मत्ती 10
10
यीशु बाराह प्रतिनिधि
मरकुस 3:13-19; लूका 6:12-16
1फिर यीशु अपु बाराह चेले भेएड़ भिए त तेन्हि दुष्ट आत्मा नशाणे, हर बीमारी त कमजोरी ठीक करणे ताकत दिती। 2अन्हि बाराह खास चेली#10:2 प्रभु यीशु संदेश पुजाणे बाड़े से खास चेले, जेन्के धे तेन अपु खास शक्ति त हक दुतो थिआ। (मत्ती 10:5-10) के नओं ईं असे।
शमौन जेस नओं तेन “पतरस” रखु
त तसे भाई अन्द्रियास;
जबदी कुआ याकूब
त तसे भाई यूहन्ना;
3फिलिप्पुस,
बरतुलमेई,
थोमा
त मामला नेणे बाड़ा मत्ती,
होर हलफई कुआ याकूब
त तद्देइ,
4शमौन कनानी#10:4 यहूदी मेह्णु के यक दल थिआ, जे रोमी मेह्णु के राज केआं अजाद भुण जे लड़ाई कतेथ। तेन्हि जे अरामी भाषाई अन्तर “कनानी” बोतेथ, होर यूनानी भाषा अन्तर तेन्हि जे “जेलोतेस” बोतेथ।
त यहूदा इस्कारियती, जेन यीशु टोवाई बि छड़ा।
यीशु अपु बाराह प्रतिनिधि लंघाण
मरकुस 6:7-13; लूका 9:1-6
5तोउं यीशु तेन्हि बाराह जेईं जे ईं बोल कइ लंघाए “गैर यहूदी मेह्णु केईं न घिए, होर ना सामरी मेह्णु के केसे शेहर घिए। 6बल्कि तुस इस्राएली मेह्णु केईं घिए, जे जीं भटको ढडुड़ के ईं परमेश्वर केईआं बिडिड़ गो असे। 7होर हंटते हंटते ईं प्रचार करे: ‘स्वर्गे राज्य तुं भेएड़ एई गो असा।’ 8बीमार मेह्णु सुसुरेरिण दिए। मरो तेन्हि दुबारी जीआण दिए। कोढ़ी ठीक करे त दुष्ट आत्मा नशाण छड़े। ए सोब करणे शक्ति तुसी बजन मुले मेओ असी, त तुस बि ए सोब बजन मुले करे। 9तुसी अपफ जुए न सुन्ना चन्नी, न रुपेई, होर न कोई चीज रखीण। 10तुसी बथ जे न कोई झोड़ा, न झिणे, न प्युले त न लठि रखीण, किस कि मजूर तसे रौठि मेणे हक असा।#1 कुरिन्थ 9:14; 1 तिमुथि 5:18 11तुस जेठि कोठि केसे ग्रां या शेहर घियेल त पता करे कि तठि कोउं तुं सेवा पाणि कता। तसे गी घिए त तेस जगाई केआं घेणे तकर तठि बिशे। 12जिखेईं तुस केसेरी गी घेन्ते त अन्तर घेन्त पेंत तेन्हि जे बोले, ‘तुसी सुख शान्ति मेओ लौती।’ 13अगर तेस गीहे मेह्णु तुसी बिशान्ते त तेन्हि पुठ तुं अशुश रेहन्ती। पर अगर से ना बिशाल त तुं अशुश तुसी केईं वापिस एन्ती। 14जे कोउं तुसी न धराल या तुं बोक न शुणियाल, तेस गी या तेस शेहर केआं बाहर नशणे टेम अपु खुरे धूड़ ठुटक छड़े।#10:14 ईं करणे बेलि यहूदी मेह्णु समझतेथ कि से बंदा तेन्के खिलाफ परमेश्वर उभाण करण लगो असा। 15अउं तुसी जे बोता कि न्याय करणे रोज परमेश्वर तेस शेहरे मेह्णु जे सदोम त अमोरा शेहरे#शुरुवात 19 मेह्णु के सज्जा केआं बि ज्यादा सज्जा देन्ता।”
एणे बाड़ी बुखता
मरकुस 13:9-13; लूका 21:12-17
16तोउं यीशु हउ बि बोलु, “हेरे, अउं तुसी तीं लंघान्ता जीं कोई शेंखु बुच ढडुड़ रखता। तोउं त, तुस कीड़े ईं खबरदार बिशे त अलणी ईं भोले बणे।#लूका 10:3 17मेह्णु केआं खबरदार बिशे, किस कि से तुसी टजोटी के हवाले कते त अराधनालय अन्तर चाबुके बइ मडते।#मरकुस 13:9-11; लूका 12:11,12; 21:12-15 18तुस में बझई जुए अफसर त राजे सामणि नीइन्ते, ताकि तुस तेन्हि त गैर यहूदी मेह्णु जे बि में उगाह दी सकियेल। 19पर जपल से तुसी टोवाल त तुस ई चिन्ता न करे कि असी की बोलुण, किस कि जे किछ बि तुसी बोलुण भोल, तपले तेस घड़ी शुची आत्मा तुसी जे बोल छती। 20किस कि बोलुणे बाड़े तुस न भिन्थ, पर तुं बोउए आत्मा तुसी अन्तरा बोती। 21भाई भाई त बोउ कुआ मरण जे टोवाई छते, होर गभुरु ईये बोउए दुश्माण बण कइ तेन्हि मरवाई छते। #मरकुस 13:12; लूका 21:16 22होर में बझई जोई सम्हाई मेह्णु तुसी हेर नफरत कते; पर जे अखिर तकर लाह जोई सीढ़िन्ता, सेईंया बचता।#मत्ती 24:9; मरकुस 13:13; लूका 21:17; मत्ती 24:13; मरकुस 13:13 23जपल से तुसी यक शेहर भुंजाल त होरे शेहर जे नश घेण। अउं तुसी जे बोता कि तुसी इस्राएले सम्हाई शेहर अन्तर बि में खुश खबरी प्रचार कइ बि बटो ना भोल कि अउं, मनखे कुआ अपु शान जुए एन्ता। 24चेला अपु गुरु केआं बोडा न भुन्ता; त होर न नौखर अपु मालिक केआं बोडा भुन्ता।#लूका 6:40; यूहन्ना 13:16 25चेले गुरु जोई त नौखरे मालिक जोई बराबर भुणे ईं रज्जि असु। जपल तेन्हि गीहे मालिक जे ‘शैतान’#10:25 यूनानी भाषा अन्तर “बालजेबुल” लिखो असु। बोलु त तसे गीहे बाड़ी जे की न बोते?”#मत्ती 9:34; 12:24; मरकुस 3:22; लूका 11:15
केस केआं डरुं?
लूका 12:4-7
26“तोउं त, तेन्हि हेर न डरुण; किस कि ईं कुछ ढकिये न रेहन्तु, होर न कुछ नियोकइ रखीन्तु जे बाहर न निस्तु।#मरकुस 4:22; लूका 8:17 27जे अउं तुसी जे अकेले अन्तर बोता, तेस तुस सोबी के सामणि बोले। होर जे अउं तुं कनपत बोता, तस लहाड़ि घेई कइ जोरी जोई बोले। 28जे सद जिसम मार बटते, पर आत्माई मार ना सकते, तेन्हि हेर न डरुण। पर तेस परमेश्वरे हेर डरे जे जिसम त आत्माई दुहि नर्क अन्तर बरबाद कइ बटता।”
29“कि बारा! किछ रुपेई बइ दुई चड़ी न बेचीन्ति ना? तोउं बि, तुं बोउए इच्छाई बगैर तेन्हि अन्तरा यक बि मर कइ भीं न झड़ती। 30तुं मगरी छते बि सोब गणो असी। 31तोउं त डरे नउ; तुं कीमत त सुआ चड़ी केआं बि बध कइ असी।”
अपफ जे यीशु चेला बोलुण केआं ना लजीण
लूका 12:8-9
32“जे कोउं मोउं मेह्णु के सम्हाणि मनाल, तेस अउं बि अपु स्वर्गे बोउए सम्हाणि मानता। 33पर जे मोउं मेह्णु के सामणि न मनियाल तेस अउं बि अपु स्वर्गे बोउए सामणि न मानता।”#2 तिमुथि 2:12
यीशु एणे नतीजा
लूका 12:51-53; 14:26,27
34ईं न समझे कि अउं धरती पुठ मेल मिलाप कराण जे अओ असा। अउं मेल मिलाप कराण जे नेईं, बल्कि तलवार चलाण जे अओ असा। 35अउं तोउं अओ असा कि में बझई जोई कुआ तसे बोउ जोई, कुई तसे ईया जोई त बेउठी तसे राणी जोई झगड़ीन्ती त बखी घेन्ते। 36मेह्णु सोबी केआं खतरनाक दुश्माण तसे गीहे बाड़े भोई घेन्ते।#मीका 7:6 37जे अपु ईया बोउ मोउं केआं ज्यादा ट्यारा कते, से में चेला बणणे लेएक नेईं। होर जे अपु कुआ या कुई मोउं केआं ज्यादा ट्यारा कते, से में चेला बणणे लेएक नेईं। 38होर जे कोउं अपु क्रूस ढीड़ कइ मरुण तकर में पता न एईयाल, से में चेला बणणे लेएक नेईं।#मत्ती 16:24; मरकुस 8:34; लूका 9:23 39जे अपु प्राण बचाण चहन्ता, से तेस गड़ाई छता। होर जे कोउं में लिए अपु प्राण दी छता, तेस से मेई घेन्ते।#मत्ती 16:25; मरकुस 8:35; लूका 9:24; 17:33; यूहन्ना 12:25
यीशु अपणाणे ईनाम
40तोउं यीशु बोलु, “जे तुसी अपणान्ता, से मोउं अपणान्ता। त जे मोउं अपणान्ता, से में लंघाणे बाड़े तस बि अपणान्ता।#मरकुस 9:37; लूका 9:48; 10:16; यूहन्ना 13:20 41जे भविष्य वक्ते, भविष्य वक्ता मान कइ अपणान्ता, तेस तसे ईनाम मेता। होर जे धर्मी मेह्णु धर्मी मान कइ अपणान्ता, तेस बि तसे ईनाम मेता। 42त जे कोउं इन्हि मठड़ी अन्तरा यक जेईं बि में चेला मान कइ अगर यक गलास ठन्नु पाणि बि पियाल त तेस तसे ईनाम जरूर मेता।”
Actualmente seleccionado:
मत्ती 10: pgg
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active) Wycliffe Bible Translators, Inc. All rights reserved.