मरकुस 14
14
यीशु मरुण
(14:1—15:47)
यीशु खिलाफ मेझर
मत्ती 26:1-5; लूका 22:1-2; यूहन्ना 11:45-53
1दुई रोज पता बचणे त्योहार त रौठि त्योहार#14:1 बचणे त्योहार: परमेश्वरे इस्राएली मेह्णु मिस्र देशे गुलामी केआं छुड़काण जे, जे चमत्कारे कम किओ थिए, तसे याद अन्तर मनान्ते। (निसुणे 12:8-15:20) एणे बाड़ा थिआ। त मुख्य पुजारे त धर्मशास्त्री ताक अन्तर थिए कि से मठे नियोक कइ कीं टाण त मारण। 2पर से डर कइ ईं बि बोतेथ कि “त्योहार रोज ना। ई न भो कि मेह्णु अन्तर बबाल मच घियाल।”
यक जिल्हाणु यीशु मगिरि तेल छइ कइ इज्जत करण
मत्ती 26:6-13; यूहन्ना 12:1-8
3इस बुच, यीशु बैतनिया ग्रां शमौने गी रौठि खाण बिशो थिआ। ए से शमौन भो, जेस पेहले कोढ़े बीमारी थी। तपल यक जिल्हाणु संगमरमरे यक बोतल अन्तर जटामासी बुटे सुआ कीमति खुशबुदार तेल घिन आई; त बोतल टोड़ कइ सोब तेल यीशु मगिर पुठ डोल छड़ा। 4पर तस जुए बिशो मेह्णु बिचा कोई कोई लेहरी कइ बोलुण लगे, “ए तेल बेकार किस मुकाई छड़ा? 5किस ना ए कीमति तेल टाई सौ चन्नी सिक्के बइ बेच कइ कंगाली अन्तर बांटतेथ?” त से सोब तेस जड़काण लगे। 6त यीशु बोलु, “चुप बिशे; अस किस परेशान कते? एन त मोउं जोई भलु किउ। 7किस कि कंगाल तुसी जोई हमेशा साते रेहन्ते। तुस जपल चहे तपल तेन्के भलु कइ सकते। पर अउं तुसी जोई हमेशा न रेहन्ता। 8जे किछ ए कइ बटी, एन किउ; एन मोउं पथणे तेयारी अन्तर पेहलाई में जिसम पुठ तेल लाई छड़ा। 9अउं तुसी जे बोता कि पूरे धरती पुठ जेठि कोठि बि खुश खबरी प्रचार भोल, तठि असे इस कमे बोक बि हमेशा असे याद अन्तर करिन्ती।”
यहूदा यीशु धोखा देण
मत्ती 26:14-16; लूका 22:3-6
10तपल यहूदा इस्कारियती जे बाराह चेले अन्तरा यक थिआ, मुख्य पुजारे केईं गा त धोखे जुओई तेन्के हथे बइ यीशु टोवाणे की। 11से ईं शुण कइ खुश भोई गे, त तसे धे रुपेई देणे सोह किए। तोउं से तेस टोवाण मौका हेरण लगा।
यीशु अपु चेली जोई अखिर बेह्लु खाण
मत्ती 26:17-30; लूका 22:7-23; यूहन्ना 13:21-30; 1 कुरिन्थ 11:23-25
12तोउं रौठि त्योहारे पेहले रोज, जेस अन्तर इस्राएली मेह्णु बचणे त्योहारे किएऊ काटतेथ से दन एई गा। त यीशु चेली तेस केआं पुछु, “तु कोठि चहन्ता कि असी घेई कइ तोउ जे बचणे त्योहारे खांजे तेयार करुण?” 13यीशु अपु चेली अन्तरा दुई जेईं ई बोल कइ लंघाए, “यरुशलेम शेहर घिए, त यक मेह्णु तुसी पाणि घड़ु नेन्ता मेता, तसे पता पता घिए; 14से जेस घर अन्तर घियाल, तेस गीहे मालिक जे बोलुण, ‘गुरु पुछता कि जेस अन्तर अउं अपु चेली जोई बचणे त्योहारे रौठि खांता, में से भखेरी कोठि असी?’ 15से तुसी यक सजोरि, त तेयार किओ मोटी आटी हरालता, तठि हें लिए बचणे त्योहारे रौठि बणाण दिए।” 16चेले तठिआ शेहर ए, त जीं तेन तेन्हि जे बोलो थिउ, तिहांणि मेउ; त बचणे त्योहारे रौठि बणाई।
17जपल ब्यादि भुई, त यीशु अपु बाराह चेली जोई तठि किठे भुए। 18त जपल से बिश कइ रौठि खाण लगे, त यीशु बोलु, “अउं तुसी जे बोता कि तुसी अन्तरा यक, जे मोउं जोई साते रौठि खाण लगो असा, मोउं धोखे जोई दुश्माणी के हथ टोवान्ता।” 19ई शुण कइ से सोब उदास भोई गे त यक यक कर कइ तेस केआं पुछुण लगे, “कि से अउं भो ना?” 20तेन तेन्हि जे बोलु, “से तुसी बारोही अन्तरा ईं यक असा, जे मोउं जोई साते अभेईं कटोर अन्तर चुसुण लगो असा। 21किस कि मनखे कुआ त जीं तसे बारे लिखो असु तीं मरता; पर तेस मेह्णु खेया खाट भोई घेन्ति, जे मनखे कुआ धोखा दी कइ टोवान्ता। तेस मेह्णु लिए खरु भुन्तुथ अगर से जमोरा ना भुन्ताथ।”
22जपल यीशु त तसे चेले खाण लगो थिए, त यीशु रौठि टाती, त परमेश्वरे धन्यवाद दी कइ टुकड़ेरी, त अपु चेली कें धे दिती, होर बोलु, “इस नीए, ए में जिसम भो।”#14:22 यीशु इठि अपु जिसमे यक रौठि जुए बराबरी करण लगो असा। किस कि जीं रौठि टुकड़ेरिन्ती, तिहांणि तसे जिसम जुए करिन्तु। 23तोउं तेन दाखरसे कटोरा टाइ कइ परमेश्वरे धन्यवाद किआ, त तेन्के धे दिता; त तेन्हि सोबी तेस अन्तरा पिउ। 24त तेन तेन्हि जे बोलु, “ए दाखरस में लहु भो, जे सुआ जेईं जे बहोईन्तु। एसे बेलि परमेश्वर त मेह्णु बुच यक नोउआं रिश्ता बणता। 25अउं तुसी जे बोता कि तपल तकर अउं फिर कदी दाखरस न पीन्ता, जपल तकर परमेश्वरे राज्य अन्तर नउआं दाखरस न पीन्ता।” 26तोउं से छुआंरी लाई कइ जैतुन बुटे फाट पुठ जे गे।
पतरसे मुकरिणे बारे यीशु भविष्य वाणि
मत्ती 26:31-35; लूका 22:31-34; यूहन्ना 13:36-38
27तोउं यीशु तेन्हि जे बोलु, “तुस सोब मोउं अकेला छड़ दी कइ नश घेन्ते, किस कि धरमे कताब अन्तर लिखो असु
‘अउं पुहाल मारता, त ढडुड़ खिल्हिर घेन्ते।’#जकर्याह 13:7
28पर दुबारी जीण केआं पता अउं तुसी केआं पेहलाई गलील राज्य जे घेई घेन्ता।”#मत्ती 28:16 29पतरसे तेस जे बोलु, “सोब तोउ अकेला छड़ दी कइ नशियेल, तोउं बि अउं तोउ कदी छड़ि ना देन्ता।” 30यीशु तेस जे बोलु, “अउं तोउ बोता कि आजे रात कुकड़े दुई लिंगि बांग देण केआं पेहले ई, तु टाई लिंगि मोउं पिछाणुण केआं मुकीर घेन्ता।” 31पर पतरसे दुबारी टोहर जोई बोलु, “अगर मोउं तोउ जोई साते मरुण बि एई घियेल, तोउं बि अउं तोउ पिछाणणे केआं न मुकरीन्ता।” तिहांणि होरी सोबी बि बोलु।
यीशु प्रार्थना करीण
मत्ती 26:36-46; लूका 22:39-46
32तोउं, यीशु त तसे चेले गतसमनी नओएं यक जगाई जे गे, त तेन अपु चेली जे बोलु, “जपल अउं प्रार्थना कता, तुस इठि बिशे।” 33त से पतरस, याकूब त यूहन्ना अपफ जोई साते घिन गा। से सुआ उदास त दुखी भुण लगा। 34त तेन तेन्हि जे बोलु, “मोउं सुआ अवज ईं भुण लगो असु। ईं लगतु जीं में कांया उचेईंण लगो असी। तुस इठि चौकाने भोई बिशे।” 35तोउं से धिक अगर गा त धरती पुठ उटेऊ सेली कइ प्रार्थना करण लगा कि अगर भोई सकियेल त एस कष्ट सेहणे घड़ी केआं परमेश्वर तस बचाए। 36तेन बोलु, “ए अब्बा, ए बोउआ! तोउ केआं सोब किछ भोई सकतु; एस दुखे घड़ी मोउं केआं दूर कर: तोउं बि जीं अउं चहन्ता तीं ना, पर जीं तु चहन्ता तिहांणि भो लौतु।”
37तोउं से वापस आ त तेन्हि उंघो हेर कइ पतरस जे बोलु, “ओ शमौना! तु उंघो असा ना? कि तु यक घड़ी बि मोउं जुए खड़ खड़ न बिश सका ना? 38खड़ खड़ बिशे त प्रार्थना कते रिहे, ताकि तुस केसे परीक्षा अन्तर न पड़ेल। किस कि तुं मन त तेयार असा, पर जिसम कमजोर असा।” 39तोउं से दुबारी तठि गा त तिहांणि प्रार्थना कते रिहा।
40पता से वापस आ त हेरु कि से उंघोरे थिए, किस कि तेन्के टीर उंघाटे थिए। तेन्हि पता ना लगा कि तेस जे की जवाब देण। 41तोउं टेके लिंगि एई कइ तेन तेन्हि जे बोलु, “खरी, खरी! की तुस अपल तकर उंघोरे त अराम करणे बिशो असे ना? बस, भोई गा अब। हेरे, से घड़ी एई गई जपल मनखे कुआ दुष्ट मेह्णु हथे टोवेईन्ता। 42खड़ भुए त हंटे। हेरे! मोउं टोवाणे बाड़ा भेएड़ पूज गो असा!”
यीशु धोखे जोई टोवाण
मत्ती 26:47-56; लूका 22:47-53; यूहन्ना 18:3-12
43यीशु होता ईं बोलुण लगो थिआ कि बारोही प्रतिनिधि बुचा यक जेईं तठि पूज गा। तस जोई यक बोडा हुसुड़ा बि थिआ जे तलवार त लठि अपफ जुए साते घिन अओ थिए। से मुख्य पुजारे, धर्मशास्त्री त टजे स्याणे लंघो थिए। 44धोखे जोई तसे टोवाणे बाड़ा यहूदे तेन्हि जे मेझर कर कइ ठीक किओ थिउ कि जेस जुए अउं गड़ामेड़ा कर कइ फोकड़िउं सेईंए भो, से बिचामीर कइ घिन घेण। 45से तठि आ त झट तसे भेएड़ घेई कइ बोलु, “गुरुजी, नमस्ते!” त तस जुए गड़ामेड़ा कर कइ फोकड़िआ। 46तोउं तेन्हि से टाइ कइ बन्ह छड़ा। 47पर यीशु चेली अन्तरा जे भेएड़ खड़ खड़ थिए, यक जेईं छूरि किढ़ कइ बोडा पुजारे नौखर पुठ चलाई, त तसे कन छोलि फटा। 48यीशु तेन्हि जे बोलु, “तुसी कि अउं डाकु लगता ना जे तुस तलवारी त लठि घिन कइ मोउं टाण जे अओ असे? 49अउं त रोज देहेर अन्तर तुसी जोई साते बिश कइ शिचालताथ, त तिखेईं तुसी अउं न टाता : पर ए तोउं भु कि में बारे धरमे कताबे बोके पूरी भोल।”#लूका 19:47; 21:37 50ईं हेर कइ सोब चेले तेस छड़ दी कइ नश गे। 51तेन्हि बुचा यक जवान अपु नगे जिसम पुठ सद कोट लाई कइ थिआ; त जपल मेह्णु तस टाण लगे, 52त से कोट छड़ दी कइ नगा नश गा।
यहूदी मेह्णु के टजोटे सम्हाणि यीशु
मत्ती 26:57-68; लूका 22:66-71; यूहन्ना 18:13-14; 18:19-24
53तोउं से यीशु बोडा पुजारे केईं घिन गे; त सोब मुख्य पुजारे, टजे स्याणे त धर्मशास्त्री तसे गी किठि गे। 54पतरस दूरा ईं तसे पता पता बोडे पुजारे दुआर तकर एई गा, त सपाही जोई बिश कइ आग सेकण लगा। 55इस बुच मुख्य पुजारे त टजोटे मेह्णु यीशु मरण जे तसे खिलाफ उगाह तोपुण लगे, पर न मेईंया। 56सुआ जेईं तसे खिलाफ झूठा उगाह देण लगो थिए, पर तेन्के उगाही यके न थी। 57तोउं कुछ मेह्णु खड़ी कइ तसे खिलाफ ई झुठी उगाही देण लगे, 58“असी ए ईं बोते शुणो असा, ‘अउं इस हथे बणो देहेर ढेई छता, त टेके रोज अन्तर होरा बणान्ता, जे हथे बइ न बणो भुन्ता।’”#यूहन्ना 2:19 59ई बोक अन्तर बि तेन्के उगाही यक न भुई। 60तोउं बोडे पुजारे सभाई बिचा खड़ भोई कइ यीशु केआं पुछु, “तु किस कोई जवाब देण नेईं लगो? एन्हि मेह्णु तें खिलाफ जे उगाह देण लोओ असी, एस बारे तु की बोता?” 61पर यीशु चुप बिशा, किछ जवाब न दिता त बोडे पुजारे दुबारी तेस केआं पुछु, “कि तु तेस सर्व शक्तिमान परमेश्वरे कुआ ‘मसीह’ भो ना?” 62यीशु बोलु, “अउं भो : त तुस मनखे कुआ तेस सर्व शक्तिमाने सुमले कना बिशो, त अम्बरे बदेई जोई साते एन्ते हेरते।” 63इस बोकी पुठ बोडे पुजारे अपु झिणे चीर कइ#14:63 अगर यहूदी मेह्णु अजगता कोई दुखे बाड़ी बोक या हैरानी बाड़ी बोक शुणते त से अपु झिणे चीर कइ अपु दुख त हैरानी जतान्ते। बोलु, “अब असी होर उगाही के की जरूरत असी? 64तुसी सम्हाई परमेश्वरे बेज्जती करणे बाड़ी बोक शुणी ना? तुं की राय असी?” तेन्हि सोबी बोलु, “ए मारण लेएक असा।”#पुजारोठि 24:16 65तोउं कोउं तेस पुठ थुकुण लगा, कोउं तसे मुंह घटि कइ मडण लगा, त तेस जे बोलुण लगे, “भविष्य वाणि कर कि अब तोउ कोउं मडता।” सपाही बि से टाइ कइ तेस पुठ चटाके दिते।
पतरस यीशु पिछाणुण केआं मुकरुण
मत्ती 26:69-75; लूका 22:56-62; यूहन्ना 18:15-18; 18:25-27
66जपल पतरस बुन्ह दुआर पुठ आग सेकण लगो थिआ, त बोडे पुजारे यक नौखराणि अन्तरा तठि आई, 67पतरस आग सेकते हेर कइ यक टक तसे धे हेरु त बोलुण लगी, “तु बि त तेस नासरत ग्रांए यीशु जोई साते थिआ।” 68तेन ना कर कइ बोलु, “अउं न जाणता, न समझता कि तु की बोलुण लगो असी।” तोउं से बाहर बराने गा; त कुकड़े बांग दिती। 69से नौखराणि तेस हेर कइ जे तसे भेएड़ खड़ खड़ थिए तेन्हि जे फि बोलुण लगी, “ए बि तेन्हि अन्तरा यक भो।” 70पर से दुबारी मुकीर गा। तढ़िया कुछ देर पता जे तसे भेएड़ खड़ खड़ थिए तेन्हि पतरस जे बोलु, “सच्चे, तु बि तेन्हि बुचा यक भो; किस कि तु बि गलील इलाके भो।” 71त पतरसे इस फेरि अपफ पुठ शराप दी कइ त सोहो कर कइ बोलु, “अउं तेस मनख ना जाणता, जेसे तुस चर्चा करण लगो असे।” 72तिखेईंए झट कुकड़े दोकी बांग दी छइ। पतरस से बोक जे यीशु तेस जे बोलो थी याद एई गई : “कुकड़े दुई लिंगि बांग देण केआं पेहलाई तु में बारे टाई लिंगि मुकीर घेन्ता।” त से एस बोकी बारे सोच कइ हिक हिकि रोलुण लगा।
Actualmente seleccionado:
मरकुस 14: pgg
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active) Wycliffe Bible Translators, Inc. All rights reserved.