PALABURU 3
3
Tolino maewa Pue Ala
3:1-13
1 #
Pepat. 12:9, 20:2 Ule inceʼemo pinatuwu anu maʼai ngkaria akalanya ungka ri oyo waʼa mpinatuwu anu ndapapewali i mPue Ala. Meoasi i Ule ri weʼa setu natoʼo, “Ara monco kojo ndapampetangani i mPue Ala komi da mangkoni mpengaya-ngaya wua ngkaju ri raya bonde seʼi?”
2Mesono weʼa setu natoʼo, “Kami maya mangkoni mpengaya-ngaya wua ngkaju anu reʼe ri raya bonde seʼi,” 3“banya mantoʼo wua ngkaju anu reʼe ri tongo-tongo bonde seʼi. Kami ndapetangani i mPue Ala da mangkoni wua ngkaju setu sako ndaisu bemaya; maka ane kawianaka inceʼe kami da mate.”
4Mesono ule natoʼo, “Incetu bareʼe monco; komi bareʼe da mate. 5Ndatoʼo i mPue Ala ewanceʼe, maka ndaincani ane ndikoni wua ngkaju setu, da telokamo nawa-nawami; komi da mewali ewa Pue Ala da mangaincanimo nunjaa anu madago pai anu majaʼa.”
6Napeole mbeʼa setu puʼu ngkaju setu lese, pai nakita wuanya mawongi da ndakoni. Nanawa-nawa ara madagosa ane siʼa mewali tau loʼe. Inceʼe painaka napupu wua ngkaju setu, nepa nakoni, nawaika langkainya woʼu, pai langkainya seʼe nakoni woʼu. 7Butu nakoni wua ngkaju setu, nawa-nawa ntau seʼe telokamo pai naepe ndayamo ntau seʼe ka-tau-seʼenya melambe-lambe. Inceʼe painaka natima ntau seʼe ira ngkaju napasingkonti nakaʼuwika koro ntau seʼe.
8Ngkinowia setu nadonge ntau seʼe i Pue Ala melinja-linja ri raya bonde, inceʼe painaka mesambuni tau seʼe radua ri oyo waʼa ngkaju da naka bareʼe ndakita i mPue. 9Paikanya meboo i Pue Ala ri tuama setu ndatoʼo, “Rimbeʼimo siko?”
10Mesono tuama setu natoʼo, “Kudonge komi melinja-linja ri raya bonde; maeka rayaku, mewali kumesambuni maka yaku melambe-lambe.”
11Meoasi i Pue Ala ndatoʼo, “Isema mangantoʼoka siko kasikonya melambe-lambe?” “Ara janukonimo wua ngkaju anu kupetangani nukoni setu?”
12Mesono tuama setu natoʼo, “Weʼa anu ndiwai da mangkadudungi yaku, inceʼe anu mawaikamo yaku wua ngkaju setu, painaka kukoni.”
13 #
2 Kor. 11:3, 1 Tim. 2:14 Meoasi i Pue Ala ri weʼa setu ndatoʼo, “Wenu painaka nuwianaka inceʼe?”
Mesono siʼa, “Yaku naʼakalasi i ule, painaka kukoni wua ngkaju setu.”
Popahuku i mPue Ala
3:14-21
14Roo setu ndatoʼo i mPue Ala ri ule setu, “Siko da ndahuku ua powiamu setu; ungka ri mpengaya-ngaya pinatuwu podo siko anu sangaya-ngaya da mangkoyo tadea seʼi: Montepuʼu seʼi-seʼi siko da menjoyo pelinjamu, pai da mangkoni awu sangkarate ngkatuwumu. 15#Pepat. 12:17 Siko da moʼiwali pai weʼa setu, mulinya bareʼe bali-bali da moʼiwali pai mulimu. Mulinya da malesaki woʼomu, pai siko da mantungku todu ntau seʼe.”
16Nepa ndatoʼo i mPue ri weʼa setu, “Yaku da marangani kaparimu sindara siko mongkeni pai ri tempo mpoʼongaamu. Paikanya mau ewanceʼe, bareʼe da bali petaka ndayamu ri langkaimu, pai siko da medonge ri siʼa.”
17 #
Ib. 6:8
Nepa ndatoʼo i mPue ri tuama setu, “Siko mampedongekamo pau ndongomu painaka nukonimo wua ngkaju anu Kupetangani da nukoni. Ua powiamu setu, tetadeasimo tana. Da mapari nuepe motetala sangkarate ngkatuwumu da naka gana pangkonimu. 18Ewo pai rui da tuwu ri wawo ntana seʼi, pai waʼa mpinamuya anu bareʼe ndapomuya inceʼe anu da mewali pangkonimu. 19Da mapari nuepe motetala da tumbu oti inimu nepa da nurata sili lengemu, rantani mewalili muni siko ri tana, maka ungka ri tana ndapampowia siko. Siko ndapapewali ungka ri tana pai da mewalili muni ri tana.”
20I Adama mampapotoʼo rongonya i Hawa, maka weʼa setu mewali ine ntolino pura-pura. 21Ndapowia i mPue Ala pela mpinatuwu da naporengko i Adama pai rongonya, nepa ndapaporengko tau seʼe.
I Adama pai Hawa ndairi ungka ri bonde mParadesi
3:22-24
22 #
Pepat. 22:14
Ndatoʼo i mPue Ala, “Seʼi-seʼi tolino siwiamo pai kita, mampotumpumo pangaincani kono anu madago pai anu majaʼa. Mewali da ndajagai siʼa da naka neʼe nakoni wua ngkaju anu mawai katuwu setu, painaka siʼa da tuwu rantani masae-sae.” 23Inceʼe painaka ndiiri i mPue Ala tolino ungka ri bonde mParadesi, nepa ndapokau siʼa mampotetalaka tana, anu ungka ri tana setu ndapampowia siʼa. 24Ungka lairia, ri tondo pebetea bonde setu ri suara baa-baa mpesua, ndadika i mPue Ala waʼa keribio, pai samata penai anu mareka-reka ewa apu ewa toropana, anu majagai jaya anu da njoʼu ri puʼu ngkaju anu mawai katuwu setu. Inceʼe painaka bareʼe da reʼe mau sambaʼa tau anu da maleʼo mesua pai da mantimosuki puʼu ngkaju setu.
Actualmente seleccionado:
PALABURU 3: LAIPMF
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión