लुका 8
8
1हुनी येशु सार् धङ् युगङ् घयेत्ल गीर्न को़न्ज्योक्की ज्यागक्की केच्च्य ॱनेम्बु ॱस्येत्न टम्ब बेत्। खोङ्गी दल ॱलोप्टुक् च्युन्नीबु दी इक् यो़प्प बेत्। 2ॱनी भुमु यरीब अक् यो़प्प बेत्। हुब यरीबनी खोङ्गी ॱनो़प्प अयेक्प तो़न्न दीप्प हीङ्गो़प्प बेत्। यरीबल नज ढक्तु ची़प्प हीङ्गो़प्प बेत्। हुबे छीक्नी च्यीक् मरीयम् मग्दलीनी बेत्। हुगो च्येन्नी ॱनो़प्प अयेक्प दी़न् तो़न्न दीप्प हीङ्गो़प्प बेत्। 3ॱनी च्यीक् यङ् चुजागी नङ्जङ् योअन्न बेत्। चुजा हुगो हेरोद्गी होक्की पेम्बु छ्यीया च्यीक् हीङ्गो़प्प बेत्। ॱनी च्यीक् यङ् सुसन्ना हीङ्गो़प्प बेत्। हुनी ॱयोङ्म आक् यो़प्प बेत्। हुबे रोरङ्सो़ खर्च तो़न्न येशुसोल स्यप्च्यी़ पुगो़प्प बेत्।
ॱसो़न् ज्यबे ढीक्ल ॱलीङ्दम् च्यीक् ४-८
4येशु सार् सार्ल गीर्कील्ल फीन्नी, सार् ॱसोस्सोनी मी छेत्मीत् खोङ् च्येल्ल जोम्न युङ बेत्। मी घयेत् दील खोङ्गी हीन्दुक् सीन्न ॱलीङ्दम् च्यीक् ॱस्येप्प बेत्। 5-8ॱसो़न् तोप्तु ॱसो़म्म च्यीक् डोगेन् बेत्। ॱनी ॱसो़न् दी तोप्कील्ल फीन्नी, ॱसो़न् यरी लङ्गक्ल, यरी ॱस ओ़दोरोक्ल, यरी नेसोरोक्ल, यरी ॱस गा ॱसदीक्ल खीब बेत्। ॱनी लम्ल खीब दी कङ्लीप् दोलीप्ल तङ्न, ॱनम्गी झ्यज्युङ्म घयेक्की डुन से तङ बेत्। ॱनी ॱस ओ़दोरोक्ल खीब दी ॱस लेम्बेक् मीप्पल कीजो़त्ल कम्नर बेत्। ॱनी नेसोरोक्ल खीब दी चङ्गी दोङ्बी़ तुम्नी, हुगो ज्ये ॱमत् छुब बेत्। ॱनी ॱस गा ॱसदीक्ल खीब दी क हस्सो़त् कीन ज्येन युङ्नी, हुनी क ज्यगोर् युङ्गेन् बेत् सीन्न खोङ्गी हुगी मी घयेत् दील केत् छ्यीम्मुल खीत्रङ् ॱसी़ आम्ज्योक्की घोगुक्क हुगी हीगो नेन्ज्यीत् सीन्न ॱसुङ बेत्।
ॱसो़न् ज्यबे ॱलीङ्दम्गी धो़न् ९-१५
9हीनी ॱलोप्टुक् दीबे खोङ्ल हीगी ॱलीङ्दम् हीगी धो़न् दी घन्ड बेक्क? सीन्न ढीब बेत्। 10हीगी लेल्ल खोङ्गी हुबल को़न्ज्योक्की ज्यागक्की धो़ङ्गी ॱङीङ्बु घयेत् खीत्रङ्लरङ् तो़न्न ॱस्येप्पेन्। ॱनी ॱयोङ्म घयेत्ल हीगो ॱलीङ्दम्ल मेन्द, ॱमीत् ॱस्यो़क्केन् बेत्। हुगो हुबे तेन आक्, ॱमीत् थोङ्ज्येल धङ् नेन्न अक्, मीत् घोज्येगी ढीक्ल बेत्। 11ॱलीङ्दम्गी धो़न् दी हीगो बेत्। ॱसो़न् दी को़न्ज्योक्की केच्च्य बेत्। 12लम्ल खीबे धो़न् दी को़न्ज्योक्की केच्च्य दी गोम नेङ्गेन् बेत्। ॱनी दी़क्की चो युङ्न हुबे ॱसीम्ल तप्न यो़प्पे केच्च्य दी तो़न्न पुर् तोङ्गेन् बेत्। हुनी हुबे छ्य स्योक् ॱमीत् छुबल हुब ॱमीत् थर्केन् बेत्। 13ॱस ओ़दोरोक्ल ॱसो़न् खीबे धो़न् दी केच्च्य दी गोम ॱह घोवे यङ्ल हुल गेस लङ्न ॱसम्गेन् बेत्। हुनी धोबा च्यीक् थुक् हुबे छ्य स्योक्केन् बेत्। ॱनी छो़त्लीङ्गी दुक्प युङ्न ॱनी, हुबे चव ढादक् दी डम्ज्ये मीप्पल ॱएङ्गी लम् दीलरङ् लोक् डोगेन् बेत्। 14नेसोरोक्ल खीबे धो़न् दी केच्च्य नेम्ब दी त नेङ्गेन् बेत्। ॱनी हुब रोरङ्सो़ मीजीगी च्युगा धङ् नोर्की ॱवङ्ल धङ् गव कीप्पे ॱवङ्ल ॱस्योर्न, हुगी इप् दीगी तुम्नी, डेबु ॱमीम् ॱमीत् छुगेन् बेत्। 15ॱस गा ॱसदीक्ल खीबे धो़न् दी केच्च्य नेन्नी, हुबे ॱसीम् गङ्ज्येन् झ्यीनी ॱसीम्बे यीक्ल सुङ्न स्योक्केन् बेत्। हुबे धु च्यङ्न युङ्गेन् बेत्। हुनी डेबु छ्यागेन् बेत्।
बत्तीगी ॱलीङ्दम् च्यीक् १६-१८
16बत्ती पर्नी ॱनी, यङ् हुगो पलङ्गी होक्ल धङ् ॱनो़च्च्ये घबुक् ज्यप्न ॱसु दीगी स्योक्को़प्प बेक्कक् ॱनी? नङ्ल स्युक्केन् घयेत्ल मेङ्ग युङ्ज्ये यो़प्पल बत्ती केन स्योक्सल स्योक्केन् हीन्डो न ॱनी। 17हीगो डस्सी घङ् बेन स्यक्प घयेत् थोङ्सल ॱमीत् तो़ङ्गी धो मीप्प बेत्। एल्ला ॱमत् तो़म्ब घयेत् ॱस्यो़च्च्ये युङल धङ् ज्यी़मीत् छ्यमीत्ल झ्यीब घयेत् च्यीगी च्यीक् इक् मेङ्गल ॱमीत् तो़ङ्गी धो मीप्प बेत्। 18हीगो झ्यीनी खीत्रङ्सो ॱसम्ल तङ्न नेन्ज्यीत्। मी ॱसुल दुक्क हुल ॱल्हक्मु तीक्केन् बेत्। ॱसुल मीन्दुक्क हुगो च्यानी रोरङ्गी यो़त् ॱनो़ब दी इक् ठो डोगेन् बेत् सीन्न ॱसुङ बेत्।
येशुगी आम धङ् पी़न् १९-२१
19हुनी येशुगी आम धङ् पी़न् घयेत् दीब खोङ् ठेत्तु युङ बेत्। ॱनी मी मङ् ढानी, खोङ्गी लोल हुब युङ् ॱमत् छुब बेत्। 20ॱनी मी च्यीक्की खोङ्ल नीज्यरङ्गी आम धङ् पी़न् घयेत् नीज्यरङ् ठेत्तु उन छ्यीन ॱलीत्न दुक् सीगुक् झ्यीब बेत्। 21हुगी लेल्ल येशुगी को़न्ज्योक्की ॱसुङ्रप्की क धङ् धम्ल चीगेन् घयेत् दी ङे आम धङ् पी़न् हीम्बल युङ्गेन् बेत् सीन्न ॱसुङ बेत्।
भुयुक् छ्यक्तु ची़प्प २२-२५
22हुनी ङीन् च्यीक् येशुगी रोरङ्गी ॱलोप्टुक् दीबल हज्यरङ् ढुल स्युन हीगी छो हीगी पारील डो सीन्न ॱसुङ बेत्। हुनी कुरीक् ढुल स्युन फीम्ब बेत्। 23ॱनी डोये यङ्ल येशु ढी़ नङ्दु ॱङीत्ल ॱसोङ्न यो़प्प बेत्। हुनी छो दीगी थोक्नी छुल्ल भुयुक् छ्यीम्मु ज्यप्न युङ्नी, ढु दील छ्यु स्युन नुप्च्येम ॱयेङ बेत्। 24ॱनी ॱलोप्टुक् दीबे येशु ॱङीत् ॱसेत्न खोङ्ल चयेलम, चयेलम हज्यरङ् कुरीक् ॱस्यीयेत् झ्यीब बेत्। हुनी खोङ् लोङ्न भुयुक् दी धङ् छ्यु भङ्ज्यीत् ॱलोङ्ज्यीत् झ्यीक्केन् दील लप्स्य तङ बेत्। हुनी भुयुक् दी इक् छ्यक्न खुर्। छ्यु दी इक् स्यीवल ॱसोङ्न गीलील देप्प बेत्। 25हुनी ॱलोप्टुक् दीबल खोङ्गी खीक्की ङल हुन्दो ॱलो ॱमीत् को़गो़प्प? ॱसुङ बेत्। ॱनी ॱलोप्टुक् दीब ज्यीक्टक् धङ् ॱह लेब झ्युङ्न रोरङ्सो ॱनम्बु येशु घन्दुक् झ्यीबे मी ब अक्? छो धङ् भुयुक्की इक् खोङ्गी कल चीगुक् सीन्न झ्यीब बेत्।
गीरासीनीगी मी च्यीक्ल ॱनो़प्प स्यीम्ब २६-३९
26हुनी येशुसो गालीलागी पारीगी लुङ्ब गीरासीनी सीस्स च्यीक्ल ॱलीब बेत्। 27ॱनी हुदु छो़ छीगदु ढु दीनी थो़न्नी ॱनो़प्प अयेक्प गक् स्यीन्नरे हुगी सार्की मी च्यीक् ठेप्प बेत्। हुगी घो़ मत् घो़म्ब, खीम्दु मत् देप्प, रो बेक्स घयेत्ल गीर्न देत्नी, स्यक्पु गज्येन् ॱसोङ हीङ्गो़प्प बेत्। 28ॱनी हुगी येशु युङ थोङ्नी ओ़लोक् ज्यप्न खोङ्गी ढुङ्दु छ्यक् छेन केत् छ्यीम्मु तो़न्न ॱवे येशु, नीज्यरङ् इगी थोरी चीदु स्युगेन् को़न्ज्योक्की ॱरेबु ङल घन्ड झ्यीच्च्ये ॱनो़गुक्क? ङ नीज्यरङ्ल स्युव ज्यक्केन्। ङल दुक्प अयेक्पे ॱनर्मी तोङ्रो मत् झ्यीत् सीन्न झ्यीब बेत्। 29घन्ड हीन् सीन्न हुगी ॱनो़प्प स्यीलोक्पोक्म दील खोङ्गी हुनी थो़ल्ल ज्युक् सीन्न खक्को़ तङ्नी, हुगी हुन्दुक् झ्यीब हीङ्गो़प्प बेत्। हुगी ॱनो़प्प हुगी हुल लेम्म गज्येन् दुक्प तङ हीङ्गो़प्प बेत्। ॱनी मी घयेक्की हुगी कङ्ब लक्प दी कीङ्न च्यागोङ् ज्यप्न च्युर्न स्यक्न अक्, हुगो ॱस्योर्न म दीरङ् पक्क झ्यङ्दङ्ल ॱनो़प्प दीगी ठीक्को़प्प बेत्। 30ॱनी हुल येशुगी खोक्की मीङ्ल घन्ड सीगो़प्प? सीन्न ढीनी, हुगी लेल्ल ॱमक्कक् सीक्को़त् झ्यीब बेत्। घन्ड हीन् सीन्न हुल ॱनो़प्प अयेक्प छेत्मीत् स्युन यो़प्प बेत्। 31हुनी हुगी ॱनो़प्प दीबे खोङ्ल ङीत् घयेत् दुक्प नोङ्स खीस मीप्पे ॱसेङ्दोङल तोङ्रो मत् झ्यीत् सीन्न गन्दीक्म स्युव ज्यब बेत्।
32ॱनी हुगी यङ्ल फच्चो़त्न पोर्तोक् च्यीक्की डम्नल फक्प छेत्मीत् ॱसोगीन् यो़प्प बेत्। ॱनी ॱनो़प्प घयेत् दीगी खोङ्ल ङीत् घयेत् फागी फक्प घयेत् फागी नङ्ल स्युक्च्ये यो़प्पे ॱहक् ॱनङ्रो झ्यी सीन्न स्युदेन् ज्यब बेत्। हुनी खोङ्गी ॱहक् ॱनङ बेत्। 33हुनी ॱनो़प्प अयेक्प घयेत् दी हुगी मी दीनी थो़न्नी फक्प घयेत् दील स्युनर बेत्। स्युनी, फक्प घयेत् दी कुरीक् ज्युन फीन्न ढागोनी मल्ल छर्न हुगी छो दील खीन कुरीक् ॱङङ्न ॱस्यीनर बेत्।
34हुनी हुगो थोङ्नी फक्चीब घयेत् दी ढो़न फीन्न हीगी केच्च्य घयेत् दी हुगी सार् धङ् यु घयेत्ल ॱस्येत्न टेप्प बेत्। 35ॱनी हुगी मी घयेत् दीगी घन्ड झ्युङ बेक्क तदु डो सीन्न येशु च्याल युङ बेत्। युङ्नी, उन ॱनो़प्प अयेक्प थो़न्नरे मी दी घो़ घो़न्न ढेम्ब गङ्ज्येल्ल ॱसोङ्न येशुगी स्यप्की लोन दो़प्प ठेत्नी, हुबल ज्यीक्टक् लङ बेत्। 36ॱनी हुब एल्ला युङ्न थोङ घयेत् दीबे तीङ्ला युङ घयेत् दीबल ॱनो़प्प स्यीन्नरे मी हुगो घन्दुक् झ्यीन ढेम्ब गङ्ज्येल्ल झ्युङ बेक्क हुगो कुरीक् ॱस्येत्न टेप्प बेत्। 37हुनी गीरासीनीगी लुङ्बे मी घयेत् दी ज्यीक्टक्की येशुल हुबे नीज्यरङ् ङीत् च्यानी फल्ल लोक्न डोरो झ्यी सीन्न स्युव ज्यब बेत्। हुनी खोङ्जोसो ढुल स्युन लोक्च्येम झ्यीब बेत्।
38ॱनी ॱनो़प्प थो़न्नरे मी दीगी येशुल ङ अक् नीज्यरङ्दङ् दल युङ्दु ची़त्रो झ्यी सीन्न स्युव ज्यब बेत्। 39ॱनी येशुगी हुगोल रङ् रङ्गी खीम्ल लोक्ल ज्युक्ल मी घयेत्ल रङ्ल को़न्ज्योक्की घन्दुक्मे ज्यीक्पे ले जेत्न ॱनङ बेक्क हुगो ॱस्यो़त्ल टो़त्लेत् सीन्न तङ बेत्। हुनी हुगी मी दी लोक्न फीन्नी रोरङ्ल येशुगी घङ् जेप्पे केच्च्य घयेत् दी सार्की मी कुरीक्ल ॱस्येत्न टम्ब बेत्।
भुमु ॱस्यीनर धङ् मोनेत् च्येम्म च्यीक् ढक्प ४०-५६
40येशुसो छुरील लोक्न युङ्नी, उन खोङ्ल गुक्कीन् दो़क्केङ्गी मी घयेत् दी खोङ् झ्यो़म्बल गेस झ्युङ बेत्। 41ॱनी हुदु येशु च्येल्ल हुगी यहुदीगी छ्यो़ छोगी गोयो़प्प यैरस् सीक्केन् च्यीक् युङ्न खोङ्ल छ्यक् छेन नीज्यरङ् ङे खीम्ल झ्यो़र्रो झ्यी सीन्न स्युव पुब बेत्। 42हुगोल मोलो च्युन्नी ॱलीबे भुमु च्यीगी च्यीक्रङ् यो़प्प बेत्। ॱनी हुगो ॱस्यीज्येम ॱयेङ्न यो़प्प बेत्।
ॱनी येशु हुगी खीम्ल झ्यो़म्बे यङ्ल खोङ्ल मी छेत्मीक्की कोदुम् ज्यब बेत्। 43ॱनी मी घयेत् दीगी छीक्न ली़गी ठक् भप्न युङ्नी ॱमत् छ्येप्प, लो च्युन्नी ॱसोङे भुमु च्यीक् यो़प्प बेत्। [हुगी रोरङ्गी नोर् घङ् यो़प्प घयेत् दी खुर्न ॱमेम्बा घयेत् तुक्न आक्,] ॱसी़ इक् हुगो ढक्तु ची़त् ॱमत् छुब हीङ्गो़प्प बेत्। 44ॱनी लम्दु हुगो येशुगी तक्नी छुल्ल युङ्न खोङ्गी घो़ छ्यी घो़गी थी़च्ची दील रेक्नी, हुनी ॱस्यर्च्यक् हुगी ठक् जक्केन् दी छ्येत्नर बेत्। 45ॱनी येशुगी हुगी मी घयेत् दील खीत् ॱसी़ ङल रेक्प? सीन्न ढीब बेत्। ॱनी मी घयेत् दीगी ॱमत् ॱस्यी, ङ ॱनी मेन्, ङ ॱनी मेन् सीन्न झ्यीब बेत्। ॱनी पत्रुस्की खोङ्ल चयेलम नीज्यरङ्ल मी घयेक्की हीन्दुक्मे कोदुम् ज्यक्केल्ल ॱसुल सीक्केन्? सीन्न झ्यीब बेत्। 46हील येशुगी मी च्यीक्की ङल ॱङो़न्ने रेक्च्युङ्। ङे सी़नी ॱस्यीक् थो़न्न डोव ङे ॱह घोज्युङ् सीन्न ॱसुङ बेत्। 47हीनी हुगी भुमु दीगी ह ॱह घोसोङ्। ङ ॱमत् थो़न्न, मीत् युङेत् ॱनो़न येशुगी ढुङ्दु दर्कीन् दर्कीन् युङ्न छ्यक् छेब बेत्। हुनी खोङ्ल घन्डे ढीक्ल रेक्प बेक्क, घन्दुक् झ्यीन रोरङ् ॱस्यर्च्यक् ढक्प बेक्क हुगो कुरीक् मी घयेक्की घोस्सल ॱस्येत्न टेप्प बेत्। 48ॱनी खोङ्गी हुगी भुमु दील भुमु रङ्गी छ्य स्यक्प दीगी रङ् ढक्नर बेत्। ह ॱसीम् दीव झ्यीन ज्युक् सीन्न ॱसुङ बेत्।
49खोङ्गी हीगो ॱसुङे यङ्ल यैरस् दीगी खीम् दीनी लो़न् खुर्केन् मी च्यीक् युङ्न यैरस् दील नीज्यरङ्गी भुमु दी ॱनी ॱस्यीसोङ्। ह चयेलमल ओप्च्या ॱलङ्नी घन्ड झ्यीच्च्ये झ्यीब बेत्। 50ॱनी हुगो येशुगी ॱह घोनी खोङ्गी यैरस् दील रङ् ज्यीब मत् झ्यीत्। रङ् छ्य दीरङ् स्योक्ते। रङ्गी भुमु ॱसो़गेन् बेत् सीन्न ॱसुङ बेत्। 51हुनी खोङ् यैरस्की खीम् दील ॱलीब बेत्। ॱलीत्नी, खोङ्गी पत्रुस्, युहन्ना, याकुब् झ्यीब धङ् ॱनी भुमु दीगी पब आम दी झ्यीब ठीक्नी ॱयोङ्म ॱसु उक् नङ्ल स्युक्तु ॱमत् ची़प्प बेत्। 52ॱनी हुदु येशुल मी घयेत् दी ङुच्च्यङ् तोङ धङ् नङेन् झ्यीप्प ठेप्प बेत्। ॱनी हुबल खोङ्गी मत् ङु। हुगी भुमु हुगो ॱस्यीय मेम्ब, ॱङीत्ल ॱसोङ बेत् सीन्न ॱसुङ बेत्। 53ॱनी हुगी मी घयेत् दील भुमु दी ॱङो़न्ने ॱस्यीनर हीम्ब ॱस्यो़च्च्ये झ्यीनी, येशुगी ॱसुङे केच्च्यल हुब ढो़स्सक् ॱस्योर बेत्। 54ॱनी हीन्न अक्, येशुगी भुमु दीगी लक्पनी सुङ्न ॱवे भुमु, लोङ् सीन्न ॱसुङ बेत्। 55हुनी उ लोक्न युङ्न ॱस्यर्च्यक् ॱहोक् लोङ बेत्। ॱनी येशुगी ह हीगी भुमु हील सम गो़ब टो़त् सीन्न ॱङाब बेत्। 56ॱनी हील आम पब दी ॱह लेब बेत्। ॱनी खोङ्गी हुबल हीदु झ्युङे हीगी केच्च्य हीगो ॱसुल आक् ॱमत् ॱस्यो़च्च्यीत् सीन्न स्यागो़त् ॱनङ्न स्यक्प बेत्।
Actualmente seleccionado:
लुका 8: LHM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995 Wycliffe Bible Translators, Inc. and Nepal Bible Society