युहन्ना 13
13
येशुगी ॱलोप्टुक् दीबल कङ्ब टी़न टेप्प १-१७
1ॱनी यहुदी घयेत् छ्यीबे धी़रीम् दी ॱलीच्च्येम ॱयेङ्नी, येशुगी ह ङ जम्बुलीङ् हीनी भीन यप् च्याल डोये धी़ ॱलीस्सोङ् ॱनो़ब ॱह घोव बेत्। ॱनी जम्बुलीङ्न यो़क्केन् खोङ् रोरङ्गी मी दीबल हजो़त् थुक् झ्यम्ब झ्यीन युङ बेत्। ॱनी हीनी इक् हरुङ्द झ्यम्ब दी छ्यीदु स्युक् थम थुक् झ्यीन युङ बेत्।
2ॱनी येशु खोङ् रोरङ्गी ॱलोप्टुक् दीबदङ् गोङ्मु सम सदु देप्प बेत्। ॱनी हुले एल्ला शीमोन् इस्करीयोत्की भु यहुदाल येशु डलक्ल तोङ्ज्येमे ॱसीम्ब दी दी़क्की चो दीगी ॱलुक्न यो़प्प बेत्। 3ॱनी येशु रोरङ्गी लक्ल यप्की ॱवङ् छङ्म थम्ज्येत् ॱनङ्न यो़प्प धङ् रोरङ् को़न्ज्योक् च्यानी युङ्नी, यङ् को़न्ज्योक् च्यालरङ् लोक् डोगेन् हीम्ब खोङ्ल ॱस्यो़च्च्ये यो़प्प बेत्। 4हुगो झ्यीनी येशु रोरङ्गी दो़स्स दीनी लोङ्न रोरङ्गी घो़ छ्यी घो़ दी पीक्न स्यक्नी, रुमल् च्यीक् कीप्पल टीब बेत्। 5हुनी ॱनो़च्च्य च्यीक्ल छ्यु योन ॱलोप्टुक् दीब रीदङ् रीगी कङ्ब दी टी़न रुमल् दीगी फीन टेप्प बेत्।
6ॱनी शीमोन् पत्रुस्की लोल ॱलीत्नी, शीमोन्गी खोङ्ल चोव ज्यीन्दक् नीज्यरङ्गी घन्दुक् झ्यीन ङे कङ्ब टी़न टो़क्केन् सीक्केन्? झ्यीब बेत्। 7येशुगी लेल्ल ङे हुन्दो घन्ड झ्यीगुक्क हीगी धो़न् दी रङ्गी तीङ्ला मेन्द, ॱह मीत् घोगेन् बेत् झ्यीब बेत् 8हील पत्रुस्की नीज्यरङ्गी हीगो ॱस्युली मीत् युङ्गेङ्गी ले बेत् झ्यीब बेत्। हील येशुगी ङे टी़न ॱमत् टेत्न, रङ् ङे छ्यल मीत् डोगेन् बेत्। 9ॱनी पत्रुस्की लेल्ल नुक्म हीन्न त, ङे कङ्ब छ्युवक् मेम्ब, लक्प धङ् गो थम्ज्येत् चोव ज्यीन्दक् नीज्यरङ्गी टी़न ॱनङ् झ्यीब बेत्। 10ॱनी येशुगी लेल्ल सी़बु जेङ् टी़ छरे मील कङ्ब मेन्द, टी़त् मीत् गोगेन् बेत्। ॱयोङ् जेङ् चङ्म युङ्गेन् बेत्। खीत्रङ् घयेत् धक्पोक्म यो़क्केन् बेत्। ॱनी म दी खीत्रङ् कुरीक् मीन्दुक् झ्यीब बेत्। 11येशु रोरङ् डलक्ल तोङ्गेन् दी ॱसु बेक्क हुगो ॱस्यो़च्च्ये झ्यीनी, खोङ्गी हीगो झ्यीब हीङ्गो़प्प बेत्।
12हुनी ॱलोप्टुक् दीबे कङ्ब दी टी़ छर्नी, येशु रोरङ्गी घो़ छ्यी घो़ दी घी़न्न रोरङ् दो़स्स दीलरङ् देप्प बेत्। हुनी हुबल खोङ्गी ङे खीत्रङ्ल कङ्ब टी़न टेप्पे धो़न् हीगो खीक्की ॱह घोज्युङक्? 13खीत्रङ्गी ङल चयेलम चोव ज्यीन्दक् सीगुक्। हीगो खुङ्देन् बेत्। ङ हुगोरङ् हीन्। 14ॱनी ङ चोव ज्यीन्दक् चयेलम झ्यीनी इक्, खीत्रङ्गी कङ्ब टी़न टो़क्को़त्न ॱनी, खीत्रङ्गी इक् च्यीक्तङ् च्यीक्की कङ्ब टी़न टो़त् गोगेन् बेत्। 15हीगो खीत्रङ्ल ङे ॱमीदे तो़म्बेन्। हीगो डस्सी खीत्रङ्गी इक् झ्यीत् गोगेन् बेत्। 16हीगी ढीक्ल ङे खीत्रङ्ल गन्दीय ॱस्येत् योङ्। दक्पुले ॱयोक्पु छ्यीया मीत् युङ्गेन् बेत्। लो़न् तोङ्गेल्ले लो़न् खुर्केन् दी छ्यीया मीत् युङ्गेन् बेत्। 17हीगो खीत्रङ्ल ॱस्यो़च्च्ये यो़क्केन् बेत्। ॱनी हीगो डस्सी खीत्रङ्गी झ्यीन युङ्न ॱनी, खीत्रङ् ॱसोदी च्येम्म युङ्गेन् बेत्।
येशु डलक्ल तोङ्गेङ्गी ॱलोप्टुक्की ढीक्ल १८-३०
18हीगो खीत्रङ् कुरीक्की ढीक्ल झ्यीब मेम्बेत्। खीत्रङ् घयेक्की ॱसीम् दी ङल एल्लानीरङ् ॱस्यो़च्च्ये यो़त्। ॱनी हीन्न अक्, ङे दम्बेन्। ॱसुङ्रप्ल थो़ङ्गेन्
ङदङ् दल ङे सम सगेन् च्यीक्रङ् ङे डल लोङ्गेन् बेत् सीक्केन् हीगो डुप् गोगेन् बेत्। (ॱसुङ्रप्की गुल्लु ४१:९)
19ॱनी हीगो डुबे धी़गी यङ्ल ङ ॱसु बेक्क हुल खीत्रङ्गी छ्य स्योक् छुज्ये यो़प्पल ङे हीगो हुन्दो ॱस्येप्पेन्। 20ङे खीत्रङ्ल गन्दीय ॱस्येत् योङ्। ङे को़न तङे मील थोङ् झ्यीक्केन् दीगी ङल अक् झ्यीबल डोगेन् बेत्। ॱनी ङल थोङ् झ्यीक्केन् दीगी ङ तोङ्गेल्ल आक् थोङ् झ्यीबल डोगेन् बेत्।
21हीनी येशु ॱसीम् ठुन ॱलोप्टुक् दीबल हीन्दुक् झ्यीब बेत्। ङे खीत्रङ्ल गन्दीय ॱस्येत् योङ्। खीत्रङ्गी छीक्नी च्यीक्की ङ डलक्ल तोङ्गेन् बेत् सीन्न ॱस्येप्प बेत्। 22ॱनी हील ॱलोप्टुक् दीब ओ़न् थोम्न, ॱसी़ ढीक्ल झ्यीब ब अक् ॱनो़न रोरङ्सो ॱनम्बु च्यीक्तङ् च्यीक्ल तरी चीय बेत्। 23ॱनी येशुगी झ्यम्बे ॱलोप्टुक् दी खोङ्गी लोन देत्न यो़प्प बेत्। 24ॱनी शीमोन् पत्रुस्की हुल खदो ॱमीक्तो ज्युर्न येशुगी ॱसुल सीगुक्क केच्च्य हुगो ढी झ्यीब बेत्। 25हुनी हुगी येशु ङो़ल ख तो़न्न, चोव ज्यीन्दक् हुगो ॱसु बेक्क ॱनी? सीन्न ढीनी, 26येशुगी लेम्बुल ङे ॱसुल ढोप्चीगी खम् पान तीक्कुक्क हुगो बेत् सीन्न झ्यीब बेत्। हुनी येशुगी ढोप्चीगी खम् च्यीक् च्यक्न शीमोन् इस्करीयोत्की भु यहुदा दील टेप्प बेत्। 27ॱनी हुगी ढोप्चीगी खम् दी सेनी, यहुदाल शैतान् स्युनर बेत्। हुनी येशुगी हुल रङ्गी ॱनो़बे ले दी ह ज्योक्सी झ्यीलेत् सीन्न झ्यीब बेत्। 28येशुगी यहुदाल झ्यीबे तम्गी धो़न् हीगो ॱलोप्टुक् ॱयोङ्मा दीबे ॱस्युली ॱह मत् घोव बेत्। 29ङीक्की कङ्ज्यीक्पे पयीसक्की बेक् दी यहुदागी ली़ल खुर्केन् झ्यीनी, उन यरीगी धी़रीम्ल गो़बे गो़ज्येत् येशुगी नोदु तङ हीम्ब न, न टङ्बुल घन्ड मन्ड टो़त्तु तङ हीम्ब? ॱनो़ब छ्यर बेत्। 30ॱनी यहुदागी ढोप्चीगी खम् दी से छर्नी, हुनी ॱस्यर्च्यक् हुगो थो़न्न टप्नर बेत्। ॱनी हुगी यङ्ल नम् ॱरो़ छर हीङ्गो़प्प बेत्।
क ॱसम्ब टेप्प ३१-३५
31यहुदा दी ॱसोङ्नी, येशुगी हीगो ॱस्येप्प बेत्। ह कोलीमीगी ॱरेबुल तो़प्प छ्यीम्मु युङ्गेन् बेत्। हुनी खोङ्गी लम्नी को़न्ज्योक्ल आक् युङ्गेन् बेत्। 32ॱनी खोङ्गी लम्नी को़न्ज्योक्ल युङ्न ॱनी, को़न्ज्योक् च्येन्नी इक् खोङ्ल तो़प्प युङे लेमु जेक्केन् बेत्। हीगो ह ज्योबा डुप्केन् बेत्। 33भीजसो, खीत्रङ्दङ् दल ह ङ ॱरीप्चो़त् च्यीक्रङ् दो़क्केन् बेत्। हुनी खीत्रङ्गी ङ ॱयेङ्गेन् बेत्। यहुदी छ्यीया घयेत्ल ङे खीत्रङ् ङ झ्यीस्सल युङ् ॱमीत् छुगेन् बेत् सीन्न ॱस्येप्पेन्। ॱनी खीत्रङ्ल आक् हीगोरङ् सीक्केन्। 34खीत्रङ् नङ्दु च्यीक्तङ् च्यीक्ल झ्यम्ब झ्यीच्च्येगी ढीक्ल क ॱसम्ब च्यीक् टो़क्केन्। हीगो खीत्रङ्ल ङे झ्यम्ब झ्यीब डस्सी खीत्रङ् नङ्दु उक् च्यीक्तङ् च्यीक्ल झ्यम्ब झ्यीज्यीत्। 35हीनी हस्सो़त् खीत्रङ् नङ्दु झ्यम्ब झ्यीत्री चीय दीगी मी ॱयोङ्मा घयेक्की खीत्रङ् ङे ॱलोप्टुक् हीम्ब ॱह घो छुगेन् बेत् झ्यीब बेत्।
पत्रुस्ल ॱस्येप्पे ॱङो़स्स्यी ३६-३८
36ॱनी शीमोन् पत्रुस्की येशुल चोव ज्यीन्दक् नीज्यरङ् घल झ्यो़ङ्गेन् सीक्केन् ॱनी? सीन्न ढीब बेत्। ॱनी हील येशुगी ङ झ्यीस्सल खीत्रङ् तीङ्ला मेन्द, हुन्दो युङ् ॱमीत् छुगेन् बेत् झ्यीब बेत्। 37ॱनी पत्रुस्की खोङ्ल चोव ज्यीन्दक् हुन्दो नीज्यरङ्दङ् दल ङ घन्डल युङ् ॱमीत् छुगेन् बेत् सीक्केन्? चोव ज्यीन्दक् नीज्यरङ्गी ढीक्ल ङ ॱस्यी गो़रङ् ॱस्यर्न आक्, ॱस्यीगेन् झ्यीब बेत्। 38ॱनी येशुगी लेल्ल खो़त् ङे ढीक्ल ॱस्यीगेन् सीक्केन्? ङे रङ्ल गन्दीय ॱस्येत् योङ्। झ्यबु भो़त् भो़त्ले एल्ला रङ्गी ङल लेम्म ॱसुम् हुगो ङु ॱमीत् ॱस्यीबेत् सीन्न सीक्केन् बेत्।
Actualmente seleccionado:
युहन्ना 13: LHM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995 Wycliffe Bible Translators, Inc. and Nepal Bible Society