीज्यरङ् चोव ज्यीन्दक् हीन्न ॱनी, ङ छो़ थोक्नी फल्ल नीज्यरङ् च्येल्ल ॱस्योक् ॱसुङ्लेत् सीन्न स्यी़ब बेत्। 29ॱनी हील येशुगी ॱस्योक् ॱसुङ बेत्। हुनी पत्रुस् ढु दीनी थो़न्न छो़ थोक्नी फल्ल येशु च्येल्ल फीम्ब बेत्। 30ॱनी डोये यङ्ल पत्रुस्की ॱलुङ्बु ज्यक्पल तेनी हुनी ज्यीन भीङ्ज्येम ॱयेङ बेत्। हुनी केत् ज्यप्न चोव ज्यीन्दक् ज्योक्पु ङल छ्यीलेत् झ्यीब बेत्। 31हुनी येशुगी ढीम्बु लक्प तङ्न पत्रुस् सुङ्न खोङ्गी ॱवे छ्य गन्दीक्म मीत् स्योक्केङ्गी मी, खोक्की घन्डल मेन्डो ॱनो़ब ॱसम्गेन्।
32हुनी खोङ्जोसो ढु दील स्युनी, ॱलुङ्बु दी छ्यक्नर बेत्। 33ॱनी ढी़ नङ् दीदु ॱलोप्टुक् दीबे येशुल छ्यक् छेन नीज्यरङ् गन्दीय को़न्ज्योक्की ॱरेबु दीरङ् बेत् व झ्यीब बेत्।
नेप्प घयेत् ढक्प ३४-३६
34हुनी खोङ्जोसो़ ढु दी गनेसरेत्की ॱसनेल ॱलीब बेत्। 35ॱनी हुगी मी घयेत् दीगी येशु ङु ॱस्यीब बेत्। हुनी हुगी मी घयेत् दीगी घल अक् ख ख ॱसोस्सोल येशु उन यो़प्प हीम्बे ॱसा तङ बेत्। ॱनी हुदु ॱसोस्सोनी नेप्प घयेत् खोङ् च्याल ठीक्न युङ बेत्। 36ॱनी हुब घयेक्की खोङ्ल ङीत्ल नीज्यरङ्गी ली़गी छ्यी घो़गी थी़च्ची च्यीक्ल हीन्न अक्, रेक्तु ची़त्रो झ्यी सीन्न स्युव पुब बेत्। ॱनी खोङ्ल रेक्प घयेत् दी कुरीक् ढक्नर बेत्।
Actualmente seleccionado:
मत्ती 14: LHM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995 Wycliffe Bible Translators, Inc. and Nepal Bible Society