युहन्ना 5
5
बेथस्दा लुमे छीगदु मी च्यीक् ढक्प १-१५
1हीनी यङ् यहुदी घयेक्की ॱसम्गेङ्गी धी़रीम् च्यीक् ॱलीत्नी, येशु यरुशलेम्ल फीम्ब बेत्। 2ॱनी यरुशलेम् सार्ल स्युक्से च्यारीगी गोच्च च्यीक्ल मीङ् दील लुक्की गोच्च सीगो़प्प बेत्। हुगी छीग ॱनमुल का गज्येन् च्येम्मे खीम् डस्सी झ्यीब ॱङ यो़प्प बेत्। हुगी घुङ्न क हस्सो़त् हीब्रु केच्च्यल बेथस्दा सीक्केन् छ्यु लुम च्यीक् यो़प्प बेत्। 3ॱनी मी स्यर्च्योक् धङ् घोङ्रीय कङ्ब लक्प ॱस्योर्न खुर धङ् नेप्प ॱयोङ्म आक् गज्येन् उन दो़क्को़प्प बेत्। [ॱनी हुब घयेत् हुगी लुम दील नम् योक् तोङ्गो़दङ् ॱनो़न रीगो झ्यीन दो़क्को़प्प बेत्। 4ॱनी हुदु छम् छम् चोव ज्यीन्दक्की भङ्ज्येम्ब इगीनी मल्ल युङ्न हुगी छ्यु लुम दील योक् तोङ्गो़प्प बेत्। ॱनी हुगी योक् तङ् छचो़र्त्ल हुल मी ॱसु ॱएन्स्युक्ल स्युक्कुक्क हुल घन्दुक्मे नजरङ् यो़त्न अक्, हुगो ढक् डोगो़प्प बेत्।]
5ॱनी उन मी च्यीक् नजे सीन्नी, लोङ ॱसुम्ज्यु सोप्च्येत् ॱसोङ च्यीक् यो़प्प बेत्। 6ॱनी हुदु येशुल हुगी मी दी ना देप्पदङ् ठेप्प बेत्। ॱनी हुगो नजे सीन्नी, लो गज्येन् ॱसोङ येशुगी ॱह घोनी, हुल खो़त् ढक्च्ये ॱनो़गुक्क? सीन्न ढीब बेत्। 7ॱनी हुगी लेम्बुल छ्यु हीगो नम् योक् तोङ्गुक्क योक् तङ् छचो़र्त्ल ङल दगु मीप्पल ङ डोज्याल ॱयोङ्मा ॱएङ्गोर् ज्यप्न स्यु डोगुक् झ्यीब बेत्। 8हीनी येशुगी हुल लोङ्ल रङ्गी तेन् दी खुर्ल छ्यम् सीन्न झ्यीब बेत्। 9हुनी ॱस्यरी हुगी यङ्लरङ् ढक्नर बेत्। हुनी तेन् दी इक् खुर्न हुगो टप्नर बेत्। हीगी ङीन् दी ङीत्तुव हीङ्गो़प्प बेत्।
10ॱनी यहुदी छ्यीया यरीबल हुगो लम्ल डोव ठेत्नी, हुल खो़त् ङीत्तुवल घन्डल हुन्दुक् झ्यीन तेन् खुर्न डोगेन्? खो़त्ल ॱस्यो़च्च्ये मीप्प? झ्यीब बेत्। 11ॱनी हुगी लेम्बुल ङ ढक्तु ची़क्केङ्गी मी दीगीरङ् ङल रङ्गी तेन् खुर्ल छ्यम् सीन्न सीच्च्युङ् झ्यीब बेत्। 12हील हुबे खो़त्ल हीन्दुक् झ्यीबे ले को़क्केङ्गी मी हुगो ॱसु बेक्क? सीन्न ढीब बेत्। 13ॱनी येशु ॱसु हीम्ब हुगोल ॱस्यो़च्च्ये मीप्पल हुगी हुबल ॱस्यो़त् ॱमत् छुब बेत्। घन्ड हीन् सीन्न हुगो ढक्स दीदु मी मङ् ढाब झ्यीनी, येशु स्योक् च्यीक्ल टप्नर हीङ्गो़प्प बेत्।
14ॱनी तीङ्ला यङ् छ्यो़गङ्दु येशुल हुगी मी दी ठेप्प बेत्। ॱनी येशुगी हुल ह रङ् ढक् छर बेत्। ह दीक्प मत् झ्यीत्। स्येन् रङ् एल्लाले हरुङ् दुक्पा युङ् छुगेन् बेत् झ्यीब बेत्। 15हुनी हुगो यहुदी छ्यीया घयेत् च्याल फीन्न, ङ ढक्तु ची़क्केन् दी येशु बेत् सीन्न ॱस्येप्प बेत्।
येशु को़न्ज्योक्की ॱरेबु हीम्ब तो़ङ्गेन् १६-४७
16ॱनी येशुगी ङीत्तुवल हुन्दुक् झ्यीन मी ढक्तु ची़क्केङ्गी ले झ्यीनी, यहुदी छ्यीया घयेक्की हुनी झ्यीनी खोङ्गी डल लोङ्न खोङ्ल अयेक्प झ्यीच्च्येल झ्यी़ तेब बेत्। 17ॱनी येशुगी हुबल ङे यप्की ले छीगङ् जेक्केन् बेत्। ॱनी ङे एक् छीगङ् झ्यीक्को़त् झ्यीब बेत्। 18ॱनी हीगो ॱह घोनी, ॱसुम्ब हुब घयेक्की येशु ॱसो़च्च्येमल गीम्ब बेत्। घन्ड हीन् सीन्न येशुगी ङीत्तुवे कल ॱमत् चीय छ्युवक् मेम्ब, को़न्ज्योक्ल ङे पब सीन्न रोरङ् को़न्ज्योक्तङ् डस्सील सोगुक् झ्यीब बेत्। 19ॱनी हुब घयेत्ल येशुगी खीत्रङ्ल ङे गन्दीय ॱस्येत् योङ्। ॱरेबु रोरङ् च्यीगी च्यीक्पी़ घन्ड अक् मीत् झ्यीक्केन् बेत्। यप्की घङ् जेप्पे लेमुल तेन हुगोरङ् क ॱरेबी़ इक् झ्यीक्केन् बेत्। यप्की घन्ड झ्यीक्को़दङ् हुगो डस्सी दी ॱरेबी़ इक् हुन्दुक् दीरङ् झ्यीक्केन् बेत्। 20यप्की ॱरेबुल च्यीब झ्यीक्केन् बेत्। हुगो झ्यीनी खोङ्गी घन्ड जेक्को़दङ् हुगो ॱरेबुल कुरीक् तो़ङ्गेन् बेत्। खीत्रङ् ॱह लेज्येल हुले त छ्यीयागी ले यप्की ॱरेबुल तो़न्न झ्यीत्तु ची़क्केन् बेत्। 21ॱनी मी ॱस्यीनर घयेत् ॱसोम्बुल ॱलोङ्न यप्की छी ॱनङ्गेन् डस्सी ॱरेबी़ इक् रोरङ्गी ॱसुल छी टो़च्च्ये ॱनो़गो़दङ् हुल टो़क्केन् बेत्। 22-23यप्की ॱसुल आक् ठीम् ॱमीत् च्यो़क्केन् बेत्। यप्ल तो़प्प युङ डस्सी ॱरेबुल आक् युङ्ज्येल हुगी ॱवङ् घयेत् कुरीक् ॱरेबुल टेत्न यो़क्केन् बेत्। ॱरेबुल तो़प्प मीत् झ्यीक्केङ्गी मी ॱरेबु तोङ्गेन् यप्ल अक् तो़प्प मीत् झ्यीक्केन् बेत्। 24ङे खीत्रङ्ल गन्दीय ॱस्येत् योङ्। ङे केच्च्यल नेन्न, ङ तोङ्गेल्ल मी ॱसी़ छ्य स्योक्कुक्क हुल फु तक्पे छी थोप्न युङ्गेन् बेत्। ॱनी हुल छ्येप्प ॱमीत् खीब, हुगो ॱस्यीवे लक्नी थर्न छीये लम्ल पो़ छर युङ्गेन् बेत्।
25ङे खीत्रङ्ल हरुङ्द गन्दीय ॱस्येत् योङ्। ह हीन्दुक् झ्यीबे धी़ च्यीक् युङ्गेन् बेत्। हुगो हीन ॱलीत् छर बेत्। ॱस्यीनर डस्सील यो़क्केन् घयेक्की को़न्ज्योक्की ॱरेबी़ ॱसुङ्स्येत् ॱह घोगेन् बेत्। ॱनी हील नेन्न युङ्गेन् घयेत् दी ॱसो़न ॱसोम्बु युङ्गेन् बेत्। 26ॱनी उज्येन् घयेत् थो़न्से चव दी यप् बेत्। ॱनी हीगो डस्सी दी क खोङ्गी ॱरेबुल आक् ॱनङ्न यो़क्केन् बेत्।
27खोङ् कोलीमीगी ॱरेबु झ्यीनी, ठीम् च्यो़च्च्येमे ॱवङ् घयेत् कुरीक् यप्की ॱरेबुल ॱनङ्न यो़क्केन् बेत्। 28खीत्रङ् ॱह लेब मत् झ्यीत्। हीन्दुक् झ्यीबे धी़ च्यीक् युङ्गेन् बेत्। ॱरेबी़ केत् ज्यबल मी ॱस्यीन खुर घयेत् 29ॱसोस्सोरङ्गी ॱसनेनी कुरीक् ॱसोम्बुल लोङ्गेन् बेत्। हुनी गा झ्यीबे ॱलम् च्येम्म घयेत्ल फु तक्पे छी तीक्केन् बेत्। ॱनी यङ् अयेक्प झ्यीबे मी घयेत्ल छ्येप्प को़गेन् बेत्।
30ङे ङरङ् च्यीक्पी़ घन्ड अक् मीत् झ्यीप्प यो़त्। यप्की घङ् ॱङाबल तेन ङे ठीम् च्यो़क्को़त्। हीगो ङे ङरङ्गी रङ्स्यीगी मेम्ब, ङ तोङ्गेङ्गी थुल डीक्पे ठीम् च्यो़क्केन् झ्यीनी, हीगो ढङ्बु युङ्गेन् बेत्। 31ङरङ्गी ढीक्ल ङरङ्गीरङ् ॱस्येत्न दीम्बल सोगो़त्न, हीगो मीत् धक्केन् बेत्। 32ङे ढीक्ल पङ्बु झ्यीन ॱस्यो़क्केन् ॱयोङ् च्यीक् यो़क्केन् बेत्। ङे ढीक्ल हुगी घङ् ॱस्येप्प घयेत् गन्दीय धक्केन् हीम्ब ङल ॱस्यो़च्च्ये यो़त्।
33खीत्रङ्गी युहन्ना बप्तीस् च्याल तम् ढीदु मी तङ्दुक् न ॱनी। ॱनी खोङ्गी हुबल दीम्बे ढीक्ल पङ्बु झ्यीन केच्च्य ॱस्येत्तुक्। 34ॱनी म दी ङ दीम्ब हीम्ब सोवल ङल कोलीमीगी पङ्बु मीत् गो़ब यो़त्। हीगो खीत्रङ् घयेत् थरे ढीक्ल सीन्न ङे ॱस्येप्पेन्। 35युहन्ना हुगो म दी मेङ्ग टक्पोक्म झ्यीनी, हुगी ओ़त्ल खीत्रङ् घयेत् ॱरीप्चो़त् च्यीक् दो़च्च्ये ॱनो़न गेस झ्यीन देप्प बेत्।
36ङ यप्की तङ्नी युङेन्। हीगो खुङ् हीन् धङ् मेल्ल युहन्नागी पङ्बु झ्यीन ॱस्येप्प बेत्। ॱनी हुले त हरुङ् यप्की ङल ॱङान झ्यीत्तु ची़प्पे ले घयेत् दीगी धक्पा ॱस्यो़क्केन् बेत्। 37ङ तोङ्गेन् यप्की इक् ङे ढीक्ल एल्लादु पङ्बु जेत्न ॱसुङ बेत्। खीत्रङ्गी खोङ्गी ॱसुङ्गेत् ॱह घोज्ये न, न खोङ्गी ङोरी थोङ् ॱनोङ्ज्ये। 38खोङ्गी तङ्न युङ दील खीत्रङ्गी छ्य दीरङ् मीत् स्योक्पे, घन्दुक् झ्यीन खोङ्गी ॱसुङ्रप् खीक्की ॱसीम्ल ङागेन्? 39फु तक्पे छी दी खीत्रङ्गी ॱसुङ्रप्नी थोप्केन् बेत् ॱनो़न हुल छीगङ् तेन ॱलोप्केन् बेत्। ॱनी हुगी ॱसुङ्रप्की केच्च्य घयेक्की इक् ङे ढीक्ल तो़न्न ॱस्यो़क्केन् बेत्। 40ङे तीङ्ल युङ्न क, खीत्रङ्ल फु तक्पे छी दी थोबेत् क। खीत्रङ् युङ्ज्ये दीरङ् ॱमीत् ॱनो़बे।
41हीगो मी घयेत् च्यानी तो़प्प लीन्ज्येल सीन्न ङे ॱस्यो़क्केन् मेन्। 42खीत्रङ् घन्दुक् झ्यीब हीम्ब हुगो ङल ॱस्यो़च्च्ये यो़त्। खीत्रङ्गी ॱसीम्ल को़न्ज्योक्ल झ्यम्ब मीन्दुक्। 43ङ ङे यप्की छेन्नी युङ हीन्। ॱनी युङ्न अक्, खीत्रङ् घयेक्की ङ ॱलोल मीत् झ्यीक्केन् बेत्। ॱनी मी ॱयोङ्म रोरङ्गी मीङ्नी थो़न्न युङ्गेल्ल खीत्रङ्गी ॱलोल झ्यीक्केन् बेत्। 44खीत्रङ् घयेक्की को़न्ज्योक् च्यीगी च्यीक् हीम्ब च्येन्नी थोप्केङ्गी ॱस्यङ्ज्युङ् यक्च्युङ् दी ॱमीत् ॱयेङ, मी च्यीक्तङ् च्यीक्की च्यानी तो़प्प ॱयेङ्गेन् बेत्। हुगो झ्यीनी, घन्दुक् झ्यीन छ्य स्योक् छुगेन्?
45यप्की ढुङ्दु खीत्रङ्ल ङे ङीब कप् योङ् ॱनो़ब ॱमत् खुर्। खीत्रङ्ल ङीब कोप्केन् दी हुन्दो खीत्रङ्गी रीगो झ्यीक्केन् मोशा युङ्गेन् बेत्। 46मोशाल खीत्रङ्गी छ्य स्योक्को़त्न, ङल अक् छ्य स्योक्पेत् क ॱनी। ङे ढीक्ल मोशागी ढीन स्यक्न यो़क्केन् बेत्। 47ॱनी मोशागी ढीन स्यक्पे ॱसुङ्रप्ल त खीत्रङ्गी छ्य मीत् स्योक्पे, ॱनी ङे तम्ल ॱसुम्ब खीक्की घन्दुक् झ्यीन छ्य स्योक् छुगेन्? सीन्न ॱस्येप्प बेत्।
Actualmente seleccionado:
युहन्ना 5: LHM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995 Wycliffe Bible Translators, Inc. and Nepal Bible Society