التَّكوِين 2
2
آس أَسّابَع
1و ساهَن يَكمَل أَخلاق ن أَسماواث د أَلقَعَّث د أَلِّ ذِيسَن أَلكُل 2أُڨّاس أَسّادَس يكَمَّل رَبِّ أَلِّ يكان يثَڨ ذِيس، أُڨّاس أَسّابَع يَرثاح. 3يبارَخ رَبِّ آس أَسّابَع يقَدَّسث، علَخاطَر يكَمَّل ذِيس أَلِّ يَخلَقث أَلكُل. يَرثاح أَسِّس سَڨ و أَخلاق.
تَجنِنت ن عَدَن
4ساهَن أَسماواث د أَلقَعَّث أَمَّخلَقنَث. 5لَحَبَّ لى أَشَّجَر لى أَلحَش ڨ أَلقَعَّث، علَخاطَر رَبِّ أَليُوش أَليُزِينش آمزَر، أُلَحَبّاش ذ وِين ذَيَخذَم أَلقَعَّث. 6أَمَّ أَثكان تَلَّ تَلمُيث أَتّالِ سَڨ أَلقَعَّث تَسَّسوَ كُل شَي. 7يَڨ رَبِّ أَلعَبذ سَڨ أَشال يَنفَخ ڨ أَلخَشمَس أَنَّسمَث ن وَدّار، يَذوَل آدَم ذ أَلعَبذ يَدَّر. 8يَڨ رَبِّ أَجَّنَّث ڨ عَدَن يَتوالِ آقَّس ن تَفُوث، إِحُط د إِين آدَم أَلِّ يَخلَقث. 9يَخلَق رَبِّ لَنواع أَلكُل ن أَشّجَر ڨ أَلقَعَّث أَلمَنضرَنسَن يَبهَ و أَتّاروَن أَلغَلَّث تَحلَ، أُڨَّمَّس ن أَجَّنَّث يَخلَق أَشَّجرَث ن وَدّار د أَشَّجرَث ن واسَّن ن أَلخِير د أَشَّر. 10يكان يَلَّ أَسُوف يَفَّغ سَڨ عَدَن باش أَ يَسَّسو أَجَّنَّث، أَسيِين أَيَمزُون ف أَربعَ. 11أَمَزوار أَلَّسمَس فِيشُون، أَسُوف أَلِّ يَنَّض ف أَلقَعَّث ن أَحوِيلَ أَلِّ ذِيس أُورَغ. 12أُورَغ ن أَلقَعَّثدِين يَبهَ، يَلَّ زادَ أَجُّوهَر د أَلعقِيق. 13أَسُوف أَثّانِ أَلَّسمَس جِيحُون، واهَن يَنَّض ف أَلقَعَّث ن كُوش أَلكُل. 14أَسُوف أَثّالَث أَلَّسمَس دَجلَ، يَڨُّور ڨ أَشَّرق ن شُور. أَسُوف أَرّابَع ذ أَلفُورات.
15ياوِ رَبِّ آدَم إِحُطِّ ڨ أَجَّنَّث ن عَدَن باش أَ تيَخذَم يَلهَ أَسِّس. 16يَنَّس: «أَثڨَدَّذ أَثَتشَذ سَڨ أَشَّجرَث أَلكُل أَلِّ تَخسَذ، 17كان د أَشَّجرَث ن آسَّن ن أَلخِير د أَشَّر، آس أَلِّ أَثَتشَذ أَسِّس راهُ أَثَمُّوثَذ.»
18يَن رَبِّ: «أَليَبهِيش أَدجَ آدَم يَدَّر وَحذَس، يَلزَم أَسَخلقَ إِيجَن م نَتَّ باش أَ ثِعاوَن.» 19ياوِ رَبِّ أَشال يَڨ أَسِّس أَلهُوش د إِزانِّوَن أَلكُل. و بَعَّذ يَخلَق آدَم يَوِيثَن ي أَتوَلِيس باش أَ يَرقَب ماخ ذَنِّسَمَّ، أُساهَن إِوِيَن أَلكُل أَلِّسَمِنسَن. 20إِنابَ آدَم أَلهُوش د إِزانِّوَن د أَلهوايَش أَلكُل س أَلِّسَمِنسَن. ياخِ أَليُفِيش أَسِّسَن باش أَ ثِعاوَن. 21يَسَّنعَس رَبِّ آدَم ڨ أَنُدَّم ذ أَمَقّار، ياوِ إِيجَن سَڨ إِغَسغِسنَس إِعَبَّ أُڨَّمخَنَس أَخسُم. 22يَڨ سَڨ أَغَسغِسدِين أَلِّ يِوِثِ سَڨ آدَم تَمَطُّوث، يَغَت ي أَتوالِ آدَم. 23يَن آدَم: «ثاهَن تُرَ ذ إِيغَص سَڨ إِخسَنِيو د وَخسُم سَڨ أَخسُمِيو. ثاهَن ذ أَثَمسَمَّ تَمَطُّوث#2:23 بِلعِبرِيَ أَلكَلمَث ن وَرياز «إِسه» و أَلكَلمَث ن تَمَطُّوث «إِسهى». علَخاطَر تَمّاوِ سَڨ أَرياز.» 24هَذاكَ علاش أَرياز أَيَدج دادَّس د يَمَّس يَلصَق ڨ لِوَشَس أَذولَن إِيجَن. 25آدَم د لِوَشَس كانَن لَسَّن ذ إِعَريانَن، و أَلَّثحَشمَنش.
Actualmente seleccionado:
التَّكوِين 2: KTJT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.