ᤗᤢᤁᤠ 10
10
ᤕᤧᤛᤢᤖᤧ ᥍᥈ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤡᤱᤓᤴ ᤛᤧᤛᤧ ᤐᤠᤱᤄᤢᤛᤡ᤹
1ᤂᤧᤴ ᤀᤣᤃᤠᤱ ᤍᤠᤱᤒᤠᤖᤧ ᤘᤣ᤹ ᤏᤢ-ᤏᤧᤳ (᥍᥈) ᤔᤏᤠᤜᤠ᤹ ᤛᤣᤃᤢᤛᤡᤀᤠᤱ ᤐᤣᤖ ᤐᤳᤇᤧᤒᤠ ᤐᤠᤱᤈᤢᤶᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤏᤧᤵᤑᤢ ᤏᤧᤵᤑᤢ ᤗ᤹ᤖᤡᤰ ᤀᤡᤱᤓᤴ ᤛᤧᤛᤧ ᤐᤠᤱᤄᤢᤛᤡᤖᤥ॥ 2ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤛᤢᤶᤔᤠ ᤁᤧᤒᤥᤱᤒᤠ ᤆᤠ᤺ᤴ ᤕᤖᤡᤰ ᤏᤧ᤹᤺. ᤁᤖ ᤆᤠ ᤁᤧᤛᤢᤶᤒᤠ ᤕᤠ᤺ᤗᤡᤰᤜᤠ᤹ ᤔᤧᤛᤢ᤺ᤴᤗᤥ॥ ᤜᤧᤰᤁᤣ᤺ᤸᤗᤧ ᤛᤢᤶᤔᤠ ᤁᤧᤒᤥᤱᤒᤠ ᤆᤠ᤺ᤸᤗᤧ ᤁᤢᤴᤍᤠᤱᤒᤠᤴ ᤕᤖᤡᤰ ᤕᤠᤗᤡᤰᤜᤠ᤹ ᤆᤠ ᤛᤢᤶᤛᤧ ᤐᤠᤱᤄᤢᤛᤡᤖ ᤑᤠ᤹ᤀᤠᤱ ᤂᤡᤏᤡ᤹ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ 3ᤔᤧᤸᤗᤢᤰᤛᤠᤜᤠ᤹ ᤐᤖᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠᤱᤔᤏᤠᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤐᤠᤱᤏᤡᤱᤗᤥ॥ ᤀᤠᤸᤗ ᤐᤣᤃᤧᤶᤔᤧ᤹ᤀᤥ॥ 4ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤛᤠᤒᤪᤡᤜᤠ᤹. ᤛᤢᤰᤘᤠᤜᤠ᤹ ᤜᤧᤰᤁᤩᤠᤱ ᤗᤠᤱᤛᤢ᤺ᤵᤜᤠ᤹ ᤌᤣᤀᤠᤱ ᤔᤧᤕᤠᤱᤅᤠᤛᤡᤶᤔᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤗᤠᤶᤔᤥ ᤔᤏᤠᤜᤠ᤹ᤏᤢ ᤛᤧᤘᤠ ᤔᤕᤧᤶᤔᤧ᤹ᤖ ᤔᤧᤜᤶᤛᤡᤱᤅᤧᤶᤔᤡᤴᤏᤧ᤹ᤀᤥ॥ 5ᤂᤡᤏᤡ᤹ ᤀᤠᤳᤋᤡᤴ ᤜᤡᤶᤔᤥ ᤁᤧᤗᤠ᤺ᤛ᤻ᤛᤡ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤴ ᤜᤡᤶᤔᤥ ᤜᤠᤖᤠ᤹ ᤛᤏᤠᤖᤢᤱ ᤋᤠᤏᤡᤖᤥ ᤗ᤹ᤖᤡᤰ ᤐᤠ᤺ᤳᤋᤧᤶᤔᤧ᤹॥ 6ᤂᤧᤴ ᤜᤡᤶᤔᤥ ᤛᤏᤠᤖᤢᤱ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤔᤏᤠ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤧᤵᤔᤥ ᤘᤠ᤹ ᤗᤠ᤺ᤳᤗᤥ. ᤁᤖ ᤜᤧᤰᤋᤱᤒᤠ ᤔᤏᤠᤴ ᤜᤥ᤺ᤵᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤡᤏᤡ᤹ᤀᤥᤀᤣ ᤕᤠᤱᤏᤠ ᤏᤢ᤺ᤱ ᤋᤠ᤺ᤖᤥ॥ 7ᤀᤠᤳᤋᤡᤴ ᤜᤡᤶᤔᤥ ᤂᤡᤏᤡ᤹ ᤁᤧᤘᤕᤡ᤹. ᤒᤠ ᤂᤧᤵᤔᤥᤀᤣ ᤘᤕᤧᤶᤔᤧ᤹ᤀᤠᤱ ᤂᤡᤏᤡ᤹ ᤁᤧᤶᤒᤡᤖᤡᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤆᤧᤶᤔᤧ᤹ ᤌᤢᤅᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤠᤗᤡᤰᤁᤡᤴ ᤏᤠᤶᤕᤠᤰ ᤂᤥᤔᤠ ᤗᤠ᤹ᤖᤢᤖᤥ॥ ᤂᤡᤏᤡ᤹ ᤜᤡᤶ ᤌᤵᤔᤣ ᤋᤠᤰᤔᤧᤃᤴᤍᤧᤶᤔᤡᤴᤏᤧ᤹ᤀᤥ॥ 8ᤂᤡᤏᤡ᤹ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤁᤧᤗᤠ᤺ᤛ᤻ᤛᤡᤸᤗᤧ ᤗᤠᤶᤍᤠ᤺ᤰᤔᤠ ᤁᤧᤶᤒᤡᤖᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤍᤥ᤺ᤴᤍᤡ᤹ ᤁᤧᤶᤒᤡᤖᤡᤒᤠ ᤆᤠᤜᤠ᤹ ᤆᤧᤶᤔᤧ᤹. 9ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤧᤶᤛᤡᤶᤔᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ‘ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ॥’ 10ᤁᤖ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤂᤡᤏᤡ᤹ ᤗᤠᤶᤍᤠ᤺ᤰᤔᤠ ᤁᤧᤔᤧᤶᤒᤡᤖᤡᤴ. ᤂᤧᤴ ᤐᤠᤱᤈᤢᤶᤜᤠ᤹ᤀᤥᤒᤠ ᤗᤠᤶ ᤜᤧᤱᤄᤠᤳᤋᤡ ᤗ᤺ᤴᤍᤧᤶᤔᤧ᤹ᤀᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. 11‘ᤀᤠᤏᤡᤃᤣ ᤗᤠᤱᤅᤥ ᤂᤡᤵᤋᤢᤀᤠᤱ ᤁᤧᤒᤵᤐᤠ ᤂᤡᤏᤡ᤹ ᤐᤠᤱᤈᤢᤶᤔᤥᤒᤠ ᤂᤠᤶᤜᤡ᤺ᤰᤜᤠ᤹ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤠᤏᤡᤃᤣ ᤌᤠᤵᤛᤢᤶᤒᤧᤖᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 12ᤂᤠᤛᤧᤴ ᤕᤧᤴᤏᤥ ᤂᤧᤴ ᤐᤠᤱᤈᤢᤶᤔᤡᤸᤗᤧ ᤁᤢᤍᤢᤰᤂᤣ᤺ᤱᤃ ᤛᤠᤍᤥᤔᤖᤧ ᤁᤢᤍᤢᤰᤂᤣ᤺ᤴᤏᤢ᤺ᤸᤗᤧᤀᤠᤱ ᤁᤧᤛᤠᤰᤐᤠ ᤐᤥᤱ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥’”
13“ᤂᤥᤖᤠᤈᤡᤏ ᤏᤢ ᤒᤧᤌᤛᤣᤍᤠ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤂᤡᤏᤡ᤹ ᤐᤠᤱᤈᤢᤶᤔᤥ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤋᤠᤕᤖ ᤏᤢ ᤛᤡᤍᤥᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧᤃ ᤀᤢᤴᤇᤥ᤺ᤴᤇᤠ ᤂᤧᤵᤔᤥᤒᤠ ᤔᤏᤠᤜᤠ᤹ ᤗᤠᤕᤥᤗᤠᤶ ᤜᤡᤴᤍᤡᤃᤧ ᤑᤠ᤹ᤀᤠᤱ ᤛᤃᤡᤋᤣᤳ ᤔᤧᤈᤠᤰᤛᤡᤱᤅᤠᤱ ᤂᤠᤵᤐᤢ ᤔᤧᤈᤢ᤺ᤳᤇᤡᤱᤒᤠᤔᤧᤴ॥ 14ᤁᤖ ᤂᤠᤛᤧᤴ ᤕᤧᤴᤏᤥᤃ ᤂᤡᤏᤡ᤹ ᤋᤢᤰᤂᤣᤏᤢ᤺ᤸᤗᤧ ᤋᤠᤕᤖ ᤏᤢ ᤛᤡᤍᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥᤱᤗᤥ॥ 15ᤜᤧᤰᤁᤩᤠᤱ ᤂᤡᤏᤡ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤐᤣᤃᤡᤃᤧ᤹ ᤁᤧᤗ᤹ᤖᤡᤒᤡ᥅ ᤔᤣ᤺ᤴᤗᤥ᥄ ᤂᤡᤏᤡ᤹ᤃ ᤂᤧᤔᤠᤕᤱᤛᤱ ᤌᤠᤖᤡᤰ ᤁᤧᤎᤩᤧ᤹ᤀᤡᤖᤥ॥
16“ᤀᤠᤳᤋᤡᤸᤗᤧ ᤂᤡᤏᤡ᤹ ᤐᤠᤴ ᤂᤧᤵᤛᤢ᤹. ᤂᤧᤸᤗᤧ ᤀᤠᤒᤠ᤺ᤴᤏᤡᤴᤏᤠᤱ ᤂᤧᤵᤛᤢ᤹॥ ᤀᤠᤳᤋᤡᤸᤗᤧ ᤁᤧᤏᤠ᤹ᤖᤡ᤹. ᤂᤧᤸᤗᤧ ᤀᤡᤱᤃᤠ᤹ᤀᤠᤱ ᤏᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤠ᤹ᤀᤠ. ᤂᤧᤸᤗᤧ ᤕᤠᤵᤔᤡ ᤁᤧᤒᤠᤱᤒᤧᤴᤏᤠᤱ ᤏᤠ᤹ᤖᤢ᤹ᤖᤥ॥”
17ᤏᤢ-ᤏᤧᤳ (᥍᥈) ᤜᤢ᤹ᤛᤠᤶᤒᤠᤜᤠ᤹ ᤔᤧᤛ᤺ᤳᤋᤧᤖ ᤔᤧᤍᤩᤧᤀᤠᤱ ᤕᤧᤛᤢᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤔᤡᤱᤅᤥᤃ ᤑᤧᤴᤛᤠᤶᤜᤠ᤹ ᤀᤠᤏᤡᤃᤣ ᤕᤢᤰᤁᤥ ᤔᤧᤍᤩᤧᤖᤥ॥”
18ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤠᤑᤧᤴᤛᤠᤶᤔᤡᤴ ᤛᤠ᤺ᤶᤓᤣ ᤗᤧᤰᤋᤧᤒᤠ ᤁᤢᤀᤡᤛᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤰᤌᤩᤧᤖ ᤐᤳᤇᤧᤒᤠ ᤀᤡᤱᤃᤠ᤹ ᤏᤡᤛᤢᤱ॥ 19ᤏᤡᤱᤔᤡ᤺ᤸᤗᤧ ᤁᤢᤔᤢᤰᤛᤠᤶ ᤛᤶᤍᤠᤱ ᤀᤡᤱᤃᤠ᤹ ᤕᤢᤰ ᤐᤡᤏᤡᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤛᤣ᤺ᤰᤐᤠᤜᤠ᤹ ᤛᤶᤍᤠᤱ ᤂᤡᤏᤡ᤹ ᤗᤠᤱᤁᤧᤄᤣᤃᤡ᤹. ᤋᤠᤱᤛᤠᤱ ᤂᤧᤒᤰᤜᤠ᤹ ᤁᤧᤍᤥ᤹ᤖᤢᤶᤛᤡᤶ. ᤁᤖ ᤌᤣᤀᤠᤱ ᤁᤧᤔᤧᤶᤔᤧᤳᤋᤡᤴᤗᤥ॥ 20ᤜᤧᤰᤁᤣᤛᤠᤱ ᤑᤧᤴᤛᤠᤶᤜᤠ᤹ ᤂᤡᤏᤡ᤹ ᤕᤢᤰᤁᤥ ᤔᤧᤘᤠ᤹ ᤑᤠ᤹ᤀᤠᤱ ᤔᤣ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤡᤏᤡ᤹ ᤔᤡᤱ ᤛᤠᤵᤋᤧᤀᤠᤱ ᤐᤵᤐᤠᤸᤗᤧ ᤆᤥᤃᤢᤸᤗᤧ ᤛ᤺ᤳᤋᤧᤶᤔᤧ᤹ᤀᤥ॥”
21ᤂᤧᤴ ᤕᤧᤶᤔᤥ ᤕᤧᤛᤢᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤛ᤺ᤳᤋᤧᤖ ᤐᤠᤖᤧ. “ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤀᤣ. ᤀᤡᤱᤃᤠ᤹ ᤏᤥᤃᤧᤴ ᤐᤡᤏᤧ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤛᤡᤰᤁᤢᤶᤛᤠᤒᤠᤜᤠ᤹ ᤜᤧᤰᤁᤩᤠᤱ ᤆᤠ᤺ᤵᤐᤠᤜᤠ᤹ᤏᤢ ᤁᤧᤔᤠ᤹ᤖᤢᤒᤠ ᤐᤠ᤺ᤴᤏᤡᤴ ᤜᤡᤴᤈᤠ᤹ ᤜᤧᤰᤋᤱᤒᤠᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤛᤡᤖᤥ॥ ᤀᤠᤶᤒᤣ. ᤒᤠ ᤀᤰᤂᤣ ᤆᤥ᤺ᤰᤔᤠᤀᤣ ᤂᤧᤏᤧ᤹ ᤁᤧᤛᤡᤖᤠ᤹ ᤌᤠᤅᤧᤖᤥ॥”
22“ᤀᤠᤶᤒᤠᤖᤧ ᤁᤠᤰ ᤐᤠ᤺ᤴᤜᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥ ᤁᤢᤛ᤻ᤛᤠᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤶᤒᤠᤖᤧᤖᤰ ᤁᤢᤛᤡᤱᤏᤡ᤺ᤳᤋᤢ᤹. ᤘᤣ᤹ᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤁᤢᤛ᤻ᤛᤠ᤺ᤸᤗᤧ ᤀᤥᤛᤣ᤺ᤴᤎᤠᤰᤋᤢᤛᤡᤒᤠ ᤔᤏᤠᤜᤠ᤹ᤖᤧᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥”
23ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤫᤠ᤺ᤳᤋᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤡᤰᤁᤡᤸᤗᤧ ᤁᤴ ᤐᤠ᤺ᤴᤜᤠ᤹ ᤏᤡᤛᤢ᤹ᤖᤥ॥ 24ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤡᤏᤡ᤹ ᤁᤧᤏᤡᤛᤢᤶᤒᤠ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤏᤡᤔᤠ ᤏᤢ ᤂᤧᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ. ᤁᤖ ᤔᤧᤱᤄᤥᤛᤢᤴᤗᤥ॥”
ᤏᤢᤒᤠ ᤛᤠᤔᤠᤖᤡ᤺ᤸᤗᤧᤴ ᤂᤧᤍᤠ᤹
25ᤌᤡᤰᤕᤧᤴ ᤛᤠᤶᤕᤥᤌᤡᤶᤛᤠᤶᤒᤠᤎᤡᤰ ᤕᤧᤶᤛᤡᤱᤅᤠᤱ ᤕᤧᤛᤢᤴ ᤐᤠ᤺ᤴᤏᤥ ᤌᤠᤔᤠ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠ ᤌᤣ ᤆᤥ᤺ᤰᤔᤠ ᤐᤥᤱᤒᤣ᥅”
26ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤂᤧᤴ ᤛᤣ᤺ᤴᤍᤥᤛᤢ. “ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤌᤣ ᤛᤠᤵᤋᤧᤀᤠᤱ ᤐᤳ᥅ ᤂᤧᤴ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤒᤣ᥅”
27ᤂᤧᤸᤗᤧ ᤏᤥᤃᤵ ᤐᤡᤖᤢ. “‘ᤂᤧᤏᤧ᤹ ᤁᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤁᤧᤛᤡᤰᤗᤢᤱᤔᤠᤸᤗᤧ. ᤁᤧᤖᤧᤰ ᤁᤧᤛᤰᤔᤠ ᤛᤠᤶᤔᤡᤸᤗᤧ. ᤁᤧᤖᤧᤰ ᤁᤧᤎᤢᤶᤔᤡᤸᤗᤧ ᤜᤧᤰᤁᤩᤠᤱ ᤁᤧᤖᤧᤰ ᤁᤧᤏᤡᤱᤘᤠ᤹ᤀᤡᤸᤗᤧ. ᤔᤡ᤺ᤶᤈᤡ ᤔᤧᤳᤋᤧ᤹.’ ᤜᤧᤰᤁᤩᤠᤱ ‘ᤀᤠᤵᤑᤣᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤜᤡᤶᤒᤣᤛᤠᤱᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥’”#ᤗᤧᤒᤡ ᥇᥏:᥇᥎
28ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤍᤱᤒᤠ ᤏᤥᤃᤵ ᤁᤧᤒᤡᤖᤢᤖᤥ॥ ᤜᤧᤰᤁᤩᤠᤱ ᤒᤠᤜᤧᤰᤁᤣ ᤆᤥᤃᤧ᤹ᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤄᤥᤛᤢ᤹ᤖᤥ॥” 29ᤁᤖ ᤂᤧᤸᤗᤧ ᤛᤠᤶᤕᤥᤒᤠ ᤌᤠ᤺ᤶᤛᤡᤱᤔᤠ ᤏᤡᤱᤘᤠ᤹ ᤀᤡᤋᤢᤀᤠᤱ ᤏᤢᤒᤠ ᤗᤧᤱᤛᤡᤱᤗ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ ᤀᤠᤜᤡᤶᤒᤣᤛᤠᤱᤒᤠᤜᤠ᤹ ᤜᤠ᤺ᤳᤇᤡᤒᤣ᥅”
30ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢᤀᤠᤱ ᤔᤧᤳᤋᤢ. “ᤌᤡᤰᤕᤧᤴ ᤗᤳᤇᤠ ᤔᤏᤠᤴ ᤕᤖᤢᤛᤗᤧᤔᤗᤠᤶ ᤕᤥ ᤕᤧᤖᤡᤜᤥᤀᤥ ᤐᤣᤖ ᤐᤳᤇᤧᤸᤗᤧ ᤑᤠ᤺ᤴᤍᤠᤜᤠ᤹ᤖᤧ ᤔᤧᤕᤠᤱᤄᤢᤀᤠᤱ ᤁᤢᤍᤣ᤺ᤳᤜᤠ᤹ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤛᤡᤔᤠᤗᤡᤱᤎᤥ ᤁᤧᤖᤧᤖ ᤜᤠᤶᤒᤪᤧᤰ ᤔᤧᤜᤡᤵᤋᤢᤀᤠᤱ ᤗᤠᤶᤔᤥ ᤗᤠᤵᤔᤧᤓᤢᤛᤢ ᤔᤧᤎ॥ 31ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤏᤡᤱᤘᤠ᤹ᤑᤢᤛᤠᤶᤒᤠᤎᤡᤰ ᤕᤧ᤺ᤖ ᤐᤳᤇᤧ॥ ᤂᤧᤸᤗᤧ ᤂᤧᤴ ᤔᤏᤠᤴ ᤏᤡᤛᤢᤛᤠᤱ ᤔᤧᤴᤏᤡ᤺ᤶᤏᤠ ᤗᤧᤱᤛᤡᤱᤅᤠᤱ ᤗᤠᤶ ᤁᤒᤢᤎᤀᤠᤱ ᤐᤣᤖᤥ॥ 32ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤗᤠᤶᤔᤥ ᤔᤠᤱᤜᤡᤶᤔᤥ ᤁᤧᤓᤠ᤹ᤒᤠ ᤗᤧᤒᤡᤎᤡᤰᤁᤠᤱ ᤕᤧᤖ ᤐᤳᤇᤧ ᤂᤧᤸᤗᤧᤀᤠᤱ ᤂᤧᤴ ᤔᤏᤠᤴ ᤏᤡᤛᤢᤛᤠᤱ ᤔᤧᤴᤏᤡ᤺ᤶᤏᤠ ᤗᤧᤱᤛᤡᤱᤅᤠᤱ ᤗᤠᤶ ᤁᤒᤢᤎᤀᤠᤱ ᤐᤣᤖᤥ॥ 33ᤁᤖ ᤛᤠᤔᤖᤡᤕᤠᤛᤔᤠ ᤔᤏᤠᤎᤡᤰ ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤐᤣᤖᤒᤳᤇᤧᤸᤗᤧ ᤂᤧᤴ ᤔᤏᤠᤴ ᤏᤡᤛᤢᤀᤠᤱ ᤗᤢᤱᤔᤠ᤹ ᤋᤢᤰᤋᤢᤖᤥ॥ 34ᤂᤧᤴ ᤛᤠᤔᤖᤡ᤺ᤴ ᤐᤣᤀᤠᤱ ᤁᤠ᤺ᤴᤍᤧᤒᤠ ᤁᤢᤕᤠᤱᤄᤣ᤺ᤰᤁᤥ ᤛᤡᤍᤠ᤹ᤀᤡᤴ ᤜᤢ᤺ᤳᤋᤢ ᤐᤡᤖᤢᤀᤠᤱ ᤋᤣᤳ ᤆᤡᤖᤡᤰᤜᤠ᤹ᤖᤧ ᤀᤡᤓᤢᤳᤋᤢ ᤐᤡᤖᤢ. ᤜᤧᤰᤁᤩᤠᤱ ᤁᤢᤀᤍᤱ ᤛᤶᤍᤠᤱ ᤕᤢᤰᤂᤢᤀᤠᤱ ᤆᤧᤕᤠᤱᤎᤥ᤺ᤰᤁᤥ ᤋᤣ᤹ᤖᤢᤀᤠᤱ ᤏᤢᤖᤡᤰᤁᤠᤱ ᤁᤶᤒᤪᤠᤱ ᤔᤧᤳᤋᤢᤖᤥ॥ 35ᤁᤢᤍᤠ᤺ᤴᤍᤡᤰᤔᤠ ᤂᤧᤴ ᤛᤠᤔᤠᤖᤡ᤺ᤸᤗᤧ ᤆᤧᤕᤠᤱᤎᤥ᤺ᤰ ᤍᤠᤱᤒᤠᤴ ᤏᤧᤳᤇᤡ ᤕᤢᤵᤐᤠᤕᤠᤱ ᤐᤡᤖᤢᤀᤠᤱ ᤔᤧᤳᤋᤢ. ‘ᤁᤴ ᤔᤏᤠᤴ ᤏᤢᤖᤡᤰᤁᤠᤱ ᤁᤶᤒᤪᤠᤱ ᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤏᤢ᤺ᤱᤅᤠ ᤋᤠᤀᤠᤸᤗᤧ ᤁᤴᤏᤠᤱᤎᤥ ᤁᤧᤗᤠ᤺ᤵᤐᤠ ᤕᤠᤱᤅᤡᤴ ᤜᤢᤅᤢᤱ ᤐᤡᤏᤧᤖᤥ॥’”
36ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤛᤣ᤺ᤴᤗᤠᤵᤋᤢ. “ᤁᤴ ᤛᤢᤶᤛᤡ ᤔᤏᤠᤜᤠ᤹ᤀᤥ ᤀᤠᤳᤋᤡᤴ ᤔᤏᤠᤴ ᤑᤠ᤺ᤴᤍᤠᤜᤠ᤹ᤖᤧ ᤔᤧᤕᤠᤱᤄᤢᤒᤠᤸᤗᤧᤴ ᤁᤧᤏᤢ᤹ᤒᤠ ᤁᤢᤜᤡᤶᤒᤣᤛᤠᤱᤒᤠ ᤐᤥ᤺ᤰᤂᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤣ᥅”
37ᤂᤧᤴ ᤛᤠᤶᤕᤥᤌᤡᤶᤛᤠᤶᤒᤠᤸᤗᤧ ᤏᤥᤃᤵ ᤐᤡᤖᤢ. “ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤵᤐᤧᤴᤗᤥ॥”
ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤂᤧᤏᤧ᤹ᤀᤠᤱ ᤒᤠ ᤜᤧᤰᤁᤣᤀᤣ ᤆᤥᤃᤧ᤹ᤀᤥ॥”
ᤕᤧᤛᤢᤖᤧ ᤔᤠᤷᤌᤠ ᤏᤢ ᤔᤖᤡᤕᤶᤔᤡᤴ ᤋᤢᤔᤢᤛᤡ᤹
38ᤀᤠᤸᤗ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤌᤡᤰ ᤐᤠᤱᤓᤣ᤹ᤀᤥ ᤔᤧᤃᤧᤖᤧᤀᤠᤱ ᤂᤧᤵᤔᤥ ᤔᤠᤷᤌᤠ ᤔᤧᤵᤔᤏᤠᤔᤠᤸᤗᤧ ᤁᤢᤜᤡᤶᤔᤥ ᤗᤠᤶᤍᤠ᤺ᤰᤔᤠ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ ᤁᤢᤜᤡᤶᤔᤥ ᤔᤧᤒᤣ॥ 39ᤜᤧᤰᤁᤩᤠᤱ ᤔᤠᤷᤌᤠᤖᤧ ᤁᤢᤴᤛᤠ᤹ ᤔᤖᤡᤕᤔ ᤔᤧᤵᤔᤏᤠᤔᤠᤴ ᤘᤕᤧ॥ ᤂᤢᤏᤧ᤹ ᤍᤠᤱᤒᤠᤸᤗᤧ ᤁᤢᤗᤠᤱᤈᤰᤐᤥ ᤕᤢᤱᤛᤡᤱᤅᤠᤱ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤛᤡᤰᤁᤢᤶᤍᤡᤱ ᤂᤠᤜᤢᤴᤜᤠ᤹ ᤂᤧᤵᤛᤢᤖᤥ॥ 40ᤁᤖ ᤔᤠᤷᤌᤠᤖᤧ ᤋᤖᤣ ᤋᤥᤔᤠ ᤕᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤒᤠᤸᤗᤧ ᤁᤢᤛᤰᤔᤠ ᤜᤢ᤹ᤖᤢ ᤜᤧᤰᤁᤩᤠᤱ ᤐᤣᤀᤠᤱ ᤍᤠᤱᤒᤠᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤕᤠᤵᤔᤡ ᤁᤶᤒᤪᤠᤱ ᤁᤧᤶᤔᤧᤳᤋᤠᤴᤒᤡ᥅ ᤀᤡᤱᤃᤠ᤹ ᤀᤠᤴᤛᤠ᤹ᤖᤧᤃ ᤁ᤹ᤕᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤓᤠ᤹ᤀᤠᤴᤒᤧ॥ ᤀᤡᤱᤃᤠ᤹ ᤕᤠ᤺ᤶᤒᤰᤁᤥ ᤜᤠᤖᤠ᤹ ᤑᤠ᤹ᤀᤠᤏᤡ ᤑᤠ᤹ᤀᤠᤱ ᤔᤧᤳᤋᤠᤱ ᤐᤡᤖᤠᤱᤅᤧ᤹ᤏᤠ॥”
41ᤁᤖ ᤕᤧᤛᤢᤖᤧ ᤔᤧᤳᤋᤢ. “ᤔᤠᤷᤌᤠᤀᤣ. ᤂᤧᤏᤧ᤹ᤃ ᤕᤖᤡᤰ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤁᤧᤒᤡᤖᤢᤀᤠᤱ ᤀᤠᤒᤠᤅᤣ ᤋᤢᤰᤂᤣ ᤁᤧᤈᤠ᤺ᤳᤇᤡᤱᤅᤠᤱ ᤁᤧᤘᤠ᤹ᤖᤥ. 42ᤁᤖ ᤁᤧᤕᤧᤰᤐᤠ ᤗᤰ ᤌᤡᤰᤗᤰ ᤘᤠ᤹ᤖᤥ. ᤜᤧᤰᤁᤩᤠᤱ ᤔᤖᤡᤕᤔᤖᤧᤃ ᤂᤧᤴ ᤏᤢᤒᤠ ᤗᤰᤁᤡᤴ ᤛᤣᤃᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤏᤢ ᤂᤧᤴ ᤗᤰᤁᤡᤴ ᤏᤠᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥”
Actualmente seleccionado:
ᤗᤢᤁᤠ 10: LIFOTNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2009, 2023, Wycliffe Bible Translators, Inc. All rights reserved.