लुका 4
4
येशुल दी़क्की चो दीगी छो़त् तेब १-१३
1ॱनी हुदु यर्दन् चङ्बुदु येशुल धम्बे थु स्युन घेङ्न, हुनी लोक्न युङे यङ्ल धम्बे थुगी खोङ् पक्क झ्यङ्दङ्ल डोदु ची़प्प बेत्। 2ॱनी हुदु येशु स्यक्पु स्यीप्च्यु थुक् देप्प बेत्। ॱनी हुगी यङ्ल येशुल छो़त्लीन् तदु दी़क्की चो दी युङ बेत्। ॱनी हुदु येशुगी स्यक्पु स्यीप्च्यु थुक्ल सम घन्ड अक् मत् सेबल खोङ् ढोप्प तोब बेत्। 3ॱनी दी़क्की चो दीगी खोङ्ल खो़त् को़न्ज्योक्की ॱरेबु हीन्न ॱनी, हीगी दो हीब ढोप्चील ज्युर्ल ज्युक् झ्यीलोङ् न ॱनी झ्यीब बेत्। 4ॱनी खोङ्गी लेल्ल ॱसुङ्रप्ल ढीन यो़क्केन् बेत्।
मील सम छ्युवक् मेम्ब, ॱयोङ्म आक् गो़गेन् बेत् झ्यीब बेत्। (ठीम्लु ८:३)
5हुनी दी़क्की चो दीगी येशु लदोक् च्यीक्ल ठीक्न जम्बुलीङ्गी ज्यागक् घयेत् जेङ् खोङ्ल ॱरीप् घङ्ल तो़म्ब बेत्। 6हुनी हुगी खोङ्ल हीगी ज्यागक् घयेक्की ॱवङ् धङ् नोर् खुङ् घयेत् हीगो जेङ् ङे लक्ल ठो़त्न यो़त्। हीगो ङे ॱसुल टो़च्च्ये ॱनो़गो़दङ् हुल टो़त् छुगो़त्। 7रङ्गी ङल छ्यक् छेन ॱनी, हीगो ङे रङ्ल जेङ् टेत् योङ्। 8हीनी येशुगी हुल ॱसुङ्रप्ल ढीन यो़क्केन् बेत्।
चोव ज्यीन्दक् को़न्ज्योक्लरङ् छ्यक् छेन धेप्प दी खोङ्लरङ् क झ्यीत् गोगेन् बेत्। (ठीम्लु ६:१३)
9हुनी दी़क्की चो दीगी येशु यरुशलेम्ल ठीक्न हुगी छ्यो़गङ्गी चीमुङ् दील जेक्तु ची़त्न खोङ्ल ह रङ् को़न्ज्योक्की ॱरेबु हीन्न ॱनी, हीनी मल्ल फीर्। 10घन्ड हीन् सीन्न ॱसुङ्रप्ल ढीन यो़क्केन् बेत्।
को़न्ज्योक्की खोङ् रोरङ्गी तेङ् यी़गी भङ्ज्येम्ब घयेत् इगीनी मल्ल तङ्न युङ्न, हुबे ॱरोक्च्यप् झ्यीन 11रङ्गी कङ्ब दोल दुदु ॱमीत् ची़प्प, हुबे दुलील खुर्केन् बेत्। (ॱसुङ्रप्की गुल्लु ९१:११-१२)
12हीगी लेल्ल येशुगी ॱसुङ्रप्ल हीगो ओक् थो़ङ्गेन् बेत्।
रङ्गी चोव ज्यीन्दक् को़न्ज्योक्ल छो़त्लीन् तज्ये मीत् युङ्गेन् बेत् झ्यीब बेत्। (ठीम्लु ६:१६)
13हुनी येशुल हुगी दी़क्की चो दीगी छो़त्लीन् तये ले घयेत् दी ढुप्नी, हुगी धोबा च्यीक् थुक्ल ॱलो़ तङ्न टप्नर बेत्।
येशुगी गालीलादु घङ् जेप्प ४:१४–९:५०
येशु गालीलाल लोक्प १४-१५
14हुनी येशुल धम्बे थुगी ॱस्यीक् ॱङीत्न गालीलाल लोक्न युङ बेत्। ॱनी हुदु खोङ्गी ढीक्की केच्च्य घल अक् धर्नर बेत्। 15ॱनी खोङ् हुदु छ्यो़गी छोगङ् घयेत्ल गीर्न ॱलोप्स गज्येन् ज्यप्न टेप्प बेत्। ॱनी घल फीन्न आक्, मी घयेक्की खोङ्ल तो़त् तो़प्प झ्यीब बेत्।
नासरत्तु येशुल धेप्प मीप्प १६-३०
16हुनी येशु खोङ् रोरङ्गी फयु नासरत्ल लोक्न युङ बेत्। ॱनी ङीत्तुवे यङ्ल ज्यी़न्दु ॱङर् डस्सी खोङ् हुगी छ्यो़गी छोगङ्ल झ्यो़म्ब बेत्। ॱनी हुदु मी जोम्न युङ घयेत् दील ॱसुङ्रप्की यीगी डोन तीत्तु लोङ बेत्। 17ॱनी छोगङ्गी ॱयोक्पु दीगी खोङ्गी लक्ल कलुङ् ॱस्यो़क्केन् यशैयागी यीगी बुरीम च्यीक् टेप्प बेत्। ॱनी खोङ्गी हुगो ॱस्यीक्न हीन्दुक् सीन्न डोन टेप्प बेत्।
18ङे ज्यप्ल चोव ज्यीन्दक्की थु यो़त्। मी दुक्च्या घयेत्ल केच्च्य ॱनेम्बु ॱस्यो़च्च्येगी ढीक्ल ङे गोल ॱनुम् ॱही़न्न को़ज्युङ्। चो़ल्ल ॱस्योर्नर घयेत् तो़न्दु धङ् स्यर्च्योक् घयेत् थोङ्गेल्ल सोदु धङ् मी होक्ल ॱस्योर्नर घयेत् तो़न्दु 19धङ् कोलीमील चोव ज्यीन्दक्की गय जेप्पे धी़ दी ॱलीत् छर हीम्बे केच्च्य ॱस्यो़त्तु ङ तङ्ज्युङ् सीर हीगो डोन टेप्प बेत्। (यशैया ६१:१-२)
20हुनी यीगी दी तीरीलील डीन ॱयोक्पु दील टेत्न खोङ् स्युब बेत्। ॱनी हुगी मी घयेत् दीबे खोङ्ल गन्दीक्म फोरील तेब बेत्। 21हुनी खोङ्गी हुबल हन्देन् ङे डोन टेप्पे ॱसुङ्रप् हीगो ङे ढीक्ल तान युङ बेत्। हीगो खीत्रङ्गी नेन्न युङ बेत् सीन्न ॱसुङ बेत्।
22ॱनी हुगी मी दीब खोङ्ल गस्सी छोर बेत्। खोङ्गी ॱसुङे केच्च्य दील ॱनेन्सी छोर्न ॱह लेब बेत्। ॱनी हीन्न अक्, हुबे यङ् रोरङ्सो नङ्दु हुबे हीगो युसुफ्की भु मेम्बेक्क ॱनी? झ्यीब बेत्। 23ॱनी खोङ्गी हुबल खीत्रङ्गी ॱसीम्बे म दी ङल पीरङ्ल तेबे, रङ्रङ् ॱमेम्बाल रङ्गी नज रङ्गीरङ् ढक्तु ची़त् छुगो़ट्टो। रङ्गी कफर्नहुम्दु झ्यीबे ले घयेत् दी ङीक्की ॱह घोज्युङ्। ॱनी हुगो डस्सी हीदु रङ्गी फयुदु उक् झ्यीत्रो झ्यी सीच्च्ये ॱनो़ब यो़क्केन् बेत्। 24हीगी ढीक्ल ङे खीत्रङ्ल गन्दीय ॱस्येत् योङ्। कलुङ् ॱस्यो़क्केन् घङ्गोल अक् रोरङ्गी फयुगी मी घयेक्की थोङ् मीत् झ्यीक्केन् बेत्। 25हरुङ्द ङे गन्दीय ॱस्येत् योङ्। धङ्बु कलुङ् ॱस्यो़क्केन् एलीयागी ङोल लो ॱसुम्दङ् दव ढुक् थुक् छ्येप्प थीदोक् च्यीक् इक् मत् ज्यबल लुङ्ब की़ल्ल तोरी छ्यीम्मु ॱस्योर बेत्। ॱनी हुगी यङ्ल इस्राएल्न मोरेङ्मु गज्येन् यो़प्प बेत्। 26ॱनी यो़त्न अक्, हुब घन् दील अक् दगु झ्यीत्तु को़न्ज्योक्की एलीया ॱमत् तङ, ॱयोङ्ल सीदोन् लुङ्बे सारफत् युगी मोरेङ्मु च्यीक् च्याल तङ बेत्। 27कलुङ् ॱस्यो़क्केन् एलीशागी ङोल अक् जीस्सो़ इस्राएल्न गज्येन् यो़प्प बेत्। ॱनी यो़त्न अक्, हुब च्यीगी च्यीक् इक् ढक्तु ॱमत् ची़प्प बेत्। बोर सीरीया लुङ्बे मी नामान् सीक्केन् दी एलीशागी ढक्तु ची़त्न चङ्मल सो़ब बेत् सीन्न ॱस्येप्प बेत्।
28ॱनी हीगो घोनी, छोगङ्न यो़प्पे मी घयेत् दी खोङ्डोक्की मी बर बेत्। 29हुनी हुब कुरीक् लोङ्न येशु सुङ्न हुगी सार्की छ्यील यो़प्पे ढागो दील पुर्तु सीन्न छ्यील तो़म्ब बेत्। हीगी सार् दी लदोक्ल यो़प्प बेत्। 30हुनी येशु हुब घयेक्की घुङ्नी या ढेन ॱयोङ्ल टप्नर बेत्।
येशुगी ॱनो़प्प अयेक्प दीप्प ३१-३७
31हुनी येशु मल्ल गालीलागी कफर्नहुम्ल फीम्ब बेत्। ॱनी ङीत्तुवे ङीन् दी खोङ् हुगी छ्यो़गी छोगङ्ल स्युन हुदु जोम्बे मी घयेत्ल ॱलोप्स ज्यप्न टेप्प बेत्। 32खोङ्गी ॱलोप्स ज्यक्लुल मी घयेत् दी गन्दीक्म ॱह लेब बेत्। घन्ड हीन् सीन्न खोङ्गी ॱसुङ्स्येत्ल कवङ् छ्यीम्मु यो़प्प हुबे ॱह घोव बेत्।
33ॱनी उन ॱनो़प्प स्यीलोक्पोक्म स्यीन्नरे मी च्यीक् यो़प्प बेत्। हुगी केत् छ्यीम्मु तो़न्न 34येशुल ॱवे नासरत्की येशु खो़त् ङीत्तङ् डीक् दीरङ् मीत् डीक्पे, ङीत् खरप्ल तोङ्दु युङ हीम्ब? रङ् इगी को़न्ज्योक् च्यानी युङे चङ्म हीम्ब च्येम्म बेत्। रङ् ङे ङु ॱस्यीज्युङ् झ्यीब बेत्। 35ॱनी हुल येशुगी ॱहरक्प दो़त्। रङ् हुनी थो़ल्ल ज्युक् सीन्न कगो़त् तङ बेत्। हुनी ॱनो़प्प दीगी हुगी मी दी ॱसल दप्न हुनी थो़न्न खुर बेत्। ॱनी हुगो कुरीक्की थोङ बेत्। ॱनी च्यो़न् घन्ड अक् ॱमत् तङ बेत्। 36ॱनी हील मी घयेत् दी ॱह लेन हुब रोरङ्सो नङ्दु घन्दुक्मे ॱस्यीक् छ्यीये ॱवङ्गी ले ब अक्। हुगी कगो़त्ल ॱनो़प्प स्यीलोक्पोक्म घयेत् एत् थो़न् डोगुक् न झ्यीब बेत्। 37हुनी येशुगी ढीक्की केच्च्य हुगी लुङ्ब घल अक् धर्नर बेत्।
शीमोन्गी खीम्दु नज ॱनजो ढक्प ३८-४४
38हुनी येशुसो छोगङ् दीनी थो़न्न शीमोन्गी खीम्ल फीम्ब बेत्। उन शीमोन्गी ज्युक्मु दी गन्दीक्म ढो़त् बर्न नगो़प्प बेत्। ॱनी हुगी ढीक्ल मीजङ् दीबे येशुल स्युव ज्यब बेत्। 39हुनी खोङ् नेप्प दीगी लोल फीन्न ढो़त् बर्केन् हीगो छ्यक्ल ज्युक्च्यीत् सीन्न कगो़त् ॱनङ बेत्। हुनी ढो़त् दी छ्यक्नर बेत्। हुनी ॱस्यर्च्यक् लोङ्न येशुसोल स्यप्च्यी़ ज्युब बेत्।
40ॱनी गोङ्ज्यो दी येशु च्येल्ल नज ॱनजो गुजो च्येम्मे नेप्प गज्येन् ठीक्न युङ बेत्। ॱनी खोङ्गी हुब रीदङ् रील छ्यक्वङ् केन कुरीक् ढक्तु ची़प्प बेत्। 41ॱनी ॱनो़प्प अयेक्प स्यीम्ब गज्येन् थो़न्न टप्नर बेत्। ॱनी थो़म्बे यङ्ल हुबे येशुल नीज्यरङ् को़न्ज्योक्की ॱरेबु बेत् सीन्न केत् छ्यीम्मुल सीगो़प्प बेत्। हुब घयेत्ल खोङ् को़न्ज्योक्की को़बे च्यप्को़न् ख्रीष्ट् हीम्ब ॱस्यो़च्च्ये यो़प्प बेत्। हुगो झ्यीनी, खोङ्गी लप्स्य तङ्न ॱस्यो़त्तु ॱमत् ची़प्प बेत्।
42हुगी नेम्बेत् दी येशु थोर्च्याल लोङ्न मी मीस्स पक्कल फीम्ब बेत्। ॱनी सार्की मी घयेत् दीबे खोङ् ॱयेङ बेत्। तीङ्ला ॱङीत्नी हुबे खोङ्ल हीदु स्युरो झ्यी। हीनी झ्यो़र्रो मत् झ्यीत् सीन्न स्युव ज्यब बेत्। 43ॱनी हील येशुगी ङ को़न्ज्योक्की ज्यागक्की केच्च्य ॱनेम्बु ॱस्यो़त्तु सार् ॱयोङ् ॱयोङ्ल आक् डो गोगेन् बेत्। हीगी धो़ल्ल क ङ तङ्न युङ बेत् सीन्न ॱसुङ बेत्। 44हुनी यहुदीयागी लुङ्बे छ्यो़गी छोगङ् घयेत्ल गीर्न येशुगी केच्च्य ॱस्येप्प बेत्।
Actualmente seleccionado:
लुका 4: LHM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995 Wycliffe Bible Translators, Inc. and Nepal Bible Society