रोमि 12
12
भगवान सेवाआ राः जीवन
1हेनाते एगा भाईकू, इंञ भगवान राः दया एर सुरता केपे ते अपे थरेंञ अरजीः तना कि अपे राः देंह जीवत, अवुर पवितर, अवुर भगवान मनहेंवाः घयते, पूजा राः रूप तेपे रकाबे, नेन होयाना अपे राः आत्मिक सेवा। 2अवुर अपे नआँ दुनियाँ रेनकू घयते अलोपे बनोऊ; लेकिन अपे राः मन नवाँ यनाते अपे राः चाल बेहवार हो बदलो चलोऊ, ताकि अपे भगवान राः इक्छा जोकि सही गिआ, अवुर बढ़ियाँ गिआ, अवुर पक्का गिआ, हेना पे जेर सकोऊ।
3भगवान राः किरपा ते इंञ तीमिन होडिंञ गिअंञ मेनाअंञ जेर केडा, हेनाते अपे सगोरकू एंञ कहनी वपे तना, कि कनय हो ओतना बडे कोवाय रेहो, अपन आप बडे गिअंञ मेनते अलोय पसींदे, लेकिन बढ़ियाँ तेय पसींदे, अवुर भगवान हेंय जेतना बिसवासिय ओवाडिया, हे-ना राः अनुसार तेय जे-रुऊ। 4कहेकि जेयसे अबू राः देंह रे अखीर अंग इदाना, अवुर सींड़ अंग राः मियाँ घयते काम कोवाआ।#1 कुरि 12:12 5नेन घयते अबू बगरा गिआबू, हेंडे रेहो मसीह रे अबू मीनियेंटंगाँः देंह घयगिअबू, जेयसे मीनियेंटंगाँः देंह राः एनेट एटाः अंग मिल जुल ते दोहोना, हेन घयते अबू हो आपस रे मिल जुल तेबू दोहोनू।#1 कुरि 12:12 6भगवान किरपा केनते अबू एनेट एटाः बरदानिय ओवड बुआ। हेनाते भविस्वाड़िय राः दान ञँमकेना, हेंय जेतना ना बिसवासिय ओवाडिया, हे-ना बिसवास राः अनुसार तेय भविस्वाड़ियू। 7सेसेवा राः दान ञँम केन रेदो, हेंय सेसेवा महल रेय लगो कोऊ, चेचेड राः दान ञँम केन रेदो, हेंय चेचेड रेय लगो कोऊ। 8अवुर टेबोः बबाहल राः दान ञँम केन रेदो, हेंय टेबोः बबाहल रेय लगो कोऊ; दान एम राः दान ञँम केन रेदो, हेंय हरग दिल तेय ए-मे, अअगवाय राः दान ञँम केन रेदो, हेंय हरग दिल तेय अअगवायू, दयाः अराः दान ञँम केन रेदो, हेंय हँसी खुसी तेय दयाऊ।#1 कुरि 12:4-11
मसीही जीवन जियोः राः तरिका
9अपे राः परेम कपट ते अलो दोहोनू, बुराई पे मेरंगवा; भलाई रेपे लगो कोऊ। 10अपे बरेमिसीकू घयतेपे परेम ओड़ेंगू; अपे एटाःकू इंञ वरी बढ़ियाँ गिअय मेनते पसींद केकू तेपे आदर इजेत कू। 11मेहनाते महल रेपे दोहोनू, कोढ़ियाकू अलोपे बनोऊ; लेकिन हरग दिल ते परभु पे सेवायू। 12असरा कोःते हँसी खुसी तेपे दोहोनू; अवुर संकट मेजुः रे थीर तेपे दोहोनू; हर घड़ी बिनती रेपे दोहोनू। 13पवितर होड़कू#12:13 भगवान रेनकू होड़कू लगड जे-ना जरूरत पड़ोः रे सहेता पे ओवाकू; अवुर एटाःकू मान मरजाद लगड तँवतँव रेपे दोहोनू।
14अपेकू सतोआ हेंकू आसीस पे ओवाकू आसीसू; सराप अलो।#मत्ती 5:44; लूका 6:28 15बहाली मनोकू सुदा बहाली पे मनो; अवुर ईयामकू सुदा पे ईयामू। 16सगोरकू सुदा मया मिलन तेपे दोहोनू; अपन आप अलोपे उसूलुःऊ; लेकिन नरम होड़कू सुदा उठाब बेयठाबुः महल रेपे दोहोनू, अवुर इंञ सींड़िंञ पपाड़िआ मेनते अलोपे पसींदे।#नीति 3:7
17अपे बुराई राः बदला ते, बुराई अलोपे करोवे; सींड़कू राः नँजेर रे जे बढ़ियाँ गिआ, हे-ना काम राः कोसीस रेपे दोहोनू। 18जेतना न हो सके, अपे सींड़कू सुदा मया मिलन तेपे दोहोनू।
19एगा प्यारा भाईकू! बदला अलोपे मिड़ागे, भगवान पे इकावा। कहेकि धरमग्रंथ रे न घयते लिखल इदाना, “बदला मिड़ाः ईञाः काम हवे, परभु कहनियाँ बदला ईनिंञ मिड़ागेआ।”
20हेनाते “अमाअय मुदेय रँगेज केडिय रेदो, हेंय जोमुः लगड मी ओवायू; ततँग केडिय रेदो, ञुँय लगड दाः मी ओवायू; कहेकि नआँ घयतेम करोवे रेदो, हेंय मी एचे लजियो विया।”#12:20 उनानी भासा ते न घयते लिखल इदाना कि न याःतेम करोवे रेदो हेंय भोः रे सेंगेल हसम अदाहा
21अपे बुराई रे अलोपे एर हरोऊ, लेकिन भलाई काम काम केते बुराई पे हरो।
Actualmente seleccionado:
रोमि 12: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.