मत्ती 4
4
येसुन पारख
(मरकुस 1:12-13; लुका 4:1-13)
1तेत्यार परमेश्वरोन आत्मा येसु काजे बोयळामा लीगोयू काहाकि भुतडासी तेरी पारख होये. 2चू चावीस दाहळा, एने चावीस रात चू उपास्यू होतु काय नि खादु, ती तीना काजे भूक लागी. 3ती पारखने वावू तेरे साते आवीन तीना काजे कोयू, “ओगर तू परमेश्वरोन पुऱ्यु होय, ती कोय दे, कि यु दोगळू रुटा बोन जाय.” 4येसु जोवाब आप्यू, “लिखलो छे, माणूस निस्तु रुटासी नि, बाकीन हर एक वचनोसी यो परमेश्वरोन मुखोसी निकोवतलो छे, जीवता रोयसे.”
5तेत्यार भुतडू तीनाक चुखला सोहोरोमा लीगोयू एने मंदीरोन काठोपोर उभू कोऱ्यु, 6एने तीना काजे कोयू, “कोदि तू परमेश्वरोन पुऱ्यु छे, ती आपना खुदो काजे नेचू पाळ दे; काहाकि लिखलो छे चू तारा बारामा आपना सोरोग दूत काजे आग्या आपसे, एने चे तुसे काजे हातोमा झेल लेसे; कोदि ओसो नी होये कि तारा पायोमा दोगळान झोट लागे.” 7येसु तीना काजे कोयू, “यो बी लिखलो छे तू प्रभू आपना परमेश्वरोन पारख मा कोरे.”
8ओवतेन भुतडू तीनाक घोना सोवटा उचला बोयळा पोर लीगोयू एने आखा जोगोन राज एने तेरो कला देखाळीन 9तीना काजे कोयू, “कोदि तू वाकु वोवीन मेसे काजे नोमोन कोरे, ती मे यो आखो काय तुसेक आपदिस.” 10तेत्यार येसु तीना काजे कोयू, “हे भुतडा नांबे होय जा, काहाकि लिखलो छे, तू प्रभू आपना परमेश्वर काजे नमस्कार कोर, एने निस्तु तेरीत आराधना कोर.” 11तेत्यार भुतडू तेरे साते गोथू जात रोयू, एने देखू, सोरग दूत आवीन हेरी सेवा कोरणे बाज गोया.
येसुन सेवकाईन सुरुवात
(मरकुस 1:14-15; लुका 4:14-15)
12जेतार चू यो सोमव्यू कि योहान बोंदी होय गोयलु छे, ती चू गलीलमा जात रोयू. 13एने चू नासरेथ काजे छुळीन कफर्णहुमोन सोहोरमा, जो दोरीयान काठे जबुलून एने नफताली भाग मा छे, जायीन रोयने बाज गोयू; 14काहाकि जू यशयाह भविष्य कोरतान लारे कोवाय गोयलो होतो, चो पुरो होये. 15“जबुलून एने नफताली देस, दोरीयान वाटेसी यरदनोन नोंदीन पार, दिसरा जात्यान गलील. 16जे माणसे आंदारलामा बोसला होता, चे घोनो मोटो विजावो देख्या; एने जे मोरोनोन भाग एने साहवामा बोठला होता, तिंदरे पोर विजावो चोमक्यो.” 17तिनी टेमे गोथू येसु प्रचार कोरणे एने यो कोयने सुरवात कोऱ्यु, “मोन फिरावू काहाकि सोरगोन राज साते आव रोया”.
पेहेला चेला काजे बुलावनो
(मरकुस 1:16-20; लुका 5:1-11)
18गलीलोन दोरीयान काठे फिरतला येसु दुय भाशोक मतलब शिमोन काजे जू पतरस कोवायतू होतु, एने तेरु भाश अन्द्रियास काजे दोरीयामा जाव नाखतलु देख्यू; काहाकि चे माछल्या होता. 19येसु तीनु काजे कोयू, “मारे पोछोव आत रोवू, ती मी तुमु काजे माणसोक धोरणे वावा बोनावीस.” 20चे तेतारुत जावी काजे छुळीन तेरे पोछोव आत रोया. 21चा गोथा ओगा जायीन, येसु एने दुय भाशोक मतलब जब्दिन पुऱ्यु याकुब एने तेरु भाश योहान काजे देख्यू चे आपनु बास जब्दि पुठी ढोंड्यो पोर आपनी जावी सुधारता होता तीनु काजे बी बुलाव्यू. 22चे तेतारुत ढोंड्यो एने आपना बासो काजे छुळीन तेरे पोछोव आत रोया.
येसुन मांदला माणसोक वारू कोरनो
(लुका 6:17-19)
23“येसु आखा गलीलमा फिरतू जायीन तिंदरे प्रार्थना घोरोमा प्रचार कोरतू, एने राज्यान वारली खोबर प्रचार कोरतू जायीन, एने माणसोन होर भातीन बिमारी एने कोमजुर काजे वारू कोरतू गोयू. 24एने आखा सिरीया देसोमा तेरो काम पोसरी गोयो, एने माणसे आखा बिमारी वावा काजे, जी भाती भातीन बिमारी, एने दुखोमा घेरायला होता, एने जीनामा भुंडली आत्मा बी होता, एने फेपरा वावा एने लखवा बिमारी वावा काजे येसुनचा लाव्या एने तीनु काजे येसु वारू कोऱ्यु. 25गलील एने दिकापुलीस, यरुशलेम, यहुदिया एने यरदन नोंदीन पोरले धोळे गोरदी पोछोव आव लागी.”
Actualmente seleccionado:
मत्ती 4: BFBNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.