Matyôos 2
2
Ocêl ɓɛ̄l ō gū tɔɔ̄p ócwēēcwēn ɓák ɛ́, ɓɛ́ ɛ́ zye tí ɛzi ɗúɛl Yésus
1Yésus ā ɓyɛ̂l ɓɛ̌ khandǎ Ɓétɛlɛm gūm nɛ cǐl ɓwǎs Yuɗé tí tɛ́m Elôd ā ɓɛ ndə́ə́ ê. Ocêl ɓɛ̄l ō gū tɔɔ̄p ócwēēcwēn ɓák ɛ́, ɓɛ̄ ɓú kɛ̄ tyáá ɓɛ mɛ́gbal mɛ ɗwôo, ɓɛ̄ zí kǔm ɓɛ̌ Yotósalɛm. 2Ɓɛ̄ ɓú titɔ́ nɛ ɛjijía nāá: «Ndə́ə́ Oyúɗɛn ɗí a a lwɔ̂ɔ ɓyɛ́l ɔ́kɛ́ ɛ wɛ̄? Zi ɓɛ̄ zí í ɓɛɛ cwēēcwēn wɛ̄ ɓɛ mɛ́gbal mɛ ɗwôo, zī ɓú zye tí ɛ zī ɗúɛl ɛ̂.» 3Ɗɛ Elôd ā gwôk tɔɔ̄p ték ékɛ́, ī ɓúzī thés ɛ́, ī thēs thɔ́k tí nɛ ɓot ō Yotósalɛm ɓyɛ̂ɛs. 4Ɛ ɓúzī gwésɛl ɓáánénén ɓɛ̄ ífata i mɛ́tûnka ɓyɛ̂ɛs, nɛ iyêkle ɓɛ̄ ílɔ́a tí ɛjí ɓɛ́ pyǎt Kūmāndē Zɛ́mb ā kɛs ɔ́ ā ɓɛ nāá, á á ɓyɛ́l ê. 5Ɓɔ̂ɔ nɛ nɛ̄ nāá: «Í ɓɛ̌ Ɓɛ́tɛlɛm tí cǐl ɓwǎs Yuɗê. Nɛ dɔ nāá, mgbɛ́sel mitɔɔ̄p mí Zɛɛ̄mb ā til nāá:
6“Wɔ khandǎ Ɓétɛlɛm,
Ɗí tí cǐl ɓwǎs Yuɗé ê.
Wa a ɓɛ̄ sá ɛ́ɗyamɛl tí ndɔŋ íkhanda i nén ī Yuɗê.
Nɛ dɔ nāá, ndə́ə́ wā kɛ nɛ kúl yám,
Ízaɛ́l ɔ́kɛ́, á á gbɔ́m ɓɛ yɔ̂.”»
7Elôd ɛ ɓúkā zī jóó ócél ɓīnɛ́ɛ̌ŋ sɔɔ̄ tí ɛjí ɓɛ́ tɛ́m cwēēcwēn ték ā nyɛl ɛnyén ê. 8Phúla ték ɛ́, ɛ ɓúzī kɛnd ɓɛ́ ɓɛ̌ Ɓétɛlɛm. Nyɛ nɛ nɔ̄ɔ̄ nāá: «Tɔ̄ kɛ̄ timbɛlká tɔɔ̄p ɛ́ɓyɛ̄l ɛ̄ mwán ték ɛ́nwɔŋnwɔŋ. Ɓí wā ɓyela ɛ́ nâk, ɓī zí lɛ́ɛ́ mɛ̂. Myam thɔ́k ɛ́, má á kɛ̄ ɗúɛl ɛ̂.»
9Phúla ɓā sîl ɛgwókɛ̌l lüii mí kūmāndē ékɛ́, ɓɛ̄ ɓúzī kpâŋ. Cwēēcwēn ɓā nyee ɓɛɛ ɓɛ mɛ́gbal mɛ ɗwóó ɔ́kɛ́, tí ɛkikɛ sɔ̂kphɔ̌mb nyɔ̄ɔ̄. Phúla ték ɛ́, ɛ ɓú kɛ̄ tyáá zinjá pyaāt mwán ā ɓɛ ê. 10Ɗɛ ɓā ɓɛɛ nāá, cwēēcwēn ɛ́ ɛ́ tyáá ékɛ́, ɓɛ̄ ɓúzī lwónd tí mimyaŋla. 11Ɓɛ̄ ɓúzī ní twóó njāā, ɓɛ̄ ɓyélā mwán ɓá nɛ nǎŋg wɛ̄ Malía. Ɓɛ̄ ɓúzī kút mɛ́ɓɔ̄ŋ, ɓɛ̄ ɗūɛ̄l ɛ̂. Phúla ték ɛ́, ɓɛ̄ ɗíí mímyanj myɔ̄ɔ̄, ɓɛ̄ nwɔ́ŋ gól nɛ oɓēl ō puū nɛ ɓɛ̄l ō mɛ́ɗyūū ɛ́, ɓɛ̄ pɛ́s ɛ́ nɛ yá. 12Zɛɛ̄mb ɛ ɓúzī césɛl ɓɛ́ tí líma nāá, ɓá a ɓākā ɓúlɛ̌l ɓɛ ɗá mí Elôd. Ɓɛ̄ ɓúzī nwɔŋ nyīl zyé süís, ɓɛ̄ ɓūlā ɓɛ sī nyɔ̄ɔ̄.
Ɓɛ́ ɛ́ tɔ́ nɛ Yésus ɓɛ̌ Egíptɛn
13Ɗɛ ócél ɓīnɛ́ɛ̌ŋ ɓā ɓɛ ɓɛ́ ɛ́ kpáŋ ékɛ́, éŋgeles mí Ɗá ɛ ɓúzī túula Yósɛp tí líma, nyɛ nɛ nɛ̄ nāá: «Gbal ê, u nwɔ́ŋ mwán ɓá nɛ naāŋg, u kāmb nɛ nɔ̄ɔ̄ ɓɛ̌ Egíptɛn. Ɓī ɗí pyaāŋ ī kɛ́ kum tɛ́m mí wā lɛ́ɛ́ nɛ nɔɔ̄ nāá, u ɓúla kê. Nɛ dɔ nāá, Elôd á á sáŋ nāá, ɛ dô mwán têk.» 14Yósɛp ɛ ɓúzī gbal, ɛ nwɔ́ŋ mwán ɓá nɛ naāŋg, ɓɛ tɔ̄ pum ɛ pum ɓɛ̌ Egíptɛn. 15Ɛ ɗí pyaāŋ ī kɛ́ kum tɛ́m Elôd ā jüe ê. Tí ɛlwóndɛ̌l lüii mí Ɗá, mgbɛ́sel mitɔɔ̄p wɛ̄ ā lɛ́ɛ nāá: «Mí í jóó Mwán aām nāá, ɛ gbás ɓɛ̌ Egíptɛn.»
Ɓɛ́ ɛ́ dó thūnd ɓwân
16Ɗɛ̌ Elôd ā ɓɛɛ nāá, océl ɓīnɛ́ɛ̌ŋ ɓɛ́ ɛ́ kwóŋ ɛ́ ékɛ́, ɛ ɓúzī gbá ɛ́ɓūk tí thɔ́ŋ cwaŋ. Ɛ lwōm ɓót nāá, ɓɛ kɛ́ɛ dó ɓwán ɓyɛ̂ɛs, tí ɛnyɛl tí ithɔmá i kɛ́ kum tí ɓɛ̄l ō mú nɛ mimbú mīmbá tí khanda Ɓétɛlɛm yɛ̂ɛs, zī ka nwɔŋ ɓīl íkhikhāndā ī mɛ́phanj. Ā sâ ɗyaāŋ ī dá dala nɛ tɛ́m ócél ɓīnɛ́ɛ̌ŋ ɓā lɛ́ɛ́ ê. 17Í ɗyaāŋ sá mgbɛ́sel mitɔɔ̄p mí Zɛɛ̄mb Yelemí ā lüii ékɛ́, yā lwónd ê. Ā lɛ́ɛ nāá:
18«Cīm ī tí ɛɗüǐs ɓɛ̌ Láma
Nɛ mɛjüé nɛ mɛkɛ́l mɛ̄ khɔ̂ŋ.
Í Alásyɛl ɗí tí ɛje ɓwán ɓɛ̄
A a kpɛ́l nāá, ɓɛ̄ lyók ɛ
Nɛ dɔ nāá, ɓwán ɓɛ̄ ōték ɓɛ́ ɛ́ jüe.»
Phúla mí Yósɛp ɓɛ̌ Egíptɛn
19Phúla ɛswee ɛ mí Elôd ɛ́, éŋgeles mí Ɗá ɛ ɓúzī sula Yósɛp tí líma ɓɛ̌ Egíptɛn. 20Nyɛ nɛ nɛ̄ nāá: «Gbal ê, u nwɔŋ mwán ɓá nɛ naāŋg u ɓūlā ɓɛ kánda Ízaɛ̂l. Nɛ dɔ nāá, ɓot o ɓā sisáŋ ɛdô mwán ték ɓák ɛ́, ɓɛ́ ɛ́ jüe.» 21Yósɛp ɛ ɓúzī gbal, ɛ nwɔ́ŋ mwán ɓá nɛ naāŋg ɛ ɓūlā ɓɛ kánda Ízaɛ̂l. 22Sá gwát ɛ ɓúzī gwók nāá, Aakelaós mwán mí Elôd ɛ́ ɛ́ nwɔ̌ŋ də́ə́ phúla ɛswee ɛ sāŋg ɓɛ̌ khandǎ Yuɗê. Ī ɓúzī sá ɛ́ ɓwɔ̄ŋ tí nāá ɛ ɓúla. Zɛɛ̄mb ɛ ɓúzī ɓākā lüii nɛ nɛ̄ tí líma. Yósɛp ɛ ɓúzī tɔ́ ɓɛ pák ɓwǎs Galilê. 23Ɛ kɛ́ ɗǐ ɓɛ yīl khanda ɓɛ́ jōō nāá, Nazalɛ́ ê. Tí nāá, sá ógbɛ́sel o mítɔɔ̄p o mí Zɛɛ̄mb ɓā lɛ́ɛ nāá: «Ɓá á jóó ɛ́ nāá, mot Nazalɛ́ ékɛ́,» i lwónd ê.
Actualmente seleccionado:
Matyôos 2: MPU
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, CABTAL amp © 2023, COCELMPU