Zenez 8
8
Lafin deliz
1Bondie pa finn bliye Noe ek tou bann zanimo ki avek li dan bato. Bondie fer enn divan soufle lor later e nivo dilo koumans bese. 2Bann lasours dilo aret koule. Bann lafnet dan lesiel ferme e lapli aret tonbe. 3Bann dilo ki lor later koumans bese dousma-dousma. 150 zour apre deliz, nivo dilo finn dimigne. 4Lor disetiem zour dan setiem mwa, bato la tom lor sek lor montagn Ararat. 5Nivo dilo kontign desann. Premie zour dan diziem mwa, bann pwint montagn koumans paret.
6Apre 40 zour, Noe ouver enn linpos. 7Li larg enn korbo, e Korbo la ale-vini ziska ki dilo sek lor later. 8Lerla, Noe larg enn pizon pou verifie si vremem dilo finn sek lor sirfas later. 9Me pizon la pa trouv enn plas pou li poze, parski ankor ena dilo partou. Pizon la retourn ek Noe dan bato. Noe avoy so lame deor e fer li rantre. 10Noe atann ankor set zour, lerla li relarg pizon la. 11Ler pre pou aswar, pizon la retourne. Dan so labek ena enn ti bourzon pie zoliv. Alor, Noe kone ki dilo finn bese. 12Me Noe atann ankor set zour e li relarg pizon la. Sann fwa la, li pa retourne.
13Premie zour dan lane ki Noe gagn 601 an, dilo finn sek lor later. Noe ouver plafon bato, e li trouve ki later finn sek. 14Lor vennsetiem zour dan deziem mwa, later finn sek partou. 15Bondie dir Noe: 16“Sorti dan bato ek to fam, to bann garson ek to bann belfi. 17Tir tou bann zwazo, bann zanimo ek tou bann lezot bebet ki avek twa dan bato. Zot ava ogmante e ranpli later.” 18Alor, Noe sorti dan bato avek so bann garson, so fam, ek so bann belfi. 19Tou bann kreatir vivan sorti dan bato par group, dapre zot lespes.
Sakrifis Noe ek promes Bondie
20Noe aranz enn lotel pou LESEGNER. Li pran enn zanimo ek enn zwazo parmi sak lespes ki ti pir. Li ofer zot kouma enn sakrifis lor lotel. 21LESEGNER apresie parfin sakrifis la. Lerla li dir:
“Zame ankor mo pa pou modi later
akoz bann imin ki mo finn fer.
Li vre ki bann dimoun azir mal,
Depi zot zenn zot leker sal.
Me zame mo pa pou detrir sa bann kreatir vivan la,
kouma mo finn fer sann fwa la.
22Tanki later existe,
pou ena touzour enn letan pou seme,
ek enn letan pou rekolte.
Freser ek saler,
lete ek liver,
lanwit ek lizour,
pou existe touzour.”
Actualmente seleccionado:
Zenez 8: KMOTPOR
Destacar
Compartir
Copiar
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fes-ES.png&w=128&q=75)
¿Quieres tener guardados todos tus destacados en todos tus dispositivos? Regístrate o inicia sesión
Kreol Morisien OT Portions © Bible Society of Mauritius, 2020.