Génesis 3
3
La sc'axuntayic c'op te Adán soc Eva
1Te chan ha bayel xan sp'ijil yu'un lo'loywanej a te bin ut'il spisil yantic chambahlametic ta q'uinal te pasticlambil yu'un Dios. Hich la yalbe te antse: ¿Hich bal la yalbat te Diose: Ma me xalo'be sit spisil te te'etic ayic ta ts'umbil q'uinal, xchi bal te Diose? xchi.
2Te ants la yalbe te chane: Ya laj xhu' ya jlo'becotic sit biluc te'il ay ta ts'umbil q'uinal, 3ha nax te sit te te' ay ta yohlil te ts'umbil q'uinal la yalbotcotic te Diose: Ma me xalo'beyic sit stuquel, ma me xapicbeyic sit, scuenta yu'un ma ba ya xchamex, xchi.
4Te chan hich la yalbe te antse: Ma ba ya xchamex yu'un. 5Sna'oj Dios te bin ora yac alo'beyic te sit ya me xjahm asitic, pajal soc Dios ya xc'ohex, ha te yac ana'ic te bin lec soc te bin ma lecuque, xchi.
6C'alal la yil te ants te lec ta lo'beyel sit te te' soc t'ujbil ta ilel, soc te bic'tal-o'tantic sba te ya yac' p'ijil-o'tanil, hich la stulbe sit, la slo', soc la ya'be te smamalal te ha nix hich la slo'. 7Hich jahm sit schebalic soc la sna'ic te mayuc sc'u' spaq'uic. Ha yu'un la sts'isic ya'binal higuera, la smac sbaq'uetalic a.
8Patil te winic soc te ants la ya'iybeyic sc'op te Jehová Dios te yac ta c'axel ta ts'umbil q'uinal te c'alal ya sicub q'uinal ta tibiltic, hich la snac' sbahic ta stojol te Jehová Dios ta yohlil te te'etic ta ts'umbil q'uinal. 9Pero te Dios hich la yawtay te winic: ¿Banti ayat? xchi.
10La sjac' te winic: La jca'iy yacat ta c'axel ta yohlil te ts'umbil q'uinal, tal xiwel ta co'tan yu'un mayuc jc'u' jpac', ha yu'un la jnac' jba, xchi.
11La yal te Diose: ¿Mach'a la yalbat te mayuc ac'u' apac'? ¿Yu'un bal la alo'be sit te te' la jcalbat te ma me xalo'be te site? xchi.
12La sjac' te winique: Te ants te la awa'bon joquin, ha la ya'bon te sit te te', hich la jlo', xchi.
13Ha yu'un te Jehová Dios la sjohc'obe te antse: ¿Bin a te la apas? la yut.
La yal te antse: Ha la slo'loyon te chane, hich la jlo', xchi.
14Te Jehová Dios hich la yalbe te chane: Te bin ut'il hich la apas:
bohlobix ac'oblal ta yohlil spisil alaq'uil chambahlam
soc ta yohlil spisil te ha'mal chambahlametic.
Ta atahn ya xbehenatix,
soc ts'u'lum yac alo'
te jayeb c'ahc'al cuxulat ta q'uinal.
15Soc ya cac' te contra yac awil aba soc te antse,
soc te ats'umbal contra ya yil sba soc te sts'umbale;
ha ya yehchentesbat ajol,
yan te ha'ate yit nax yoc yac awehchentesbe stuquel, xchi sc'oblal.
16Hich la yalbe te antse:
Ya cac' tohyuc awocol ta alajel;
ay awocol ya x'alajat.
Ya xc'oht ta stojol amamalal te sc'anojel awo'tan,
soc ha ya scuentahinat, xchi sc'oblal.
17Soc la yalbe te winique:
Te bin ut'il la ach'uhumbe sc'op te awihnam,
te la alo'be sit te te' te la jcalbat:
Ma me xalo'be sit, te xchihone,
bohlobix sc'oblal te lumq'uinal ta acuenta,
wocol yac ata awe'el ta lumq'uinal
te jayeb c'ahc'al cuxulat.
18Ya xcol bayel ta chahp ch'ixetic,
soc yac awe'ic itaj te ya xcol ta q'uinal.
19Ta scuenta achic' yac ata awe'el,
ha to c'alal ya xc'atp'ujat ta lum,
como tey chicnajemat talel a;
ta ts'ubil lum pasbilat,
ta ts'ubil lum ya suhtat, xchi te Diose.
20Te Adán la ya'be sbihil Eva#3.20 Eva: jteb ma pajaluc ta a'iyel soc: cuxlejal, xchi ta hebreo. te yihname, yu'un ha nanil c'oht yu'un spisil mach'atic cuxajtic. 21Te Jehová Dios la spasbe sc'u' spac' ta snuhculel chambahlam te winic soc te yihnam, la ya'be slap. 22Soc hich la yal te Jehová Dios: Pajal c'ohemix soc ho'otic te winique, te bin ut'il ya sna' bin lec soc te bin ma lecuc. Ha yu'un ma sc'an te ya shach sc'ab yu'un ya stsac slo'be sit te te' scuenta cuxajel, te hich ya xcuxaj sbahtel q'uinal a, xchi.
23Ha yu'un te Jehová la sloq'ues ta ts'umbil q'uinal Edén yu'un ya schahpan te lumq'uinal te ha nix yich'oj pasel a. 24Hich la sten loq'uel ta ts'umbil q'uinal te winic, la yac' querubinetic ta stojol banti ya xloc' tal c'ahc'al yu'un te ts'umbil q'uinal Edén, soc la yac' espada te yac ta tihlel te ya sjimulan sba yu'un ya smacbe sbehlal te te' scuenta cuxlejal.
Actualmente seleccionado:
Génesis 3: TZH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Biblia Tzeltal Bachajon © Sociedad Bíblica de México, A.C., 2006.