परेरित 4
4
महासभा रे पतरस अवुर एहुन्ना
1पतरस अवुर एहुन्ना होड़कू सुदा कींञ टेबोः दोहो एनु, तहाँ आजक अवुर मँडिल पपाहराकू सिपाहिकू रेनिय अधिकारी, अवुर सदूकिकू, हेंकींञ थरे कू मेजेना। 2हेंकू अखीर कू धको तना, कहेकि हेंकींञ होड़कू कींञ चेड दोहो एनु, अवुर ईसु गोजतन वरी जियो रिमुः राः बारे तेकींञ परचारे दोहो एनु, हेन घयते गोजियान हेंकू सगोरकू फेर सेते कू जियो रिमुआ मेनते कींञ चेडकू दोहो एनु। 3अवुर नेकींञ कू सबकेड कींञ ते अयूब यनते जेहेल रे रात भर कू बँद तडकीञाँ। 4जे जे हेंकींञ राः टेबोः कू अँजोम तेडा, हेंकू मेंडे अखीर होड़कू बिसवास तेडा, हेंकू लेखा तेडकू रे लगभग पाँच हजार मेनमोट कू दोहो एना।
5हेना ञिंदावत एरुसलेम रे एहूदी अघुवाकू अवुर सपायँड़कू अवुर एहूदी नियम चेचेडकू राः सभा होया एना। 6हेना रे बडेअय आजक हन्ना, अवुर कयफा, अवुर एहुन्ना, अवुर सिकन्दर अवुर सींड़कू वरी बडेअय आजक परिवार रेनकू सींड़कू हेना रेकू दोहो एना। 7तहाँ हेंकींञ मँझर रेकू चँड़ा केडकींञ ते, नआँ काम करा सक्ति ते अवुर ईया ञुमू तेबा काम तेडा मेनते कू होंबोर तेडकिञाँ। 8हेना वरी पतरस पवितर आत्मा राः भरपूरी तेय कहनी तेडा, 9“ए होड़कू रेनकू अघुवाकू अवुर सपायँड़कू, नेय खोड़ा होड़ सुदा धरम काम लिंञ काम केड हेना राः बारे ते, तेसींञ अपे काःतेय चिकन केना मेनाआँ अलिंञ पे होंबोर यडा? 10अपे सींड़कू अवुर गोटा इसराएलिकू पपाड़ी कोःपे, नसरेत गाँव रेनिय ईसु मसीह अपे कुरूस रेपे ठोको तेडिया, अवुर भगवान हेंयिय जियो तेडिया, हें-नी ञुमू ते नेय होड़ चिकन केनते अपे मड़ंग रेय चँड़ा केना। 11नआँ हें-ना
दिरी हवे, अपे राज मिस्तीरिकू मेरंग वडा,
हेनेना दिरी कोनासी दिरी बनो एना।#सिरिंग 118:22
12अवुर कनय एटागी राः दोवारा ते एरो कू बंचो एना। कहेकि अगस राः पेंदी रे मनवाँकू मेंडे अवुर कनय एटागी ञुमू बेगारिय ए-मा, जेकर दोवारा ते अबू बंचोऊ।”
13तहाँ हेंकू पतरस अवुर एहुन्ना राः हिमत कू ञेंलतेडा, अवुर कू पपाड़ी एना कि नेकींञ अनपढ़ अवुर सोझ सुरखा होड़कींञ हवे, तहाँ कू अहचरज यनु; अवुर हेंकू ईसु सुदा कींञ दोहो एना मेनते कू चिन्हों गोत्तेड किञूँ। 14अवुर खोड़ा होड़ चिकन केनते हेंकींञ सुदाय चँड़ा तना ञेंलते, कनार मेनते मेने कू कहनी सको गना। 15लेकिन हेंकू सभा वरी चलोः बा मेनते कू कहनी वडकींञ दोहो एनु, अवुर हेंकू आपस रेकू बिचार तेडा, 16“नेकींञ काःतेबू ची किञाँ? कहेकि एरुसलेम रे दोहोन तनकू सींड़ कुकू पपाड़ी तना, नेकींञ अखीर बडेआ चमत्कार राः काम कींञ काम केडा, अबू नेकींञ एरोबू नहकार सको एना। 17लेकिन होड़कू थरे मसत ते अलो मीरिजुऊ, नेय ञुमू ते कनय थरे अलोबा टेबोगे मेनते बू दब-दिबो गोडवा किञूँ।” 18तहाँ हेंकींञ कू राःतेड किञाँ, अवुर दब-दिबो केडकींञ तेकू कहनी वडकिञाँ, “ईसु राः ञुमू ते कनर अलोबा टेबोगे, न बा सिखोकू।” 19लेकिन पतरस अवुर एहुन्ना जबाब वडकू दोहो एनु, “भगवान राः टेबोः बगी वते अपे राः टेबोः लिंञ मनोः हेना, भगवान बेसवअय किदो? बेदे, अनापे न्याय वलिञूँ? 20अलिंञ ञेंलकेड अँजोम केड हेना दोलिंञ लनायेआ, अलिंञ एरो लिंञ बगी तेडा।”
21हेना वरी हेंकू हेंकींञ अवुर कू दब-दिबो केडकींञ तेकू बगी वडकिञूँ, कहेकि होड़कू राः चलते ते हेंकींञ दंड ओवा कींञ लगड कनर मोका मेने ञँम गना, कहेकि जे घटना होया एना, हेना राः चलते ते सींड़ होड़कू भगवान कू बडेयवा दोहो एनु। 22अद्भुत रीति तेय चिकन एन हेनी होड़ राः उमेर चालीस बरिस वरी बगरा दोहो एना।
बिसवासिकू राः बिनती
23पतरस अवुर एहुन्ना छडो केनते अकू गतिकू थरे कींञ मेजेना, अवुर जो कुछ होया एना, बड बडे आजककू अवुर सपायँड़कू हेंकींञ थरे कू कहनी तेड हेना, हेंकू कींञ लाय वडकू। 24हेना अँजोम केते, हेंकू एक मन केनते बडे आवाज ते भगवान थरे कू कहनी तेडा, “ओ मालिक, अम हें-नी हवे, जो सरग अवुर धरती अवुर समुन्धर अवुर जो कुछ हेना रे इदान कुआ, हेंकुम बनो केडा।#निर्ग 20:11; नहेम 9:6; सिरिंग 146:6 25अम पवितर आत्मा राः दोवारा ते, अमाअय सेवेखिया अले रेनिय खुटियारा दाऊद राः अहा तेम कहनी तेडा,
‘अनजातकू ची लगड कू हल्ला केडा?
अवुर देस देस रेनकू होड़कू ची लगड फलतू टेबोः कू पसींद यडा?’
26परभु अवुर हेंय रेनिय मसीहा राः बिरोध रे धरती रेनकू राजाकू रिमेना,
अवुर अधिकारिकू मियाँ रेकू जवार एना।#सिरिंग 2:1-2
27कहेकि सहिच मेते अमाअय सेवेखिया ईसु राः बिरोध रे जोकि नेय अम मसीहा हवे मेनतेम अभिसेक केडिया, हेरोदेस अवुर पुन्तियुस पिलातुस हो अनजातकू सुदा अवुर इसराएलिकू सुदा नआँ सहर रेकू जवार एना।#मत्ती 27:1,2; मरकुस 15:1; लूका 7:11; 23:1; एहुन्ना 18:28-29 28जो कुछ नेकू करो तेडा, हेना अमाः सक्ति अवुर अमाः इक्छा ते पनाहिल तेम तय तडा। 29अब, ए परभु, हेंकू राः धमकी टेबोः रे धियान मी एमू, अवुर अमाःकू सेवेखियाकू एयसा बरदान मी ओवाकू कि अमाः टेबोः एकदम हिमत के साथ तेकू लाय सकोऊ। 30अवुर चिकन कू लगड अमाः हाँथ मी बड़हो; कि चिन्ह अवुर अद्भुत काम अमाअय पवितरय सेवेखिया ईसु राः ञुमू ते होयाऊ।”
31हेंकू बिनती छुटो एना, तहाँ जे जघा रेकू जवर तना, हेना जघा हिलो यनु, अवुर हेंकू सींड़कू पवितर आत्मा तेकू भरो यनु, अवुर भगवान राः टेबोः हिमत राः साथ तेकू लाये दोहो एनु।
बिसवासिकू राः समुहिक जीवन
32अवुर बिसवासेःकू राः मंडली एक सूर अवुर एक मन तेकू दोहो एना। कनय हो अनेज राः अन धन ईञाः मेनते मेनेय कहनिवा दोहो एनु, लेकिन सींड़ चीज सझिया ते दोहो एना।#परेरित 2:44,45 33अवुर परेरितकू एकदम हिमत लगय ते परभु ईसु मसीह जियो रिमेना राः गोवाही कू एम दोहो एनु, अवुर हेंकू सींड़कू थरे भगवान राः किरपा अखीर दोहो एना। 34अवुर हेंकू मेंडे कनय हो गरीब मेने कू दोहो गना; कहेकि जे जे थरे जमीन चहे ओड़ाः दोहो एना, हेंकू हेना केजा केजा ते, केजा ताः हेना राः दाम कू आगू, अवुर हेना परेरितकू कटा बँदे रेकू मँडो गोत्ते दोहो एनु। 35अवुर जेयसे न जे राः जरूरत होयाऊ, हेना राः अनुसार ते सींड़ कुकू हटींग वकू दोहो एनु।
36अवुर उसुफ मेनते कू ञुमू तडिय हेनी होड़ दोहो एना, हेंय साइपरास रेनिय लेवी दोहो एना, हेंय ञुमू परेरितकू बरनबास (मतलोब सान्ति रेनिय कोड़ा होपोन) मेनते कू ञुमू तेडिया। 37हेंय राः कुछ ओतेत दोहो एना, हेना हेंय केजा तेडा, अवुर दाम तू आगकेडते परेरितकू मड़ंग रेय मँडो तेडा।
Actualmente seleccionado:
परेरित 4: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.