Siin Giala 1
1
Lawa a lon laanka kanaa diɛ boo
1Lɛlɛ-lɛlɛ Lawa na á lon laanka kanaa da. 2Kanaa lɛ gɔ́ɔ̃ kooro na á goã, màn kɔ́n banban. Bǎã tumaa na á goã mu lɛa, wɔlɔ tumaa n tì. Lawa Yiri na á goã bìn diɛ mu lɛ ganaa.
3 #
KOR2 4.6. Lawa tɔ́n pɛ kɛnɛn: «Wɔlɔ fúlu bɔ.» Wɔlɔ fúlu bɔ. 4Lawa wɔlɔ fúlu yɛ màn siĩn lɛa. Á tɔ́n toɛ̃ á bɔ kɔn ka wɔlɔ tì ni. 5Á wɔlɔ fúlu bíi "Lɛawaa", á wɔlɔ tì bíi "Tèlò". Wasamiɛ̃n yɛ, baayɛlɛ dɔ́ yɛ. Lɛawaa bibinaa nə ka bɛ nɛ.
6 #
PIƐ2 3.5. Lawa tɔ́n pɛ kɛnɛn doo: «Gèlè yɛ, a mu na kɔn wɔlɔ paa.» 7Bɛ nə́ n zɛnaa miɛ̃. Lawa na á bɛa gèlè lɛ bɔ, a ná a giulun mu laanka a lalan wɔ na, á ǹ bɔ kɔn. 8Á gèlè lɛ bíi "Lon". Wasamiɛ̃n yɛ, baayɛlɛ dɔ́ yɛ. A lɛawaa paabaa ǹ wɔ n ka bɛ nɛ.
9Lawa pɛ kɛnɛn doo: «Lon giulun mu lɛ nə n tɔ kɔn lɛ bǎã goon toto ne, wɔlɔ kooro boo la a yɛ.» Á n zɛnaa miɛ̃. 10Lawa wɔlɔ kooro lɛ bíi "Tán", á mu tɔkɔnlɛ lɛ bíi "Kɔ̀". Lawa yɛ màn siĩn lɛa.
11Lawa tɔ́n pɛ: «Tán luu buruu pãlin bɔ: màn tumaa bɔ, a we ná a tan, a kɔnpɛ ka a tɔrɔ nɛ, da tumaa bɔ, a nɛ kɔ a kɔnpɛ ka a tɔrɔ nɛ.» Bɛ nə́ n zɛnaa miɛ̃. 12Tán luu buruu pãlin bɔ: màn tumaa bɔ, a we ná a tan á kɔnpɛ ka a tɔrɔ nɛ, da tumaa bɔ, á nɛ kɔ á kɔnpɛ ka a tɔrɔ nɛ. Lawa yɛ màn siĩn lɛa. 13Wasamiɛ̃n yɛ, baayɛlɛ dɔ́ yɛ. A lɛawaa sɔɔbaa ǹ wɔ pinaa n ka bɛ nɛ.
14Lawa tɔ́n wusoo á pɛ kɛnɛn: «Folon-kaalin nə bɔ lon gɔ̀nɔn ganaa, ǹ lɛawaa laanka tèlò a bɔkɔnlɛ nyaa. Ǹ nə n baa biikoo nyaa ǹ mànan lɛa, ǹ zɔ́n biikoon nyaa, ka lɛawaan laanka lɛ̀n nɛ. 15Ka bɛ dɔ nɛ, ǹ boo la, ǹ nə n toa lon gɔ̀nɔn ganaa, ǹ wɔlɔ fúlu kaa tán la.» Á n zɛnaa miɛ̃. 16Lawa folon-bɔle dadara màn paa zɛnaa: ǹ mɛn bɛ́ gole, wasa nɛ, á bɛ koa lɛawaa mìi la; ǹ mɛn bɛ́ boɛɛnɛ, mui ni, á bɛ koa tèlò mìi la. Á leeren dɔn zɛnaa. 17Lawa na á ǹ koa lon gɔ̀nɔn ganaa, mà ǹ wɔlɔ fúlu kaa tán la, 18ǹ goã lɛawaa laanka tèlò mìi la, ǹ wɔlɔ fúlu toɛ̃ ǹ bɔ kɔn ka wɔlɔ tì ni. Lawa yɛ màn siĩn lɛa. 19Wasamiɛ̃n yɛ, baayɛlɛ dɔ́ yɛ. A lɛawaa siibaa ǹ wɔ n ka bɛ nɛ.
20Lawa tɔ́n wusoo á pɛ kɛnɛn doo: «Màn yiikoonaa gigiã yɛ bǎã tumaa a mu li, bàanan dɔn nə piɛ̃ ǹ wo lon.» 21Lawa kɔ̀ mu giulun màn dadaran da, màn yiikoonaa tɔrɔ mɛn tumaa bɛ́ tɔ we mu giulun. Á bàan tɔrɔ tumaa dɔ da. Lawa yɛ màn siĩn lɛa. 22Lawa barka da ǹ ganaa, á pɛ kɛnɛn: «Mu mànan nə nɛn bɔ, ǹ mɔnaa, ǹ kɔ̀ mu pã, bàanan dɔn nə mɔnaa tán la.» 23Wasamiɛ̃n yɛ, baayɛlɛ dɔ́ yɛ. A lɛawaa soorobaa ǹ wɔ n ka bɛ nɛ.
24Lawa tɔ́n pɛ kɛnɛn doo: «Tán màn yiikoonaa tɔrɔ tumaa bɔ, piɛ mànan laanka don mànan nɛ, a dadaran laanka a bɔnboɛɛnɛn nɛ.» Á n zɛnaa miɛ̃. 25Lawa bɛa màn yiikoonaan lɛn tɔrɔ tumaa da miɛ̃. Lawa yɛ màn siĩn lɛa.
26 #
KOR1 11.7. Bɛ kio kəni, Lawa tɔ́n pɛ: «Ka daa, wɔ minbuiin nɛ zɛnaa, wɔ dinin kɔnboe lɛa, ka wɔ dinin bɛ́ lɔn. A giã kɔ̀ mu li ǹ zɔ̀n mìi la, ka bàanan nɛ, ka piɛ mànan laanka don mànan nɛ, a dadaran laanka a bɔnboɛɛnɛn nɛ.»
27 #
MAT 19.4; MAR 10.6. #SGK 5.1-2. Lawa na á minbuiin nɛ zɛnaa a din a kɔnboe lɛa,
á zɛnaa ka Lawa din bɛ́ lɔn.
Á ǹ zɛnaa, giĩ laanka lɔ nɛ.
28Lawa barka da ǹ ganaa, á pɛ ǹ nɛ kɛnɛn: «Ka nɛnyaanan yɛ, ǹ mɔnaa, ǹ tán pã, ǹ giã a mìi la. Ǹ goã kɔ̀ mu li ǹ zɔ̀n mìi la, ka bàanan laanka màn yiikoonaa mɛn tumaa bɛ́ tɔ we tán la.» 29Lawa tɔ́n kɛ pɛ á ti a ganaa: «Á ke, man màn tɔrɔ tumaa laanka da nɛ-kɔle tɔrɔ tumaa koe ka la tán tumaa la, bɛ á die kaa màn-bii biɛ. 30Sɛnɛ, màn yiikoonaan mɛnɛn tumaa bɛ́ tán la, ka bàanan tumaa nɛ, màn woo màn tá piɛ̃ sii, man buu buruu koe bɛn tumaa la, ǹ màn-bii lɛa.» Á n zɛnaa miɛ̃. 31Lawa màn mɛn tumaa zɛnaa, á yɛ mà ǹ tá siĩn parsiini. Wasamiɛ̃n yɛ, baayɛlɛ dɔ́ yɛ. A lɛawaa sɔrɔbaa ǹ wɔ n ka bɛ nɛ.
Actualmente seleccionado:
Siin Giala 1: SCE2013
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
San Catholic Edition Bible © Bible Society of Burkina Faso, 2013.