Kejadian 1
1
Allahdi akeca-keca yuma ketekepra deipu upu
1Akeca-keca yuma men kwamu taruda, Allahdi im cap, tuai cap ketekepra deipu. 2Tuai mutu ketekepra deipu dinin, akeca yala-yala yuma kapul men kwamupa, lepsisikra kapul men deipka tep, urasin tali-talipu kupu. Ila kauru weik mokon akapupa, kunuknapu kupu. Ukupupa, Allah er Lek Sambaladi amokon deiki lang-lang penmau.
3Ukunmaupa, Allahdi pepu. “Dirine dayo,” peipupa, adipapu dirine katuai kupudi, bereku. 4Dirine kupupa, Allah dipetepudi, ‘Adirinda telepe,’ tenepudi, kunungnai yuk, dirinai yuk bokrapudi, yuk-yuk deipu. 5Dirine tep Allahdi, “Keteng komuni,” pepra si karepu. Kunungnai tep nengeda, “Lukunda,” pepra si karepu. Ukupu pangeda, lukunda cap, berengna cap kupupa, ue tenpu tumi menmena ngeda, konum telep kupu.
6Ukupu dingeda, Allahdi pepu. “Ton mokon deiki tara, ton mokonda amutara neitamaida, ila go kuprepa, mokon dana-dana wilipropkure,” pepu. 7Upepu pangeda, Allahdi ila go ketekepra deipu pangeda, dutara ton mokon deipu. Ila go deiki tara, ton mokon deipu pangeda, amokon yuma wilipropke. Allahdi peiputopu kupu. 8Ukupupa, Allahdi ila go neitamai ketekepra deipu ngeda, si tep, “Im neitamai,” pepu. Upepupa, ipmaua berekupa konuma, butene tuminge konum kupu.
9Ukupu dingeda, Allahdi pepu. “Ukutaruda, im neitamai dice, dutara mokonda tenpaipu derirbaredi, tu katuai belepkure,” pepra deipupa, adipapu Allahdi peipmautopu kupu. 10Mutu belepudi, tu kal kupu ngeda, Allahdi akeca si tep, “Tuai mutu,” pepu. Tonda dutara mokon tenpaipu deipmau ngeda, si tep, “Laut mokon,” pepu. Upepra dipterepudi, ‘Ange yumada telepe,’ tenepu. 11Ukupu dingeda, Allahdi upepu. “Ukuda tuai mutu ban-ban yuma neitamaida, tu pumbon di pakra bolongkamre keca yala-yala yuma, adipapu bolokurume,” pepupa adipapu boloku. Tonda, “Co du cap, tapu du cap, uda, du mouramre keca yala-yala yuma cap, sun urasin yuk-yuk akunkamretopu, du moupredi, yal keca dapkure,” peipupa, adipapu kupu. 12Tuai mutu ban-ban yuma neitamai di, ware yala keca do yuma, pakra nepudi, sun urasin yuk-yuk akuretopu, du cap, yal keca cap ketenepu. Tonda, co palpal yala-yala yuma bolokudi, sun urasin yuk-yuk akuretopu, du moupudi, eku. Ukupupa, Allah dipetepudi, ‘Ange yumada telepe,’ tenepu. 13Ukupu pangeda, ipmaua berekupa, ue weneri tuminge konum kupu.
14Ukupu pangeda, Allahdi pepu. “Ukuda im neitamaida, ila dirin keca kupkure. Adirin keca di lukunda cap, keteng komuni cap wilipropkure. Tonda adirin kecada, ‘Li keca yakan taruda ace, tenpu keteng tamun ace, ue tenpu tumi ace,’ tenena tep, peten kemdin keca kunkamre. 15Tonda, adirin keca im neitamai deipnepa, tuai mutu ban-ban yuma tep dirine keipkamre.” Allahdi aupu peiputopu, adipapu kupu.
16Ataruda, Allahdi ila dirin keca butene ketekepra deipu. Ila ngeda, ‘Keteng komuni taru tengkamre’ tenen, keteng ketekepra deipu dinin, yambul ngeda, ‘Lukunda taru neitamai tengkamre’ tenen, war cap, kuru cap ketekepra deipu. Tonda, atarupuda, kuru ton ketekepra deipu. 17Allahdi, ‘Ace tengkamre,’ teneputopu ketekepra deipudi, ‘Tuai mutu yuma tep dirin keipkamrenge,’ tenepu. 18Ton ngeda, ‘Keteng komuni tengkamre, ton ngeda lukunda neitamai tengkamre, sun dirin deikida, dirinai cap, kunungnai cap wilipkamre,’ tenepu. Ukupu pangeda, Allah dipetepudi, ‘Angeda telepe,’ tenepu. 19Ukupupa, ipmaua, berekupa, ue tenpu ton dum tuminge konum kupu.
20Ukupu dingeda, Allahdi pepu. “Ukutaruda, mokon neitamai yumada, gam kure keca yala-yala yuma weik kuprume. Tonda, im neitamaida, ma yala-yala yuma adipapu weik kupmengedi, im neitamai lakra embankamenge,” pepu. 21Allah upepka deiki di, mokon neitamai gam kure keca ilange pe, yambulnge peda, sun yala-yala yuk-yuk akunkamretopu, ketekepra deipu. Tonda, im neitamai lakra embaramre keca, ma yala-yala yuma ketekepra deipu. Ketekepra deipupa, dakunmaupane, Allah dipetepudi, ‘Ange yumada telepe,’ tenepu. 22Utenepudi, mokon neitamai gam kure keca cap, im neitamai lakra baramre ma yala-yala yuma cap tep, pio telep kupra deipudi, “Sun yumada, nyapu weik deriramrumupane, weik kupbankamrume. Laut mokonai yuma neitamaida, gam kure keca weik kupkure. Tuai mutu ban-ban yuma neitamaida, ma yala-yala weik kupkure. Akeca-keca yumada, nedi telep kweipkamne,” pepu. 23Upepupa, ipmaua berekupa, pamu bari tuminge ton kupu.
24Ukupu dingeda, Allahdi pepu. “Tuai mutu ban-ban yuma neitamaida, gam kure keca tu deiki yanipra bankamre keca weik, yala-yala yuma kupkure. Ada nimi peinkameng keca cap, tu deiki yanipra embankamre keca cap, tali bura tara keca, sun mundu deiki embaramre keca cap, sun yala-yala yuk-yuk akunkamretopu kupkure,” pepu. Allahdi aupu peiputopu, adipapu kupu. 25Ada, atumi Allahdi ketekepra deipu ngeda, nimidi peinkameng keca cap, tu deiki yanipra embankamre keca cap, akeca yala-yala yuma akunkamretopu, ketekepra deipudi dipetepudi, ‘Ange yumada telepe,’ tenepu.
26Ukupu dingeda, Allahdi pepu. “Nun kuramnup atonun, nimi ton ketekepra deipmeko. Nun kamo atonun, tuai nesala ketekepra deipmepepa, nimidi tuai mutu keca yuma tep talepra, deiyo neng kunkamenge. Ada, laut mokon neitamai kure keca cap, mekina cap, tonda im neitamai lakra embare ma yala-yala yuma cap, nimidi peinkameng keca yala yuma cap, tu deiki yanipra embare keca yuma cap, uda, tuai mutu ban-ban kure keca yuma tep, tuai nesala talepmengedi, deiyo nengpu kunkamenge.” Allahdi pepu.
27Allahdi upepka cadi, Allah er pe yambulanun kuretopu, tuai nesala ketekepra deipu. Ada, Allah er kamo utonun, nimi cap, nerapu cap kupra, Allahdi ketekepra deipu. 28Ukupudi, ‘Sun pio telep kunkameng’ tenen, sun tep telep upu pepra deipka deiki di, telep kweipudi, upepu, “Sun nyapu weika di deipbaramrum panenda, tuai nesala weik kupbankamenge. Tuai mutu ban-ban yuma bena kumumdi, akeca-keca yuma tep, bisbisa kapra talenkamrume. Mokon neitamai kure mekina cap, im neitamai lakra embare ma yala-yala yuma cap, tuai yanipra embaramre gam kun keca yuma cap tep, taleprumudi, deiyo neng kunkamrume.” Allahdi pepu.
29Upepu dingeda, aupu ton pepu. “Tonda tuai pakra neramredi, du deriramre keca yuma cap, co du mouramredi, co du yal keca mouramre co yala-yala yuma cap, sun jene tep karepsene. 30Ange utopu, tuai mutu neitamai gam kuramre keca yala yuma cap, im neitamai lakra embare ma yala yuma cap, tu deiki yanipra embare keca yala-yala yuma cap tep, tali paramre keca, bo-bo keca yumada, karepsenepa akecapu jenkamrume,” pepu. Allahdi aupu peiputopu, adipapu ange yuma kupu. 31Allahdi ketekepra deipmau keca, yala-yala yuma dipetepudi, ‘Ange-ange yumada pio telepe,’ tenepu. Utenepupa, ipmaua, berekupa, ue tenpu ton, ngantan tumi konum kupu.
Actualmente seleccionado:
Kejadian 1: KNTOT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2022 Wycliffe Bible Translators, Inc