लूका 1
1
शुरुवाती बोके
(1:1-4)
1-2प्रभु यीशु मसीहे बारे जे सोब घटना हें बुछ भुओ असी, तस लिखणे सुआ मेह्णु कोशिश किओ असी। अपु लेख अन्तर तेन्हि तेन्हि बोकी के बारे लिखो असु, जीं एन्हि सोब घटनाई के उगाह बोते, होर जीं तसे बोक शिचालणे बाड़े असी शिचालते। 3तोउं त, ए मान्यवर थियुफिलुस जी! किस कि अउं लूका अपफ बि ए सोब बोक शुरु केआं जांच पड़ताल कइ छो असी, त मोउं ई खरु लगु कि ए सोब बोके सुसुर जुढ़ेर कइ तुसी जे लिखुं, 4ताकि तुसी ई पता लगता कि जे सोब बोक तुसी शिचालो असी से कति यकीन लेएक असी।
यीशु जमुण त तसे मठड़ियारी बोके
(1:5—4:13)
चुसुणे बाड़ा यूहन्ने जमणे बारे भविष्य वाणि
5यहूदिया राज्य पुठ राजा हेरोदेस#1:5 राजा हेरोदेस 37 केआं 4 ईसपुर्व अन्तर राज कताथ। ए रोमी सम्राटे बेलि नियुक्त भुओ थिआ। एस जे “महान राजा, पेहला हेरोदेस” बि बोते। पता एस कुआ हेरोदेस राजा बणा। राज कते टेम, जकराय नओएं यक पुजारा थिआ। से अबिय्याह#1:5 अबिय्याह देहेर अन्तर सेवा करण जे पुजारी के 24 दल बुच यक दले नओं असु। तपल यक दल यक हफ्ते लिए ईं सेवा कतेथ। नओएं यक पुजारे दले थिआ। तसे जुएली नओं इलीशिबा थिउ, जे कि हारुने#1:5 इस्राएले मेह्णु अन्तरा हारुन परमेश्वरे पेहला बोडा पुजारा थिआ। ऊड़ी थी। 6से दुहिए परमेश्वरे नजर अन्तर धर्मी थिए। से परमेश्वरे हर निआंग त बोक मानणे बाड़े थिए। 7इलीशिबा शन्हि थी त से दुहिए स्याणे भोई गो थिए।
8जपल जकराय अबिय्याह दले बारी पुठ परमेश्वरे सेवा करण लगा, 9त पुजारी के रिवाजे#1:9 इस्राएले मेह्णु परमेश्वरे देहेर अन्तर हर रोज ब्यागे त ब्यादि गुगुल धूप छतेथ। ई करण जे से लखिर छइ कइ यक मेह्णु चुणतेथ, जे देहेर अन्तर सेवा कताथ त गुगुल धूप छताथ। मुताविक परमेश्वरे देहेर अन्तर पुजापाठ त गुगुल छाण जे तसे नओएं यक लखिर निथि। 10त पुजापाठ त गुगुल छाणे टेम मेह्णु के बोडा हुसुड़ा बाहर बिश कइ प्रार्थना करण लगो थिआ। 11तपल प्रभु यक स्वर्गेदूत पूजाई कुण्ड#1:11 यहूदी मेह्णु के तेस टेम यक केआं ज्यादा कुण्ड भुन्तेथ। से यक कुण्ड पुठ सद गुगुल धूप छतेथ त होरे कुण्ड पुठ जानवरी के भकत चढ़ान्तेथ। होर होरे कुण्ड पुठ अनाजी के संझ चढ़ान्तेथ। इठि जकराये यक खास कुण्ड पुठ गुगुल धूप छाण लगो असा। सुमले कना खड़ खड़ तेन काई छड़ा। 12तस हेर कइ जकराये भे घेई गई त सुआ डर लगा। 13पर स्वर्गेदूते तस जे बोलु, “ए जकराये! डरीं तु, किस कि प्रभु तें प्रार्थना शुणो असी। तें जुएली केआं तोउ जे यक कुआ जमता। तोउ तस नओं यूहन्ना#1:13 “यूहन्ना” मतलब “परमेश्वरे दाह किओ असी”। रखुंण। 14तसे बेलि तोउ खुशी त सुख मेता, होर टज खुशी मनान्ती। 15किस कि ए तें कुआ परमेश्वरे यक बोडा सेवक बणता। से सरा त अराख कदी न पीन्ता त अपु ईयेरी पेट अन्तर शुची आत्माई बेलि भरी भुन्ता। 16यूहन्ना इस्राएले सुआ मेह्णु प्रभु, अपु परमेश्वर कना जे पलाटता। 17होर से एलिय्याह#1:17 एलिय्याह पुराणे जमाने परमेश्वरे यक बोडा भविष्य वक्ता थिआ। तेन सुआ चमत्कारे कम किओ थिए। शक्ति त ताकत जुए भरी कइ प्रभु केआं पेहले एन्ता। होर से ईये बोउए मन अपु गभुरु कना जे खिरकान्ते, त दुष्ट मेह्णु खरी बथ पुठ अण्ही कइ यक ईं टज बणान्ता, जे प्रभु मीण जे तेयार असा।”
18जकराये जपल स्वर्गेदूत केआं पुछु कि “मोउं कीं पता लगाल कि इहांणि भुन्तु? किस कि अउं बुढा भोई गो असा त में जुएली बि बुढी भोई गो असी।”
19स्वर्गेदूते तस जे बोलु, “अउं जिब्राईल भो, जे परमेश्वरे सेवा कता। होर तेन अउं तोउ जुए बोक करण जे त ई खुश खबरी शुणाण जे लंघो असा। 20हेर! किस कि तेईं में बोक पुठ, जे अपु टेम अन्तर पूरी भुण असी, विश्वास ना किआ, त जिएस तकर ई सोब बोक पूरी ना भुन्ति, तिएस तकर तु टटा बणता। तोउ केआं कुछ न बोलिन्तु।”
21तपल मेह्णु के बोडा हुसुड़ा देहरे बाहर जकराय भाड़ बिशो थिए त हैरान थिए कि तस एतु चेरे कीं लगु। 22पर जपल से बाहर निसा त तेस केआं कुछ बोक ना करीं। त मेह्णु समझी गे कि एस देहेर अन्तर कोई दर्शण भुओ असे। से तेन्हि जुए हथ भाशि कता रिहा, त टटा बण गा।
23जपल जकराये देहेर अन्तर सेवा करणे बारी खतम भुई त से अपु गी जे घेई गा। 24तस गी घेण केईआं पता तसे जुएली इलीशिबा गभुरवाल भुई। त पंज मेहने पेट गभुर भोई कइ बि तेन ईं सोच कइ केसे जे किछ ना बोलु कि 25“प्रभु मोउं पुठ कति कृपा किओ असी। जे मेह्णु मोउं जे शन्हि बोतेथ, तेन्के टीर उघाड़णे लिए परमेश्वर स्याणे वकत मोउं जुएई ई किओ असु।”
यीशु जमणे बारे भविष्य वाणि
26-27जपल इलीशिबे छटूं मेहना लगो थिआ, परमेश्वरे दूत जिब्राईल स्वर्ग केआं गलील राज्ये, नासरत ग्रांए यक कुवांरी कुई गी गा, जेसे छक दाऊदे ऊड़ी यूसुफ नओएं यक मेह्णु जोई भुओ थी। तस कुई नओं मरियम थी।#मत्ती 1:18 28स्वर्गेदूत तसे भखेरी घेई कइ बोलु, “बधेए तोउ! परमेश्वर तोउं जोई साते असा।”
29से ई बोक शुण कइ सुआ डर गई कि मोउं जुए कोउं बोक करुण लगो असा त एस बोकी मतलब की असा? 30स्वर्गेदूते बोलु, “ए मरियम! ना डर, किस कि तोउ पुठ परमेश्वरे बोडी कृपा भुओ असी। 31शुण! तु गभुरवाल भुन्ति। तोउ केआं यक कुआ जमता। तस नओं तोउ ‘यीशु’#1:31 “यीशु” मतलब “परमेश्वर बचान्ता” असु। रखुंण। 32परमेश्वर तस सुआ बोडा कता त से ‘सर्व शक्तिमान परमेश्वरे कुआ’ बोलिन्ता। प्रभु परमेश्वर तसे ऊड़ी दाऊदे राजवाड़ी तसे धे देन्ता।#2 शामु 7:12-14 33त से राजा बण कइ याकूबे वंश पुठ हमेशा राज कराल त तसे राज कदी ना मुकता।”#शुरुवात 28:14; 35:11
34मरियमे स्वर्गेदूत जे बोलु, “अउं त केस मर्द ना जाणती, होर कुवांरी असी। त मोउं कीं गभुर भुन्तु?” 35स्वर्गेदूते बोलु, “तोउ पुठ सर्व शक्तिमान परमेश्वरे छतरछाया असी त से तें पेट अन्तर शुची आत्मा छता। तोउं त, जे कुआ जमता से शुचा भुन्ता त परमेश्वरे कोईये नओं पुठ पिछाण भुण असी। 36होर इएर शुण; तें ऊड़ी इलीशिबा बि स्याणे वकत यक कुआ पेट भुओ असा। जेस जे कि मेह्णु कदी शन्हि बोतेथ, तस छटूं मेहना लगो असा। 37किस कि परमेश्वरे अगर कोई बि कम औखु नेईं।”#शुरुवात 18:14 38मरियमे बोलु, “हेर, अउं प्रभु नौखराणि भो, त जीं तुसी बोलो असु, मोउं जोई तिहांणि भो लौतु।” तोउं स्वर्गेदूत तठिआ घेई गा।
मरियम इलीशिबा जुए मीण जे घेण
39तेन्हि दिनि, मरियम झट पहाड़ी राज्य यहूदिये यक शेहर जे घेई गई। 40तेन जकराये गी पूज कइ इलीशिबा जे नमस्ते किउ। 41जिखेईं इलीशिबे मरियमे नमस्ते शुणु, तिखेईं तसे पेट अन्तर गभुर जोरी जोई लुकुण लगु, त इलीशिबा शुची आत्माई बइ भरी गई। 42तोउं तेन जोरी जुए बोलु, “बधेए तोउ! सोबी जिल्हाणु केआं ज्यादा अशुश परमेश्वरे तेन्धे जे दुतो असी। होर तें पेटे गभुरु धे बि परमेश्वर सुआ सुख देन्ता। 43ई कृपादृष्टि कोढ़िआ आई कि में प्रभु ई मोउं जुओई मीण जे अओ असी। 44हेर, जिखेईं तें नमस्ते बोक में कन अन्तर गई, तपल केआं खड़ में पेट अन्तर गभुर खुशी जुए लुकुण लगु। 45परमेश्वरे तेन्धे सुआ सुख दुतो असा, किस कि जे बोके तेन तोउ जे बोलो असी, से सोब पूरी भुणे तेईं विश्वास किआ।”
मरियम परमेश्वरे गुणगान करण
46तोउं मरियमे बोलु,
“में प्राण परमेश्वरे महिमा कते।
47में आत्मा में बचाणे बाड़ा परमेश्वर केआं खुश भुई।
48किस कि तेन अपु नौखराणि बुरे हाल पुठ कृपादृष्टि किओ असी।
तोउं त शुणे, अपल केआं खड़ सोब जुगे मेह्णु मोउं जे धन्य बोते।
49किस कि तेन बोडे ताकतवरे मोउं जे बोडे बोडे कम किओ असे,
त तसे ईं शुचा होर कोई नेईं।
50जे तस हेर डरते
से तेन्हि पुठ त तेन्के पीढ़ी पुठ दाह कता रेहन्ता।
51तेन अपु शक्ति हराली,
त जे सुआ रोभ किढ़तेथ, से छिंगेई छड़े।
52तेन अधिकारी तेन्के राजगद्दी पुठा फटाई छड़े।
त कमजोर त गरीब से खड़ेर छड़े।
53तेन ढुके मेह्णु खरी खरी रौठि के बेलि रज्जाणे,
त अमीर खाली हतेउ बाहर किढ़ छड़े।
54-55तेन अपु से दाह याद की त अपु सेवक इस्राएल साह्मी छा,
जे दाह अब्राहम त तसे टब्बर पुठ हमेशा रेहन्ती, जीं तेन हें बाव दादु जे सोह किओ थिए।”#शुरुवात 12:2-3; 17:4-7; 18:18; 22:18; 26:4; 28:14; प्रतिनिधि 3:25
56मरियम लगभग टाई मेहन तठि बिशी, तढ़िया पता से अपु गी जे पैठ एई।
पोण अन्तर चुसुणे बाड़े यूहन्ने जमुण
57तढ़िया पता इलीशिबा सूणे वकत एई गा त तस यक कुआ जमा। 58परमेश्वर जे तेस पुठ बोडी कृपा किओ असी, ई बोक तसे भेयाड़ त ऊड़ी बाड़ी शुणी, त तेन्हि तेस जुए खुशी मनाई। 59त अठूं रोज से सोब तेस कोईये खतना करण#1:59 खतना यक यहूदी रिवाज असा, जे परमेश्वर त तेन्के बुच भुओ जुबाने निशाण असा। इस रिवाज अन्तर हर यक मठुड़ कोईये लिंगे छोड़ अठूं रोज कटण पड़तीथ। जे आए। त तसे नओं अपु बोउए नओं पुठ “जकराय” रखण लगे। 60पर तसे ई बोलुण लगी, “ना, एस नओं ‘यूहन्ना’ रखण असु”। 61त तसे भेयाड़ी तस जे बोलु, “पर तुं ऊड़ी अन्तर त यूहन्ना नओं केसेरी बि नेईं।” 62पता तेन्हि भाश कर कइ तसे बोउ केईआं पुछु कि तस नओं की रखुंण। 63त तेन यक लिखणे बाड़ी पठि मगाई कइ तेस पुठ लिखु “एस नओं यूहन्ना असु।” त से सोब हैरान रेही गे। 64तिखेईंए तसे आसी त जिभुड़ चलण लगु। होर से परमेश्वरे गुणगान कते बोक करण लगा। 65ई हेर कइ तेन्के सोब भेयाड़ परेशान भोई गे त पूरे पहाड़ी यहूदिया राज्य अन्तर एस बोकी चर्चा भुण लगी। 66त सोब शुणणे बाड़े अपु अपु मन अन्तर ईं सोचुण लगो थिए “पता नेईं, ए कुआ कत बोडे बोडे कम कता?” किस कि प्रभु शक्ति तस जुए थी।
जकराये परमेश्वरे गुणगान करण
67तोउं तेस कोईये बोउ, जकराये शुची आत्माई बइ भरी गा त इ बोल कइ भविष्य वाणि करण लगा,
68इस्राएले प्रभु परमेश्वरे गुणगान करे।
किस कि तेन अपु मेह्णु पुठ कृपादृष्टि किओ असी त से छुड़को असे।
69-70होर तेन अपु सेवक राजा दाऊदे टब्बरा केआं
असी जे यक ताकतवर बचाणे बाड़ा किढ़ा,
जीं तेन पेहलाईदि अपु शुचे भविष्य वक्ती के बेलि बोलो थिउ।
71मतलब कि तेन हें दुश्माणी केआं त
सोब बैरी के हतेउ केआं असी बचाण जे से लंघो असा।
72तेन ए सोब हें बाव दादु जे अपु दाह हरालण जे
त अपु तेस शुची जुबान याद करण जे किओ असु,
73जे तेन हें बोउ अब्राहमे धे दुतो थी,
74कि अस अपु दुश्माणी के हतेउ केआं छूट कइ, बजन कोई डरे,
75तसे साम्हाणि शुचे धर्मी बण कइ, उमर भइ तसे सेवा कते।
76होर तु, ए कोईया! तेस प्रभु परमेश्वरे भविष्य वक्ता बोलिन्ता;
किस कि तु तेसे अगर अगर घेई कइ तसे जे मेह्णु मन तेयार कता।#1:76 मूल भाषा अन्तर “प्रभु बथ बणाण जे” लिखो असु।
77होर तु मेह्णु कें धे बचणे ज्ञान देन्ता,
जे तेन्के पापी के माफी बेलि मेता।
78ए हें परमेश्वरे तेस दाह बेलिए भुन्ता,
जेस बेलिए मसीह खड़ोरिया एन्ता, जीं तेज पथवारी टगड़ियार एन्ती,
79ताकि अन्हारे त मौते उडार अन्तर बिशणे बाड़ी बचणे सुसुर बथ हरालियेल,
त असी तेस बथ पुठ हंटाल, जेसे बेलि अस बगैर कोई परेशानी शान्ति जोई बिशियेल।
80त से कुआ मोटीण लगा त आत्मा जुए बि ताकतवर भुण लगा। होर जोउं तकर परमेश्वरे से इस्राएली मेह्णु के सम्हाणि खुल कइ ना अण्हा, तोउं तकर से अरुणि धार अन्तर बुठा।
Actualmente seleccionado:
लूका 1: pgg
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active) Wycliffe Bible Translators, Inc. All rights reserved.