မာကု 13
13
စံဝ်ယေဆု ကလာင်းပ္လေႈအူန်း ဘည်ဘာည်းနံင်ယာ်ႈလှဲဝ် စော်င်းစံဝ်ဖြား
မတဲ ၂၄း၁-၂၊ လုကာ ၂၁း၅-၆
1ဇိုစံဝ်ယေဆုလည်လေႈဒေဲႈ ဒစော်င်းစံဝ်ဖြား၊ ခေဲင်းတပဲအန်းကဲ အူချှေႈ စီဒေဲႈကလာင်းဒါ်ႈ “ဆြာ တိူဝ်ႈဟံင်း။ မာဝ်းကဲနီး အန်းဒါင်းဘိူန်ဒီပေါႇအခည်း၊ ဂါင်းကဲနီးမာ် ဒါင်းခီုက်ပေါႇအခည်းဟာ့်။”
2အန်းစံဝ် စီႎီးဒါ်ႈ “မိုႈအိူဝ်၊ စံင်နည် မည်းဟည်ယေဲဝ်းအူန်း ဂါင်းဒါင်းခီုက်ကဲနီး။ အီးမိုႈက္လိုန်းမာဝ်း အန်းအီးကဇိုည်ႇအူန်း တီင်စော်င်းဖြားကဲနီးမာ် နံင်ကတူႈကညားတက္လာ်ႈဇောႈဒို့။ အူပိုင်းမာ် အန်းနံင်ဘူႎီးဂေါ်ည်းမ ဒီဂေါ်ည်းပျီမ်းအန်း။”
စံဝ်ယေဆု ကလာင်းပ္လေႈအူန်း ဘည်ဘာည်းနံင်ကီန်းဒည်းဒေဲႈ တော်န်းမျိုး
မတဲ ၂၄း၃-၁၄၊ လုကာ ၂၁း၇-၁၉
3ႎါည်းဒီး စံဝ်ယေဆု အံက်ပါ့်တေဲင်းနောဆာန်လူန် ကတော်ငါည်းဒေဲႈ ညျှာစော်င်းစံဝ်ဖြားဒီး။ ယာမ်းဇေဲန်း အီးမိုႈပေတရု၊ ရာကိုပ်၊ ယောဟာန် ကဲအန်ဒရေ ကဲစီဒေဲႈဇူးပါ့်အန်းစံဝ် ဘျားလာ်မှောႇဒါ်ႈ 4“ကလာင်းနှဲဟံင်း ယေးနာ်ႇ၊ ဘိူန်မှေဲ နံင်ပေန်ဒေဲႈ ကဲကဲဒီး။ မှေဲနံင်ဘာည်းလာ်နာ်ႇ ဆာ်ကဲကဲဒီး ဟည်မိုႈပေန်ဒေဲႈ။”
5စံဝ်ယေဆုမာ် စီကလာင်းဒါ်ႈ “နှာင်းအီးကံပ်ဘူခလံဝ်းဟိုမ်းပဲ ဂေါ်ည်းချဲတ်ခည်းခည်းနာ်ႏ။ 6တူအီးကဲမာ် နံင်ရေဲန်းထင်နှေးဒေဲႈဒို့ မိုႈအံဝ်း ဂီုန်းပေါႇခည်း။ ကဲ စီနံင်ဒေဲႈခလံဝ်းဟိုမ်းတူအီးဂီုန်းကဲ ဒါ်ႈဒို့ကဲမိုႈ မေဆိယ#၁၃:၆ စံဝ်ခရီတ်ဟာ့်။ 7ပဲကဲဒီးမာ် ဆာ်ပဲယေဲဝ်းတညာဝ်းလာ် ဘည်ဘာည်း အီးလည်ကတိူက် ကာည်း ခါဝ်ဆတာင်းလော်င်အီးလည်ကတိူက်၊ ပဲခူယံဝ်းနာ်ႏ။ ကဲကဲဒီး နံင်ပေန်ဒေဲႈပေါႇ အခည်း။ မိုႈလိူည် ညျံမ်မိုႈမ ဒီတဟော်ည်ႇအန်း။ 8ဘိူန်ဇေဲန်း တူအီး အူခြိူဝ်းတာ့်အူခြိူဝ်း၊ အူကီုင်းတာ့်အူကီုင်း စီနံင်လည်ကတိူက်။ တော်န်းဒီတော်န်းဒဲန်မာ် နံင်ပေန်အိင်ဆံန်လယူႈ၊ ပံင်ဟိုမ်းပံင်စိုင်းမာ် တူအီးနီး နံင်အတ်ဒေဲႈ။ အီးပေန်ဒေဲႈကဲနီး စီမိုႈပေါႇ ဒီတဇူႈကီန်းဒည်း၊ အီးဒီး အန်းစီဘာည်းပေါႇ အီးပဲန့်ဒိူည်းတိုးချှူက်ယိုင်းဆဲဝ်း နံင်ပျေဲႈကော်န်းဟာ့်။”
9“ပဲမာ် ဂေါ်ည်းချဲတ်နာ်ႏ။ အီးစီနံင်တိုန်းပဲ အာပ်ပါ့်လုမ်းတြား။ ပါ့်တရော်ပ်ကဲမာ် အီးစီနံင် ကယာင်ငါ်ႈပဲ။ ဂေါႇမိုႈလီုင်စာအံဝ်း ပဲကဲဒီး နံင်ကတူႈကညား စေဲတ်မှောႇ ပါ့်လအာည်ႇတူအီးတိူဝ်ႈမေန်းကဲ ကာည်း တားကညျားဒါင်းကဲ၊ ပဲမာ် နံင်ႎီးဘိူန်း ကလာင်းဒါ်ႈ လော်င်ခါဝ်ဆတာင်းအီးမှေဲမ်ခိုည်း။ 10ပဲစီလိုဟောကလာင်း ခါဝ်ဆတာင်းမှေဲမ်ခိုည်းနီး တာ့်ခြိူဝ်းမျိုးတူအီးပါ်ပည်မေဲႈ အာည်ႇစာ်မ်း ဒီတဟော်ည်ႇအန်းနာ်ႏ။ 11ဆာ်အီးဒေဲႈကမ်းပဲ စေဲတ်မှောႇပါ့်လုမ်းတြား၊ ပဲခူထင်အီုင်ဂီႈ ပံင်နံင်ကလာင်းပဲ။ ဇိုယာမ်းဇေဲန်း ခေဲင်းနောႈပဲ ဆာ်ကဘ္လူႈဒေဲႈဘာည်းမှေဲ့မာ် ကလာင်းလိူည်ဘာည်းဇေဲန်းနာ်ႏ။ ဆီမ်ဘာည်းဆံမ်ဒါ်ႈလာ်ဘာည်းဇေဲန်း ကျောႈကဲဒီး အာဝ်မိုႈမကျောႈအီးဒေဲႈတီင်နောႈပဲ၊ အန်းမိုႈကျောႈအီးဒေဲႈ ပါ့်ႎိညျေန်ချှီႇဆငါးစံဝ်။ 12ဘိူန်ဇေဲန်း အီးမိုႈအူပီအူႎါးမာ် နံင်ႎီးအာပ်ဒဲႈ အီးပယာ်မ်းႎီုန်။ ကူန်းမားမာ် စီနံင်အာပ်ဒဲႈ ကော်န်းကဲ နှာင်းအီးပယာမ်းႎီုန်။ ကော်န်းကဲမာ် နံင်ႎီးကယာင် တာ့်ကူန်းမား၊ စီနံင်အာပ်ဒဲႈ အီးပယာ်မ်းႎီုန်။ 13ဂေါႇမိုႈလီုင်စာအံဝ်း တူအီးတော်န်းချှေႈ နံင်ကအီႈဒို့ပဲ။ ဘည်ဘာည်းစံမ့်ဇေဲန်းမာ် ချှေႈအီးဂေါ်ည်း ဇံင်းကတာ်န်း တောႇကံပ်စာ်မ်းဒီတဟော်ည်ႇအန်း၊ ချှေႈဒီး အန်းနံင်ဘိူန်း ညားချော်တ်လာည်းဟာ့်။”
ဘည်ဘာည်း နံင်ကညားဇောႈယာဝ်း ကီန်းဒည်း
မတဲ ၂၄း၁၅-၂၈၊ လုကာ ၂၁း၂၀-၂၄
14“ဆာ်စာ်မ်းဒေဲႈအူဆငည်း ‘အန်းအီးမှေဲမ်ကအီႈမှေဲမ်ယံဝ်း အန်းအီးဒဲႈအန်းလှဲဝ်ပေန်ငဲဝ်ဒို့’ အန်းနံင်ကဘ္လူႈဒေဲႈ နံင်ဇံင်းဂေါ်ည်း ပါ့်ဒီအာဝ်ထုက်အာပ်တာ့်ဂေါ်ည်း။ ဘိူန်ယေဲဝ်းပဲတာ်လာ်တိူဝ်ႈဘာည်းဇေဲန်း၊ အီးမိုႈ တူအီးကဲအီးဂေါ်ည်းပါ့်အရာပ်ယုဒကဲ လိုဒဲဝ်းဟိုက်ဒို့ ပါ့်နော။ (ချှေႈမှေဲ့ ဆာ်ဒီႈဘေဲႇလှေနီး ဒဲႈအန်းကဘ္လူႈနာ်ႇပေါႇနာ်ႏ။) 15ချှေႈအီးဂေါ်ည်း ပါ့်တေဲင်းကရာႈခလေဲပ်မာ် ရေဲန်းလံင်ကံန်း ခူလေဲပ်ယံဝ်းခခေဲင်း စာနံင်တေဲႈလာည်းတာ် ဂျိုးဂျာမ်း။ 16ကဲအီးဂေါ်ည်းရေဲန်းဇီုင်းပါ့်နားမာ် ခူႎီးယံဝ်း စာနံင်တေဲႈလာည်းကဘျိုက် ပါ့်ခလေဲပ်။ 17ဇိုယာမ်းဆငည်းဒီး အီးပဲန့်ဒိူည်းတိုးဇာ်န်းကဲ ကာည်း အီးပဲန့်မေဲႈကော်န်းဘူးကဲမာ် မှေဲမ်ပေန်အူန်း နောႈအီုင်ဂီႈပေါႇခည်း။ 18မှာန်းဆူး တာ့်စံဝ်ဖြား အီးမိုႈလော်င်ကီန်းဒည်းကဲဒီး နှာင်းအန်းကံပ်ဘူကညား ခါဝ်းက္လာည်း ယာမ်းဟာဝ်းဒည်းႎီးဒည်း။ 19ဆီမ်ဘာည်းဆံမ်ဒါ်ႈလာ်ဘာည်းဇေဲန်း၊ ဘိူန်နံင်မိုႈတာ် ဆငည်းကဲဒီး တူအီးကဲစီနံင် ကညားဇောႈယာဝ်း ကီန်းဒည်း ပံင်အာဝ်တေဲမ်ဘာည်းကညားဒေဲႈ ဇူႈဆီုင်ခည်စံဝ်ဖြား ဖာန်ပ္လေႈကံမ်ဖာ တော်ကံပ်စာ်မ်းဒေဲႈစံင်နည်။ တူအီး စီနံင်ဘူႎီးကညားဇောႈမ ကီန်းဒည်းဘာည်းကဲဒီး ဘိုးခံဝ်ဘော်က်။ 20စာဆငည်းကဲဒီး ဆာ်စံဝ်ကညျား ဘူချော့ဒဲႈ၊ ချှေႈမှေဲ့မာ် နံင်အာဝ်လော်တ်မ။ ဘည်ဘာည်းမာ် ဂေါႇမိုႈလီုင် တူအီးပံင်ရောႈလာည်းအူန်းအန်း၊ စံဝ်ကညျား စီချော့ဒဲႈ ဆငည်းကဲဒီး။
21ဘိူန်ဇေဲန်း ချှေႈမှေဲ့ ဆာ်ဒေဲႈဒါ်ႈ တာ့်ပဲ ‘တိူဝ်ႈဟံင်း မေဆိယ#၁၃:၂၁ စံဝ်ခရီတ် ဂေါ်ည်းပါ့်နီး၊’ ‘မေဆိယ ဂေါ်ည်းပါ့်နူး’၊ ပဲခူညျှေဲမ်နာ်ႏ။ 22အီးမိုႈအန်းအီးရေဲန်းထင်နှေး မေဆိယ#၁၃:၂၂ စံဝ်ခရီတ် ကာည်း အန်းအီးရေဲန်းထင်နှေး ပရောဖဲတ် နံင်ကဘ္လူႈဒေဲႈ ဂီုန်းပေါႇအခည်း။ ဆာ်နှေးနံင်ဘိူန်းဘာည်း စာနံင်ခလံဝ်းဟိုမ်း စံမ့်တူအီးပံင်ရောႈလာည်းအူန်းစံဝ်ဖြား ကဲမာ် နံင်ရေဲန်း နှဲလာ် ပံင်အီးမှေဲမ်အာမ်း တော်န်းမျိုး။ 23ဂေါႇမိုႈဘာည်းဇေဲန်း အီးမိုႈပဲမာ် စီဂေါ်ည်းချဲတ်ဒို့နာ်ႏ။ စံင်နည် အံဝ်းဟည်ကလာင်းအူန်းဟော်ည်ႇဒို့ တာ့်ပဲ အာည်ႇပေန်ဒေဲႈတာ် ကဲဒီးနာ်ႏ။”
ဘည်ဘာည်းကော်န်းတူအီး နံင်ႎီးလေႈဒေဲႈ
မတဲ ၂၄း၂၉-၃၁၊ လုကာ ၂၁း၂၅-၂၈
24“ဘိူဝ်ဘိူန်ဟာဝ်းတာ် ႎါည်းကီန်းဒည်းဒီး ‘ဆာင်ငည်းမာ် နံင်အာ်ႇဘံင်ဘံင်။ အီးမိုႈပကျိူဝ်းမာ် နံင်ဘူပ္လါင်မ။ 25ႎါည်းဒီး အီးမိုႈလာဝ်ကဲမာ် နံင်တက္လူႈဇောႈလေႈ။ ဘိူန်ဇေဲန်း အန်းအီးမေဲႈကနေဲႈဒါင်းပါ့်ပ္လါ်န်း ပါ်ပည်မေဲႈမာ် နံင်လယူႈဒါင်းဒေဲႈဒို့။’ 26ဘိူန်ဇေဲန်း တူအီးကဲ စီနံင်ယေဲဝ်းအူန်းတိူဝ်ႈ ‘ကော်န်းတူအီးနီး နံင်ဒါးတာန်ခိုးဒါင်း ဖုင်းဆရေဒါင်းစံဝ်ဖြား စီနံင်လေႈဒေဲႈ တောႇအုင်အုဟာ့်။’ 27ႎါည်းဒီး ကော်န်းတူအီးနီးမာ် စီနံင်ဆူည်ႇလာ် စံင်နာင်းပါ့်ပ္လါ်န်းကဲ လေႈဒေဲႈ စာနံင်တေဲႇကစု လာည်းဟာဝ်းဒို့ တူအီးပံင်ရောႈအူန်းအန်း ကဲအီးဂေါ်ည်း တော်န်းဒီတော်န်းဒဲန် ဆုတ်ပ္လါ်န်း ဆုတ်ကတာည်း ပါ်ကံမ်ဖာနီး။”
လော်င်ကျောႈကကည်း တင်းကဒိုည်ႇ
မတဲ ၂၄း၃၂-၃၅၊ လုကာ ၂၁း၂၉-၃၃
28“တိူဝ်ႈပဲဒါး အီးမိုႈတင်းဟာ်ည်းကဒိုည်ႇနာ်ႏ။ ဆာ်ရားအန်းဟည်ကဇံက်လေႈ လှားတမာည်းအန်းမာ်ဟည်ဟူန်ဒေဲႈ၊ ဘိူန်ဇေဲန်း ပဲမာ်ဟည်နာ်ႇမိုႈတာ် ဟည်မိုႈစာ်မ်းဒေဲႈ ခါဝ်းမှည်ဟာ့်။ 29တံန်နှေးတာ့်ဘာည်းဇေဲန်း ဆာ်ပဲဟည်ယေဲဝ်းလာ် ကဲဒီးပါ်ပည်မေဲႈ ပေန်ဒေဲႈ၊ ဘိူန်ဇေဲန်း ကော်န်းတူအီးနီးမာ် အန်းဟည်ဒေဲႈကစံမ်ရီမ်းပဲ ဟည်ဒေဲႈစာ်မ်းဟောည်ႇ ပါ့်လအာည်ႇမိုည်ႇပလိုႈပဲ။ 30အံဝ်းနံင်ဒါ်ႈ အီးမိုႈအီးမှာန်အန်း၊ ဂါကဲကဲဒီး ပါ်ပည်မေဲႈ ညျံမ်ပေန်ဒေဲႈအခည်း၊ တူအီးကာပ်စံင်နည်နီးမာ် ညျံမ်ဘိူန်းမ ယာ်မ်းဘိူန်ဟာဝ်း။ 31ပ္လါ်န်း ကာည်း ကတာည်း ဆံမ်လှဲဝ်ဟာဝ်းစံမ့်မာ် အီးမိုႈကျောႈအံဝ်း နံင်ဂေါ်ည်းမံန်အူန်းပေါႇ။”
ချှေႈမှေဲ့မာ် အာဝ်နာ်ႇမ ဆငည်းနံင်ႎီးဒေဲႈ စံဝ်ယေဆု
မတဲ ၂၄း၃၆-၄၄
32“ဘည်ဘာည်းစံမ့်ဇေဲန်းမာ် အီးနံင်ဘာည်းဒေဲႈကဲဒီး အီးမိုႈတာ် အချီုင်နရီဒီးဘူဒါ်ႈ အချီုင်ဆငည်းဒီးဘူဒါ်ႈ၊ ဘိူန်ဒကူန်းစံဝ် ဆိအာဝ်နာ်ႇမ၊ စံင်နာင်းပါ့်ပ္လါ်န်း ကဲအီးဂေါ်ည်းပါ့်ပ္လါ်န်းမာ် အာဝ်နာ်ႇမ၊ ကော်န်းစံဝ်မာ် အာဝ်နာ်ႇမ။ 33ဂေါႇမိုႈပဲအာဝ်နာ်ႇ အချီုင်နရီဆငည်းဒီး နံင်ပေန်ဒေဲႈ ဘိူန်မှေဲ၊ ပဲမာ် ဂေါ်ည်းချဲတ်နောႈ ချဲတ်ဖေဲမ်းနာ်ႏ။ 34အီးနီးအန်းဘာည်းလိူည် ချှေႈအီးနံင်လည်လေႈဟာဝ်းအီုန်ဒါ်န်း။ ခည်အန်းနံင်လည်လေႈဟာဝ်းအီုန်ဒါ်န်း၊ အီးမိုႈပါ့်ခလေဲပ်အန်း အန်းစီအာပ်ဒဲႈအူန်း တူအီးပံင်ဆူည်ႇအန်းကဲ တိူဝ်ႈမေန်း။ ဇီုင်းပံင်လိုတာ့်လာ်ရေဲန်းတော်န်းမျိုးမာ် အန်းစီကဆာင်းဒဲႈဒို့ လဆိလအန်း။ ချှေႈအန်းအီးပည် မိုည်ႇပလိုႈကိူန်မာ် အန်းစီတာ်မ်းအူန်း နှာင်းအန်းဂေါ်ည်းပည် ချဲတ်နာ်ႏ။ 35ဂေါႇမိုႈဘာည်းဇေဲန်း ပဲကဲဒီးမာ် ဂေါ်ည်းချဲတ်နောႈ ချဲတ်ဖေဲမ်းပဲနာ်ႏ။ ဆီမ်ဘာည်းဆံမ်ဒါ်ႈလာ်ဘာည်းဇေဲန်း အီးမိုႈကညျားခလေဲပ်ဒီး နံင်ႎီးဒေဲႈ ဘိူဝ်အာ်ႇဟီုဝ်၊ ဘိူဝ်လှီူက်ဟီုဝ်၊ ဘိူဝ်အျိူဝ်းကဒိုးဟီုဝ်၊ ဘိူဝ်ဘျည်းနံင်ႎါႈဟီုဝ်၊ ချှေႈမှေဲ့မာ် အာဝ်နာ်ႇမ။ 36ဂေါႇဘာည်းဇေဲန်း ဆာ်ကညျားခလေဲပ် ဒေဲႈစာ်မ်းကတီုင်ကတင် ခူဒဲႈအန်းဒေဲႈယေဲဝ်း ပဲအိငါမ်း ဂေါ်ည်းအာဝ်တင်ချင်တံန်းအူန်းဆိ။ 37ကျောႈချဲတ် ပံင်ကလာင်းအံဝ်း တာ့်ပဲဒီး၊ အီးမိုႈတာ့်တူအီးပါ်ပည်မေဲႈမာ် အံဝ်းကလာင်းဒဲႈအူန်းဒို့လိူည် ဘာည်းဇေဲန်းဟာ့်။ ဂေါ်ည်းချဲတ်နောႈ ချဲတ်ဖေဲမ်းပဲနာ်ႏ။”
Actualmente seleccionado:
မာကု 13: RMT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.