मत्ती 6
6
दांनेरै बारै मझ
1“ध्यान रखा, कि तुवे मैहणुवां किना तारीफ शुणनेरै मकसदै ला धर्मेरै कम मेईं कातै, नंता अपड़ै पिता किना जै स्वर्गा मझ आ तैस किना कौ बि ईनाम ना मेईंणा।” 2“ऐठणीरै तेईनी ध्यान रखा कि जेख्णी तुवे कोसक्यै गरीबनी दान दींतै, ता ऐठणीरा ज्यादा दिखावा मेईं करा, जिहीं यहूदी सभा घरा मझ जां गईया मझ कवटी मैहणु होर्नियां किना तारीफ शुणनेरै तेईनी कातै। आंउ तुहां सिंउ सच बोलता, कि तेन्हांनि मैहणुवां किना तेठणीरा पूरा ईनाम जां तारीफ मेऔरी आ। 3पण जेख्णी तुवे जरूरती बाऐ मैहणुनी दान देया ता कोसनि बि ऐस दांनैरा पता ना लगिया कि तीं कितु कियु। 4ताकि तिंडा दान गुप्त रिय्हा, ऐठणीरा ऐ नतीजा भुआ कि जै किछ तु छपि करि काता, तैस प्रभु असैड़ा पिता बि तकांता, सैक्या ताउनि ऐठणीरा ईनाम दैला।”
प्रार्थनायरी शिक्षा
5“जेख्णी तुवे प्रार्थना करा ता कवटिया सैयि मेईं करा केईनी कि सै यहूदी सभा घरा मझ जां सिड़का केरै मौड़ा पन खड़ै भौ करि प्रार्थना कांना चाहंथै ताकि मैहणु तैन्हांं तका करि तेन्हैरी तारीफ करिया। आंउ तुहां सिंउ सच बोलता, कि तैन्हां मैहणुवंनी तेठणीरा ईनाम जां तारीफ ऐ मैई। 6पण जेख्णी तु प्रार्थना करिया ता अपड़ै कमरै मझ गा; जां दुवार बंद करि-करि अपड़ै पिता सिंउ जैस असै तका ना सकतै, तैस सिंउ प्रार्थना कर, फिरी तिंडा पिता जै सभ किछ यानि गुप्त मझ क्यौरी प्रार्थना बि तकांता, ताउनि ऐठणीरा ईनाम दैला। 7प्रार्थना कातै टैंमा तुवे होरनियां जातिया सैयि ऐहियें बिना मतलबेरी गलै मेईं दोहरा, केईनी कि सै ऐ सौचतै कि तेन्हैरू जादु बोलणै ला तेन्हैरी शुणियूंणी। 8ऐठणीरै तेईनी तुवे तैन्हांं सैयि मेईं बंणा, केईनी कि तुवाड़ा पिता तुवाड़ै मगणां किना पेहिलै जांणता, कि तुवाड़ी कितु जरूरत आ।”
9तुवे ऐनि हिसाबै प्रार्थना करियां करा,
“हे स्वर्गा मझ बेठोरै असेड़ै पिता! मैहणु तिंडा आदर करिया केईनी कि तु पवित्र परमेश्वर आ।”
10तु संसारेरै सारा मैहणुवां जां संसारेरी सारिया चीजा पनि राज करिया। तिंडि ईच्छा जिहीं स्वर्गा मझ पूरी भूंती तिहियें धरती पनि बि पूरी भुईया।
11हर धियाड़िरी रोटी तु हर धियाड़ि असुनि दै, जै असु तैस धियाड़ि चेहिंथी।
12जां जिहीं असुवें अपड़ै अपराधियनि माफ कियु, तिहियें तु बि असेड़ै पापा माफ कर।
13जां असुं परीक्षाई मझ मेईं अणैं, पण शैताना किना बचा; (केईनी कि राज्य जां शक्ति जां माहिमा हमेशा तिंडि आ) आमीन।
14“ऐठणीरै तेईनी अगर तुवे मैहणुवां केरै पाप माफ करेलै, ता तुवाड़ा परमेश्वर तुवाड़ा स्वर्गीय पिता जै स्वर्गा मझ बेशता तुवाड़ै पापा बि माफ करैला। 15जां अगर तुवे मैहणुवां केरै पाप माफ ना करेलै, ता तुवाड़ा पिता बि तुवाड़ै पाप माफ ना करैला।”
उपवासैरी शिक्षा
16“जेख्णी तुवे उपवास करा, ता तुवाड़ै मुँह कवटिया सैयि उदास ना भूंणै चेहिंथै, केईनी कि सै उदास लेहिंथै, ताकि सै मैहणुवंनी लुहाई सकिया कि असै उपवास कातै अत्तै। आंउ तुहां सिंउ सच बोलता, कि सै अपड़ा ईनाम लैई बेठोरै अत्तै। 17पण जेख्णी तुवे उपवास कातै, ता अपड़ै शिरा पन तैल ला जां अपड़ु मुँह धौ ल्या। 18ताकि मैहणु ऐ ना समझिया कि तु उपवास काता आ, पण तिंडा पिता परमेश्वर जैस तु तका ना सकता सै तकाईया कि तीं उपवास क्यौरा आ। फिरी तिंडा पिता परमेश्वर जै तिंडै गुप्त क्यौरै सारै कम तकांता, ताउनि तेसैरा ईनाम दैला।”
स्वर्गा मझ धन किट्ठा करा
(लूका 12:33-34; 11:34-36; 16:13)
19“अपड़ै तेईनी धरती पन धन किट्ठा मेईं करा, जेठि कीड़ै जां काई बिगाड़तै, जां जैड़ि चौर अड्डा ला करि तैस चोरी नींतै। 20पण अगर तुवे अच्छै कम करेलै ता सै स्वर्गा मझ धन किट्ठा कांना सैयि भूंणु, मतलब भलाईरै कम जै कि स्वर्गीय धन आ, जेठि ना कीड़ै जां ना काई बिगाड़तै, जां जेठि चौर ना अड्डा लांतै ना चौरतै। 21केईनी कि जेठि तुवाड़ा धन आ तैठि तुवाड़ा मंन बि लगी रींहणा।
शरीरैरा दीया
22तुवाड़ु टीर तुवाड़ै शरीरेरै तेईनी एकि दीयै सैयि आ: केईनी कि ऐ तुहां हर चीज तकांणेरै काबिल बंणातु, अगर तुवाड़ै टीरै अच्छै अत्तै ता तुवाड़ा सारा शरीर अच्छा भूंणा। 23पण अगर तिंडै टीरै खराब भुईया, ता तिंडै शरीरा मझ अंधारू भूंणु, ऐठणीरै तेईनी अगर तुवे गलती सिंउ ऐहीं सौचतै अत्तै कि असैड़ा दिमाक प्रगड़ु मझ आ, पण हकीकति मझ तुवे अंधारू मझ अत्तै, ता तुवाड़ु अंधारू हकीकति मझ घोर अंधारू आ।”
परमेश्वर जां धन
(लूका 12:22-34)
24“कौ मैहणु एकि टैंमा मझ दुवां मालका केरी सेवा ना करि सकता, केईनी कि अगर कौ ऐहीं काता ता सै एकि सिंउ नफरत काता ता एकि सिंउ प्रेम काता, या एकिरा वफादार भूंणा ता हौरैरा निरादर करैला, तुवे परमेश्वरेरी जां धनेरी दोईयो केरी सेवा सेईतै ना करि सकतै। 25ऐठणीरै तेईनी आंउ तुहांनि बोलता, कि अपड़ै तेईनी चिंता मेईं करा कि तुवे क्या खालै जां क्या पीलै; जां ना अपड़ै शरीरेरै बारै मझ कि कितु लालै। क्या जीवन रोटी किना जां शरीर लिकड़ा किना जादा कीमति ना? 26पंछिया धेरै ध्यान दिया सै ना ता किछ बी बांतै ना पट्टिया मझ अनाज किठु कातै, फिरी बि तुवाड़ा स्वर्गीय पिता तेन्हांनि खलांता। असल मझ तुवाड़ी एहमियत तैन्हांं सुरगेरै पंछिया किना बड़ी जादी आ। 27जां तुहां मझ ऐतिया केणु आ जै चिंता करि-करि अपड़ि जिन्दगिरी अक घड़ि बि बधैई सकता?”
28जां लिकड़ा केरै तेईनी केईनी चिंता कातै? बंणेरै फुला पन ध्यान करा, सै किहीं फुलतै। सै ना ता मैहनत कातै ना लिकड़ै बुणतै। 29फिरी बि आंउ तुहां सिंउ बोलता, कि राजै सुलेमाने बि अपड़ी सारी धन-दौलती मझ तैन्हांं मझांं कोसक्यै एकि फुला समान लिकड़ै ना लाईयै। 30ऐठणीरै तेईनी अगर परमेश्वर मैदानैरू घाह, जै आज आ जां दोत्तीं आगी मझ सुटि दींणु, तेन्हैरी चिंन्ता काता, ता क्या परमेश्वर तुवाड़ी देखभाल ना करि सकता? तुवाड़ा विश्वास यौउता घट केईनी आ? 31ऐठणीरै तेईनी तुवे चिंता करि-करि ऐहीं मेईं बोलतै, कि असै कितु खालै, कितु पीलै, कितु लालै? 32होरनियां जातिया केरै मैहणु ऐन्हां चीजा केरी तलाशी मझ रींहथै। तुवाड़ा स्वर्गीय पिता जांणता कि तुहां ऐन्हां सभनियांं चीजा केरी जरूरत आ। ऐठणीरै तेईनी चिंता मेईं करा। 33ऐठणीरै तेईनी तुवे पेहिला स्थान परमेश्वरनी देया जां अक धार्मिक जीवन जींणैरी कोशिश करा ता ऐ सारी चीजै बि तुहांनि मेईं गांहणी। 34ऐठणीरै तेईनी दोत्तिंरै बारै मझ चिंता मेईं करा, केईनी कि दोतकणी ता असेड़ि होरी चिंताय भूंणी; अजकि धियाड़िरै तेईनी अजका दुख ऐ बड़ा आ।
Actualmente seleccionado:
मत्ती 6: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.