मत्ती 8
8
यीसू कोढ गै रोगी नै ठीक करणो
(मरकुस 1:40; लूका 5:12-16)
1यीसू जद प्हाड़ ऊं उतरगे चाल्यो तो लोगां गी मोटी भीड़ बिंगै लारै चाल पड़ी। 2बिं भीड़ गै मा एक कोढी बी हो। बो यीसू कनै आ'गे पगां पड़ग्यो अर केण लागग्यो, हे प्रभु, तूं चावै तो मैं ठीक हो सकूं। 3जद यीसू बिंगै सिर पर हात रखगे केयो, “मैं साची चाऊं, तूं ठीक होज्यै।” अर बो जद ई ठीक हो'ग्यो। 4फेर बण बिनै केयो, “इंगै बारै में किनैई कीं ना कैई अर जा'गे मिन्दर गै याजक नै दिखाई। अर मूसा गै आदेस ऊं बठै भेंट चढाई झिका ऊं लोगां नै तेरै ठीक होण गो ठा लागज्यै।”#लेवी 14:2-32
5फेर यीसू कफरनहूम में गेयो तो बठै एक रोमी सेनापती आयो अर बिंऊं मदद खातर बिनती करी। 6हे प्रभु मेरो एक दास लकवै ऊं बीमार पड़यो है। बिंगै भोत पीड होण लागरी है। 7जद यीसू बिनै केयो, “मैं आ'गे बिनै ठीक करूंगा।” 8सेनापती बोल्यो, “प्रभु मैं ईं लायक कोनी कै थे मेरै घरे आओ। ईंखातर अठुं ई एक बात के'दे तो मेरो दास ठीक होज्यासी। 9मेरै उपर बी केई अधिकारी है अर मेरै नीचै बी केई सिपाई काम करै है। जद मैं मेरै सिपाई नै आण जाण गो केऊं तो बो बिंयाई करै। अर मैं मेरै दास नै कोई काम केऊं तो बो मेरो केणो मानै।” 10ओ सुणगे यीसू लोगां गी भीड़ नै केयो, “मैं साची केऊं, मैं इतो मोटो बिस्वास इसराएल में किंगैई मा कोनी देख्यो। 11मैं थानै केऊं भोत सारा आथूणा ऊं अर आगुणै ऊं आवैगा अर बे सुरग राज गै भोज में अबरहाम, इसहाक अर याकूब सागै बेठैगा। 12पण इसराएली लोग झिका इंया सोचै है कै म्हानै परमेसर गै राज में जाण गो हक है तो बे बारै अंधेरै में काडी ज्यैगा अर बे बठै चीखता अर दांत पीसता रेवैगा।” 13जद यीसू सेनापती नै केयो, “जा तेरो जिसो बिस्वास है बिंयाई होवै अर जद बिंगो दास ठीक हो'ग्यो।”
पतरस गी सासू नै ठीक करणी
(मरकुस 1:29; लूका 4:38-41)
14यीसू जद पतरस गै घरे गेयो तो बिंगी सासू बुखार में सुती पड़ी देखी। 15तो यीसू बिंगै हात गै आपगो हात लगायो अर बा ठीक होगी अर बा यीसू गी सेवा करण लागगी।
16जद आथण होयी तो लोग ओपरी बडे़ड़ा लोगां नै ल्याण लागग्या। बण आपगै हुकम ऊं ओपरियां नै काड़ दी अर बानै ठीक करया। 17आं चमत्कारां ऊं आ बात साबित होगी झिकी परमेसर गी बात बताण आळै यसयाह गी किताब में लिखेड़ी ही कै “बण आपणै रोगां नै ले लिया अर आपणै दुखां नै ओड लिया।”
18यीसू जद आपगै च्यारूंमेर लोगां गी भीड़ देखी तो बण आपगै चेलां नै झील गै परलै पासै जाण खातर केयो। 19जद एक नेम विधान सिखाण आळो आ'गे बोल्यो, “गुरूजी थे जठै बी जाओगा मैं थारै सागै चालूंगा।” 20जद यीसू बिनै केयो, “लोंबड़ियां गी घुरी होवै अर पंछियां गो आलणो होवै पण मिनख गै बेटै कनै रेण खातर आपगो सिर ढकण नै ई जिग्यां कोनी।” 21फेर एक चेलै केयो, “प्रभु मेरो बाप गुजरग्यो, पेलां मनै माटी देण गी आग्या दैयो।” 22यीसू केयो, “तूं मेरै लारै चालतो रे अर मरेड़ा नै आपगा मुरदा दाबण दे।”
यीसू आंधी नै रोकणी
(मरकुस 4:35-41; लूका 8:22-25)
23जद यीसू आपगै चेलां सागै किस्ती पर चड गे बेठग्यो। 24बिं टेम झील में मोटो तूफान आ'ग्यो अर लेहरां किस्ती गै ऊपराकर जावैई। पण यीसू बिं टेम सुत्यो पड़यो हो। 25जद चेला आ'गे जगाण लाग्या अर केयो, “प्रभु म्हानै बचा, म्हे मरण लागरया हां।” 26जद यीसू बानै केयो, “हे कमजोर बिस्वासियों, थे इता डरेड़ा क्यामी हो?” जद यीसू खड़यो होगे तूफान अर लेहरां नै ललकारी अर बे रुकगी। 27ओ देखगे बे लोग हेरान हो'ग्या अर आपसरी में केण लाग्या, ओ कुण आदमी है झिकै गो केणो तूफान अर समुंदर बी मानै।
ओपरी बड़ेड़ा आदमी नै ठीक करणो
(मरकुस 5:1-20; लूका 8:26-39)
28जद बे झील गै दूसरै पासै गदरेनिया गै देस में पूगग्या तो बानै मूसाणा में दो आदमी दिख्या। बां दोनां में ओपरी बड़ेड़ी। बे इता खतरनाक हा कै बठकर कोई टपतो कोनी। 29बां किलकारी मारी, “हे परमेसर गा बेटा, तूं म्हारूं के चावै? तूं म्हानै म्हारै टेम ऊं पेलां ई सजा देण आयो है।” 30सारै ई एक सूरां गो रेवड़ चरै हो। 31जद ओपरियां बिनती करी तूं म्हानै बारै काड़णो चावै तो बां सूरां में घाल दे। 32जद यीसू हुकम दियो कै जाओ। बे निकळ गे सूरां में बड़गी अर सूरां गो रेवड़ रूड़तो रूड़तो झील में जा पड़यो अर सारा सूर मरग्या। 33जद सूरां गै गुआळियां ओ देखगे गाम कानी भाज्या अर सारी घटना अर बां ओपरी बडे़ड़ै आदमियां गो हाल गाम गा लोगां नै बतायो। 34जद गाम गा लोग यीसू ऊं बात करण आया अर यीसू नै देखगे बिनती करी कै म्हारो इलाको छोडगे उड़जा।
Actualmente seleccionado:
मत्ती 8: BGQ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active), Wycliffe Bible Translators, Inc. All rights reserved. © WIn Publishing Trust