Luke 5
5
Jezu aswolo alwoni a nde a ncomi
1Cugu lemo Jezu kiigi li ka mpaana oduba o nkuumu Zenezarete#5.1 Oduba o Zenezarete wua ba acwolo nde se maa oduba wo Ngalile. Lekese nca Mareke 6. 53., ŋaa bege le baari le kaya ŋa asisari ka mpaana nde ma kayuga mbari a Njyami. 2Nde moni avaari mwele ka ofunuŋu oduba, eli abii ancu kiigi ama suruga ma kacuka akia a bo. 3Nde nyuniŋi nca vaari omo, ŋaa nde kiigi wo Simon. Ŋaa Jezu mpi nde akolokolo ma kaje nca owunu, nde ki manci kanca vaari, ŋaa nde yiga abaana kayiziga bege le baari.
4Ntini ye mani nde kalyele, nde ŋa Simon ndi: «Selege nciina nca owunu, ŋaa lecuna akya a be ma anja.» 5Simon akaala ŋa nde ndi: «Mfumu, bizi le ma ajanja lempiibi le enciina, bizi le kibaga kalogo ŋi.» Ŋaa eli we mi lyele, mi elege okya ma anja. 6Ŋaa bo alege akia, bo ayagi bege le ancu, ŋa akia ayiga ma abaga. 7Bo bakasa abuga baali kanca vaari wo omo, njiimi ma kaya baga bo. Bo ayi, ŋa bo aso alusi avaari amwele, ŋaa avaari kiigi yiga ma ajiniŋa nca anja. 8Simon Pyere kamono bwa, nde vi ka ncina abwu a Jezu, ŋaa nde ndi: «Mfumu, ciege ka mpaana mi, kabila mi mbuuru wobi.» 9Simon bila abuga adugi bwa, bo ba amoni osizi ba ancu ba bumi bo. 10Kiigi ŋa Jake, ŋa Jan, mwana Zebede ba baaka bila Simon bo se amoni osizi baa. Ŋaa Jezu ŋa Simon ndi: «Ndaga kabaraga, we yiga amaka obaga baari.» 11Ŋaa bo ayi vuruga bila avaari ma kaya vuta bo ma ncye. Bo anyini biibi eso, ŋaa bo alwoni Jezu.
Jezu asalaga ngaa ebila
12Cugu lemo, Jezu kiigi li kanca kangundu kamon ka bungu le Ngalile, ŋaa mono balaga lemo njuru ema abya ma ebila kamono Jezu, nde yi va kacina Jezu kalii kanca ncye, ŋaa nde ndi: «Mfumu, mi yayi mini we ajia, we abuna kasalaga mi. Ŋaa mi nka cece.» 13Jezu legi jiala yila nde ŋa nde ndi: «Mi ŋa njala ni we wuuma, ŋaa ka cece.» Ŋaa kancinci ŋa nde ebila efi. 14Jezu yiezi nde ndi: «We bizi mbuuru kalyele. Ŋaa je mvyere njuru a we ŋa ompi ambwoŋi, mabuni nde kampa Njyami ambwoŋi, ma lemigi le eteende Moyize, mabwa baari ayaa ndi we mi wuuma.» 15Ŋaa ncia Jezu eseligi eyeni ma angulu ma ancye ma tiniŋa lia, lembuuru le kukuna lekugi ma kayuga mbari a Njyami bila kasalaga anjuru a bo. 16Ŋaa Jezu yeni ka kabiri ye ndeotu ma kabwono.
Kabuka ka Jezu ka saligi
17Cugu lemo, Jezu kiigi ayiziga afarizi bila ayizigi angiri baawi ampugu ma bungu le Ngalile, ŋa Jude bila kangundu ka Jeruzaleme, kiigi ali manci kapaana nde. Mpari a Njyami kiigi eli bila Jezu, ma kasalaga abieri. 18Abalaga ayi, bo kiigi amaabira kabuka kayila kakala. Bo baasaga kanyunuŋa nca njo ma kaswuza nde kavuzu o Jezu. 19Okorogo bo akibuna kanyunuŋa bila nde ŋi, kabila lembuuru le ma avula. Ŋaa bo akumi kayila okaami a njo, bo atubi mburu, bo aswuzi obieri kayila kakala ka nde, ka kari a bo aso, kavuzu o Jezu. 20Jezu kamono lila le bo, nde ŋa obieri ndi: «Ndigi a mi, amaami maabi a we amibologo.» 21Ayizigi angiri bila afarizi amono ba cimiŋa ndi: «Nde wu na, we atuga Njyami. Kangula Njyami otu, mbuuru okima kibuna kacieze maami maabi ŋi.» 22Okorogo Jezu kiigi yayi ecimiŋi e bo ŋaa nde ŋa bo ndi: «Be meema lecimiŋa bwa? 23Yo jaa le mpasi? Kalyele ndi: “Maami maabi a we amibologo”, sikali kalyele ndi: “We temeŋe ŋa je” 24Ave be leyayi ni Mwana Mbuuru ŋa onkani ma kabologo amaami maabi a baari kayila ncye. Okorogo Jezu dugi ŋa kabuka: «Mi ŋa we ni, temeŋe, yaga kakala, je mpila we!» 25Parabu, kabuka ka sarigi ka miizi a baari aso. Nde kayagi kakala ka nde kaga baaka ma tolo, ŋaa nde yeni njo, nde aje ma kalyele ndi: «Lekuma le we Njyami! 26Ekoli baari aso, ŋa bo njuru eyaani.» Bo se yiga ba alyele ndi: «Lekuma le we Njyami! Lubu bizi lemi mono ekubu emaami ba lwari.»
Jezu acwolo Levi
27Amana bwa, Jezu cuugi nca mpugu, nde moni balaga lemo kanca ajanji ba bayaga lempo, nkuumu a nde Levi. Nde kiigi manci ka biri ye ajanja nde, ŋaa Jezu ŋa nde ndi: «Lwono mi.» 28Levi onyini e nde eso, temiŋi ŋa nde lwono Jezu.
29Levi kuzigi kiza leenini ka njo nde ma kayamba Jezu. Ŋaa kiigi ŋa ajanji ba kukuna ba bayaga lempo, bila bege le baari akima baakiigi ja bila bo. 30Afarizi bila ayizigi angiri baakiigi bila bo, ba ka ŋiina ka mpanaŋa bo, bo ŋa alwoni ndi: «Be mema leeja ŋa be lenyua bila anga lempo, ŋa baari eli bo baasa maami maabi?» 31Jezu yagi mbari ŋa bo ndi: «Ka baari ba akaami angayi, baali ŋa kaama ma mbuuru we asalaga bo ŋi, ŋaa anga kaama abyeri.» 32Mi ka ma baari atele nja ŋi, okorogo ma baari baabi mabuni bo akaala eku.
Ekaali e Jezu ŋa Afarizien
33Afarizi ba alyele ŋa Jezu ndi: «Alwoni a Jan mva a bizi ali, bo ba sa eyila e njala bila bo ba sa obuoni, okorogo a we baaja, ba anyua.» 34Nde akaala ŋa bo ndi: «Be ki buna kasuuza andigi ba olumi aki njala eli olumi kini bila bo ŋi.» 35Ecugu be ya eli ba acieze balaga le lebala, ŋaa bo baaje kaka njala.
36Ŋaa nde se wobi ŋa bo ma lempiini: «Mbuuru ki buna kavusa kabori ka mfa bila ke nyarigi ŋi, mabuni ncanke kabari ka mfa keenyarigi ka avusi bila kabori kia kabaagi.» 37Ŋaa mbuuru ki buna kalege mali ma anyarigi kanca ebori ba ampye ye kabaana ŋi, ncanke ampye abaagi, mali ayirigi ŋa ampye abii. 38Okorogo kalege mali ma anyarigi kanca ampye ma anyarigi. 39Ŋaa mbuuru, ki buna nyua mali akala, ŋaa nde vuri jii kanyua ma anyarigi ŋi, kalyele ciri ndi: «Mali akala ŋa ove.»
Actualmente seleccionado:
Luke 5: teg
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES