Matío 4
4
Sɛ́ta a á ega ntátɛ á Yɛɛ́so
(Mlk 1.12-13; Lúk 4.1-13)
1Mɛ́ le nōʼ á Yɛɛ́so á ntshi páʼā, Azwakne Ndém á ghʉ, á gʉɔ mé késáatswɛt, ŋ́gɛ Sɛ́ta a etáte á yí. 2Yɛɛ́so á kó éwú, ńnáŋ eleʼé alāʼ megēm lekua, étsōʼ pɔ́ ezokó, té pfɛ́t azō, tɛ ŋgē emakne, nzi é záŋ á yí. 3Sɛ́ta á lɛ ntshóte nnɛ̄t mé lezēŋ tsí, ńdé á mbū yí ŋ́gɛ: «Páʼ o ó Méŋ Ndém lā, tswiī metɔ́ puɔ e esɛnne ncʉ́ʼ etsō lejhʉ̄. » 4Yɛɛ́so á pwɛt ŋ́gɛ: «Mɛ́ le tí á ntē aŋwaʼne Ndém ŋ́gɛ: ŋiŋnɔŋ a te lɛ̄ mpfɛ́t áa etsō lejhʉ̄ ndaʼ, tɛ́ ndɔk ŋgɔ́ éwú ú, a lɔɔ̄k áa ashuŋne ntsem zīi, á tó á nchu Ndém tɛ́ ŋgɔ́ éwú. » 5Sɛ́ta á lɛ ndɔ̄k, á yí ŋgʉ̄ɔ mé Yelósalɛm, á te alɔ́ʼ tésɔŋ. Ŋ́kɔ́ʼne á yí ntshí á ndo ntsɔʼ Mía Ŋgyā Ndém. 6Ńdé á mbū yí ŋ́gɛ: «Páʼ o ké ŋgɔ́ á Méŋ Ndém lā, fhó ega ŋkyɛ́t ntshí á esī. Mɛ́ le tí á ntē aŋwaʼne Ndém ŋ́gɛ, Ndém a a shʉʼ etswii mecɔʼ pí e epíp á wú, ŋ́ŋímne ŋkʉ̄lɛ á wú, ŋ́gwɛ̄ á ntē mbū pɔ́p, tɛ ŋgɔ́ yīi, o gɔ le ánɛ tɔ́ kwate. » 7Yɛɛ́so á pwɛt á mbū yí ŋ́gɛ: «Á zéŋ ŋgɔ́ nti tií, á ntē aŋwaʼne Ndém ŋ́gɛ: “Ndɛ́ʼ ŋiŋ á kone kone, tɛ́ Atsyapuɔ Ndém á ghʉ ajū mīi, ŋgaŋ a á si nzɛ́ttɛ.”»
8 Sɛ́ta á zéŋ ndɔ̄k á yí, ŋ́kɔ́ʼ tɛ ŋkó á ndo mmɔʼ sisia lekwɛ̄t, ńtshí éwú, ńtswī á yí elāʼ ntsem tsīi, é ndo esī atsetsáʼ, mbɔɔ lewūʼ tsīi é ntē éwú. 9Ńdé á mbū yí ŋ́gɛ: «O lɛ ŋké ntswíʼte á esī á mvhɔ meŋ, ŋ́gūʼte á gá, meŋ mbú ŋgyá ntsem, á mbū wu. » 10Yɛɛ́so á lɛ ndé á mbū yí ŋ́gɛ: «Sɛ́ta, fhó á nzem meŋ ŋkʉ̄. Mɛ́ le tí á ntē aŋwaʼne Ndém ŋ́gɛ: “Ŋiŋ a ewūʼte áa ndaʼ Atsyapuɔ Ndém, ńjúʼ áa ndaʼ nchu yí.”» 11Sɛ́ta á lɛ ntshī á Yɛɛ́so néŋ. Mecɔʼ Ndém é lɛ eshʉ̄ʼ nzī á letswīte á yí.
Yɛɛ́so a á ega ŋgʉ̄ɔ mé Ŋgaliléa á nzií afaʼ zí
(Mlk 1.14-15; Lúk 4.14-15)
12Mɛ́ le gɔ̄ á Jáaŋ nnéŋ á ŋgyā atʉɛ́, Yɛɛ́so á júʼ épúp, ŋgʉ̄ɔ mé Ŋgaliléa. 13Ŋ́kó éwú, ńtshī á Naázalɛt nnéŋ, ŋ́gʉɔ nnáŋ á Kafaanawum. Á gɔ́ tésɔŋ yīi, a á legʉ̄ŋ ntshi Ŋgaliléa. Ŋgaliléa e é si ŋgɔ́ apak alāʼ zīi, epuɔ Zabulɔŋ pɔ́ epuɔ Nɛftali, é le láʼ nnáŋte éwú. 14Á gɔ́ épúp, tɛ́ anu zīi Izayi ntswi‑ŋke Ndém a le léē, á lɔk mbō. A le lé ŋ́gɛ:
15«Pɛ epuɔ Zabulɔŋ, mbɔɔ pɛ epuɔ Nɛftali,
pɛ pīi pɛ naŋteé
á legʉ̄ŋ nzhɛ ntshi,
mbɔɔ á nzéŋ ntshi Juldɛŋ,
pɛ epuɔ Ŋgaliléa, álāʼ zīi epuɔ pīi é té epuɔ Yúda á,
é naŋteé éwú,
16Pɛ pīi pɛ kɛɛ́ nnáŋa á ntē nzém,
ezɛ njhʉ̄, e é pú ndá.
Nu a á sáʼ, tɛ nnɔ̄ŋ ŋkyáa
ánɛ pɛ pīi,
é kɛɛ́ nnáŋa á ntē nzém, á alāʼ zīi lewhʉ̄ a á éwú. »
17Yɛɛ́so á gɔ́ á Kafaanawum épúp, ńzī á lesāʼ eshúŋ ŋ́gɛ: «Pɛ egɔ̄ nnɛ̄t zɛ, ŋ́gwáʼ atswhī tepɔŋ zɛ́, melaʼ mīi, afʉʼ zīi Ndém a gɔ á esáʼ lefɔ tsí, á tshóne tɛ mbáte. »
Yɛɛ́so a á ega ntsɔ́ʼɔ epuɔ lekua ndɔ̄kɔ ŋghʉ̄ɛ megaŋ nnɔ pí
(Mlk 1.16-20; Lúk 5.1-11)
18Yɛɛ́so á shʉʼ nnɔ̄ŋ nzīŋɛ, á akʉŋɛ́ mía ntshi Ŋgaliléa, ńjʉ́ɔ epuɔ mémpīa, á ŋiŋ pɔ́ ntsiʼnzem yi, pɔ́ gɔ́ wɔ maʼ‑mesōh. Mmɔʼ ŋgaŋ á gɔ́ lɛ Simɔŋ, mɛ́ zéŋ ntɔ́ŋ á yí lɛ Piɛ. Ntsiʼnzem yi á gɔ́ lɛ Aŋdlɛya, pɔ́ nɔŋ mmāʼa lekhʉ tsɔ́p á ntshi. 19Yɛɛ́so á lé á mbū pɔ́p ŋ́gɛ: «Pɛ eshʉ̄ʼ ŋgɔ́ á nzem meŋ, meŋ eghʉ̄, pɛ ecʉ́ʼɛ ncúʼtɛ áa epuɔ menɔŋ. » 20Pɔ́ lɛ ntshī lekhʉ tsɔ́p nnéŋ, ńtsé á nzem Yɛɛ́so. 21Yɛɛ́so á náʼ nzīŋ, ńzéŋ njʉ́ɔ emɔ̄ʼ epuɔ mémpīa, á ŋiŋ pɔ́ méŋ mɔ́ yi. Á Jáak pɔ́ ntsiʼnzem yi Jáaŋ, épɔ̄ Zebedé. Pɔ́ gɔ́ á ntē akɛnūʼ pɔ́ a mɔʼɔ́ wɔp, ńnɔŋ ncūŋtɛ mekhʉ mɔ́p, á tɔ́ŋ á wɔ́p. 22Pɔ́ lɛ ntshī akɛnūʼ zɔ́p, mbɔɔ mɔʼɔ́ wɔ́p nnéŋ, ńtsé á nzem Yɛɛ́so.
23Á tɔ́k épúp, Yɛɛ́so á kʉ́ʼne á ntē metésɔŋ Ŋgaliléa ntsem, ńzíʼne epuɔ anu Ndém, á ntē meŋgyā aswiŋte pɔ́p. Ńzéŋ nnɔŋ ntswīi ŋke mbɔŋ, ésáʼa eshúŋɔ páʼ Lefɔ Ndém é épúp. Ńnɔŋ ŋghʉ̄ɛ, ŋiŋ yīi a á ŋgwɛ̄ eziɛ́ ntií agɔ lɛ́, mbɔɔ ŋiŋ yīi a á ŋgwɛ̄ eziɛ́ ntií alɔʼ lɛ́, á ntē alāʼ, á tʉɛ. 24Á gɔ́ épúp, mɛ́ pú ndɔ̄k lezēŋ Yɛɛ́so esāŋ ŋgɔŋ Sília ntsem. Mɛ́ pú ndɔ̄k epuɔ metsem pīi, ntií ntiī agɔ a lē ŋkwɛ́t á wɔ́p, pɔ́ nɔŋ njʉ́ɔ ŋgʉɔ̄ʼ, éshʉ̄ʼ. Épuɔ pīi mesī é ánɛ pɔ́p, megaŋ awāʼ, meŋkeluʼ, á ghʉɛ pɔ́ tʉɛ. 25Púp, atʉtʉ epuɔ á zhɛne á Yɛɛ́so, éfhɔ́ɔ á apak ŋgɔŋ Ŋgaliléa, mbɔɔ ánɛ Metésɔŋ‑Legēm#4.25 É si ŋgɔ́ lezēŋ amɔ̄ʼ ajʉʼ, éfhó ánɛ páʼ metésɔŋ é le cúʼte á ajʉʼ mɛ́t tɛ ŋgɔ́ legēm., éfhɔ́ɔ á Yelósalɛm mbɔɔ Yudéa, mbɔɔ á nzéŋ ntshi Juldɛŋ.
Actualmente seleccionado:
Matío 4: ybb
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© CABTAL