Yṳ̂ha Ta̤hî̌bǎ wǐ dǒ alô̤mô̤̌
Ta̤hî̌bǎ wǐ dǒ alô̤mô̤̌
Lî̤ ta̤sǎlě̤we̤kè Yṳ̂ha hǒtôbǎ nî̌ a hî̌lṳ̌ kû̌ Yeshǔ Khrǐ mî̌ Cǒmara alě̤ayô̤̌ tûjû̌pwa̤ tôpwa̤. “A hè htû Kòyòphûkhû dě a hè ô̌htûpwa̤ dǒ pakla.” (1:14) pô̤̌ lî̤ hǒtôbǎ hî̌ kû̌, kòyò wě̤ lî̤hǒtôbǎ mî̌ pô̤̌khô pwa̤dô̌lî̤ tokhlǒ gǔ yṳ̌ǎ kû̌ Yeshǔ mî̌ pwa̤ma̤hǎplǎ kòyò dǒ Cǒmara olò̤ kû̌ a gǔ hè pě nu tôpwa̤, htokhôtô̤̌ a mî̌ Cǒmara aphû̌khû tôpwa̤, dě dǒ asî yṳ̌ǎ lû̌û akhû̌akhîdě a gǔ nǐ̤bǎ lô̌khô yôla htûpwa̤, kòyò wě̤ bǎ asî pô̤̌nu. (20:31).
Bǎ lî̤hǒtôbǎ hî̌phlôwǐ bǎ hto kû̌ Yeshǔ mî̌ Cǒmara alě̤ayô̤̌ tûjû̌pwa̤ tôpwa̤, a hî̌lṳ̌ wǐ ta̤ma̤ cô̌klǐcô̌sè pṳ̂̌mi̤shicǒ dě ta̤ma̤ cô̌klǐcô̌sè nî̌ a dǔlṳ̌ kû̌ Yeshǔ mî̌ pwa̤phǔhtò̌ kòyò tôpwa̤ hǒ, htokhôtô̤̌ a mî̌ Cǒmara aphû̌khû tôpwa̤ hǒ. Htodě a shôbǐǐlṳ̌pô̤̌ bǎ ta̤ma̤ cô̌klǐcô̌sè tokhlǒ yô̤̌mûyô̤̌sǎ. Kòyò tokhlǒkhlǒ nu, a yṳ̌nǐ̤nǎ̤nǐ̤ Yeshǔ hî̌tè, dě kòyò gû̌ lû̌kò hî̌tè awe̤akè, a shôbǐǐlṳ̌ bǎ lî̤hǒtôbǎ akû. Htodě a wě̤lṳ̌ bǎ pô̤̌ kû̌ kòyò sǎkhî̌ Yeshǔ dě kòyò htè̌shěshǔ yǎ tokhlǒ awe̤akè.
Bǎ kòyò pṳ̂̌ Běcǎ Yeshǔ nò̌khôtô̤̌ nutôsa kû̌ kòyò ma̤sihtò̌ lû̌û nò̌khôtô̤̌ nutôwô̤ awe̤akè nu, kòyò wě̤mǎnǎ a bǎ amèdû̌ 13:17 akû nu. Htokhôtô̤̌ a kû̌ akhôphijǎ tokhlǒ a ta̤bǒshû̌khǎkhôǐ lû̌û, a ta̤tîwî̌tòwò nǎ tokhlǒ kû̌ a ǐkhû̌ǐǎǐ asî tokhlǒ awe̤akènu kòyò wě̤mǎnǎ dô̌ bǎnu. Amèdû̌ dǒ nô̌kòlǒ tokhlǒnu a shôbǐǐlṳ̌ bǎ kû̌ kòyò pṳ̂̌ Yeshǔ kû̌ Khwǐpǐlǎ gwè̌ kè̌kè̌ lû̌û awe̤akè, kòyò ma̤sihtò̌ lû̌û awe̤akè kû̌ ata̤si ihtǒhtûpwa̤ getîkhî awe̤akè, kû̌ a si ihtǒ getîkhî htonu a dǔlṳ̌ bǎ anǎ̤ kû̌ akhôphijǎ tokhlǒ awe̤akè.
Khûyṳ̂ha wě̤ bè̌dû̌ pa nǐ̤bǎ tutṳ̌ ta̤htûpwa̤ tûjû̌pwa̤ asû nǐ̤kwe nu dǒ Khrǐ a ô̌ awe̤akè. Kòyò dǒ a yṳ̌ǎ kû̌ Yeshǔ mî̌ klè̌, ta̤tě̤ta̤mè̤̌, kû̌ ta̤htûpwa̤ tokhlǒnu, yôla htûpwa̤ asûnu a gǔ htûhǒ ata̤ sahtò̌ khònò̤̌ hènè ajû̌jû̌ ahtuhtu hǒ. Khûyṳ̂ha a ta̤dǔlṳ̌phlô wô̌ tôcǒmî̌ bǎ a sǎyṳ nè̌lṳ̌ bǎ kòyò kû̌ dǒsû̌dǒsò̌ awe̤akè tokhlǒ akhanu, a noǎ dô̌nè bǎ kòyò kû̌ tě̤ta̤ dǒ kòyò lǎ̤klô noǎ a lṳmṳ̌khǐ lṳmṳ̌lî tokhlǒ. Hî̌kûmṳ̂̌mò̌, a noǎ bǎ kòyò kû̌ shi, mû̌, ta̤lî, pwa̤kè̌ǐsû̌phû̌, sû̌phû̌ tokhlǒ, sîpî̌mṳ̌, kû̌ sîpî̌sǎ tokhlǒ.
Ta̤hî̌bǎ tôtô̤̌ kû̌ tôtô̤̌
Ta̤hî̌bǎ wǐ dǒ alô̤mô̤̌ 1:1-18
jushi Khûyṳ̂ha kû̌ Běcǎ Yeshǔ akhôphijǎ awǐlǒ tokhlǒ 1:18-51
Yeshǔ a ta̤phǐta̤ma̤ 2:1-12:50
Dǒ gutṳ̌kò tôshô̌bě bǎ Wî̤̌yarǔshôle akû kû̌ awò̤shî̌ tokhlǒ 13:1-18:42
Běcǎ Yeshǔ si ihtǒ getîkhî, dǔlṳ̌tîkhî kòyò kû̌ anǎ̤, kû̌ a gehtò̌tîkhî dǒ mǒkhû̌ awe̤akè 20:1-31
Yeshǔ dǔlṳ̌ bǎ sô̌ anǎ̤ kû̌ kòyò dǒ Galilè̤̌gǎ 21:1-25
Actualmente seleccionado:
Yṳ̂ha Ta̤hî̌bǎ wǐ dǒ alô̤mô̤̌: KXF
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Wycliffe USA