MATIUS 3
3
Yohanes Pembaptis nen Allah wene yega lagage wene
(Mrk. 1:1-8; Luk. 3:1-18; Yoh. 1:19-28)
1Ar Yohanes Pembaptis eti, todi anggumo o Yudea paga etoma ari wagagerek Allah wene yega lagage. 2#Mat. 4:17; Mrk. 1:15Ma ar nen Allah wene yega dogolir, “Ar Allah Raja arar menatuk, apma binaniluk wene mbalka dogorak eti arar panggo yege o! Eti ar ma, kir nen ye maduk nde maduk eku lagop mendek etoma, obogar mbo bini o,” yiluk yega lagage o. 3#Yes. 40:3Ar Nabi Yesaya nen, wene ar Yohanes yi abok yirige mende yegerogon,
“Ap omanggi akuni dekma, o todi anggu paga etoma, ane wai yega dogolir,
‘Ar Tuhan aruwan yakwi,
Nen Ar aruwan ebe enagago pik pak yakwi, eku dogoni o.’ ”
4 #
2Raj. 1:8
Ar Yohanes iyom yugu welagage eti,unta iri mendek. Nen ar ombaganuk etiunta agakdo mendek, nen agarom eti yebeda inom nen dinggin onggama mende amburu madu inom nengga lagige o. 5Ir akuni pakalogar, o Yerusalem nen, o Yudea nen, o ambetak i Yordan aik penak-penak etoma nen, ar Yohanes oba wagu lagugwa. 6Ar oba watuk, ir inomaduk bagalkwi kalok, ar Yohanes nen ir i Yordan ima arar wukbaga lagage o.
7 #
Mat. 12:34, 23:33 Ir akuni pakalok Farisi mendek inom, Saduki mendek inom, Yohanes nen ima wukdinanuwak o, yiluk oba wagugwa. Ogwe, ir nen ar oba wagwi il dalok wene yoraga dogolir, “Akuni maduk ekwa yi! Kir Ar Allah nen anggin panggin kinoba binagagin eti, wogalogo kode wundugun yiluk, ta nen yorkiragemo wagop? 8Kir kinomaduk eku lagop mendek bugalogo mbo biluk, ebebar andalok ekwi mendek telekmarogon inil kinawak nen, eku dogoni o. 9#Yoh. 8:33Kir kinakla nen, nir ap Abraham umbui ma, anggin panggin ninoba binanigin dek yiluk, kinakla andaurak dek o! 10#Mat. 7:19O edo omanggen kudi murogo lakburak paga, mbuti pikpuk erek agarik o. Ye o nde o enggen pano mendek yikikdek kalok, murogo indumo mbo onggol bigin o. 11An nen kir ima i paga wukbinagagin eti, kir kinomaduk obok bugalogo mbo biluk, ebebar andagop eti inilu togo erigin o. Nen Ar ap an namborna ambi warigin eti perak, Ar kwak nggok negen o, nen an kwak bugudagar o. An nen Ar eti iyok agur nonggodek waganurak ogwe ndak dek ar o. Eti arma, Ar watuk nen, kir Roh Allah eti obarne paga inom, indu akda paga inom, ima wukbinagagin o. 12Ar ake gandum enggen maduk o pano o imbirak pulurak paga ake nen, inggimo nyiru#3:12: Nyiru eti: Indonesia wene paga. Nen nyiru eti paga beras kwa nen gandum kwak, enggen agakdo pulir taga mende. mendago kodalok warigin o. Nen gandum enggen kau iyomla yagar tega, gandum agakdo kau pulogo, indu akda wulok damok mban yir tagama etoma, kali nuwak nen yiluk onggol dega erigin o.”
Yesus ima wukbirige wene
(Mrk. 1:9-11; Luk. 3:21-22)
13O eta paga Ar Yesus o Galilea nen, i Yordan ima arar lagage. Ar Yohanes oba wagagerek, ima wukbanin o yiluk, ar Yohanes nggino yorige o. 14Ogwe Ar Yohanes nen yega dogolir, an nen Kar ima wukbagurak mondok ndak dek o. Nenaluk Kar nen perak, an ima wukbanurak eti ndak o, ogwe Kar yogondak an noba wagan o, yiluk yorige.
15Yorigemo Ar Yesus nen wene onggo yoga dogolir, “Yogondak ya paga ugunar o. Nenaluk, ya erugun paga Ar Allah akla andarige mendek etoma obogar etaruak nen o,” yiluk yorigemo, ar Yohanes nen Ar Yesus ima arar wukbirige o. 16Arar Ima wukbirigemo, Ar Yesus ebe ima nen pudarogo dagi waga kigik, Roh Allah mbogor keyak togon tewe merpati talek, Ar omak taga putuk lakbi wura waga ar Yohanes il karige o. 17#Kej. 22:2; Mzm. 2:7; Yes. 42:1; Mat. 12:18, 17:5; Mrk. 1:11; Luk. 9:35Oba dengge yi waga kigik, Ar Allah Mbogor taga nen yega dogolir, “Elege yi, An Nakbur Niliti kunik mende Ar yi arar o. Ar An niliti adeknggen arar erogo bege o,” yiluk yega aruk kulkige o.
Actualmente seleccionado:
MATIUS 3: WLW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión