मत्ती 14
14
यूहन्ना बपतिस्मा दींणै वाऐरी हत्या
1तैस टैंमा हेरोदेसै जै देशेरै एकि चौथाईरै हिस्सैरा राजा थ्या तेनी यीशुरै बारै मझ चर्चा शुणि। 2जां अपड़ै दासा सिंउ बौलु, “ऐ यूहन्ना बपतिस्मा दींणै वा! जै मौरा मझां जींति गियौरा, ऐठणीरै तेईनी कि तैस किनि ऐन्हां चमत्कारा कांनेरी शक्ति आ।”
3केईनी कि हरोदैसै अपड़ै भाई फिलिप्पुसेरी लाड़ी हेरोदियासैरै कारण, यूहन्ना पकड़ी करि बन्हां जां जैल्ही मझ सुटि दितौरा थ्या। 4केईनी कि यूहन्ने तेसनी बौलु, “अपड़ै भाईरी लाड़ी तेसेरै जीते जी ऐपु किनि रखणी ठीक ना!”
5ऐठणीरै तेईनी हेरोदेस यूहन्ने सेईतै बैर रखींथ्या जां सै तैस मारी छडणां चांहथा थ्या, पण मैहणुवां किना डरींथ्या, केईनी कि मैहणु तैस भविष्यवक्ता मनींथ्यै।
6पण जेख्णी हेरोदेसैरा जन्मदिन या, ता हेरोदियासेरी छोकरी हेरोदेसेरै जां तेसेरै मेहमाना केरै सांमणै नची करि योउतै खुश क्यै कि, 7हेरोदेसै तैस छोकरिनी वचन दित्ता कि, “जै किछ तु मूं किना मगैली मूं ताउनि सै दींणु।” 8तेनी अपड़ि मयिरिया गलै मझ ऐईछी करि बौलु, “यूहन्ना बपतिस्मा दींणै वाऐरू मुंडक एकि थाई मझ इठिनि मगा दै।” 9तां फिरी राजा बड़ा उदास भुआ, तेनी अपड़ि कसमि जां मेहमाना केरै कारण तेसैरी मांग पूरी कांनेरी आज्ञा दित्ती। 10ऐठणीरै तेईनी राजै तेसै टैंमा एकि सिपहिनी आज्ञा दी करि यूहन्ने किनि जैल्ही मझ भेईजा कि तेसैरू मुंडक बढि करि लै ऐईछा। 11जां तेसैरू मुंडक थाआ मझ लै अंणु, जां तैस छोकरिनी दी दित्तु, जां तेनी गहि करि अपड़ि मयि धेरै दी दित्तु। 12जां यूहन्नेरै चैलै अईछी करि तेसैरी लास लैयि जां दबि दित्ती, जां फिरी तैन्हैं ऐईछी करि यीशुनि शुणाउ।
पंजा हजारा मैहणुवंनी रोटी खलांणी
(मरकुस. 6:30-44; लूका 9:10-17; यूह. 6:1-14)
13जेख्णी यीशु ऐ शुणु, ता किश्ती पनि चढ़ी करि तेठां किना कोसक्यै सुनसान जगायनी, एकान्त मझ चलि ग्या, जां मैहणु ऐ शुणि करि अपड़ै नगरा-नगरा किना निकोहि पैदल तैस पिचालीं चलै। 14यीशु जेख्णी किश्ती पना उतरि करि किनारै पन या, ता तेनी बड़ा मैहणुवां केरी भीड़ किट्ठी भोरी तकाई, जां यीशु तैन्हांं पन तरस खयि जां तेनी तेन्हैरै बिमार मैहणु ठीक क्यै। 15जां संन्हैरै टैंमा तेसेरै चैलै तैस किनि गहि करि बौलु कि, “ऐ सुनसान जगा आ, दीह बुडणा लगोरू आ। मैहणुवां भेईजि दींतै, कि ऐक्यै आसै-पासेरै ग्राईयां जां नगरा मझ गहि करि किछ अपड़ै खांणेरै तेईनी खरीदी लिया।” 16पण यीशु तैन्हांं सिंउ बौलु, “ऐन्हैरू गांहणु जरूरी ना! तुवे ऐ ऐन्हांनि किछ खाणुनि देया।” 17तैन्हैं तैस सिंउ बौलु, “ऐड़ि असु किनि पंज रोटी जां दो मछली छडि करि किछ ना।” 18यीशु बौलु, “ऐन्हां इठि मूं किनि लै ऐईछा।” 19तां यीशु मैहणुवंनी द्रबड़ा घाह पनि बेशणनी बौलु, जां यीशु सै पंज रोटी जां दो मछली लेई, जां सुरगा धेरै तका करि परमेश्वरैरा धन्यवाद क्या जां रोटी भन्नि-भन्नि करि चैला धेरै दित्ती जां चैलै मैहणुवंनी दित्ती। 20जां सारै खा करि रजि ग्यै, जां चैलै बचोरिया रोटिया केरी बाहरा टोकरी भरी करि उछुति। 21जां तैड़ी खांणै बाऐ जनेनियां जां छोकरूवा छडि करि लगभग पंज हजार मड़द थ्यै।
यीशुरू पांणी पन चलणु
(मरकुस. 6:45-52; यूह. 6:16-21)
22फिरी यीशु तुरंत अपड़ै चैला सिंउ किश्ती मझ चढ़नेरै तेईनी बौलु, कि सै तैस किना पेहिलै पार चलि गहिया, त्यो-तेईनी आंउ मैहणुवां विदा काता। 23यीशु मैहणुवां विदा कांना किना बाद सै प्रार्थना कांननी अलग पहाड़ा पन ग्या; जां सन्हैरै टैंमा सै तैठि अकैला थ्या। 24तैस टैंमा किश्ती झीलिरै बिच छाहलिया मझ जादा हिलणा-डुलणा लगी, केईनी कि हवा तेन्हैरै सांमणै धेरै चलोरी थी 25जां यीशु रातिरै चोउथै पेहरा यानि त्रियें जां छियैं बजेरै बिच झीलि पन चलता तैन्हांं किनि या। 26चैलै तैस झीलि पन चलतै तका करि डरि करि बोलणा लगै कि, सै भूत आ जां ऐ तका करि डरौरै चिंड दिई गैई। 27यीशु झट तैन्हांं सिंउ गलै की जां बौलु, “डरा मेईं, आंउ आ।” 28पतरसै तेसनी जुबाव दिता, हे प्रभु! अगर तु ऐआ, ता मूंनी ऐपु किनि पांणी पन चलि करि ऐईणैरी आज्ञा दै। 29तेनी बौलु, “आ!” तां पतरस किश्ती पना उतरि करि यीशु किनि गांहणनी पांणी पन चलणा लगा। 30पण ब्यार तका करि डरि ग्या, जां जेख्णी डुबणा लगा, ता चिंड दी करि बौलु, हे प्रभु, मूं बचा। 31यीशु झट हत्थ दी करि सै पकड़ी लिया, जां तैस सिंउ बौलु, “तुवाड़ा विश्वास कमजौर आ तुहैं शक केईनी केया?” 32जेख्णी सै तैन्हांं सेईतै किश्ती पन चढ़ी ग्या ता बियार बि रुकि गैयि। 33ऐत पन जै किश्ती मझ थ्यै, तैन्हैं तेसनी प्रणाम करि बौलु सचमुच “तु परमेश्वरैरा पुत्र आ।”
यीशुरै द्वारा गन्नेसरत मझ रोगी ठीक कानें
(मरकुस. 6:53-56)
34सै झीलि पार उतरि करि गन्नेसरत नगरा मझ पुज्जै। 35जां तेठणिरै मैहणुवें सै झटपट पछियांणी ल्या जां आसै-पासेरै सभनियांं ग्राँईयनी विषैक भेईजा, जां सारै बिमार मैहणु तैस किनि लै अंणै। 36जां तैस सेईतै विनती कांना लगै कि सै तैन्हांं अपड़ा लिकड़ा केरा पल्ला छूणां दिया, जां जेत्थरै सै छुता सै सारै ठीक भौ ग्यै।
Actualmente seleccionado:
मत्ती 14: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.