Matío 3
3
Jáaŋ Mbaptísi a á ega ntswīi ŋke Ndém
(Mlk 1.2-6; Lúk 3.1-6; Jáŋ 1.19-23)
1Á lɛ ánɛ afʉʼ mɛ́t, Jáaŋ nnoʼ‑epuɔ á ntshi á sáʼ, á késáatswɛt Yudéa, ńnɔŋ esáʼa eshúŋɔ ŋ́gɛ: 2«Pɛ egɔ̄ nnɛ̄t zɛ, ŋgwáʼ atswhī tepɔŋ zɛ́, melaʼ mīi afʉʼ zīi, Ndém a gɔ á esáʼ lefɔ tsí, á tshóne tɛ mbáte. » 3Jáaŋ mɛ́t a á si ŋgɔ́ á ŋiŋ yīi, Izayi ntswi‑ŋke Ndém a le lé ánɛ athū zí ŋ́gɛ:
«Ŋiŋ a á késáatswɛt, ńdʉ́ɛ́ mé ŋghi teté ŋ́gɛ,
pɛ ecūŋte á mɛnzhɛ Atsyapuɔ,
ésēŋte meliɛ́‑nzhɛ mí, e etshí ndeŋ ndeŋ. »
4Jáaŋ a lɛ késáatswɛt épúp, ḿmāʼ nzhó, mbɔ mɛ́ le lɔ̄k menɔŋ shamo tɛ́ mbáʼ. Ńzwík ekɔp ŋgup na, á mbembéŋ yí. Etsí etsō lejhʉ̄, é gɔ́ ŋgím, ŋ́ghʉ̄ ŋŋwāʼ atswɛt. 5A le nɔ̄ŋ esáʼa épúp, atʉtʉ epuɔ á nɔŋ efhɔ́ɔ á Yelósalɛm, éfhɔ́ɔ á Yudéa ntsem, ḿbúu efhɔ́ɔ á eshhʉ̄ ntshi Juldɛŋ ntsem, éshʉʼɛ njʉ́ɔ á yí, 6ḿvéŋɛ mefa mɔ́p á ntentā, á noʼo á wɔ́p á ntē ntshi Juldɛŋ.
Jáaŋ a á ega ntswīi ŋ́gɛ alāʼ a ewáʼ atswhī tepɔŋ zɔ́p
(Lúk 3.7-9)
7Jáaŋ á jʉ́ɔ páʼ epuɔ Falísia mbɔɔ epuɔ Sadúsia tɛ nzá, é si eshʉ̄ʼɛ ŋ́gɛ, a enōʼ á wɔ́p á ntshi, ńdé á mbū pɔ́p ŋ́gɛ: «Pɛ pīi pɛ yikɛ, ńzīŋɛ ŋŋɛ́tte ŋɛtté páʼ menū, awɔ́ a á shúŋ á wɛ́ ŋ́gɛ, pɛ gɔ ekʉ̄ʉ ŋgʉɔ̄ʼ zīi, Ndém a gɔ emaʼ á athū epuɔ tɛ ntswɛ́t é? 8Pɛ eghʉ̄ menu membɔŋ mīi, é si ntswīi á légɛ, pɛ é wáʼ atswhī tepɔŋ zɛ́. 9Pɛ epá á lelɛ ndɔ̄k áa nchu ndaʼ, ńdé ŋ́gɛ: “Pek é ndhu Ablaham.” Meŋ shúŋɔ á wɛ́ ŋ́gɛ, Ndém a kuūʼ á lesɛt metɔ́ puɔ, ńdɔk ŋghʉ̄ nzwɛt Ablaham. 10Mɛ́ ndáʼ ŋkāʼ nza, ńdɔ̄kɔ ŋgɔ̄ á ŋkʉɔ́ʼ tɛ mbɔɔ aziɛ́ athʉ́ lɛ́ zīi, á ka ntá mbɔŋ zém ɛ́. Éfhó á esī, ékʉɔ́ʼ ánɛ meŋgaŋ, étɔ á mmók.
(Mlk 1.7-8; Lúk 3.15-18; Jáŋ 1.24-28)
11Meŋ, meŋ á si nnōʼo á wɛ́ áa ntshi ndaʼ, ńdɔkɔ ntswīi á légɛ, pɛ é wáʼ atswhī tepɔŋ zɛ́. Táʼ, ndʉɛ yīi a á nzem meŋ eshʉ̄ʼɛ, a puú ntsyā á gá, tɛ meŋ zi te kūʼ yīi, meŋ gɔ eŋɔ́ʼne á esī, ésɔ̄ŋ meláŋ mí í. A a shʉʼ azí páʼā, énéŋ Azwakne Ndém ánɛ epuɔ, ézéŋ enéŋ mmók ánɛ epuɔ. 12A wɛɛ̄ á túŋ á mbū yí, ńdɔkɔ efwɔ́kɔ etsō tsí. Éfwɔ́k épúp, énéŋ etsi mbɔŋ á ŋkiŋ, épiŋ etɔ ekaŋne á ntē mmók yīi, é té láʼ epí í. »
Jáaŋ a á ega nnōʼo Yɛɛ́so á ntshi
(Mlk 1.9-11; Lúk 3.21-22; Jáŋ 1.29-34)
13Jáaŋ a le nɔ̄ŋ eshúŋnɛ épúp, Yɛɛ́so á lɛ esáʼne, éfhɔ́ɔ á Ŋgaliléa. Éshʉʼ tɛ ŋkó á lezēŋ yí, á ntē ntshi Juldɛŋ, ŋ́gɛ a enōʼ á yí á ntshi. 14Jáaŋ á nɔŋ ndʉ̄ʼɛ, ńdʉ́ɛ á mbū yí ŋ́gɛ: «Meŋ mé eyi, o gɔ enōoʼ á gá á ntshi, o ó piŋ eshʉ̄ʼ ŋ́gɛ, meŋ enōʼ á wú á ntshi lɛ́?» 15Tɛ́ Yɛɛ́so á tsɔ́ʼ á mbū yí ŋ́gɛ: «Véŋ ŋ́gɛ, a egɔ́ épúp tsetsɔŋɔ. O o ghʉ épúp, tɛ́ pɔkɔ elɔk ŋghʉ̄, anu tsem zīi Ndém a le léē, a ezīŋ ndeŋ ndeŋ. » Jáaŋ á lɛ mvéŋ. 16Ńnōʼ á Yɛɛ́so á ntshi, tɛ á fhó éwú ntó. Ńdɛ ŋgē ejʉ́ɔ, lephū é tsɔ́ʼɔ ntshí, á jʉ́ɔ Azwakne Ndém á fhó éwú esóʼo, ŋ́gɔ́ páʼ akepēŋ lā, éshʉʼ nnáŋ ánɛ yí. 17Á zéŋ njúʼ mmɔʼ ŋghi é fhó éwú ndé ŋ́gɛ: «Ŋiŋ wuɔ a á Méŋ ga, meŋ kɔ̄ɔŋ á yí tɛʼ, a ghʉʉ̄ ntē gá é gáŋte. »
Actualmente seleccionado:
Matío 3: ybb
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© CABTAL