Luka 17
17
O Sowal to Raraw
(Matay 18.6-7, 21-22; Maroko 9.42)
1Pasowal sa ci Yis i nisawawaan Ningra, <<O airaira aca ko misawiay a pakaciraraw to tamdaw a dmak, nikawrira, o cacilafo koya paci^ci sanay a misawi a tamdaw! 2O nika ciraraw no misawiay to ccay nonini a sasafaay i, o nika piso'ot to li'el ningra to tata'angay a fokloh a tailangan a mafahkol i talolongay a riyar ko nga'ay. 3Pina'on kamo.
<<Ano ciraraw ko salikaka iso i, kakteren cingra. Ano mifalic cingra to faloco' i, hpolen ko raraw ningra. 4Ano kinapito cingra a misatatiih i tisowanan to ccay a romi'ad i, ano kinapito cingra a misanga'ay to sowal i tisowanan toya <O morarawayto kako,> saan i, o hahpolen iso ko raraw ningra,>> han ni Yis.
O 'Icel no Piti'er to Kawas
5Pasowal sa ko tarokos to Tapang, <<Pa'icelen ko piti'er niyam i Kawas,>> han nangra.
6Pasowal sa ko Tapang, <<Ano ira ko hato faloay no kolang a nika tata'ang no piti'er namo to Kawas i, <Kafangad a malinah a malngaw i riyar,> ano han namo a somowal konini a 'adidem i, o mamihaklong to sowal namo konini a waxalan.
O Sikining no Koli
7<<O cima namo ko cikoliay to maomahay, ano ^ca i, o pakaenay to siri i, ano minokay koya koli nai omah i, ira ko <Dadada, kakomaento,> sanay namo saw? 8Awaay! O sasomowal kiso i cingraan, <Pisakalafiho to sakalafi ako. Kacisafaked a matayal to saki takowanan tangasa i kahrekan no mako a komaen. Ta itiyato kiso a komaen,> o sasaan kiso. 9Ano milahcihci ko koli to sowal no tawki ningra i, mikansiya ko tawki i cingraan saan kamo saw? 10Caay. Malcad tonini kamo. Ano milahcihci kamo to limo'ot a ma^min i, <O nano caayay ka ci ^poc a koli kami, deng o pisarocod aca niyam to dadmaken niyam,> han ko sowal.>>
O Piadah to Mamo^tepay a Malono'ay a Tamdaw
11Yo macokacok ci Yis a tayra i Yirusalim i, pakayra Cingra i la'ed no Samariya ato Kalili a romakat. 12Yo micomod ci Yis i ccay a niyaro' i, ma'araw Ningra ko mamo^tepay a malono'ay a tamdaw. Tomireng cangra i ra:ay. 13Cli' sa cangra a somowal, <<Yis singsi, kasini'adaenho kami,>> saan cangra.
14Nengneng sa ci Yis cangraan a somowal, <<Katayra i citodongay to ta'ong, ta patiri'en cangra to tireng namo,>> han Ningra.
Yo tayra cangra i, makorac#17.14 makorac -- Nengnengen i Matay 8.2. ko tireng nangra i fatad no lalan. 15Mafana' ko ccay nangra to nika adah no tireng ningra i, lkal sa. Kalanipipahmek han ningra to Kawas a patiko a tayra i ci Yisan. 16Hinokop sa cingra i ka'ayaw ni Yis a mikansiya i Cingraan. O Samariya a tamdaw cingra. 17Sowal sa ci Yis, <<Mamo^tep koya maadahay kiya saw? I cowato ko sasiwa? 18Nawiro dengan onini a ccay a roma a finacadan ko patikoay a tayni a pahmek to Kawas saw?>> saan. 19Ta pasowal sa ci Yis toya tamdaw, <<Kalomowad. Olili. O piti'er iso to Kawas ko sakaadah iso,>> han Ningra.
O Nika Talahkal no Pikowan no Kawas
(Matay 24.23-28, 37-41)
20<<Ano hakowa a talahkal ko pikowan no Kawas?>> han no papinapina a Farisay a tamdaw ci Yis a milicay. Paca'of sa ci Yis i cangraan, <<Caay ko ma'araway ko nika talahkal no pikowan no Kawas. 21Nawhani ira i faloco' namo#17.21 i faloco' namo -- ano ^ca i, ira i taterongan namo, roma i, fahal sa a ira i taterongan namo. ko pikowan no Kawas. Saka, <Nengnengen, ira i tini,> ano ^ca, <Ira itira,> caay ko hahaenen ita a somowal,>> han Ningra.
22Pasowal sa ci Yis i nisawawaan Ningra, <<Ano hakowa i, nanay ma'araw niyam to ccaccay aca a romi'ad ko nika tayni noya Wawa no Tamdaw, o sasaan kamo. Nikawrira, caay ko mama'araw namo. 23O aira ko pasowalay i tamowanan, <Nengnengen, ira itira.> <Nengnengen, ira i tini,> ano saasaan cangra i, aka ka tayra. Aka pitoor. 24Samatiya sa o pimiyat no kalapiyat i kakarayan a patdi i tolas no kakarayan, mahaen ko nika ira noya Wawa no Tamdaw a kataynian Ningra a romi'ad. 25Nikawrira, caay ka ^ca o ai'ayawho ko nipisemsem noya Tamdaw. O mamafalah no aniniay a tamdaw Cingra. 26O aira a romi'ad to nika tayni noya Wawa no Tamdaw i, o mamatiya yo ma'oripho ca Nowa. 27Itiyaayho a tamdamdaw i, mararid a komaen, mita'owak, cifa'inay, cifafahi tangasa i picomodan na Nowa i tamina toya romi'ad. Ta ira ko lenlen a mitkop i cangraan a ma^min. 28O romasato, o mamatiya o dmak toya romi'ad yo ma'oripho ci Loto. Komaen, mita'owak, mi'aca, mipacakay, mipaloma, mipatireng to loma' ko tamdamdaw. 29Yo miliyas ci Loto to Sotom i, itiya a matfad nai kakarayan ko namal ato miwarakay a 'acfel a mitkop to tamdamdaw a ma^min. 30O mamalcad tonini a dmak ko nika talahkal noya Wawa no Tamdaw toya romi'ad.
31<<Itiya toya romi'ad i, ano i fadahongay kiso i, aka ka ^pod a micomod i loma' a miala to maamaan. O romasato, ano i omahay kiso i, aka pinokay i loma'. 32Haratengen ko dmak no fafahi ni Loto. 33O limlaay to 'orip no tireng a tamdaw i, o mamafalah ningra ko 'orip ningra. O kinafalahay to 'orip ningra i, o mamilayap to 'orip cingra. 34Sowalen Ako kamo, itiya toya dadaya i, yo mafoti' i ccay a kafoti'an ko tatosaay a tamdaw i, o mamaala ko ccay, o mamasiday ko ccay. 35Yo malacafay a miilang ko tatosaay a fafahiyan i, o mamaala ko ccay, o mamasiday ko ccay,>> han Ningra.#17.35 Ira ko katlangay a cudad matongal i 36 a tosir Yo i omah ko tatosaay a fa'inayan i, o mamaala ko ccay, o mamasiday ko ccay (tiri'en i Matay 24.40).
37Sowal sa ko nisawawaan i ci Yisan, <<Tapangaw, i cowa konini a dmak?>> han nangra.
Pasowal sa ci Yis, <<Ano i cowa ko kodih i, o a itira a masa'opo ko lidep,>> han Ningra.
Actualmente seleccionado:
Luka 17: AMIS2019
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© The Bible Society in Taiwan, 2019