Luki 23
23
Jeju Pɩlatɩɩ ƴɛra
(Mat 27:1–2, 11–14; Mar 15:1–5; Jã 18:28–38)
1Dɩ wɛr fɛʋ ɩɩr a kpa Jeju a jalna Pɩlatɩɩ ƴɛra, 2a ma dɩ wa‐n pɩɛraa sor ayɩ: Kuunikɛ sɩ fʋnɩ asɩ too a‐n tɔ da‐n pɛr laʋna, dɩ pɩɛrna tɩbɩla dakha wo wa‐n lɩmɩ Sejaarɩ lãphoaˈ, dɩ a kɔɔ sor dakha wo ayɩ, ɩnɛr dʋɔn Kirisiti fãgadaar. 3Dɩ Pɩlatɩ bulee thakɛ: Fɛr dʋɔn Juifi fãgadaarɩ? Dɩ Jeju birsee: Mɔna fɩ sonɩ gɩ. 4Dɩ Pɩlatɩ so bonɩ jidaar kɔ̃tɩnana, na tibil jɔraale ayɩ: Ma yɩ dɩ paar fɩɩʋrakɛ kuunnaakaˈ. 5Sɩ wɩ bor dɩ wa‐n so aa: A‐n tɔr tɩbɩla da‐n pɛr laʋna, da‐n dɩɩr tɩbɩla Jude dɩɩra fɛʋ, a fʋna Galile ka a kɔɔ fʋnɩ a dana kɩɛr. 6Ɔbɔɔkɛ Pɩlatɩ nɩɛnɩ gele, a bulele ado kuunikɛ Galiledaar a do. 7Ɔbɔɔkɛ Pɩlatɩ nɩɛnɩ dɩ Ɛrɔɔdɩɩ marra Jeju the, a thɔnaanɛ Ɛrɔɔdɩraakɛ kɔɔ hanɩ Jerujalɛm dawiilera dakha.
Jeju Ɛrɔɔdɩɩ ƴɛra
8Dɩ ɔbɔɔkɛ Ɛrɔɔdɩ kɔɔ yɩnɩ Jeju daʋ fʋʋrɛ dɩɩ ka, gɩdonɩ gɩ maanɛ ka a kɔɔ ƴaalnɩ a yɩɩ, gɩrɛraakɛ a kɔɔ nɩɛnɩ dɩ wa‐n mɩɩ ɔɔda. Dɩ Ɛrɔɔdɩ pɛrɛ haar, ɩnɩ‐n yɩɛ a cʋʋna dɩkhaa nɔ kpaa thɩ̃. 9Dɩ Ɛrɔɔdɩ buleele thɩ̃ɛ jɔɔ, sɩ Jeju na kɔɔ birsee thɩ̃ bɩɛllakaˈ. 10Dɩ bonɩ jidaar kɔ̃tɩna na jɔfʋ dɩɩrdarasɔ kɔɔ hale dɩ wa‐n pɩɛraa sor na fãga. 11Sɩ Ɛrɔɔdɩ na ɔɔ sɔrasɩsɔ n kpɔ̃kpɔrɔɔnɛ. Dɩ ɔbɔɔkɛ wɩ kɔɔ maanʋʋnɩ sa tʋʋ kẽkẽ ɓʋ̃ɔ, Ɛrɔɔdɩ bire thɔnaa Pɩlatɩɩ pa wo. 12Ga wiilera Ɛrɔɔdɩ na Pɩlatɩɩkɛ kɔɔ dɔnɩ kha lãlaardara mamara kũu kha dɩphã.
Mɔ̃ wɩ pɛrnɩ Jeju sor
(Mat 27:15–26; Mar 15:6–15; Jã 18:39—19:16)
13Dɩ Pɩlatɩ we bonɩ jidaar kɔ̃tɩna, na kɔ̃tɩnasɔ, na tɩbɩla a so war: 14Nɩ kɔɔ ɩna marɛ kuunikɛ ayɩ, tɩbɩla a‐n tɔ da‐n pɛr laʋna; sɩ nɩ hɩnɛ, mɩ kɔɔ buleele anɩ ƴɛra, dɩ ma yɩ puure kuunnaakɛra nɩ‐n sonɩ gɩraˈ. 15Ɛrɔɔdɩ dakha na kɔɔ yɩɩraa dɩ paaraˈ, gɩdonɩ a bire thɔnaa asɩ ƴɛra wo. Dɩ nɩ hɩnɛ, kuunikɛ na cʋʋ thɩ̃ bɩɛllakɛ dɩɩ teena wɩ kʋʋaˈ. 16A mɛ̃ gɩ khasa ma ciilnəə sɩ na fagʋʋ. [
17Sɩ fɛtɩ bɔɔ fɛʋ Pɩlatɩ teenanɛ a faa khaɩdaarɩkɛ tɩbɩla n ƴaalnɩ a ha wɩ.] 18Dɩ wɛr fɛʋ hulẽ nɔ bɩɛl ayɩ: Cʋɛ kuunikɛ a khi, sɩ fɩ faa Barabasɩ fɩ ha sɩ. 19Sɩ wɩ kɔɔ khaanɛ Barabasɩɩkɛ khaɩra, gɩdonɩ ɔr gɩɩkɛ ɩrɛnanɩ lãʋ dɩ bɩnɔ dɩ a kɔɔ kʋrɛ dakha tibil. 20Dɩ mɔ̃kɛ Pɩlatɩ kɔɔ pɛrnɩ haar ɩnɩ‐n faa Jeju, a bire bule tibil jɔɔle wo. 21Sɩ wɩ hulene kheu aa: Gbaanɛɛ kpa kʋkʋ thɩrʋra, gbaanɛɛ kpa kʋkʋ thɩrʋra. 22Dɩ Pɩlatɩ bir bule wi wo balãtherdaa: Anyee puu ca a cʋʋ? Mer na yɩɩraa thɩ̃ɛɛkɛ a cʋʋnɩ dɩɩ teena wɩ kʋʋaˈ. A mɛ̃ gɩ khasa ma ciilnəə sɩ na fagʋʋ. 23Sɩ wɩ bor a hulẽ jɔɔ dɩ wa‐n gbɛ̃gbɛrɛna aa: Kpaanɛɛ kʋkʋ thɩrʋra. Dɩ mɔna wɩ‐n huleni gɩ hana gɩ ha. 24Dɩ Pɩlatɩ tha thʋnɔ sa tu ayɩ, gɩrɛra wɩ‐n bɩɛlnɩ wɩ cʋɛ. 25Dɩ a faarɛ kuunikɛ wɩ kɔɔ bɩɛlnɩ, ʋrɛɛkɛ wɩ kɔɔ khaannɩ khaɩra laʋna na tibil kʋrra, sa gba Jeju a ha wɩ mɔ̃ wɩ‐n ƴaalnɩ.
Jeju kʋkʋ thɩrʋra
(Mat 27:32–44; Mar 15:21–32; Jã 19:17–27)
26Mɔna wɩ‐n jalnanɩ Jeju, wɩ caananɛ kũu bɩɛlɩkɛ thɛnɩ lɔɔ da‐n kɔ̃, a cʋgʋʋ dɩ heen kʋkʋ thɩrʋ da‐n kpana Jejura khiro. Ɔr wɩ‐n we Sɩmɔ̃, Sɩrɛn a the.
27Dɩ tɩbɩla jɔɔ n kɔɔ kpaaraarɛ, na khɛrasɔɔkɛ n bɩɛraanɩ dɩ wa‐n khɩɩna, 28sɩ Jeju kɩɩl hɩɩn khɛraale sa so war: Jerujalɛm khɛra, na‐n khɩɩ maraˈ, sɩ na‐n khɩa anɩ thɛthɛɛdara na anɩ bɩsanaadara. 29Nɩ hɩnɛ, bɔɔ na daan kɛ wa sonɩ anayɩ: Gɩ da kʋ̃bʋʋsɔra, gɩ da dakha kɔ̃lʋʋsɔraakɛ na kɔɔ kɔnanɩ bi yuuəˈ, na ilẽ bi nʋɔɔkɛ bi na kɔɔ mamɩnɩ yuuəˈ. 30Mɛ̃ tɩbɩla na ma wa‐n so gɔ̃gɔ̃ kɔ̃tɩnana wɩ yɩ: Nɩ je the sarrakɛ; na gɔ̃gɔ̃ yɩrara wɩ yɩ: Nɩ kɛa sarrakɛ.#Oje 10:8; Nɩr 6:16 31Gɩdonɩ ado wɩ cʋʋ thale thɩr huurə, anye na dana thɩr khɩɩra?
32Dɩ bɔ bɩɛllaalera, wɩ kpar puu cʋʋdara yenyɔɔkɛ teananɩ wɩ kʋʋrɛ wɩ a kpana Jeju dakha a jalna. 33Dɩ ɔbɔɔkɛ wɩ danɩ paarɩkɛ wɩ‐n wenɩ Yʋ khubu, le wɩ kpa Jeju kʋkʋ thɩrʋra nakha puu cʋʋdara yenyɔɔlera, bɩɛl ɔɔ nyɔ̃bɔra, bɩɛl ɔɔ nyɔ̃bɩlana. 34Sɩ Jeju sor: Thɩrɛ, faa awɩ sopugo a ha wɩ gɩdonɩ wa jɩ gɩrɛɛkɛ wɩ‐n cʋʋnaˈ. Lɩɩkɛ wɩ kɔɔ lɩnɩ wɩ tɩnɛna ɔɔ kẽkẽsɔ.#Khɩ 22:18
35Dɩ tibil jɔɔkɛ kɔɔ hanɩle jɩɩlɛ dɩ wa‐n hɩɩn. Dɩ kɔ̃tɩnasɔ dakha wɩ‐n kɔɔ ɓoɓororaarɛ dɩ wa‐n sona: Aa‐n kɔɔ taa wɩ̃ tibiləə a taa ɔɔbara bɛɛ, ado ɔr dɔ Kirisitiikɛ Thãgba phiirni.#Khɩ 22:7 36Dɩ sɔrasɛsɔ dakha n ɓoɓororaarɛ, a tɔ pɔ na ta ƴʋ̃ɔ dɩ wa‐n haa sɩ wa‐n so:#Khɩ 69:21 37Ado fɛr dʋɔn Juifi fãgadaar, taa afɩbara bɛɛ. 38Dɩ kherereekɛ kɔɔ hanɩle kʋkʋ thɩrʋra ƴũ sor: Ʋrɛɛkɛ dʋɔn Juifi fãgadaar.
39Dɩ tibil bɩɛl puu cʋʋdararaakɛ wɩ kɔɔ kpanaanɩ kha kʋkʋ thɩrʋra n nɩɩrʋʋrɛ da‐n sʋʋrnaa ayɩ: Ga do Kirisiti fɩ doaa? Taa afɩbara sa taa sɩ. 40Sɩ ɔɔ ˈwalãkha bɩɛl phaanʋʋnɛ ayɩ: Fa‐n ma Thãgba gaa? Mee ga so heen ca bɩɛlla fɩ ˈlɛ dakha. 41Sɩ ado sɛr gɩ, gɩ teere kha gɩdonɩ sɩ ˈlɛr gɩrɛɛkɛ teananɩ asɩ cʋʋ pa. Sɩ ʋrɛɛkɛ, aa cʋʋ thɩ̃ puu bɩɛllakaˈ. 42Agɩpɩ dɩ so Jejura: Jɛna mɩ ɔbɔɔkɛ fa gbanɩ fãga. 43Dɩ Jeju birsee: Sobɔr mɩ so far, nɩ̃kɛ fa har kha na mɛrɛ hɩɩr paar Thãgbaa kal ƴɔɔ.
Jejuu khi
(Mat 27:45–56; Mar 15:33–41; Jã 19:28–30)
44Gɩ kɔɔ thɔɔrɛ ʋlkhɔɔ, sɩ dɩɩ koo birəre tɩ̃tɩ̃tɩ̃ a dana dʋɔr bɔɔ. 45Wire kɔɔ birəre, dɩ kẽkẽ nɩɩkɛ hanɩ Thãgba fʋɔr cɔ kɔ̃tɩɩna vaarɛ yenyɔ.#Thɩɩ 26:31–33 46Dɩ Jeju kɔɔ hulene nʋɔ dɩɩ khɩɩr ayɩ: Thɩrɛ, mɩ gbaar ɩ̃ thu dɩ ma‐n pɛ afɩ nyɛna. Dɩ ɔbɔɔkɛ a sonɩ gele pɩ a khire.#Khɩ 31:6 47Dɩ mɔ̃kɛ sɔrasɛ tamaa kɔ̃tɩ̃ yɩnɩ gɩrɛɛkɛ kɔɔ dananɩ, a‐n dʋbɩrɛ Thãgbaa i ayɩ: Sobɔr gɩ, tɩɩ sarʋ kuunikɛ do ger. 48Dɩ tibil jɔjʋɔ kɔɔ pɔr a tor ga thɩnaale yire, dɩ ɔbɔɔkɛ wɩ yɩnɩ gɩrɛɛkɛ kɔɔ dananɩ pɩ, wɩ kɛrrɛ bir dɩ wa‐n kɔ̃ na ƴɛ gʋɛrɛ. 49Dɩ wɩrɛ fɛʋʋkɛ jɛnɩ Jeju na khɛrasɔɔkɛ n kɔɔ kpaaraanɩ a fʋna Galile, wɩ kɔɔ hale a jɩɩl ƴɔɔ dɩ wa‐n hɩɩn gɩrɛ n cʋɛnɩ.#Lu 8:2–3
Mɔ̃ wɩ dʋnɩ Jeju
(Mat 27:57–61; Mar 15:42–47; Jã 19:38–42)
50Hɩnɛ kũu bɩɛl gɩ, a kɔɔ hale a do so gʋʋrdaar dɩ wa‐n wɩɩ Jojɛfɩ. Tɩɩ bʋɔ gɩ a sarna dakha. 51Aa‐n kɔɔ tu ɩkhasɔɔdaakɛ wɩ‐n sonaˈ na gɩrɛɛkɛ wɩ‐n cʋʋnaˈ. Juifisɔɔ dɩɩkɛ wɩ‐n wenɩ Arɩmate a the. Dɩ a‐n pɩɛrɛ bɔɔkɛ Thãgbaa fãgadaar do na ɩnɩ. 52A kɔɔ ɩɩrɛ jal Pɩlatɩɩ pa a bɩɛl a ha nɩ Jejuu for. 53Agɩpɩ dɩ gba Jejuu for a gbunə a parʋʋ kẽkẽ bulo ɓʋ̃ɔ, sa dʋʋ kaaraakɛ wɩ kɔɔ thelnɩ gɔ̃gʋɔna, kãkɛ wa kɔɔ dʋnɩ tibil paˈ. 54Sɩ dɩɩ do gbɛbɩ wire gɩ, a thɩɛna gaa gɛr dʋɔn hɩɩr wi tɔ̃tʋ̃ɔ wire.
55Dɩ khɛrasɔɔkɛ kɔɔ thɛnɩ Galile nakha Jeju kɔɔ kpaanɛ Jojɛfɩra a yɩ kaa na mɔ̃ wɩ dʋnɩ Jeju. 56Dɩ wɩ kɛrrɛ bir kɔ̃ a gbɛbɩ niinikɛ n hʋnanɩ daʋ na latɩkolo, sa hɩɩr hɩɩr wire mɔ̃kɛ awɩ jɔfʋ hanɩ.#Thɩɩ 20:10; Dət 5:14
Actualmente seleccionado:
Luki 23: LOBIRI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible Society of Burkino Faso 1985.