Aba Vatowo 14
14
Loti ana yóita tetelina
1E tutayana da Sinari adi tolovina Amrapeli, da Elasa adi tolovina Ariyoki, da Elam adi tolovina Kedolaomera be da Goim adi tolovina Tidali siilovina, e tolovinayadi adi taivasi madi tovayaviyayao silamgógana yaviya manuna. 2Silamgógana, sideli sina bego sivayaviya tolovina adi tainima taiyao. Tauyadi moe da Sodoma adi tolovina Bera, da Gamora adi tolovina Bisa, da Adima adi tolovina Sinabi, da Siboim adi tolovina Semibera be nakae da Bela adi tolovina. Belayana youyuwoina Sowa. 3Ame tolovinayadi adi tainima sima Sidim butumina goi taiyao sispwagógana yaviya manuna. (Ego niga baige butumayana goi otoku yoina Négwasa Negonegosina#14:3 Négwasa Negonegosina: Ame négwasa go, soroti sinaena ivakaigaga, tauna amoko goi geya tayaamo kaga maa yawoina itoboine ikaiyaka. Ame tuta yoina Négwasa Kaamasina. isowóduwo.)
4Ego idi yaviyayana unana ame: Tala ana badabada yawou aiyuwo goi Kedolaomera tolovina adi tainima ilovinaedi go, ina lovina yaidi igoyo. Tuwo ina lovinayana kidi tolovina adi tainima bogina ilausidi. Tauna tala yawou aitonina goi sitaoya bego ina lovina sikapipilave.
5E tala yawou aivasina goi, kidi Kedolaomera tolovina adi taivasi taiyao silamgógana go, idi kasa sikalavedi sinonoina Sidim butumina. Sinonoina, e asa Asiterota Karanaim goi sisowóduwo, e todukeketayao sikaumatedi. Ikavava, sina asa Em goi Susim tubunao sikaumatedi. Ikavava, sina asa Sava Kirayataim goi Emim tubunao sikaumatedi. 6Niga sina Seira koyaina goi Kori tubunao sikaumatedi. Ikavava, sina Eli Parani yoyowo goi sikaaiyaka. 7Niga sina Eni Misipata goi moe youyuwoina Kadesi, e Amaleki tubunao sikaumatedi. Ikavava, sina Esasoni Temari goi Emori tubunao sikaumatedi.
8E amo tutayana kidi tolovinayadi adi tainima bogina silamgógana go, madi tovayaviyayao sideli sima Sidim butumina goi sitaoya bego sivayaviya 9kidi Kedolaomera taiyao. Tauna tolovina adi taivasi madi tovayaviyayao go, idi kaleyayao tolovina adi tainima madi tovayaviyayao. 10E kidi Kedolaomera sitogaga, tauna kidi da Sodoma be da Gamora bego sisiya. Ego Sidim butumina goi bobosiu sikaaiyaka go, sépwala potapotaina ilataoidi. Tauna tutayana da Sodoma be da Gamora idi tovayaviyayao sisiya, koroto maniyedi sisou bobosiuyadi sinaedi goi go, maniyedi sisiya sina koya goi. 11Sisiya go, kidi Kedolaomera sitogaga, tuwo sina da Sodoma be da Gamora idi kasa goi konadi be avadi madabokidi sivainaoidi. 12E Eberam ana gómana natuna Loti nakae siyoisi bego ma konana sinavedi idi kasa goi. Bogina kuyagoi. Tauyana nava Sodoma goi ikaaiyaka.
13Sinavedi go, koroto tayamo isiya ima Eberam, tauyana , ilatuwoko idigo kana,
‘Eberam, Kedolaomera ma senao sina Sodoma tomota silauidi go, am gómana natuna Loti siyoisi, sinave.’
Ego amo tutayana Eberam ikaaiyaka koroto tayamo yoina ina kalova gagaidi goi. Mamreyana Emori tubuna go, senao Esikoli be Aneri. Ago adi taito Eberam taiyao silamgógana; latuwodi Kedolaomera ma senao idi tovayaviyayao sivatapiyedi.
14E livalayana Eberam inove, ina koroto adi badabada teri andedi eitin (318) iduduwedi sima. Tauyadi tovayaviya katubaayasidi go, moe Eberam ina tunagu goi sibíbina, tauna inumisedi. E iduduwedi sima, taiyao sina asa yoina Dani goi bego Loti ana toyoitayao sivatapiyedi. 15Sina Dani goi go, sabamgo goi Eberam ina tovayaviyayaoyadi, moe ina pakonayao, iwotaidi sina Kedolaomera ma senao idi tovayaviyayao silauidi, sivatapiyedi. Tuwo kidi Kedolaomera sisiya sina yawéyana Damasiko goi siseivata sina asa yoina Koba. 16Tauna kaga liliuna tauyadi siyoisidi, e kidi Eberam sikabimneidi. E nakae ana gómana natuna Loti ma konana be nakae tomota liliudi sikabimneidi.
Tonúwala Melikisedeki ina Eberam ikaaipakuye tetelina
17E Eberam Kedolaomera ina tovayaviyayao be senao idi tovayaviyayao ilauidi ikavava, ikaluvila ina ina kasa. Inonoina, Sava Butumina goi Sodoma adi tolovina ima ivalobode. Savayana ana yagoina moe Tokalibúbuna Butumina.
18E kina go da Salema#14:18 Salema: Ame asayana nakona Yerusalema. adi tokalibúbuna yoina . 19Tauyana ima Eberam idigo kana,
‘Eberam, Yaubada Tokanayatanatoina bei ikaipakuyem.
Tauyana yábana be poyapoya adi tomadágina.
20Yaubadayana aba yapali!
Im kaleyayao goi iyavem be nimam goi iyatoidi.’
E tuwo Eberam ina kaleyayao konadi liliudi bogina ikabidi iwotaidi aiguyau ana badabada yawou go, aiguyau tayamo ikabi Melikisedeki ivini. 21Ivini ikavava, e da Sodoma adi tolovina idigo kana,
‘Eberam, kónana kom toinim kwabīdi go, tomota boi siyooisidi yau kuvinīgu.’
22E kina Eberamyana idigo kana,
‘Akatótula Yaubada Tokanayatanatoina matana goi, Tauyana yábana be poyapoya adi tomadágina. 23Guna katotulayana ame nakae: Geya kada tayaamo konam bei akabi geya. Neta gagaina o giyaina, geya akabiyeta, govila kom kam, “Yau pasigu Eberam iguyau.” 24Tauna konam geya akabidita, go sem kaga liliuna guna tovayaviyayao bogina sikáika, moe bogina. Ago tauyadi Aneri, Esikoli be Mamre yaviya goi sivaitegu, tauna kutagonēdi adi kaiguyau sikabidi.’
Actualmente seleccionado:
Aba Vatowo 14: GVS
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2019, Wycliffe Bible Translators, Inc. All rights reserved.