Matayɔ 15
15
Ɨkɔɔ ngia yɨ Ɓafalisayɔ nʉ ɓapananakɨa ɓʉ mapanʉ
(Mak 7:13)
1Mbise ngiinanɨ, Ɓafalisayɔ ɨzɔ nʉ ɓapananakɨa ɓʉ mapanʉ, ɓambʉʉngwa anʉ Yelusalɛma ɓambʉka kʉgbʉka Yeso. Ɓambumuɓukuo ɓɔ: 2« Jʉtanɨ‑zʉ ɓakpataka ngiɓʉsɔɔ ɓambakakyananakɨa ɨkɔɔ ngia ɓakuku ɓa꞉tɨsɨa nayɔ? Ʉna‑zʉ ɛɓɔ ɓakʉdyakaka ɓʉjaɓanenikɔmʉ lɨkɔndɔ. » 3Gʉ Yeso naɓɔ ɓɔ: « Andʉ‑zʉ inu, akʉ moni kɨmanɨ nakuɓundo mapanʉ kʉ Asʉɓɨɨ, kʉkyananakɨa tʉkʉ ɨkɔɔ ngiindɛnʉ? 4Jʉ Asʉɓɨɨ a꞉sigo ɓɔ: ‹ Kumo ɔɔ atɔ nʉ anʉ. › Ambʉmatɨa ɓata kusigo ɓɔ: ‹ Mombi ugboseni ɨsɛ yɛmɔ inye, ɓʉmʉwa tʉkʉ waa. › 5Ɨkyɛmɨngana, inu naapanɨa ɓɔ mombi ngia asigio ɨsɛ yɛmɔ inye ɓɔ: ‹ Ɨkyɛmɛ ngia mʉkwanana piɛ ɓɔ mʉnasalɨa nayɔ, ɛmɛ mʉɨnapɨa tiga ndʉ apɛpɛ akʉ Asʉɓɨɨ, › 6mombi ngiinanɨ ʉkwananakɔmʉ tii ɓata kukumo ɔɔ ɨsɛ nʉ inye. Inu nʉndapiso ɨsaʉ yɨ Asʉɓɨɨ ekoo ʉ ɨkɔɔ ngiindɛnʉ. 7Inu ɓafili ngiɓa! Ambʉ ɨgbɛ Ɨsaya a꞉sigo jɛnɛ ɔgɔ tʉkʉ kingono ekoo ʉndɛnʉ ɓɔ:
8‹ Ɓombi ngiɓa ɓaanabibiso tʉkʉ akʉ moni,
ɨkyɛmɨngana mɨtʉma ngiindaɓʉ ya danga nɛmɛ!
9Bibiso ngia ɛɓɔ ɓaasigo ɓɔ ɓanɛmɛ kubibiso, ya tʉkʉ ɨsʉkʉɓwanɨ!
Jʉ mapanʉ ngika ɓakʉpanɨa engo, ka tʉkʉ mapanʉ kʉ ɓombi. › »#Popoko Ɨsa 29:13
Ɨkyɛmɛ tɨmanɨ yaaikiso mombi 'ukpulunie
(Mak 7:14-23)
10Mbise ɔngɔ, Yeso ambusoko ungbutu wʉ ɓombi, gʉ ɛyɔ naɓɔ ɓɔ: « Ʉkeni moni ngika, nambukupimiso tʉkʉ iɗo! 11Ɨkyɛmɛ ngia yaakumunio amati moni kʉ mombi, yambʉkʉkwanana nayɔ kikiso 'ukpulunie apɛɛ ʉ Asʉɓɨɨ. Ɨkyɛmɨngana, tʉkʉ ɨkyɛmɛ ngia yaaɓʉa amati moni kʉ mombi yaamikiso 'ukpulunie apɛɛ ʉ Asʉɓɨɨ. »
12Kija ɓakpataka ngiɓangɔ ɓa꞉sa anambamba angɔ, ɓambumuɓukuo ɓɔ: « Ajʉ wambʉkɔmʉ tɔ kʉmbɨa ɓɔ moni ngikʉnanɨ wu꞉sigoo, kakudyiso Ɓafalisayɔ ikoko akʉ mɨtʉma? » 13Gʉ Yeso naɓɔ ɓɔ: « Ɨgbɛɛ kʉ iɓomu ngia Tidoo ngiasɛmɛ a ekoo ʉ ɓisi a꞉ɨhʉnakɔmʉ, ɓa꞊iɗuo tʉkʉ ɗuoo. 14Sieni Ɓafalisayɔ ngiɓʉnanɨ tʉkʉ ananɨ. Ɛɓɔ ɓa ngbanga ndʉ ɓombi ɓɔɔ ɓuchwie mesu ngiɓa ɓakʉkɨndakiso ɓombi ɓɔɔ ɓuchwie mesu nga ɓɔmɔ anɨngbaa. Ndʉ mombi ɔɔ chwie mesu mʉngana aɓio kʉkɨndakiso mombi ɔɔ chwie mesu nga kɔmɔ, ɛɓɔ ɓapɨnɨ kʉ ɓuɓomu ɓabi kʉkwa tʉkʉ amati ʉ ʉpɨa ɓʉ buu! » 15Kija Pɛtɛlɔ a꞉musigio ɓɔ: « Tɨngakɨa‑zʉ inyi yɨ isisinio ngiinanɨ. » 16Yeso ambuɓuɓukuo ɓɔ: « Ajʉ inu na ɓata kʉ amati ʉ ɓujangi‑jangi ngiɓʉnanɨ ɓiɛ? 17Nambʉkɔmʉ‑zʉ kʉmbɨa ɓɔ, ɨkyɛmɛ kʉ iɓomu ngia yaakumunio akʉ moni yaasa akʉ ɓʉa yambʉsa akʉ 'ʉtaa. 18Ɨkyɛmɨngana, ɨkyɛmɛ ngia yaaɓʉa akʉ moni kʉ mombi yaaʉngwa tʉkʉ amati 'ʉtʉma nguangɔ. Nʉ ɨkyɛmɛ ngiinanɨ ɛyɔ iya yaakwanana nayɔ kuikiso 'ukpulunie apɛɛ ʉ Asʉɓɨɨ. 19Jʉ moni ngika kaaɓʉa akʉ 'ʉtʉma wʉ mombi ka ɓɔ: itungwio yɛɛ ɓɨɓɨ, dʉka ɓombi, kyɨa ɨndambʉ, kɨnda nʉ ɓoi nʉ ɓugue kʉ gbaɨ, ndiɓo, chwio ɓangɛ nʉ yakanaka, nʉ ɗaaka ɓangɛ nʉ moni kʉ yakanaka. 20Ikanzi yɨ moni ngiinanɨ kʉ iɓomu, ɛyɔ iya yaikiso mombi 'ukpulunie. Ɨkyɛmɨngana, mombi ngia adyakaka ʉjaɓanenikɔmʉ lɨkɔndɔ, ɛyɔ ambʉkʉkwanana kʉka mombi ɔɔ 'ukpulunie apɛɛ ʉ Asʉɓɨɨ. »
'Ʉtʉ ʉ Ɓakanana ʉbaya Asʉɓɨɨ
(Mak 7:24-30)
21Mbise ɔngɔ, Yeso ambʉʉngwa nanɨ anʉ Gɛnɛjalɛtɨ, ambʉsa tiga nʉ wagba wʉ gɨpa ʉ Tilo nʉ Sɨdɔna. 22Moi mʉngana 'ʉtʉ Ɓakanana ɔngɔ i꞉nye na akʉ ɨkʉmbʉ ngiinanɨ. Kija a꞉sa kʉgbʉka Yeso ambʉnatɨa ɓɔ: « Makʉʉɓɨɨ, Mwana ʉ ngama Daudi, nanɨa ɓaka tʉkʉ ikoko! 'Ʉtʉma wʉ abɨa mungono waakyananaka Mwana ngiasɛmɛ ɔɔ moi akɛ ɓʉkaɨ nadɨndɨ! »
23Ɨkyɛmɨngana, chʉkɔmʉ Yeso ambumutisio ɨngbaa yɨ moni gʉkʉ mɨngana. Ɓakpataka ngiɓangɔ ɓambʉka nayɔ kʉta ɓɔ: « Tikpinyio‑zʉ moi ngia anisu kʉkpata nʉ ɨpʉmbʉ akɛ! » 24Gʉ ɛyɔ naɓɔ ɓɔ: « Asʉɓɨɨ a꞉natʉma ɛmɛ tʉkʉ ɔɔ ɓakɔndɔlɔ ngiɓa ɓa꞉yangaa amati ʉ ɓaanza ngiɓa ɓʉ Ɨsalaɛlɛ. »
25Ɨkyɛmɨngana, moi ngiinanɨ ambʉgbʉkʉmɨa muwuu tʉkʉ na apɛɛ angɔ, ambʉmʉta ɓɔ: « Makʉʉɓɨɨ! Nasalɨa ɓaka tʉkʉ salɨanɨ! » 26Yeso ambumutisio ɓɔ: « Yɨkwananakɔmʉ kʉchɨka idyo ngia yɨ ɓana ɓambuigisio ɓɨmva. » 27Gʉ moi ngiinanɨ nayɔ ɓɔ: « Makʉʉɓɨɨ! Ya kingono. Ɨkyɛmɨngana, abana tʉkʉ ɓɨmva, ɓaadya pɛpɛ ɓadudu ɓʉ idyo ngia yaaɓwanaka ɛsɨ ʉ gbɔgbɔ ɓʉ ɓakʉɓʉndaɓʉ tʉkʉ dyanɨ. »
28Yeso ambumutisio ɓɔ: « Ɔwɛ moi ngiakɛ, baya ngiisɔɔ ya ɓʉmʉ! Moni ngika wʉtananɨaa kʉkyananakɨa ekoo asɔɔ ngbanga tʉkʉ ndʉ akʉ wa‑ɔɔ kʉkʉnda. » Tʉkʉ nɨma ngiinanɨ, mwana angɔ ɔɔ moi ngiinanɨ ambʉhɨa.
Yeso uhiiso ɓombi ɓʉ ɓakwisikiso ɓaja
29Mbise ɔngɔ, Yeso ambʉʉngwa nanɨ, ambʉɓaa ɨngbaa anambamba ʉ yapuu yɛɛ ɨja ngia yɨ Galilaya. Ambuɗito ekoo ʉ ɨkpangba, ambuwulo ɨsɨ. 30Ungbutu wʉ ɓombi ɓaja wambʉka nʉ ɓombi ɓʉ ɓakwisikiso kʉ di di di ndʉ ɓombi ɓʉ mɨdɛɛ, nʉ ɓombi ɓɔɔ ɓuchwie mesu, lijangi, nʉ ɓajakɛsɨ, ɨzɔ nʉ ɓombi ɓʉ ɓakwisikiso nga ɓɔmɔ ɓaja. Kija a꞉ɓuhiiso kʉ ɓuɓomu tʉkʉ ɓʉ gba. 31Moni ngikʉnanɨ kambʉmbangɨa ungbutu wʉ ɓombi nguʉnanɨ tʉkʉ nadɨndɨ, kʉna ɓɔ lijangi lufaniso yaka, ɓombi ɓʉ mɨdɛɛ kʉkɨndaka kʉ ngbii, ɓajakɛsɨ kʉkɨndaka, nʉ ɓombi ɓɔɔ ɓuchwie mesu kʉnɨna. Kija ɓa꞉faniso bibiso Asʉɓɨɨ ngia wʉ Ɓaɨsalaɛlɛ.
Yeso ʉdyakakiso ɓugue ɛlɛfʉ ɓʉgɨna
(Mak 8:1-10)
32Kija Yeso a꞉soko ɓakpataka ngiɓangɔ, ambuɓusigio ɓɔ: « Makʉdyɨa ungbutu wʉ ɓombi nguakɛ ikoko, jʉ yɨpa tiga makwaa kaatʉ aka ɓa‑ɔɔ ɨzɔ nɛmɛ aka, chʉkɔmʉ nʉ ɨkyɛmɛ yɛɛ ɨdyɛ. Ɛmɛ mambʉkɔmʉ kʉkʉnda naɓɔ kʉnanzaniso nʉ taa, ambʉ ɓɔɔsakɔmʉ bɨnza nʉ taa nɨngbaa. » 33Ɓakpataka ngiɓangɔ ɓambumuɓukuo ɓɔ: « Isu kakʉsa kʉnyɨa nʉ idyo gbanɨ akʉ ɨza ngia, iya kakwanana nayɔ kʉdyakakiso ungbutu wʉ ɓombi ʉpɛ ɓɔ! » 34Yeso ambuɓuɓukuo ɓɔ: « Na ti‑zʉ nʉ mikati ɨpɨtanɨ? » Ɓambumutisio ɓɔ: « Ya tʉkʉ ʉmalɨanɨka nʉ mikpekpe yɨ ɓana ɓʉ ɓasipe. » 35Yeso ambutitio ungbutu wʉ ɓombi ngiɓʉnanɨ ɓɔ ɓuwulo akɛsɨ. 36Ambʉchɨka mikati ʉmalɨanɨka nʉ sipe ngiinanɨ, ambutuisio Asʉɓɨɨ ɨbɨba, ambuiɓunzoko, ambunzikio ɓakpataka ngiɓangɔ ɓɔ ɓʉɨpakɨa ɓombi.
37Ɛɓɔ kʉ ɓuɓomu ɓambʉdyakaka, ɓambumotoko kʉ ɓuɓomu tʉkʉ ɓʉ gba. Kija ɓakpataka ɓa꞉mʉmaka ɓadudu ɓʉ idyo ngiɓa ɓa꞉tukuo ɓambuhuo ɓajaɨ ʉmalɨanɨka. 38Ɓombi ngiɓa ɓa꞉dyakaka ɓi꞉nye ɓugue ɛlɛfʉ ɓʉgɨna, chʉkɔmʉ kupoo ɓoi nʉ ɓana. 39Iya Yeso a꞉nzo ɓombi ngiɓʉnanɨ kɨnda, kija a꞉ɗito akʉ ɨngbɔɔ ambʉsa mesu nʉ gɨpa ʉ Magadanɨ.
Actualmente seleccionado:
Matayɔ 15: BudKoya
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2021, Wycliffe Bible Translators, Inc.