युहन्ना 1
1
को़न्ज्योक्की ॱसुङ्स्येत् कोलीमील झ्युङ १-१८
1ॱङो़न् धङ्बुनीरङ् को़न्ज्योक्की ॱसुङ्स्येत् यो़क्केन् बेत्। ॱनी खोङ् को़न्ज्योक्तङ् दल यो़क्केन् बेत्। ॱनी को़न्ज्योक् धङ् खोङ् च्यीक्प बेत्। 2धङ्बु खुङ्नीरङ् ॱसुङ्स्येत् को़न्ज्योक्तङ् दल यो़क्केन् बेत्। 3ॱनी ॱसल यो़प्प ॱनम्ल यो़प्प घयेत् जेङ् को़न्ज्योक्की खोङ् च्येन्नी छ्यादु ची़प्प बेत्। खोङ् च्येन्नी ॱमत् छ्याब च्यीक्तङ् मीप्प बेत्। 4ॱङो़न् धङ्बुनीरङ् खोङ् उज्येन् घयेत् छ्येस्से छ्येत् खुङ् दी बेत्। ॱनी खोङ् मी घयेत्ल मेङ्ग बेत्। 5खोङ् मेन्नक्ल बर्केन् बेत्। ॱनी मेन्नक्की मेङ्ग हुगो क च्यो़त् ॱमत् छुब बेत्।
6को़न्ज्योक्की को़न तङे मी युहन्ना बप्तीस् थो़न्न युङ बेत्। 7ॱनी हुगी मी घयेत्ल मेङ्ग ज्यी़ तो़न्न, मी कुरीक्की मेङ्गल छ्य स्योक् छुज्ये यो़प्पल हुगो मेङ्गे ढीक्ल दीम्बे केच्च्य ॱस्यो़त्तु थो़म्ब बेत्। 8म दी रोरङ् मेङ्ग मेम्ब, मेङ्गे ढीक्ल पङ्बु झ्यीन ॱस्यो़क्केङ्गी मी बेत्।
9हुनी हुगी मेङ्ग हुगो जम्बुलीङ्ल ॱस्यरी थो़म्ब बेत्। ॱनी खोङ् मी घयेक्की ॱसीम्बे ॱमीक् भीदु ची़क्केङ्गी मेङ्ग खुङ् दी बेत्। 10ॱस धङ् ॱनम् म दीरङ् जेङ् धङ्बु खोङ्गी लम् ज्यी़त्नी छ्यादु ची़प्प बेत्। ॱनी हीन्न अक्, खोङ् जम्बुलीङ्ल युङ्नी, मी घयेक्की खोङ् ङु ॱमत् ॱस्यीब बेत्। 11खोङ् म दी रोरङ्गी मीस्सीर् यहुदी घयेत् च्याल युङ बेत्। ॱनी युङ्न अक्, मीस्सीर् घयेक्की खोङ्ल ॱमत् ॱसम्ब बेत्।
12ॱनी मी ॱसु ॱसी़ खोङ्ल ॱसम्न छ्य स्यक्न युङ्दुक्क हुब घयेत् को़न्ज्योक्की भीजल युङ्ज्ये यो़प्पे ॱहक् खोङ्गी टेप्प बेत्। 13को़न्ज्योक्की भीजल युङ्गेन् बेत् सीक्केन् हीगो मीच्च्यी़त् छ्येप्पे लुस डस्सी मेम्बेत्। कोलीमीगी लुसे लेमु डस्सी इक् मेम्बेत्। अबी छ्योगो़ ॱलो़लङ्गी झ्यीबे लेगी इक् मेम्बेत्। हीगो को़न्ज्योक् च्यानी झ्युङे लेगी युङ्गेन् बेत्।
14ॱनी हुगी ॱसुङ्स्येत् दी क कोलीमील कीन युङ्न हज्यरङ् मी घयेक्की घुङ्दु स्युब बेत्। खोङ् म दीरङ् यप् को़न्ज्योक्की ॱरेबु च्यीगी च्यीक् हीम्ब खोङ्ल यप्की तो़त्वङ् छ्यीम्मु ॱनङ्न यो़प्प ङीक्की थोङ्ज्युङ्। खोङ्ल यप् च्यानी झ्युङे थुज्यी धङ् दीम्ब छङ्न यो़प्प ङीक्की ॱस्यीज्युङ्।
15ॱनी खोङ्गी ढीक्ल युहन्ना पङ्बुल थो़न्न मी घयेत्ल हीन्दुक् सीन्न केत् ज्यब बेत्। ङे खीत्रङ्ल ॱस्येत्न टो़क्केन् दी फोगो बेत्। फोगो ह ङले तीङ्ल थो़ङ्गेन् बेत्। ॱनी म दी ङले एल्ला यो़क्केन् झ्यीनी, ङले छ्यीया यो़क्केन् बेत् सीन्न ॱस्येप्प बेत्। 16खोङ्गी थुज्यीगी भङ्जेत्नी हज्यरङ् घयेत्ल थुज्यीगी थोक्ल आक् थुज्यी थोप्न यो़क्केन् बेत्। 17छ्यो़डीम् म दी को़न्ज्योक्की मोशागी लम्नी ॱनङ बेत्। ॱनी थुज्यी धङ् दीम्ब दी येशु ख्रीष्ट्की लम्नी युङ बेत्। 18को़न्ज्योक् मी ॱसी़ इक् थोङ् ॱमत् ॱनोङ बेत्। यप् रोरङ्दङ् दल यो़क्केन् ॱरेबु च्यीगी च्यीक्पु दीगीरङ् को़न्ज्योक् घन्दुक् झ्यीब यो़प्प बेक्क हुगो मी घयेत्ल तो़न्न युङ बेत्।
युहन्ना बप्तीस् ख्रीष्ट् मेम्बे ढीक्ल १९-२८
19यरुशलेम्गी यहुदी छ्यीया घयेत् दीबे छ्यो़प्पो़न् यरीब धङ् लेवीगी ज्यी़त् यरीबल हुगी युहन्ना हुगो ॱसु हीन् सीगुक्क हुल तम् ढीलेत् सीन्न तङ बेत्। ॱनी हुब फीन्न हुबे युहन्नाल खो़त् ॱसु हीन् सीगो़प्प? सीन्न ढीब बेत्। 20ॱनी युहन्नागी ङ को़न्ज्योक्की को़बे च्यप्को़न् ख्रीष्ट् दी मेन् सीन्न स्युङ्ज्योङ् ॱस्येप्प बेत्। 21ॱनी हुबे खो़त् हुगो मेन्न, को़न्ज्योक्की कलुङ् ॱस्यो़क्केन् एलीया दी हीम्ब ॱनी? सीन्न ढीब बेत्। ॱनी युहन्नागी ङ हुगो ओक् मेन् सीन्न ॱस्येत्नी ॱनी, यङ् हुबे हुगो ओक् मेन्न ॱनी, खो़त् ङीक्की रीगो झ्यीबे को़न्ज्योक्की कलुङ् ॱस्यो़क्केन् दी हीम्ब ॱनी? सीन्न ढीब बेत्। ॱनी यङ् युहन्नागी ङ हुगो ओक् मेन् झ्यीब बेत्। 22ॱनी फीच्च्य हुबे हुगो ओक् मेन् सीन्न ॱनी, खो़त् ॱसु दी घन्ड हीन् सीगो़प्प ॱनी? ङीत् तोङ्गेन् हुबल ङीत् घन्डे लेम्बु खुर्न ॱस्यो़च्च्ये? झ्यीब बेत्। 23हीनी क युहन्नागी कलुङ् ॱस्यो़क्केन् यशैयागी ॱङो़स्स्यील ॱस्येत्न यो़क्केन्,
पक्क झ्यङ्दङ्दु केत् ज्यक्केन् च्यीक् थो़न्न हुगी केच्च्य दील चोव ज्यीन्दक् झ्यो़न्से लम् दीन्दीक्म सो़ज्यीत् सीक्केन् दी ङ हीन् झ्यीब बेत्। (यशैया ४०:३)
24ॱनी हुबे दल फरीसी छ्योगी मी इक् यो़प्प बेत्। 25ॱनी फरीसी दीबे युहन्नाल खो़त् को़न्ज्योक्की को़बे च्यप्को़न् ख्रीष्ट् दी इक् मेन् सीक्केन्। ॱनी एलीया अक् मेन् सीक्केन्। ॱनी कलुङ् ॱस्यो़क्केन् हुगो ओक् मेन् सीक्को़त्न ॱनी, घन्डल मी घयेत् बप्तीस्ल ॱलुक्को़प्प? झ्यीब बेत्। 26ॱनी युहन्नागी लेम्बुल ङे त छ्यी़ बप्तीस्लरङ् ॱलुक्को़त्। ॱनी खीत्रङ् मी घयेक्की घुङ्दु ॱयोङ् च्यीक् यो़क्केन् बेत्। हुन्दो खोङ् खीत्रङ्गी ङु ॱमीत् ॱस्यीगेन् बेत्। 27खोङ् ह ज्योक्पु थो़ङ्गेन् बेत्। ॱनी ङ खोङ्गी जुत्ते लेस् ॱस्यीक्केन्जो़त्ल आक् ॱमीत् ॱनेब यो़त् झ्यीब बेत्। 28हीगी केच्च्य हीगो यर्दन् चङ्बी़ पारी बेथानीदु युहन्नागी मी घयेत् बप्तीस्ल ॱलुक्पे धी़गी यङ्ल झ्युङ बेत्।
युहन्ना बप्तीस्की येशु ज्यी़ तो़ङ्गेन् २९-३४
29नेम्बेत् दी येशु युहन्ना रोरङ् च्येल्ल युङ थोङ्नी, युहन्नागी मी घयेत्ल तो़दे फान युङ्गेन् फोगो को़न्ज्योक्की तङे लुक्टुक् जम्बुलीङ्गी मी घयेक्की दीक्प खुर्तु युङ्गेन् दी बेत्। 30फागी ढीक्ल खीत्रङ्ल ङे एल्ला आक् ॱस्येप्पेन्। ङे तीङ्ल थो़ङ्गेन् खोङ् धङ्बु ॱङो़न्नीरङ् यो़क्केन् झ्यीनी, ङले गज्येङ्गी छ्यीया यो़क्केन् बेत् झ्यीबेन्। 31ॱनी एल्ला ङल अक् त खोङ् ॱसु हीम्ब हुगो गन्दीक्म ॱस्यो़च्च्ये मत् युङ्। ॱनी म दी ङ इस्राएली घयेत्ल खोङ् ङोस्स्यीन् टो़च्च्येगी ढीक्ल मी घयेत् छ्यी़ बप्तीस्ल ॱलुक्तु तङ्ज्युङ् सीन्न झ्यीब बेत्।
32ॱनी युहन्नागी हरुङ् पङ्बु झ्यीन ॱस्यो़क्केन् बेत्। इगी तेङ् यी़नी धम्बे थु पुक्मु डस्सील युङ्न खोङ्ल घप्न दो़प्प ङे थोङ्ज्युङ्। हुनी क खोङ् ख्रीष्ट् हीम्ब दी ङे ॱह घोज्युङ्। 33स्येन् ङल अक् त एल्ला खोङ् ॱसु हीम्ब हुगो ॱस्यो़च्च्ये झ्युङ्मोङ्। ॱनी ङ छ्यी़ बप्तीस्ल ॱलुक्तु तोङ्गेन् दीगी रङ्गी मी ॱसुल धम्बे थु घप्न दो़प्प थोङ्गुक्क हुगो हस्सो़त् मी घयेत्ल धम्बे थुगी बप्तीस्ल ॱलुक्केन् दी बेगो सीन्न खोङ्गी ॱसुङ्ज्युङ्। 34ॱनी हीगो खुङ् तान युङ ङे थोङ्ज्युङ्। हीगी ढीक्ल ङ पङ्बु यो़त्। खोङ् गन्दीय को़न्ज्योक्की ॱरेबु दीरङ् बेत् सीन्न युहन्नागी ॱस्येप्प बेत्।
येशुगी ॱलोप्टुक् दम्बे तम् ३५-५१
35नेम्बेत् दी यङ् युहन्ना बप्तीस् धङ् रोरङ्गी ॱलोप्टुक् ॱङी हुदु दो़प्पे यङ्ल 36रोरङ्सो़ फच्चो़त्नी फल्ल येशु डोव थोङ्नी, युहन्नागी फोगो को़न्ज्योक्की तङे लुक्टुक् दी बेत् सीन्न ॱस्येप्प बेत्। 37ॱनी हीगो ॱह घोनी, ॱलोप्टुक्प ॱङीबु दी येशुगी तीङ्ल टप्नर बेत्। 38ॱनी फच्चो़त्नी येशुगी तक्ल लोक्न तेन, हुब ॱङीबुल खीत् घन्ड झ्यीत्तु युङ? सीन्न ढीब बेत्। ॱनी हुबे लेल्ल रब्बी, हीगी धो़न् दी चयेलम नीज्यरङ्गी स्युसे स्युगङ् दी घन यो़प्प? सीन्न ढीब बेत्। 39ॱनी येशुगी डो तदु सीन्न ठीक्प बेत्। हुगी यङ्ल गोङ्ज्यो छ्युजो़त् स्यी छ्यक्चो़त् ॱलीब हीङ्गो़प्प बेत्। ॱनी हुगी गोङ् दी हुदुरङ् देप्प बेत्। 40हुब ॱङीबु च्यीक् शीमोन् पत्रुस्की फ च्यीक्की पी़न् अन्द्रीयस् हीङ्गो़प्प बेत्।
41हुनी अन्द्रीयस् ॱस्यरी रोरङ्गी पी़न् शीमोन् दी च्याल फीन्न, ङीत्ल मसीहा दी ठेच्च्युङ् सीन्न ॱस्येप्प बेत्। ॱनी मसीहागी धो़न् दी को़न्ज्योक्की को़बे च्यप्को़न् ख्रीष्ट् बेत्। 42हुनी अन्द्रीयस्की येशु च्याल शीमोन् ठीक्न युङ बेत्। युङ्नी, येशुगी शीमोन् दील तेन युहन्नागी भु शीमोन् रङ्गी मीङ् दी ह हीनी झ्यीब दी केफास् युङ्गेन् बेत् झ्यीब बेत्। हीगी धो़न् दी दो तीङ्दोल सीक्केन् बेत्।
43हीनी नेम्बेत् दी येशुसो गालीलाल लम् स्युन फीन्नी, फीलीप् सीक्केन् मी च्यीक् ठेप्प बेत्। ॱनी हुल येशुगी ङदङ् दल ङे ॱलोप्टुक्ल ॱस्योक् झ्यीब बेत्। 44फीलीप्, अन्द्रीयस् धङ् पत्रुस् बेथ्सेदा सार्की मी हीङ्गो़प्प बेत्।
45ॱनी यङ् तीङ्ला फीलीप्ल नथानेल् सीक्केन् मी च्यीक् ठेप्प बेत्। हुल फीलीप्की ख्रीष्ट्की ढीक्ल मोशागी ढीबे छ्यो़डीम्ल धङ् कलुङ् ॱस्यो़क्केन् घयेक्की यीगील यो़प्प दी ह तादुक्। हुगो ङीत्ल ठेच्च्युङ्। हुगो नासरत् सार्की युसुफ्की ॱरेबु येशु बेत् सीन्न ॱस्येप्प बेत्। 46ॱनी हुल नथानेल्की हुन्दुक् झ्यीबे नासरत्नी इक् गागी ढङ् थो़ङ्गो़प्प बेक्कक् ॱनी? सीन्न झ्यीब बेत्। ॱनी हुल फीलीप्की हीन् धङ् मेन् रङ् तदु डो सीन्न ठीक्न युङ बेत्।
47ॱनी हुब येशु च्येल्ल युङ्नी, येशुगी उन यो़प्पे मी घयेत् दील तो़दे, हीगी नथानेल् हीगो इस्राएली खुङ्देन् ॱएलम ॱस्युली मीप्पे मी दी हीगो बेत् झ्यीब बेत्। 48ॱनी नथानेल्की येशुल ङे ॱसीम्ब नीज्यरङ्गी घन्दुक् झ्यीन ॱह घोज्युङ? सीन्न ढीनी ॱनी, येशुगी लेम्बुल फीलीप्की रङ्ल डो सीरले त एल्ला रङ् अप्ले दोङ्बी़ होक्तु दो़प्प ङल ॱस्यो़च्च्ये झ्युङ् झ्यीब बेत्। 49हीनी नथानेल्की रब्बी नीज्यरङ् को़न्ज्योक्की ॱरेबु इस्राएली घयेक्की ज्याबु ॱङो़न्ने दीरङ् बेत् झ्यीब बेत्। 50ॱनी येशुगी हुल खो़त्ल ङे दोङ्बी़ होक्तु दो़प्प ॱस्यो़च्च्ये झ्युङ् झ्यीबलरङ् खोक्की ॱह घोन छ्य स्यक्प हीम्ब? तीङ्ला हीले त यीक् छ्यीबा रङ्गी थोङ्गेन् बेत् सीन्न, 51खोङ्गी हरुङ्द हीन्दुक् ॱसुङ बेत्। ङे खीत्रङ्ल गन्दीय ॱस्येत् योङ्। तेङ् यी़गी गोच्च भीन, इगीनी मल्ल कोलीमीगी ॱरेबु च्येल्ल को़न्ज्योक्की भङ्ज्येम्ब घयेत् यल्ल मल्ल डोव खीत्रङ्गी थोङ्गेन् बेत् झ्यीब बेत्।
Actualmente seleccionado:
युहन्ना 1: LHM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995 Wycliffe Bible Translators, Inc. and Nepal Bible Society