Luka 14
14
İsa kê jü Ferisi dero
1Jü Roca Şabati#14:1 Roca Şabati: Gorê Kıtabê Bımbareki de, na rocı guriyayenı nêbena. de, İsa şi kê pilanê Ferisiyan ra jüyê kı uca de nan boro. Çımê her kesi İsay sero bi. 2Vırniya İsay de, jü mêrık esti bi; canê ni mêrıki pêro awkı top kerdi bi. 3İsay Ferisiyan bı ilimdaranê itıqati rê nia vat: “Qeyda Heqi de, çık amo vatenı? Roca Şabati de, jüyê de nêwesi wes kerdenı bena yan nêbena?” 4İnan vengê xo nêvet. Mêrıko kı nêweso, İsay dest na pıra kerd wes, o rusna kê.
5Ferisiyan bı ilimdaranê itıqati rê nia vat: “Lacê sıma yan gayê sıma kı Roca Şabati de warogıno quyi, sıma a deqa iy nêvecenê?” 6İnan cüabê ni persi nêda.
7İsay sêr kerd meymanê kı Ferisi saba werdi veng day bi cı, inan xo rê en cayê vırniye pê gırotê. Nay sera, İsay inan rê na mesela qeşi kerdı, vat: 8“Ekı jüyê saba veyvi say rusna to rê, meso en vırniye de menisı ro. Wayirê kêyi belkia say rusna jüyo kı to ra ravero. 9Ekı tı en vırniye de roniserê, wayirê kêyi êno lê to, vano kı, ‘Hurindia xo bıdı ni mêrıki.’ A sırı, tı bı serm'a vezenay ra, sonay en peyniye. 10Ekı tı şiyay jü veyvı, so en peyniye de ronisı. Wayirê kêyi vacero, ‘Bıra, bê vırniye de ronisı.’ A sırı mıleto kı serê xonça de, verê inan de qimetê to beno zêdı. 11Kam kı xo cor de vêneno, o cêr de beno; kam kı xo cêr de vêneno, beno berc.”
Mesela ziyafeti
12Bado İsay Ferisiyo kı iy veng day bi kê xo, iy rê nia vat: “Tı nanê peroci de ya ki ê sani de veng medı havalanê xo, bıranê xo, mordemanê xo, jü ki veng medı ciranê toyê kı variyetınê. Çıkı i ki peyser veng danê to. 13Feqet key kı tı jü ziyafet danay, veng dı mordemê kı feqirê, kudê, seqetê u korê. 14Ğeji bê to, çıkı ê ninan thabay xo çino, nêşkinê saba werdi peyser veng derê to. Waxto kı mordemê rasti merdenı ra peyser amay, a waxt awa kı to kerda, Heq verê ay dano to.”
15İyê kı serê sıfra de, inan ra jüyê se kı ni qesan eşiya pê, İsay rê nia vat: “Kamo kı Hukumdariya Heqi de nan boro, ğeji bê iy!”
16İsay ki iy rê na mesela vatı: “Rocê, jü mêrık ziyafetê de gırsi dano, xeylê mıleti dawet keno. 17Waxto kı nan hazır beno, xızmetkarê xo rusneno kı vacero, ‘Bêrê, nan hazıro.’
18“Feqet, pêronan xo rê çiyê manı kerd kı meserê dawet. Jüyê vano kı, ‘Mın hêgao de newi gıroto, gereko kı ez sêri iy bıvêneri. Se beno, qusır de sêr mekı.’
19“Jüyo de bin vano, ‘Mın phanc cıti gay gırotê, gereko kı ez sêri inan bıvêneri, ala senênê. Se beno, qusır de sêr mekı.’
20“Jüyo de bin ki vano, ‘Ez newi zeweciyan, nêşkinan bêri.’
21“Xızmetkar peyser êno, vano, ‘Wayir, hal-mesel nia niawo.’
“Wayir ki zaf xuli beno, vano, ‘So veci ray-olağanê sukı; mordemê kı feqirê, kudê, korê, seqetê top bıkı biya!’
22“Xızmetkar peyser êno, vano, ‘Wayir, mın vatena to kerdı, feqet hona kê de ca esto.’
23“Wayir xızmetkarê xo rê vano, ‘Ekı hinio, so rayê kı dormê sukı derê, i cayan ro sêr kı, dormê çeperan ro sêr kı; mıleto kı vênenay, biya kı kê mın pırr bêro.’ 24Sıma rê nay vaceri: Mordemê kı mın sıftı veng day bi cı, inan ra qe jüyê nêşkino nanê mı ra tham bıkero.”
İsay dıma şiyayenı çetına
25Bado İsa lêwı de xeylê mıleti'a pia ray ra şiyenê. İsa gêra ya, inan rê nia vat: 26“Ekı jüyê êno lê mın, ma u piyê xo ra, cinık u domananê xo ra, wa u bıranê xo ra, ser ra ki canê xo ra nêvêreno ra, nêşkino telebê mın bıbo. 27Kamo kı çarmıxê xo nêgêno, mı dıma nêno, nêşkino telebê mın bo.
28“Ekı mabênê sıma ra jüyê wast jü qule bıvırazo, sıftı hesab-kıtabê xo keno, perê xo bas kenê yan nêkenê. 29Temel kı est, nêşkiya guri bıqedıno, her kes pê cı kayê xo keno, 30vano, ‘Mêrıki baslê inşati kerd, nêşkiya bıqedıno.’
31“Ekı jü qıral saba cengi sêro qıralê bini ser, hona kı nêkut ceng, niseno ro, sêr keno, xo xo de vano, ‘Eceb, des hazar eskerê mın, bı vist hazar eskeranê i qıralê bini'a şikinê bas bıkerê?’ 32Ekı bı qıralê bini'a nêşkino bas bıkero, hona key kı duri dero, xeberdaranê xo rusneno kı haştiye senên bena, bımuşiyo. 33No saba hergo teka sıma ki niawo. Sıma ra kamcini kı çıkê xo esto çino ca meverdo, nêşkino telebê mın bo.
34“Solı, çiya de rında, feqet solı kı thamê xo vindi kerd, reyna nêşkina thamê xo peyser bigêro. 35Nı welı rê xêrê xo beno, nı ki hêgay rê bena zıbıl, ercina teber. Kamo kı eşino pê, gos bıdero ni qesanê mın!”
Actualmente seleccionado:
Luka 14: kiu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active), Wycliffe Bible Translators, Inc. All rights reserved.