Matayɔ 10
10
Yeso ʉmʉma ɓatitima ngiɓangɔ kumi nʉ ɓapɨnɨ
(Mak 3:13-19; Luk 6:12-16)
1Kija Yeso a꞉soko ɓakpataka ngiɓangɔ kumi nʉ ɓapɨnɨ, ambuɓunzo angu ɔɔ ise mɨtʉma yɨ ɓabɨa, nʉ ɔɔ hiise mɨgbʉ yɨ ɓakwisikiso nʉ jʉnganaka kʉ di di di. 2Muno kʉ ɓatitima kumi nʉ ɓapɨnɨ ngiɓʉnanɨ ki꞉nye ɓɔ: Simoni ngia ɓi꞉nye musoko yɛmɔ ɓɔ Pɛtɛlɔ, nʉ manye Andelea, gʉ Yakɔbɔ mwana ʉ Jɛbɛdayɔ, nʉ manye Yʉanɨ, 3gʉ Filipo, gʉ Balatʉmayɔ, gʉ Tʉma, gʉ Matayɔ ngia i꞉nye ndɔmbɛ ɔɔ lipise manzanza, gʉ Yakɔbɔ mwana ʉ Alʉfayɔ, nʉ Tadayɔ, 4gʉ Simoni ngia i꞉nye hata ɨndɨpandasɨ akʉ gɨpa ngiangɔ,#10:4 Gʉ ɓɔ i꞉nye amati ʉ ɨtanda yɨ Ɓajɛlɔtɨ tiga nʉ Yuda Ɨsɨkalɨɔta, iya a꞉gaba Yeso.
Yeso 'ʉtʉma ɓatitima ngiɓangɔ kumi nʉ ɓapɨnɨ
5Kija Yeso a꞉tʉma ɓatitima kumi nʉ ɓapɨnɨ ngiɓʉnanɨ, ambuɓunzo ʉpanʉ ɓɔ: « Nɔɔsakɔmʉ ɔɔ ɓombi ngiɓa ɓambʉkɔmʉ Ɓayuda. Nɔɔkumuniokɔmʉ amati ʉ gʉlʉ ʉ Samalɨa. 6Ɨkyɛmɨngana, seni tʉkʉ ɔɔ Ɓaɨsalaɛlɛ, jʉ ɛɓɔ ɓa tiga ndʉ ɓakɔndɔlɔ ngiɓa ɓa꞉yangaa yangaa.
7Naijo mɨngyɛndʉ nambuɓio kʉɓɨakɨa ɓombi ɓɔ: ‹ Ɓʉngama ngiɓa ɓa ekoo ʉ ɓisi ɓʉ꞉ka tiga kʉ tinene. › 8Hiiseni ɓombi ɓʉ ɓakwisikiso, nambʉjʉkaniso mɨnda, nambuhiiso ɓakeɓu‑keɓu, nʉ iso mɨtʉma yɨ ɓabɨa. Inu na꞉nyɨa nʉ angu ngiinanɨ ɨsʉkʉɓwanɨ, kʉ ɓwanɨ nzeni ɓangɛ kʉ ɨsʉkʉɓwanɨ.
9Amati ʉ mifuku ngiindɛnʉ nɔɔchɨkakɔmʉ ɔlɔ, gʉkʉ uko ngua ɓaatuo nawɔ falanga, nɔɔchɨka gʉkʉ 'ʉkpekpe wʉ ʉfalanga.#10:9 Gʉ ɓɔ yi꞉nye muko kʉ ɨjangɨa wati nguʉnanɨ. 10Mombi ɔɔɓotokɔmʉ mbakaya kʉsa nayɔ, gʉkʉ ɓakɔtɨ ɓapɨnɨ, gʉkʉ lɨkpakʉ, gʉkʉ 'utupe wɔɔ ɓotone nawɔ. Jʉ mombi ʉ kuu ʉkwanana tʉkʉ kʉnyɨa nʉ ʉkʉa wʉ kuu nguangɔ.
11Akʉ gʉlʉ kʉ 'uɓomu, yɛmɔ ɨkʉmbʉ kʉ iɓomu ngia na꞊ɓʉya‑ɔɔ, hateni kʉmbɨa ɓɔ anɨ iya ʉkwanana ninu kʉjananɨa andɔngɔ. Ndʉ namʉna ɓieni tii tʉkʉ nandɔngɔ kʉɓʉya aka na꞊ʉngwa‑ɔɔ akʉ mʉa nguʉnanɨ. 12Ati ngia na꞊kumunio‑ɔɔ akʉ ɨkáa yɨ mombi, sigieni ɓombi ngiɓa ɓaɓio nanɨ ɓɔ: ‹ Majɨɔ kuɓio ɨzɔ ninu! ›#10:12 Ɓukuo yɨ Ɓayuda yi꞉nye ɓwanɨ. 13Ndʉ ɓambɨnyɨ ɓʉ ɨkáa ngiinanɨ ɓanɨjananɨa, majɨɔ ngikʉndɛnʉ naɓio nuɓutieni kutukuo nanɨ. Ɨkyɛmɨngana, ɓʉnɨjananienikɔmʉ, nambʉsa nʉ majɨɔ ngikʉndɛnʉ tʉkʉ kʉtaa. 14Ndʉ ɓambʉkʉnɨjananɨa, nʉ ndʉ ɓambʉkʉkɔ moni ngikʉndɛnʉ, ɓʉeni na ambɛnɨ ngiinanɨ, yɛmɔ akʉ gʉlʉ ngiinanɨ tʉkʉ ɓʉaa, nambʉɓɛndaka aɓungu ʉ mɨtɨndɨ ngiindɛnʉ.#10:14 Gʉ ɓɔ kupananiso ɓɔ ɓayo ɓusio sioni. 15Maninu kusigio tʉkʉ kingono, isiya Asʉɓɨɨ a꞊tɨna sina‑ɔɔ 'ʉkɔmbɔ ngua wʉ ɓombi, 'ʉkɔmbɔ nga wʉndaɓʉ wa꞊ɓio tiga ɓʉkaɨ kʉɓaa uwa wʉ ɓombi ɓʉ ɨkʉmbʉ yɨ Sɔdɔmɔ nʉ Gɔmɔla. »
Yeso ʉngakɨa ɓatitima moni ekoo ʉ ɓʉka‑ɓʉkaɨ ngiɓa ɓa sina kʉka
(Mak 13:9-13; Luk 21:12-17)
16« Ʉkeni tɔ! Maninu kʉtʉma ndʉ ɓakɔndɔlɔ ati ʉ ɓakwei. Kʉ ɓwanɨ, ɓieni mesu ɓʉ gbɛ ndʉ ɓazɨɨ, nambuɓio ɓombi ɓʉ majɨɔ ndʉ lɨvaka‑vaka. 17Pɨmɨeni pɨmɨaa, jʉ ɓombi ɓabi sina ninu apɛɛ 'ʉkɔmbɔ. Nʉ ɓa꞊nɨɓɨnda sina fimbo amati ʉ lɨkáa lʉ nɨta ngila lʉ Ɓayuda. 18Ɓa꞊nɨnapɨa sina nʉ 'ʉkɔmbɔ apɛɛ ʉ ɓangama ɓʉ ɓagɨpa, nʉ apɛɛ ʉ ɓangama ɓɔɔ ɓʉkpɔkpɔ aka ekoo asɛmɛ. Ya꞊kyananakɨa sina ɓwanɨ, ambʉ nyɨeni nʉ wati naɓɔ kʉɓɨakɨa ɨsaʉ ngiisɛmɛ, abana ɓombi ngiɓa ɓambʉkɔmʉ Ɓayuda. 19Ati ngia ɓa꞊nimaiso‑ɔɔ apɛɛ ʉ 'ʉkɔmbɔ, nɔɔkwakɔmʉ ɓatanga ɓɔ na꞊tisio moni ngika ɓaniɓukuo tanɨ, ɓɔ nasigo moni tɨmanɨ. Jʉ moni ngika na꞊kutisio, Asʉɓɨɨ a꞊ninzo ɛkɔ tʉkʉ akʉ wati nguʉnanɨ. 20Jʉ chʉkɔmʉ inu kʉ na꞊yaka, ɨkyɛmɨngana tʉkʉ 'Ʉtʉma ngua wʉ Atɔ ʉndɛnʉ wa꞊yaka amati ʉndɛnʉ.
21Wati nguʉnanɨ, mombi a꞊gaba sina tʉkʉ manye ɓʉ kpɛ akʉ ingyo. Nʉ ɨsɛ ʉ mwana a꞊gaba tʉkʉ mwana angɔ. Ɓana ɓa꞊nɨtanɨa ɓɨsɛ ɓʉndaɓʉ, kija ɓa꞊ɓʉgabaka akʉ ingyo. 22Ɓombi kʉ ɓuɓomu ɓa꞊nɨyaa ekoo ʉ ino ngiisɛmɛ. Ɨkyɛmɨngana, mombi ngia a꞊máa ɓʉ ngbɔmʉ akʉ baya kʉɓʉya tʉkʉ akʉ 'upipio,#10:22 Gʉ ɓɔ 'upipio wʉ ɓʉka‑ɓʉkaɨ. a꞊nyɨa nʉ ɓʉhɨa. 23Ɓunikyananakeni amati ʉ gʉlʉ mʉngana, seni bangʉ akʉ gʉlʉ nga kɔmɔ. Maninu kusigio tʉkʉ kingono ɓɔ nambukupipo kʉɓaa amati ʉ ɓagʉlʉ kʉ ɓuɓomu ngiɓa ɓʉ Ɨsalaɛlɛ Mwana ngia ʉ Mombi ambʉkenikɔmʉ.
24'Ʉkpataka gʉkʉ mungono wambakaɓaa mʉpananakɨa nguangɔ. Abana kʉndʉ bayo, ambakaɓaa makʉangɔ. 25Mwana ʉ balʉa ʉkwanana kuɓio ngbanga nʉ mʉpananakɨa nguangɔ. Kʉndʉ bayo ʉkwanana kuɓio ngbanga nʉ makʉangɔ. Kʉ ɓwanɨ, ɓʉsʉeni‑zʉ tʉkʉ makʉʉ ʉ ɨkáa ino ɓɔ Belejebuli, yaɓio tiga tanɨ akʉ ɓombi ɓʉ ɨkáa yɨ anza ngiangɔ? »
Mombi ngia nʉkwanana nayɔ kukumo
(Luk 12:2-9)
26« Kʉ ɓwanɨ, nɔɔkumokɔmʉ mombi. Jʉ yambʉkɔmʉ nʉ moni kʉ ɓaɗi gʉkʉ mʉngana ika kambʉkʉmbɨanɨa sina akʉ ɓʉmba. Nʉ yambʉkɔmʉ nʉ moni kʉ ɓaɗi ngika kambʉkʉmbɨanɨa sina. 27Moni kʉ muɓomu ngika maninu kusigio amati umomo, inu ɓɨakɨeni tiga akʉ ɓisi ɓɔɔ ɓʉyɛ. Nʉ moni kʉ muɓomu ngika maninu kʉngakɨa nʉ 'ʉdyɛkɛ‑dyɛkɛ, inu kʉtʉɓakɨeni tiga ekoo ʉ ʉpaʉ. 28Nɔɔkumokɔmʉ ɓombi jʉ ɛɓɔ ɓaawa yɨndaɓʉ tʉkʉ ndʉtʉ, ɨkyɛmɨngana ɓambʉkɔmʉ ikanzi ngia ɓawa 'ʉtʉma. Nadɨndɨ kumeni Asʉɓɨɨ ngia akwanana kʉwa ndʉtʉ ɨzɔ nʉ 'ʉtʉma kʉtaa, amati ʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá.
29Ajʉ ɓambʉkʉkwanana‑zʉ kʉgabiso ɓazoi ɓapɨnɨ akʉ mwana ʉ 'ukpekpe wʉ ʉfalanga mungono ɓiɛ? Ɨkyɛmɨngana, gʉkʉ mʉngana ati ʉndaɓʉ ambʉkʉɓwana akɛsɨ ɨsʉkʉɓwanɨ, Atɔ ʉndɛnʉ ʉbayenikɔmʉ. 30Ɨkyɛmɨngana, akʉ inu, abana tʉkʉ ndii ngiindɛnʉ Asʉɓɨɨ aaipoo tʉkʉ kʉ iɓomu. 31Nɔɔkumokɔmʉ tɔ, inu nanʉ ɨjangɨa kʉɓaa ɓazoi ngiɓʉnanɨ ɓaja.
32Mombi kʉ 'uɓomu ngia abandana apɛɛ ʉ ɓombi ɓɔ a 'ʉkpataka wʉsɛmɛ, ɛmɛ ma꞊mʉbandanɨa sina apɛɛ ʉ Tidoo ngiasɛmɛ a ekoo ʉ ɓisi kʉ bandanɨanɨ. 33Ɨkyɛmɨngana, mombi ʉnatateni apɛɛ ʉ ɓombi, ɛmɛ ma꞊mʉtata sina apɛɛ ʉ Tidoo ngiasɛmɛ a ekoo ʉ ɓisi kʉ tataa. »
Yeso akusigo ɓɔ ɓombi ɓakyɨkyanaka mangɔnɔ
(Luk 12:51-53; 14:26-27)
34« Ajʉ nakuyo ɓɔ ma꞉ka kunzo majɨɔ akʉ ɨtaka ɓiɛ? Ɛmɛ ma꞉kakɔmʉ kunzo majɨɔ kpa! Ɨkyɛmɨngana, ma꞉ka kʉmaniso ɓombi ati ʉndaɓʉ! 35Jʉ ma꞉ka kʉɗʉkaniso ɔɔ mwana nʉ ɨsɛ, nʉ kʉɗʉkaniso ɔɔ gwa ɔɔ moi nʉ inye, nʉ kʉɗʉkaniso ɔɔ unenu nʉ inyingue. 36Ɓakwa ngiɓa ɓʉ mombi ɓaɓio tʉkʉ amati ʉ ɨkáa yɨ anza ngiangɔ.#Popoko Mik 7:6
37Mombi ʉkʉndeni ɨsɛ yɛmɔ inye nɛmɛ kʉɓaa ɛmɛ, mombi ɔngɔ ʉkwananakɔmʉ kuɓio mombi asɛmɛ. Mombi ʉkʉndeni mwana angɔ ɔɔ moi, yɛmɔ iya ɔɔ gue nɛmɛ kʉɓaa ɛmɛ, mombi ɔngɔ ʉkwananakɔmʉ kuɓio mombi asɛmɛ kʉ ɓwanɨ. 38Mombi ufuɓuenikɔmʉ tʉkʉ mʉsalaba nguangɔ ɓʉ kpɛ nɛmɛ kʉkpata, mombi ɔngɔ ʉkwananakɔmʉ kuɓio mombi asɛmɛ. 39Mombi ʉhateni kuhiiso ʉɓɨɨ nguangɔ makʉɔngɔ, a꞊ʉyangiso yangisoo. Ɨkyɛmɨngana, mombi ngia a꞊yangiso ʉɓɨɨ nguangɔ ekoo asɛmɛ, a꞊nyɨa nawɔ kʉtɔ. »
Ɓombi ngiɓa ɓa꞊jananɨa ɓakpataka ngiɓa ɓʉ Yeso ɓa꞊nyɨa nʉ ʉkʉa
(Mak 9:41)
40« Ndʉ mombi anɨjananɨa inu, ambʉ ʉnajananɨa kʉ ɛmɛ. Ndʉ mombi anajananɨa ɛmɛ, ambʉ ʉjananɨa kʉ mombi ngia a꞉natʉma. 41Ndʉ mombi ajananɨa mombi jʉ a ɨgbɛ yɨ Asʉɓɨɨ, mombi ɔngɔ a꞊nyɨa nʉ ʉkʉa ngbanga nʉ ʉwa ɨgbɛ ʉkwanana kʉnyɨa nawɔ. Nʉ ndʉ mombi ajananɨa mombi jʉ a ngbingbii, a꞊nyɨa nʉ ʉkʉa ngua ɓombi ɓɔɔ ngbingbii ɓʉkwanana kʉnyɨa nawɔ.
42Maninu kusigio tʉkʉ kingono ɓɔ, mombi kʉ uɓomu ngia a꞊nzo mwana mʉngana ati ʉ ɓana ɓɔɔ ɗɛ ɗɛ ɗɛ ngiɓaɓɛ, abana tʉkʉ ʉpata wʉ mepo kɔɔ dɨ mungono jʉ a 'ʉkpataka wʉsɛmɛ, mombi ɔngɔ ambʉkʉya ʉkʉa. »
Actualmente seleccionado:
Matayɔ 10: BudKoya
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2021, Wycliffe Bible Translators, Inc.