युहन्ना 3
3
नीकोदेमस् धङ् येशु १-२१
1यहुदीगी छ्यो़गी छोक्तेन् छ्यीम्मी़ सदस्यीय मी नीकोदेमस् सीक्केन् फरीसी च्यीक् यो़प्प बेत्। 2हुगो गोङ् च्यीक् येशु च्याल युङ्न हुगी येशुल रब्बी नीज्यरङ् को़न्ज्योक्की को़न तङे चयेलम हीम्ब ङीक्की ॱह घोज्युङ्। चयेलमरङ्गी ज्यप्तक्ल को़न्ज्योक् मीत्न ॱनी, नुक्मे यीक् छ्यीम्मी़ लेगी ता मी ॱसी़ इक् झ्यीत् ॱमीत् छुगेन् बेत् झ्यीब बेत्। 3ॱनी हुल येशुगी ङे रङ्ल गन्दीय ॱस्येत् योङ्। मी म दीरङ् फीच्च्य गोनी कीन मेन्द, को़न्ज्योक्की ज्यागक् ॱमीत् थोङ्गेन् बेत्। 4ॱनी नीकोदेमस्की लेम्बुल मी गेङ्गेन् यङ् फीच्च्य घन्दुक् झ्यीन कीगेन्? घन्दुक् झ्यीन आमे ढोप्पल स्युन यङ् कीगेन्? झ्यीब बेत्। 5हुनी येशुगी ङे गन्दीय ॱस्येत् योङ्। मी म दीरङ् छ्यु धङ् धम्बे थुनी कीन मेन्द, को़न्ज्योक्की ज्यागक्ल स्युक् ॱमीत् छुगेन् बेत्। 6सी़नी कीब घयेत् कोलीमी ङो़गी ॱस्यीदा युङ्गेन् बेत्। ॱनी धम्बे थुनी कीब घयेत् दी क ॱसीम् ॱसम्ब ङो़गी युङ्गेन् बेत्। 7खीत्रङ्ल ङे फीच्च्य गोनी की गोगेन् बेत् झ्यीबल ॱह लेब मत् झ्यीत्। 8ॱलुङ्बु रोरङ् घल हीन्न हीन् ज्यक्केन् बेत्। ॱलुङ्बु ज्यक्प दी रङ्गी ॱह घोगेन् बेत्। ॱनी हुगो घनी छुल्ल युङ, घल डोगेन् हीम्ब ॱस्यो़च्च्ये मीप्प बेत्। धम्बे थुनी कीबे मी दी हुगो डस्सी युङ्गेन् बेत् झ्यीब बेत्। 9ॱनी नीकोदेमस्की हीगो घन्दुक् झ्यीन युङ् छुगेन्? सीन्न ढीनी, 10येशुगी रङ् इस्राएली घयेक्की चयेलम झ्यीनी इक्, खोक्की हीगो ॱह मीत् घोयेक्क? 11ङे रङ्ल गन्दीय ॱस्येत् योङ्। ङीक्की घन्ड घोगो़दङ्, घन्ड थोङ्गो़दङ्, हुगी पङ्बु झ्यीन खीत्रङ्ल कुरीक् ॱस्यो़क्को़त्। ॱनी ॱस्येत्न आक्, हील खीत्रङ्गी नेन् दीरङ् मीत् नेम्बे। 12जम्बुलीङ् हीगी लुसे लेमु डस्सी ङे ॱस्येत्न आक् त, खीत्रङ्गी छ्य मीत् स्योक्पे, तेङ् यी़दु युङे लेमु डस्सी ॱस्येत्न, ॱसुम्ब घन्दुक् झ्यीन खीक्की छ्य स्योक् छुगेन्? 13हीगो तेङ् यी़नी मल्ल युङे कोलीमीगी ॱरेबी़ मेन्द, ॱस्यो़त् ॱमीत् छुगेन् बेत्। मी ॱयोङ् ॱसु उक् इगीदु ॱलीत् ॱमत् ॱनोङ बेत्।
14-15कोलीमीगी ॱरेबुल मी ॱसी़ छ्य स्योक्कुक्क हुल फु तक्पे छी थोप्च्ये यो़प्पल धङ्बु मोशागी पक्क झ्यङ्दङ्दु डी़ सो़न ॱस्यीङ्ल ॱनम्ल ताब डस्सी कोलीमीगी ॱरेबु उक् हुगो डस्सीरङ् तक् गोगेन् बेत्। 16जम्बुलीङ्गी मील को़न्ज्योक्की घन्दुक्मे झ्यम्ब छ्यीय जेत्न खोङ् रोरङ्गी ॱरेबु च्यीगी च्यीक्पु दी इक् मत् स्यक्प, तङ्न युङ बेत्। ॱनी ॱरेबुल मी ॱसी़ छ्य स्योक्कुक्क हुगो खरप्ल मीत् डोव, म दीरङ् हुल फु तक्पे छी थोप्केन् बेत्। 17को़न्ज्योक्की खोङ् रोरङ्गी ॱरेबु जम्बुलीङ्गी मी घयेत्ल छ्येप्प को़दु मेम्ब, छी थर्वल तो़न्दु तङ्न युङ बेत्। 18ॱनी मी ॱसी़ खोङ्ल छ्य स्योक्कुक्क हुल छ्येप्प ॱस्युली ॱमीत् खीगेन् बेत्। ॱनी छ्य मीत् स्योक्केल्ल यङ् छ्येप्प फोक् छर युङ्गेन् बेत्। घन्ड हीन् सीन्न हुगी को़न्ज्योक्की ॱरेबु च्यीगी च्यीक्पुल छ्य मत् स्यक्प बेत्। 19हीन जम्बुलीङ्ल मेङ्ग ॱलीत् छर बेत्। ॱनी ॱलीत्न आक्, मी घयेत् म दीरङ् मेन्नक्की ङेम्बे ले झ्यीक्केल्ल ॱसोङ्नी, मेङ्गले एक् मेन्नक् दम्बा झ्यीक्केन् बेत्। हुगो झ्यीनी क, छ्येप्प दी फोक्केन् बेत्। 20मेन्नक्की ले अयेक्प झ्यीक्केङ्गी मी मेङ्गल ॱङीङ्मदुक् झ्यीक्केन् बेत्। ॱनी हुगो मेङ्ग च्याल युङ्न ॱनी, रोरङ्गी ङीब घयेत् दी थोङ् योङ् ॱनो़नी, मेङ्गल ॱस्युली मीत् युङ्गेन् बेत्। 21दीम्बे लम्ल डोगेन् दीरङ् मेङ्गल युङ्गेन् बेत्। हुनी क हुगी ले झ्यीब घयेत् दी को़न्ज्योक्की लम्नी झ्यीन युङ हीम्ब कुरीक्की थोङ्गेन् बेत् सीन्न ॱस्येप्प बेत्।
युहन्ना बप्तीस्की तम् २३-३६
22हीनी येशु धङ् ॱलोप्टुक्प दीब यरुशलेम्नी थो़न्न युङ्नी, यहुदीयागी नङ्दुरङ् धोबा च्यीक् थुक् मी घयेत् बप्तीस्ल ॱलुक्कीन् देप्प बेत्।
23युहन्ना बप्तीस् हुगी यङ्ल सालीम्गी लोन ॱनेगेन् एनोन् झ्यीस्स दीन छ्यु गज्येन् यो़क्केन् झ्यीनी, हुदु मी घयेत् बप्तीस्ल ॱलुक्कीन् यो़प्प बेत्। मी घयेत् दीब अक् हुदुरङ् युहन्ना च्येल्ल बप्तीस्ल स्युक्तु युङ बेत्। 24हुगी यङ्ल युहन्ना बप्तीस् चो़ल्ल ॱमत् ॱस्योर यो़प्प बेत्।
25ॱनी लेन् च्यीक् युहन्नागी ॱलोप्टुक् दीबदङ् मी यहुदी च्यीक् ठी़ ज्यक्पे ढीक्ल केच्च्य थुक्री चीय बेत्। 26हुनी ॱलोप्टुक् दीब युहन्ना च्येल्ल युङ्न खोङ्ल रब्बी, नीज्यरङ्गी खच्चङ् यर्दन् चङ्बी़ पारीदु हज्यरङ् च्येल्ल युङे नीज्यरङ्गी ङीत्ल केच्च्य ॱस्येप्पे मी दीगी हुन्दो पीगीन बप्तीस्ल ॱलुक्कुक्। ॱनी मी घयेत् कुरीक् हुगो च्येल्ल टप् डोगुक् झ्यीब बेत्। 27ॱनी युहन्नागी हुबल तेङ् यी़नी मल्ल को़न्ज्योक्की ॱमत् टेत्न, मील घन्ड अक् ॱमीत् थोप्केन् बेत्। 28ङ को़न्ज्योक्की को़बे च्यप्को़न् ख्रीष्ट् मेन्। ङ खोङ्गी एल्ला एल्ला डोगेल्ल को़न तङ्ज्युङ्। हीगो खीत्रङ्ल ङे एल्लादु ॱस्येप्पेन्। हीगी पङ्बु दी खीत्रङ् बेत्। 29मी घयेत् खोङ् च्याल डोगेन् हुगो मक्पल ॱनम युङ डस्सी बेत्। ङ खोङ्गी दगु हीन्। ॱनी भालील्ल मक्पे केत् दी मक्पे दगु दीगी ॱह घोनी, हुनी गेस गन्दीक्म युङ्गेन् बेत्। हीगो डस्सी दी क हुन्दो ङल मील मीप्पे गेस लङ्गुक्। 30खोङ् ह छ्यीदु छ्यीदु धङ् ङ च्युङ्दु च्युङ्दु युङ् गोगेन् बेत्। 31खोङ् इगीनी मक्की झ्यीनी, कुरीक्ले छ्यीस्स्यो यो़क्केन् बेत्। हीगी जम्बुलीङ्गी मी जम्बुलीङ् ङो़गी झ्यीनी, जम्बुलीङ्गी तम्रङ् क ॱस्यो़क्केन् बेत्। खोङ् तेङ् यी़नी मल्ल युङ झ्यीनी, कुरीक्ले छ्यीस्स्योल यो़क्केन् बेत्। 32खोङ्गी इगीदु घङ् थोङ धङ् घङ् घोव घयेत् पङ्बु झ्यीन ॱस्यो़क्केन् बेत्। ॱनी हुन्दो खोङ्गी ॱस्येप्पे केच्च्य घयेत्ल मी घयेक्की मीत् नेङ्गेन् बेत्। 33मी ॱसी़ खोङ्गी केच्च्यल नेङ्गुक्क हुगी को़न्ज्योक् धक्तेन् हीम्ब ॱह घोन, खोङ्गी पङ्बुल थो़न् छुगेन् बेत्। 34खोङ् म दीरङ् को़न्ज्योक्की तङ्न युङ झ्यीनी, खोङ्गी कङ्जु को़न्ज्योक्की ॱसुङ्स्येत् ॱस्यो़क्केन् बेत्। ॱनी को़न्ज्योक्की खोङ्ल धम्बे थु ॱस्यर्न छ्यक्चो़त् झ्यीन मेम्ब, नुक्रङ् ॱनङ्गेन् बेत्। 35को़न्ज्योक् खोङ् रोरङ्गी ॱरेबुल झ्यम्ब जेक्केन् झ्यीनी, छङ्म थम्ज्येक्की थोक्ल डोगेङ्गी ॱवङ् दी ॱरेबुल ॱनङ्न यो़क्केन् बेत्। 36ॱनी मी ॱसी़ ॱरेबुल छ्य स्योक्कुक्क हुल फु तक्पे छी थोप् छर युङ्गेन् बेत्। ॱनी मी ॱसी़ ॱरेबुल ॱमीत् चीयेक्क हुल को़न्ज्योक्की खोङ्डोक्की छ्येप्प फोक्न, हुगी फु तक्पे छी ॱमीत् थोङ्गेन् बेत् सीन्न ॱस्येप्प बेत्।
Actualmente seleccionado:
युहन्ना 3: LHM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995 Wycliffe Bible Translators, Inc. and Nepal Bible Society