परेरित 12
12
जेहेल वरी पतरस उडूंग एना
1हेना तोलोग हेरोदेस राजा कलीसिया रेनकू कुछ होड़कुय ससीत बोंहड़ी तेडा। 2हेंय एहुन्ना मगत एकूब तरवार तेय एर ञेंड गोजतेडिया। 3हेरोदेस ञेंलतेडा कि नआँ घयते करोवे रे एहूदिकू खुस इदान कुआ, तहाँ हेंय पतरस होय सबतेडिया, हेना तोलोग अखमीरी रोटी जोम राः परब दोहो एना। 4हेना वरी पतरस सबके डियते जेहेल रेय डलो तेडिया, अवुर चारो पहर रे पहराय लगड चार चार झन सिपाही कुय लगो तेडा। हेंय राः बिचार दोहो एना कि पस्का परब#निर्ग 12:1-27 बितो कोःरे होड़कू मड़ंग रेय अगेय मेनते। 5पतरस जेहेल रेय दोहो एना, तहाँ कलीसिया रेनकू हेंय लगड भगवान थरे मन लगाय तेकू बिनतीः दोहो एनु।
6जे देवह हेरोदेस एहूदिकू मड़ंग रे पतरासिय अगेय मेनतेय पसींद तडा, हेनेन ञींद पतरस बाटंग सिकरी तेकू तोलताडिया, अवुर हेंय बा होड़ सिपाही कींञ मँझर रेय गितीज दोहो एनु, अवुर पहरदारकू जेहेल दुवर कू पहरा दोहो एनु। 7हेना वरी अचाकते मियाँटंग परभु रेनिय सरगदूत देखर एना, तहाँ पतरस दोहो एना हेना कोठली इंजोत यनु। सरगदूत पतरस पँजर रे थपड़ीं केडतेय जगो तेडिया, अवुरिय कहनी वडियू, “हलितेम रिमुऊ।” अवुर पतरस ती वरी सिकरी टोविज केनते लोजोर यनु। 8तहाँ सरगदूत हेंयिय कहनी वडियू, “मयंग मिम तो-लू, अवुर पनही तम मी तुसिञूँ,” हेना वरी पतरस तयार एना, तहाँ हेंय फे-रिय कहनी तेडा, “कपड़ा तम मी तुसिंञ केते इंञ तयोम तेम से-ने।” 9पतरस हेंय तयोम तेय सेनतेडा, लेकिन हेंय मेनेय पपाड़ी दोहो एनु कि जो कुछ सरगदूत करो यडा, हेना सीरित गिआ मेनते, हेंय पसींद तेडा कनर परभांञ ञेंलियाडा मेनते। 10हेंकींञ जब पहला दूसरा दुवर रे पपाहराकू वरी कींञ उडूंग एना, तहाँ सहर हनते चलो केन हेना, लोह राः दुवर कींञ तयाः तेडा। तहाँ हेना दुवर हेंकींञ लगड अपन मन ते जीजयानु; अवुर हेंकींञ बहेर हनते कींञ उडूंग एना, हेना वरी हेंकींञ गली ते मियाँ मियाँ तेकींञ से-ने दोहो एनु, तहाँ सरगदूत अचाकते पतरस बगी वतेय चलो यनु। 11तहाँ पतरस जेर केतेय कहनी तेडा, “अब इंञ सही मेतेंञ पपाड़ी यना कि परभु अनेज रेनिय सरगदूत कुलकेड ते इंञ हेरोदेस ती वरिय बंचो केडिञाँ, अवुर एहूदिकू राः सगोर असराय टोविज गोत्तेडा।”
12नआँ टेबोईय पपाड़ी एन तहाँ हेंय एहुन्ना इंगत मरियोम ओड़ाईय सेनेना। नेय एहुन्ना मरकुस मेनते होकू कहनी वया। हेनारे अखीर होड़कू जवर केनतेकू बिनतीः दोहो एनु। 13अवुर पतरस बहेर हँडाः दुवारिय खटखटो तेडा, तहाँ हेना अँजोम केते रूदे मेनते ञुमूत दोहो एनय मियाँहोड़ हरवाहिन जीजिज लगाडिय सेनेना। 14हेंय पतरस अहाय लखो तेड दो, हेंय खुसी राः मरे ते दुवर मेनेय जिजगाडा। हेंय भीतर हँडे हुंको सेनकेनते होड़कुय लायवड कि पतरस दुवर रेय चड़ाँ केना। 15हेना वरी हेंकू हेंय कू कहनी वडू, “अम कोंदी यनामू।” हेंय जिधय तेय कहनी तेडा कि पतरस दुवर रेय चड़ाँ केना मेनते, तहाँ हेंकू कहनी तेडा, “हेंय रेनिय सरगदूत हवे जहानू।” 16फेर पतरस दुवारिय खनटखटोवे दोहो एनु, हेंकू दुवर कू जिज तेडा, तहाँ पतरस ञेंलतेकू अहचरज यनु। 17हेना वरी पतरस हेंकू जपनो कोःपे मेनते तीत तेय इसारा वडकू, अवुरिय लाय वडकू कि परभु हेंय जेहेल वरी काःतेय उडूंग तेडिया। अवुर हेंय कहनी वडकू, “एकूब अवुर एटाः भाई बंधुकू हो नआँ टेबोःपे लाय वकू।” तहाँ हेंय हेना वरी उडूंग केनते एटाः जघा हनतेय चलो एना।
18ञींदाते, सिपाहिकू राः मँझर रे हल्ला यनु, अवुर कू होंबोर बेड़ायू, “पतरस करा हनतेय चलो यना?” मेनते। 19हेरोदेस राजा पतरासिय एर छपा तेडा, लेकिन पतरस मेनेय ञँमगाना, हेरोदेस पपाहरा कुय पूछताछ तेडा, अवुर हेंकू ञेंड गोजकू लगाडिय हुकूम तेडा। हेना वरी तयोम ते हेरोदेस राजा अहूदिया वरी कयसेरिया रेय चलो यनु, अवुर हेना रे कुछ दिन अँगामिय दोहो एना।
हेरोदेस गोजेना
20सूर अवुर सयदा रेनकू सुदा हेरोदेस नराजिय दोहो एना। हेनाते हेंकू होड़कू एक गूट केनते हेंय थरे कू मेजेना। मड़ंग ते हेंकू बलासतुस कू मनो बुझो तेडा, हेंय राजा रेनिय करमचारी दोहो एना, हेंय राः दोवारा ते राजा थरे मेरवानुः मेनते कू चहोः दोहो एनु, कहेकि राजा राः देस वरी हेंकू राः खरचा बरचा पुरोः दोहो एनु। 21दिन तोलतड देवह हेरोदेस राज कपड़ा#12:21 राजाकू तुसींञेआँ कपड़ा कू राज कपड़ा वआ तुसिंञ केते अनेज राः राज गद्दी रेय दुड़ूब एना, अवुर हेंकू थरेय भाँसड़ तेडा। 22हेना वरी होड़कू हल्ला एना, “नआँ होड़कू राः मेने, भगवान राः आवाज हवे।” 23हेनेन तोलोग हेंय परभु रेनिय सरगदूत ञेंडतेडिया, अवुर हेंय थरे तीजकू परो यनु, अवुरिय गोज यनु, कहेकि हेंय भगवान राः महिमा मेनेय करो गडा। 24लेकिन भगवान राः टेबोः बड़होः अवुर मिरीज चलो एना।
25बरनबास अवुर साऊल एडकींञ सेसेवा कींञ पुरो तेडा, तहाँ हेंकींञ एहुन्ना नेय मरकुस मेनते होकू कहनी वया, एरुसलेम वरी अन्ताकिया रेकू मिड़ाः एना।
Actualmente seleccionado:
परेरित 12: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.