मरकुस 16
16
यीशु दुबारी जीण त स्वर्ग जे घेण
(16:1-20)
यीशु दुबारी जीण
मत्ती 28:1-8; लूका 24:1-12; यूहन्ना 20:1-10
1शण्हेचर ब्यादि जपल भक्ति करणे रोज पूरा भोई गा, त मगदला ग्रांए मरियम, याकूबे ई मरियम त सलोमी अब्बल अब्बल मुश्कि बाड़ी चीज खरीदी ताकि घेई कइ यीशु लाश पुठ लान्ती। 2त हफ्ते पेहला रोजे भ्यागे, दिस निस्ते ईं से कब्र पुठ जे घेण लगी। 3त से अपफ बुच बोलुण लगी, “हें लिए कब्रे मुंह पुठि पठ कोउं घरांता?” 4पर तठि पूज कइ हेरु कि मुंह पुठि मोटा घोड़ घराओ असा। 5त से कब्र अन्तर घेई गई। तठि तेन्हि यक हच्छे झिणे डबो जवान सुमले कना बिशो काआ, त से सुआ हैरान भोई गई। 6त तेन तेन्हि जे बोलु, “हैरान न भुए! तुस नासरत ग्रांए यीशु, जे क्रूस पुठ ढनओ थिआ, तोपुण लगो असी ना? से जी गो असा। हेरे, एईएं से जगाह भो, जेठि तेन्हि से रखो थिआ। से इठि नेईं। 7पर तुस घिए, त तसे चेली त पतरस जे बोले कि से तुसी केआं पेहलाई गलील राज्य जे घेण लगो असा। मरुण केआं पेहले जीं तेन तुसी जे बोलो थिउ, तठि तुसी से केता।”#मत्ती 26:32; मरकुस 14:28 8तोउं से जिल्हाणु कब्र केआं निसि त दौड़ दी कइ नश गई; किस कि से सुआ डर कइ ठरकण लगो थी त हैरान भोई गो थी। तेन्हि केसे जे किछ न बोलु, किस कि से डरो थी।
दुबारी जीणे पता यीशु मगदला ग्रांए मरियम जुए मीण
मत्ती 28:9-10; यूहन्ना 20:11-18
[9हफ्ते पेहले रोज पथवारी यीशु जी गा त सोबी केआं पेहला मगदला ग्रांए मरियमे का, जेसे अन्तरा तेन सत दुष्ट आत्मा बाहरि किढ़ो थी। 10तेन घेई कइ यीशु चेली त होरे साथी जे बोलु, जे सुआ दुखी थिए त रोलुण लगो थिए। 11ईं शुण कइ कि से जी गो असा त तेन से काआ, तेन्हि चेली त होरे साथी विश्वास ना किआ।]
यीशु दुई चेली जुए मीण
लूका 24:13-35
[12तढ़िया पता से होरे रूप अन्तर तेन्हि बुचा दुई चेली काआ, जपल से केसे ग्रां जे घेण लगो थिए। 13तेन्हि बि घेई कइ होरी जे बोलु, पर तेन्हि तेन्के विश्वास ना किआ।]
यीशु ग्याराह चेली जुए मीण
मत्ती 28:16-20; लूका 24:36-49; प्रतिनिधि 1:6-8
[14इढ़िया पता, जपल से ग्यारोह चेले रौठि खाण बिशो थिए, तेन्हि यीशु काआ। तेन्के अविश्वास त नकठर मने लिए तेन से जड़के, किस कि जेन्हि तसे जीणे पता से काओ थिआ, तेन्हि तेस पुठ विश्वास न किआ।
15तोउं यीशु तेन्हि जे बोलु, “तुस पूरे धरती पुठ घेई कइ सोबी जाति मेह्णु बुच खुश खबरी प्रचार करे। 16जे विश्वास कता त पाणि अन्तर चुसीन्ता, से बच घेन्ता। पर जे विश्वास ना कता तस सज्जा मेती। 17विश्वास करणे बाड़ी के ई निशाणी भुन्ति कि से में नओं नी कइ दुष्ट आत्मा नशाणते, नोई नोई भाषा बोते। 18कीड़ी टाइ छते। अगर से जेहेर बि पियेल#16:18 इठि यीशु बोलुणे मतलब ई नेईं कि जाणबूझ कइ कोई कीड़ा टाण, या जेहेर पीण। यीशु मतलब असा कि अगर कोई तेस पुठ विश्वास कता त से हर कुछ कइ सकता।, तोउं बि तेन्हि कुछ न भुन्तु; से बीमार मेह्णु पुठ हथ रखियेल त से ठीक भोई घेन्ते।”]
यीशु स्वर्ग जे घेण
लूका 24:50-53; प्रतिनिधि 1:9-11
[19प्रभु यीशु तेन्हि जुए बोक करणे पता परमेश्वरे से स्वर्ग जे नी छड़ा, जेठि से परमेश्वरे देहणा कना सुआ इज्जते जगाई बिशा। 20तोउं तेन्हि चेली निस कइ हर जगाई प्रचार किआ, त प्रभु तेन्हि जोई साते कम कता रिहा। त तेन्हि चमत्कारे कमे के बेलिए जेन्हि चेले कतेथ, परमेश्वरे साबित कइ छड़ु कि तसे वचन सच्चे असे। आमीन।]
Actualmente seleccionado:
मरकुस 16: pgg
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active) Wycliffe Bible Translators, Inc. All rights reserved.