ᤗᤢᤁᤠ 12
12
ᤛᤠᤶᤍᤡᤱ ᤏᤢ ᤜᤠᤱᤜᤠᤱ ᤔᤧᤵᤔᤠ
(ᤔᤳᤋᤡ ᥇᥆:᥈᥌-᥉᥉)
1ᤂᤧᤵᤔᤥ ᤏᤡ᤺ᤳᤔᤧᤴᤍᤧᤳᤋᤣ ᤜᤧᤴᤇᤡᤱᤅᤠᤱᤎᤥ ᤔᤏᤠᤜᤠ᤹ ᤆᤡᤀᤧᤳ ᤆᤡᤀᤧᤳ ᤔᤧᤀᤧᤳᤇᤡᤱᤗ ᤔᤧᤈᤢᤵᤛᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤂᤧᤴ ᤛᤡᤍᤠ᤹ ᤑᤠ᤹ᤀᤡᤴ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴᤗᤥ॥ 2ᤔᤧᤎᤠ᤺ᤵᤏᤧᤴᤗ ᤑᤠ᤹ᤀᤠᤱ ᤋᤧᤵᤋᤧᤀᤠᤱ ᤁᤧᤘᤠ᤹ᤒᤠ ᤐᤠᤴ ᤀᤡᤃᤪ ᤁᤢᤛᤡᤱ ᤏᤡ᤺ᤳᤔᤧᤍᤧᤳᤏᤧᤴᤗ ᤑᤠ᤹ᤀᤠᤱ ᤔᤠ᤹ᤖᤧᤀᤠᤱ ᤁᤧᤘᤠ᤹ᤒᤠ ᤐᤠᤴ ᤌᤣᤀᤠᤱ ᤜᤥᤵᤗᤥ॥ 3ᤂᤧᤏᤧ᤹ ᤂᤠᤃᤧᤔᤠᤰᤐᤠᤀᤥ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤠᤃᤧᤀᤥ᤺ᤵᤐᤠᤀᤥ ᤀᤡᤱᤓᤴ ᤆᤥᤰᤗᤥ॥ ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤜᤡᤶᤛᤡᤃᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤜᤡᤶ ᤛᤶᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤀᤡᤱᤓᤴ ᤆᤥᤰᤗᤥ॥”
ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤔᤠ ᤐᤥᤱ
(ᤔᤳᤋᤡ ᥇᥆:᥈᥎-᥉᥇)
4“ᤀᤠᤴᤈᤢᤶᤛᤣ. ᤜᤠ᤺ᤳᤗᤧ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴᤗᤰ ᤛᤧᤵᤔᤠᤀᤠᤱᤎᤥ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴ. ᤂᤧᤴᤏᤢ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥ 5ᤁᤖ ᤜᤠ᤺ᤳᤏᤢ ᤁᤡᤔᤠ ᤐᤥᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤳᤏᤡᤱᤗᤥ—ᤜᤠ᤺ᤳᤗᤧ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤧᤖᤢᤀᤠᤱ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠ ᤛᤢᤰᤋᤢ᤹. ᤂᤢᤏᤧ᤹ᤏᤢᤀᤣ ᤁᤡᤛᤧᤶᤔᤧ᤹ᤀᤥ᥄
6“ᤅᤠᤛᤡ ᤆᤢᤈᤢᤰᤛᤠ ᤐᤢᤜᤠ᤹ᤖᤧ ᤕᤠᤱᤏᤧᤳᤇᤡ ᤔᤧᤗᤧᤰᤏᤧᤴᤒᤡ᥅ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤠᤳᤋᤡᤴᤏᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤴᤗᤥ॥ 7ᤂᤡᤏᤡ᤹ ᤌᤧᤃᤣ᤺ᤰᤁᤥᤒᤠ ᤁᤠᤰ ᤌᤧᤃᤣ᤺ᤰᤀᤡᤜᤠ᤹ ᤂᤢᤏᤧ᤹ ᤏᤡᤖᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ᥄ ᤂᤡᤏᤡ᤹ᤃ ᤕᤖᤡᤰ ᤆᤢᤈᤢᤰᤛᤠ ᤐᤢᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤁᤧᤈᤥᤃᤡᤖᤥ॥”
ᤗᤧᤵᤔᤡ ᤔᤧᤶᤒᤥᤱᤔᤏᤠ ᤗᤠᤕᤥ
(ᤔᤳᤋᤡ ᥇᥆:᥉᥈-᥉᥉)
8“ᤀᤠᤸᤗ ᤂᤧᤵᤛᤧᤶᤔᤧ᤹ᤀᤥ. ᤜᤠ᤺ᤳᤗᤧ ᤔᤏᤠ ᤋᤃᤡ ᤕᤧᤛᤢᤴ ᤏᤛᤠᤴ ᤆᤥᤃᤢᤱ ᤗ᤹ᤖᤡᤰ ᤐᤠ᤺ᤳᤋᤢ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤴ ᤋᤠ᤺ᤰᤋᤢᤱᤗᤥ॥ 9ᤁᤖ ᤜᤠ᤺ᤳᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤀᤡᤱᤃᤠ᤹ ᤏᤠ᤹ᤀᤠ. ᤀᤡᤱᤃᤠ᤹ᤀᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤏᤠ᤹ᤖᤢᤱᤗᤥ॥
10“ᤜᤧᤰᤁᤩᤠᤱ ᤜᤠ᤺ᤳᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ᤹. ᤂᤧᤸᤗᤧ ᤗᤧᤵᤔᤡ ᤂᤥᤔᤠ ᤛᤢᤰᤋᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤔᤧᤄᤥᤛᤢᤴᤗᤥ॥
11“ᤔᤏᤠᤜᤠ᤹ᤖᤧ ᤂᤡᤏᤡ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤠᤛᤧᤴ ᤗᤥ᤺ᤶᤔᤠᤖᤧ ᤗᤠᤃᤡ ᤁᤧᤶᤍᤣ᤹ᤖᤡᤸᤗᤧ. ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤧᤔᤠ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ 12ᤜᤠᤒᤠ ᤂᤧᤴ ᤕᤧᤶᤔᤥ ᤌᤣ ᤐᤠ᤺ᤵᤔᤠ ᤐᤥᤱ ᤑᤠ᤹ᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤜᤢ᤹ᤖᤡ᤹ᤖᤥ॥”
ᤀᤍᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤴ
13ᤜᤧᤰᤁᤩᤠᤱ ᤂᤧᤴ ᤔᤏᤠᤗᤢᤶᤔᤥᤗᤠᤶ ᤌᤡᤰ ᤔᤏᤠ᤺ᤸᤗᤧ ᤕᤧᤛᤢᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤶᤓᤢ᤹ᤖᤧ ᤕᤠᤱᤛᤠᤁᤢᤴᤎᤣᤀᤥᤒᤠ ᤀᤡᤱᤃᤠ᤹ ᤀᤠᤗᤰᤁᤡᤴ ᤐᤡᤀᤠᤖ ᤑᤠ᤹ᤀᤠᤱ ᤔᤧᤳᤋᤠᤱ ᤐᤡᤖᤠᤱᤅᤧ᤹ᤀᤥ॥”
14ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤗᤢᤱᤅᤠᤀᤣ. ᤜᤠ᤺ᤳᤗᤧ ᤀᤡᤱᤃᤠ᤹ ᤂᤡᤴᤇᤡ᤹ ᤗᤢᤶᤔᤥ ᤕᤠᤱᤛᤠᤁᤢᤴᤎᤣ ᤁᤧᤜᤠᤒᤠ ᤁᤧᤒᤡᤒᤠ ᤆᤥᤃᤠᤱ ᤀᤡᤃᤪ ᤂᤠᤛᤧᤴᤗᤥ᤺ᤶᤒᤠ ᤆᤥᤃᤠᤱᤒᤣ᥅” 15ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤂᤡ᤺ᤶᤕᤰ ᤆᤥ᤺ᤰᤔᤥᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤔᤏᤠ᤺ᤸᤗᤧ ᤁᤳᤋᤢᤒᤠ ᤔᤢᤸᤗᤢᤰ ᤕᤠᤱᤛᤠᤁᤢᤴᤎᤣᤀᤥ ᤂᤢᤏᤧ᤹ ᤛᤧᤰᤂᤠᤒᤠ ᤁᤢᤜᤡᤱᤔᤴᤏᤡᤴ ᤔᤧᤘᤠ᤹ᤏᤧᤴᤗᤥ॥”
16ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤌᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤸᤗᤧ ᤕᤖᤡᤰ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤛᤢᤵᤛᤢ᤹ᤖᤥ॥ 17ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ. ‘ᤀᤠᤸᤗ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤣ᥅ ᤁᤴ ᤆᤠᤜᤠ᤹ ᤕᤢᤱᤔᤠᤍᤧᤴᤏᤣ ᤜᤥᤵᤗᤥ॥’ 18ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤀᤡ᤺ᤳᤋᤢ. ‘ᤀᤠᤸᤗ ᤀᤡᤱᤃᤠ᤹ ᤀᤰᤂᤣ ᤆᤥᤃᤢᤱ—ᤀᤢᤴᤇᤥ᤺ᤴᤒᤠ ᤆᤠ ᤕᤢᤱᤍᤧᤴᤜᤠ᤹ ᤕᤛᤢᤱᤅᤠᤱ ᤁᤢᤛᤱ ᤕᤶᤒᤠ ᤆᤠ ᤕᤢᤱᤍᤧᤴᤜᤠ᤹ ᤆᤥᤃᤢᤱᤛᤡᤱ॥ ᤜᤧᤰᤁᤩᤠᤱ ᤁᤠᤰ ᤆᤠᤜᤠ᤹ ᤏᤢ ᤀᤠᤈᤡᤃᤰᤘᤠᤜᤠ᤹ ᤂᤧᤵᤔᤥ ᤕᤢᤰᤂᤢᤱᤛᤡᤱᤗᤥ॥ 19ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤀᤰᤂᤣ ᤔᤧᤳᤇᤡᤱᤅᤠ. ᤋᤣ᤺ᤱᤒᤣ. ᤕᤖᤡᤰ ᤋᤱᤒᤣ ᤌᤠᤖᤡᤰ ᤁᤧᤕᤥᤒᤠ ᤆᤠ ᤏᤢ ᤆᤡᤃᤰᤘᤠᤜᤠ᤹ ᤛᤢᤵᤛᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗ ᤁᤢᤛᤠᤏᤢ᤺ᤖᤡᤰ ᤕᤢᤅᤧ᤹. ᤆᤧ᤹. ᤌᤢᤅᤧ᤹ᤀᤠᤱ ᤛ᤺ᤳᤋᤧ᤹ᤀᤥ᥄’ 20ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. ‘ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤣ. ᤀᤠᤀᤡᤴ ᤛᤧᤴᤍᤡᤰᤛᤠ ᤂᤧᤏᤧ᤹ ᤁᤧᤜᤡᤱᤔᤴᤏᤡᤴ ᤏᤢᤵᤐᤠᤱ ᤂᤧᤏᤧ᤹ ᤁᤧᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤗᤢᤵᤛᤢᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤜᤠ᤺ᤳᤗᤧᤴ ᤐᤥᤱᤒᤠᤒᤣ᥅’” 21ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤀᤠᤒᤠᤅᤣ ᤗᤠᤃᤡᤖᤰ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤗᤢᤶᤒᤠᤀᤠᤱ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤶᤒᤥᤱᤔᤏᤠᤒᤧᤴᤏᤠᤱ ᤒᤠ ᤜᤧᤰᤁᤣᤀᤣ ᤐᤥᤱᤗᤥ॥”
ᤏᤡᤱᤘᤠ᤹ ᤛᤥ᤺ᤴᤇᤡᤱᤔᤠ ᤔᤣ᤺ᤴ
(ᤔᤳᤋᤡ ᥌:᥈᥋-᥉᥊)
22ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ᤺ᤸᤗᤧ ᤂᤧᤵᤛᤧᤶᤔᤧ᤹ᤀᤥ. ᤂᤡᤏᤡ᤹ ᤜᤡᤱᤔᤴᤏᤥ ᤌᤣ ᤆᤠᤔᤠ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤌᤣ ᤆᤠᤱᤔᤠ ᤘᤠ᤺ᤵᤔᤠ ᤑᤠ᤹ᤀᤠᤱ ᤏᤡᤱᤛᤠᤶ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ 23ᤌᤣᤀᤠᤱᤓᤧᤸᤗᤧ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤆᤠᤔᤠ ᤌᤢᤱᤔᤠᤏᤢ᤺ᤸᤗᤧ ᤕᤶᤒᤠᤖᤥ॥ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ ᤆᤠᤱᤔᤠ ᤘᤠ᤺ᤵᤔᤠᤏᤢ᤺ᤸᤗᤧᤀᤠᤱ ᤕᤶᤒᤠᤖᤥ॥ 24ᤀᤠ᤺ᤰᤘᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ—ᤂᤧᤱᤜᤠ᤹ᤖᤧ ᤆᤠ ᤔᤧᤴᤍᤣᤛᤢᤴ ᤔᤧᤴᤇᤢᤵᤛᤢᤴ. ᤆᤠᤕᤢᤱᤍᤧᤴᤏᤥᤀᤠᤱ ᤕᤠᤱᤔᤧᤱᤄᤥ᤺ᤳᤋᤢᤴ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠ᤺ᤳᤋᤢᤛᤡ᤹ ᤜᤡᤱᤄᤢᤛᤡ᤹ᤖᤥ॥ ᤂᤡᤏᤡ᤹ᤃ ᤐᤢᤜᤠ᤹ᤏᤢ᤺ᤸᤗᤧᤀᤠᤱ ᤀᤠᤰᤂᤧᤴ ᤀᤡᤔᤧᤸᤗᤢᤱᤛᤠᤒᤠ ᤁᤧᤈᤥᤃᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 25ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤀᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤁᤢᤔᤢᤰᤌᤡᤰᤁᤠᤱ ᤑᤥᤔᤠ ᤁᤧᤴᤇᤢᤰᤋᤢᤶᤔᤡᤴ॥ 26ᤀᤰᤋᤱᤒᤠ ᤆᤢᤰᤛᤠ ᤕᤠ᤺ᤶᤒᤰᤁᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤴᤏᤡᤸᤗᤧ ᤌᤣᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤒᤠᤸᤗᤧ ᤁᤧᤕᤧ᤺ᤰᤂᤡᤒᤠᤒᤣ᥅ 27ᤀᤠᤸᤗ ᤗᤡ-ᤗᤡ ᤑᤢᤱᤅᤡᤴ ᤐᤥᤒᤠᤴ ᤀᤥᤔᤧᤳᤋᤧᤶᤔᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤡ ᤔᤧᤴᤍᤣᤛᤢᤴ ᤂᤡᤀᤠᤱ ᤔᤧᤴᤗ᤺ᤴᤏᤧᤴ. ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤏᤢ᤹ᤔᤠ ᤁᤢᤍᤠᤔᤠᤀᤥ ᤁᤴ ᤗᤡ-ᤗᤡ ᤑᤢᤱᤅᤡᤴ ᤕᤠᤖᤡᤰᤁᤠᤱ ᤏᤢᤒᤠ ᤋᤣᤳ ᤔᤧᤈᤠᤰᤛᤡᤱᤅᤡᤴᤗᤥ᥄ 28ᤀᤠᤀᤡᤴ ᤋᤠ᤺ᤴᤍᤡᤰ ᤔᤡᤀᤥ ᤗᤠᤵᤁᤧᤓᤢᤛᤡᤱᤒᤠ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤛᤢᤱᤑᤢᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤣᤗ᤹ᤖᤡᤰ ᤋᤣᤳ ᤆᤠᤰᤋᤢᤛᤡᤸᤗᤧ ᤂᤡᤏᤡ᤹ ᤋᤣᤳ ᤁᤧᤴᤈᤠᤰᤋᤡᤴᤒᤡ᥅ ᤏᤛᤠᤴ ᤁᤧᤛᤢ᤺ᤶᤒᤠᤛᤣ᥄
29“ᤆᤠᤔᤠ ᤌᤢᤱᤔᤠᤀᤥᤖᤰ ᤂᤡᤏᤡ᤹ ᤏᤡᤱᤘᤠ᤹ ᤔᤧᤒᤡᤖᤧᤶᤔᤡᤴᤏᤧ᤹ᤀᤥ᥄ ᤂᤧᤸᤗᤧ ᤗᤠᤃᤡᤃ ᤏᤡᤱᤛᤠᤶᤔᤥᤀᤠᤱ ᤔᤧᤎᤩᤧᤶᤔᤡᤴᤏᤧ᤹ᤀᤥ. 30ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤛᤢᤘᤠᤱᤜᤠ᤹ᤖᤧᤀᤠᤱ ᤒᤠᤜᤧᤰᤁᤣ ᤔᤧᤀᤡ᤺ᤳᤋᤢ᤹ᤖᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠᤴ ᤏᤡᤛᤢᤖᤥ॥ 31ᤁᤖ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴᤗᤰ ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤁᤠᤰ ᤁᤴ ᤆᤡᤃᤰᤘᤠᤜᤠ᤹ ᤂᤡᤏᤡ᤹ ᤁᤧᤶᤒᤡᤖᤡ᤹ᤖᤥ॥”
ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤠᤱᤛᤠᤁᤢᤴᤎᤣ
(ᤔᤳᤋᤡ ᥌:᥇᥏-᥈᥇)
32“ᤆᤢᤰᤛᤠ ᤔᤧᤸᤗᤢᤰ ᤛᤢᤶᤛᤧ. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤁᤢᤜᤠᤱᤈᤢᤶᤔᤡᤴ ᤐᤡᤔᤠ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹ᤖᤥ॥ 33ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤆᤡᤃᤰᤘᤠᤜᤠ᤹ ᤛᤱᤄᤧᤶᤔᤧ᤹ᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤶᤍᤣᤛᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤵᤑᤠᤸᤗᤧᤀᤠᤱ ᤔᤧᤴᤍᤧ᤺ᤱᤔᤏᤠ. ᤔᤧᤴᤜᤱᤔᤏᤠᤒᤠ ᤛᤢ᤺ᤰᤘᤠᤀᤥ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤕᤠᤱᤛᤠᤁᤢᤴᤎᤣᤜᤠ᤹ᤖᤧ ᤌᤡᤶᤛᤧᤶᤛᤡᤶᤔᤧ᤹ᤀᤥ॥ ᤂᤧᤵᤔᤥ ᤁᤧᤄᤢ᤺ᤶᤒᤠᤜᤠ᤹ᤖᤧᤀᤠᤱ ᤔᤧᤴᤄᤢ᤺ᤳᤋᤢᤴ. ᤜᤧᤰᤁᤩᤠᤱ ᤁᤢᤒᤢ᤺ᤸᤗᤧᤀᤠᤱ ᤔᤧᤈᤏᤧᤴᤗᤥ॥ 34ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤕᤢᤰᤂᤢ᤹. ᤂᤧᤵᤔᤥᤀᤣ ᤂᤧᤏᤧ᤹ ᤁᤧᤏᤡᤱᤘᤠ᤹ᤒᤧᤴ ᤐᤣ᤺ᤰᤗᤥ॥”
ᤏᤡᤱᤘᤠ᤹ᤀᤡᤖᤧ ᤆᤛᤡᤒᤠ ᤛᤧᤘᤠᤖᤥᤒᤠᤜᤠ᤹
(ᤔᤳᤋᤡ ᥈᥊:᥊᥈-᥋᥇; ᤔᤷᤁᤢ ᥇᥉:᥉᥈-᥉᥍)
35“ᤂᤡᤏᤡ᤹ ᤑ᤹ᤀᤡ᤺ᤴ ᤕᤢᤵᤛᤧᤶᤔᤧ᤹ᤀᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤠᤱ ᤕᤅᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤣᤔᤡᤴ ᤜᤠ᤺ᤴᤍᤧᤶᤔᤧ᤹ᤀᤠᤱ ᤕᤢᤰᤂᤧᤶᤔᤧ᤹ᤀᤥ॥ 36ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤖᤧ ᤆᤛᤡᤒᤠ ᤛᤧᤘᤠᤖᤥᤒᤠᤜᤠ᤹ ᤜᤧᤰᤁᤣ ᤂᤡᤏᤡ᤹ ᤐᤥ᤺ᤰᤂᤧᤶᤔᤧ᤹ᤀᤥ॥ ᤂᤢᤏᤡ᤹ ᤍᤠᤱᤒᤠᤴ ᤔᤣ᤺ᤰᤂᤡᤶ ᤛᤠᤓᤠᤱᤈᤠ ᤆᤠᤛᤧ ᤐᤣ᤺ᤰᤁᤠᤱ ᤏᤢ᤺ᤱ ᤋᤠ᤺ᤸᤗᤧ ᤂᤡᤔᤥ ᤗᤠᤶᤎᤣ᤺ᤵᤐᤧᤴ ᤜᤶᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤴᤀᤡᤶᤔᤣ ᤒᤠ ᤔᤧᤕᤢᤱᤗᤥ॥ 37ᤜᤧᤰᤁᤩᤠᤱ ᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ. ᤔᤧᤴᤀᤡᤶᤔᤣ ᤂᤢᤏᤧ᤹ ᤁᤧᤜᤠᤱᤒᤠᤖ ᤁᤧᤕᤢᤱᤒᤠ ᤛᤧᤘᤠᤖᤥᤒᤠᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤄᤥᤛᤢ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤕᤠᤖᤡᤵ ᤆᤥ᤺ᤰᤛᤡᤱᤅᤠᤱ ᤛᤧᤘᤠᤖᤥᤒᤠᤜᤠ᤹ ᤆᤠᤔᤠᤍᤧᤴᤏᤥ ᤕᤢᤰᤂᤢᤛᤡ᤹ ᤜᤧᤰᤁᤩᤠᤱ ᤆᤠᤔᤠ ᤌᤢᤱᤔᤠᤜᤠ᤹ ᤌᤠᤒᤢ ᤐᤡᤖᤢᤛᤡ᤹ᤖᤥ॥ 38ᤜᤧᤰᤁᤩᤠᤱ ᤂᤧᤴ ᤜᤡᤶᤍᤠᤱᤒᤧᤴ ᤛᤧᤳᤗᤢᤶᤓᤰ ᤂᤡᤖᤡ ᤋᤠᤛᤠᤱ ᤂᤧᤱᤜᤠ᤹ ᤔᤧᤴᤀᤡᤶᤔᤣ ᤔᤧᤕᤢᤱᤒᤠ ᤋᤢᤔᤢᤛᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤁᤢᤛᤣᤘᤠᤖᤥᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥ 39ᤜᤡᤶᤍᤠᤱᤒᤠᤸᤗᤧ ᤂᤢ᤺ᤴᤍᤪᤡᤰᤐᤧᤴ ᤂᤢ᤺ᤴᤇᤧ ᤋᤠ ᤁᤧᤗ᤹ᤒᤠ ᤕᤧᤶᤔᤡᤴ ᤏᤡᤱᤘᤠ᤹ ᤂᤥᤛᤢᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤢ᤺ᤵᤔᤠ ᤔᤧᤒᤠᤱᤄᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 40ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠᤴ ᤕᤢ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤘᤕᤡᤸᤗᤧ ᤂᤢᤏᤧ᤹ ᤕᤢᤖᤥ॥”
ᤀᤡᤱᤈᤠᤱᤃᤧᤶᤒᤠ ᤛᤧᤘᤠᤖᤥᤒᤠ
(ᤔᤳᤋᤡ ᥈᥊:᥊᥋-᥋᥇)
41ᤐᤋᤪᤢᤛᤖᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤁᤴ ᤂᤧᤍᤠ᤹ᤀᤡᤴ ᤀᤠᤏᤡᤃᤣ ᤗᤠᤃᤡ ᤁᤧᤒᤠ᤺ᤳᤋᤢᤒᤠᤒᤡ. ᤀᤡ ᤘᤣ᤹ ᤁᤧᤖᤧᤰᤗᤧ ᤗᤠᤃᤡᤀᤠᤱ ᤁᤧᤒᤠ᤺ᤳᤋᤢᤒᤠᤒᤡ᥅”
42ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. ᤀᤠᤳᤋᤡᤴ ᤛᤧᤘᤠᤖᤥᤒᤠᤴ ᤏᤛᤠ᤺ᤴᤛᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥᤰ. ᤂᤧᤴᤏᤡᤴ ᤜᤡᤶᤍᤠᤱᤒᤠᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤀᤥᤔᤧᤵᤔᤠ ᤕᤢᤰ ᤐᤡᤖᤢ᤹ ᤜᤧᤰᤁᤩᤠᤱ ᤂᤧᤸᤗᤧ ᤘᤣ᤹ ᤛᤧᤘᤠᤖᤥᤒᤠᤜᤠ᤹ ᤕᤧᤶᤕᤧᤶᤔᤥ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ᤹ᤖᤥ॥ 43ᤂᤧᤴ ᤜᤡᤶᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ ᤂᤧᤴ ᤛᤧᤘᤠᤖᤥᤒᤠᤸᤗᤧ ᤒᤠ ᤜᤧᤰᤁᤣᤀᤣ ᤆᤥᤃᤢᤖ ᤘᤠ᤹ᤒᤠ ᤋᤢᤔᤢᤏᤧ ᤑᤠ᤹ᤃᤪ ᤂᤧᤴ ᤌᤢᤶᤄᤥ ᤐᤡᤖᤢ᤹ᤖᤥ॥ 44ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤜᤡᤶᤍᤠᤱᤒᤠᤸᤗᤧ ᤂᤧᤴ ᤛᤧᤘᤠᤖᤥᤒᤠᤴ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤕᤢᤰ ᤐᤡᤖᤢ᤹ᤖᤥ॥ 45ᤁᤖ ᤀᤠᤳᤋᤡᤴ ᤛᤧᤘᤠᤖᤥᤒᤠᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤒᤥ ᤀᤡᤱᤃᤠ᤹ ᤀᤠᤴᤍᤠᤱᤒᤠᤴ ᤜᤠᤖᤠ ᤔᤧᤍᤠᤏᤧᤴ ᤗ᤹ᤖᤡᤰ ᤀᤡᤋᤢᤖ ᤆ ᤌᤢᤅᤢ᤹. ᤜᤧᤰᤁᤩᤠᤱ ᤔᤛᤡᤱᤅᤠᤱ ᤘᤣ᤹ ᤛᤧᤘᤠᤖᤥᤒᤠ ᤏᤢ ᤛᤧᤘᤠᤖᤥᤔᤠᤜᤠ᤹ ᤜᤡᤵᤋᤢᤛᤡ᤹ ᤗ᤺ᤵᤛᤢᤛᤡ᤹ᤖ ᤘᤠ᤹ᤀᤡᤸᤗᤧ 46ᤔᤧᤴᤀᤡ᤺ᤳᤋᤣᤒᤠ ᤏᤢ ᤏᤡᤱᤘᤠ᤹ ᤔᤧᤱᤄᤥᤀᤣᤒᤠ ᤕᤧᤴᤏᤥ ᤜᤡᤶᤍᤠᤱᤒᤧᤴ ᤜᤡᤶᤔᤥ ᤏᤢ᤺ᤱ ᤋᤠᤀᤠᤱ ᤂᤧᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤋᤢ᤹॥ ᤜᤧᤰᤁᤩᤠᤱ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤛᤥᤖᤡᤰ ᤂᤢᤶᤍᤡᤱ ᤐᤡᤖᤢ᤹ᤖᤥ॥
47“ᤜᤧᤰᤁᤩᤠᤱ ᤀᤠᤳᤋᤡᤴ ᤛᤧᤘᤠᤖᤥᤒᤠᤸᤗᤧ ᤂᤢᤏᤧ᤹ ᤁᤢᤴᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤏᤡᤛᤢᤛᤠᤱ ᤂᤧᤴ ᤁᤢᤀᤡᤛᤡᤰ ᤕᤠᤖᤡᤵ ᤔᤧᤶᤒᤥᤱᤅᤣ ᤁᤢᤴᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢᤴᤏᤡᤸᤗᤧ ᤂᤧᤸᤗᤧ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤂᤥᤛᤢ᤹ᤖᤥ॥ 48ᤁᤖ ᤜᤠ᤺ᤳᤗᤧ ᤁᤢᤴᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤔᤧᤏᤡᤛᤢᤴᤏᤠᤱ ᤋᤧ᤺ᤶᤓᤢᤰ ᤆᤠᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤸᤗᤧ ᤔᤡᤛᤠᤰᤗᤰ ᤋᤧ᤺ᤶᤓᤢᤰ ᤆᤖᤥ॥ ᤜᤠ᤺ᤳᤗᤧ ᤕᤖᤡᤰ ᤂᤥᤛᤢ᤹. ᤂᤧᤸᤗᤥᤗᤠᤶ ᤕᤖᤡᤰᤁᤣ ᤏᤠ᤺ᤰᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧ ᤕᤖᤡᤰ ᤗᤰᤐᤧᤴ ᤂᤥᤛᤢ᤹ ᤂᤧᤸᤗᤥᤗᤠᤶᤔᤠᤱ ᤕᤖᤡᤰᤁᤣ ᤏᤠ᤺ᤰᤗᤥ॥”
ᤕᤧᤛᤢᤖᤧ ᤕᤧᤔᤧᤴᤍᤱ ᤋᤠᤖᤢ᤹
(ᤔᤳᤋᤡ ᥇᥆:᥉᥊-᥉᥌)
49“ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤡ ᤁᤣ᤺ᤳᤇᤧ ᤋᤩᤠᤱᤒᤠᤖᤥ. ᤁᤖ ᤋᤃᤡᤛᤠ ᤔᤡ ᤗᤠᤛᤧᤸᤗᤧ ᤏᤢᤒᤠ ᤐᤥ᤺ᤰᤂᤧᤒᤠᤖᤥ॥ 50ᤀᤡᤱᤃᤠ᤹ᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧᤴ ᤒᤵᤋᤡᤛ᤻ᤔᤠ ᤐᤥᤱᤔᤠ ᤁᤳᤋᤢᤱᤗᤥ॥ ᤂᤧᤴ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤀᤠᤛᤰᤔᤠ ᤜᤢ᤹ᤛᤡᤱᤅᤠᤱ ᤘᤠ᤹ᤖᤥ॥ 51ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤏᤠᤖᤢᤱ ᤋᤠ᤺ᤳᤇᤧ ᤋᤩᤠᤱᤒᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤡ᥅ ᤔᤣ᤺ᤴᤗᤥ᥄ ᤀᤡᤱᤃᤠ᤹ᤃ ᤔᤏᤠᤜᤠ᤹ ᤛᤧᤶᤔᤠᤛᤡ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥ 52ᤀᤠᤸᤗᤀᤠᤱᤎᤥ ᤅᤠᤛᤡ ᤔᤏᤠ ᤁᤧᤘᤠ᤹ᤒᤠ ᤜᤡᤶᤛᤕᤱᤅᤥ ᤛᤢᤶᤓᤢᤖᤧ ᤋᤰᤗᤧᤱᤘᤠᤀᤥ ᤏᤧᤵᤑᤢ. ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤛᤢᤶᤓᤢ ᤔᤧᤒᤥ᤺ᤰᤁᤠᤱ ᤂᤧᤱᤜᤠ᤹ ᤔᤧᤛᤧᤖᤥ॥ 53ᤁᤢᤶᤒᤠᤴ ᤁᤢᤛ᤻ᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥᤰ. ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛ᤻ᤛᤠᤴ ᤁᤢᤶᤒᤠᤖᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤁᤢᤶᤔᤠᤴ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤀᤡᤴ ᤁᤢᤶᤔᤠᤖᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ ᤜᤧᤰᤁᤩᤠᤱ ᤏᤥ᤺ᤵᤔᤧᤴ ᤁᤢᤶᤒᤠᤱᤗᤡ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤐᤠᤱᤗᤡᤔᤧᤴ ᤁᤢᤴᤏᤥ᤺ᤵᤔᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥”
ᤕᤧᤶᤖᤧᤴ ᤔᤡᤰᤛᤣ᤺ᤴᤜᤠ᤹
(ᤔᤳᤋᤡ ᥇᥌:᥈-᥉)
54ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤶᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤏᤠᤶᤎᤠ ᤐᤡᤛᤠᤱ ᤂᤠᤵᤔᤡ᤺ᤵᤐᤠᤴ ᤁᤧᤏᤡᤛᤢᤶᤔᤡᤸᤗᤧ ᤀᤠᤸᤗᤥᤛᤠ ᤘᤠᤜᤡᤳ ᤌᤠ᤹᤺ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤶ. ᤜᤧᤰᤁᤩᤠᤱ ᤜᤧᤰᤁᤣᤗ᤹ᤖᤡᤰ ᤘᤠᤜᤡᤳ ᤌᤠ᤹᤺॥ 55ᤗᤠᤱᤃᤧᤴᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤸᤗᤧ ᤀᤠᤸᤗ ᤛᤠ᤹ᤖᤡᤰ ᤜᤠᤱᤘᤠ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ. ᤜᤧᤰᤁᤩᤠᤱ ᤜᤧᤰᤁᤣᤀᤣ ᤐᤥᤱ॥ 56ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤀᤰᤂᤣᤗ᤹ᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤢ ᤋᤖ᤺ᤱᤍᤡᤱ ᤋᤠᤱᤛᤠᤱᤅᤥᤒᤠ ᤐᤠ᤺ᤴᤏᤡᤴ ᤀᤥᤃᤧᤔᤧᤳᤋᤢᤶᤔᤠᤱ ᤋᤠ᤺ᤴᤍᤡᤰ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤁᤧᤒᤠ᤺ᤳᤋᤢᤶ. ᤁᤖ ᤁᤴ ᤕᤧᤶᤔᤥ ᤁᤧᤍᤠᤒᤠ ᤔᤡᤰᤛᤣ᤺ᤴᤜᤠ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠᤒᤣ᥅”
ᤒᤡᤑᤩᤢᤱ ᤏᤢ ᤏᤠᤍᤱ ᤆᤥ᤺ᤰᤔᤠ
(ᤔᤳᤋᤡ ᥋:᥈᥋-᥈᥌)
57“ᤂᤡᤏᤡ᤹ ᤀᤡᤱᤃᤠ᤹ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤡᤴ ᤏᤢᤒᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤌᤣᤀᤠᤱ ᤀᤠᤒᤠᤅᤣ ᤁᤧᤴᤇᤧᤴᤍᤢᤶᤔᤡᤴᤒᤠᤒᤣ᥅ 58ᤂᤧᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤧᤴᤏᤢ ᤂᤠᤛᤧᤴᤜᤡᤶᤔᤥ ᤁᤧᤒᤣ᤺ᤰᤁᤡᤸᤗᤧ. ᤗᤠᤶᤔᤥᤛᤠ ᤑᤥᤋᤩᤠ ᤁᤧᤃᤢ᤺ᤵᤐᤧᤴᤏᤢ ᤏᤠᤍᤱ ᤆᤥᤃᤧ᤹ᤀᤥ॥ ᤔᤣ᤺ᤴᤏᤣ ᤑᤠ᤹ᤃᤪ ᤂᤧᤸᤗᤧ ᤂᤧᤏᤧ᤹ ᤂᤠᤛᤧᤴᤗᤥ᤺ᤶᤒᤠᤸᤗᤥ ᤁᤧᤍᤣ᤹ᤀᤠᤱ ᤂᤧᤴ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤋᤡᤗᤡᤱᤃᤠᤜᤠ᤹ᤖᤥ ᤜᤢᤰᤁᤧᤛᤢᤵ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤢᤱᤗᤠᤜᤡᤶᤔᤥ ᤁᤧᤶᤎᤧᤰᤗᤥ॥ 59ᤜᤧᤰᤁᤩᤠᤱ ᤜᤢᤱᤔᤠ ᤁᤧᤒᤥᤱᤒᤠ ᤁᤠᤰ ᤛᤠᤶᤒᤠ᤺ᤴᤕᤠᤱ ᤔᤧᤴᤜᤢᤱᤅᤣ ᤌᤠᤖᤡᤰ ᤂᤧᤵᤔᤥᤀᤣ ᤁᤧᤕᤠᤰᤗᤥ॥”
Actualmente seleccionado:
ᤗᤢᤁᤠ 12: LIFOTNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2009, 2023, Wycliffe Bible Translators, Inc. All rights reserved.