Mataayi 4
4
Saatina ayesini Yiisu
(Malako 1.12-13; Luka 4.1-13)
1Tumake, Muheebili a Nziaambi abiti Yiisu ku tsi ya tsata, paa Saatina wamuyesine. 2Nha mbisi a ulabisa maku mana ma biluumbu bia nyanga na bia butsuu kwahele a udia, Yiisu abayi nzala. 3Saatina muwungisi aswesii kwaa nde na wamuleeli: «So we li mwaana a Nziaambi, tumu mamanya ma makituu mapa.» 4Yiisu avutili: «Mabasonuu ma Ngira mali mu uleele: “Muutu a ali mu ubaa moonyi mu ndila mapa pe, ka mu mandaa moosi ma Nziaambi ali mu uleele#Ndi 8.3.”» 5Ni mu buu, Saatina wamubiti natee ku Yeruselemi, ngaanda ya ngira, wamunayi ku yulu a mbulili a Nzo a Nziaambi, 6na wamuleeli: «So we li Mwaana a Nziaambi wa ngwanya, patuu na bwa nha tsi. Mundaa ti Mabasonuu ma Ngira mali mu uleele:
“Nziaambi sa aha litumu kwaa batumu ba nde, mu ndaa we,
na bo sa bayaka we mu mioo mia bo,
paa ti kuulu kia we ihele ukubu baka#Mkg 91.11-12.”»
7Yiisu abwivutulu kwaa nde: «Mabasonuu ma Ngira mali mu uleele ka ti: “A yesine Pfumu Nziaambi a we pe#Ndi 6.16.”»
8Saatina abwibiti nde ku yulu a mulaanda wa ngo bula, wamumweesi bipfumu bioosi bia tsi na bubwe ba bio. 9Na wamuleeli: «Me sa ha we bi bioosi, so we tsukini nha kulu a me na ukuundu me.» 10Ni mu buu Yiisu aleeli kwaa nde: «Matuu nha Saatina! Yene! Mundaa Mabasonuu ma Ngira mali mu uleele: “Kuundu Pfumu Nziaambi a we, na ndila nde we afwaana usalila#4.10 Ndi 6.13..”» 11Mu mbala yi Saatina ninha asiisi nde, na batumu ba Nziaambi baswesii kwaa Yiisu na bamusialili.
Yiisu abaandii isala kia nde ku Ngalili
(Malako 1.14-15; Luka 4.14-15)
12Yiisu bu ayuyi ti Yowani#4.12 Yowani wu ni Yowani Mubootu. balooso mu perese, nde ayeni ku Ngalili. 13Nde a adiaali pe nha Nazareti, ka ayidiaala ku Kapernawumi. Ngaanda yii ali mu mukoo a mubu a Ngalili, mu bitinini bia Zabuloni na Nefetali. 14Maa mayilimi buu paa maleeli mubili Yeesaya mayene tsitsi:
15«Beni baata ba bitinini bia Zabuloni na Nefetali,
mu kuulu ya mubu, ku peembi yimosi ya nziali a Yorodaani,
ku Ngalili ku li mu udiaala bieenyi!
16Beni baata babali kutso pimisi,
sa dimono liyalila lilinene!
Kwaa babali mu udiaala mu idziimi kia likwa,
liyalila sa limonuu#4.16 Yes 8.23—9.1.!»
17Umatuu mu taanga dii, Yiisu abaandii uyiisi, na aleeli: «Disobo ndiaatili a beni, mundaa Ipfumu kia mayula ika bebele!»
Yiisu asooli miyii mia nde mia tsiomi
(Malako 1.16-20; Luka 5.1-11)
18Bu Yiisu akiyene mu mukoo a mubu wa Ngalili, nde amoni baana banguu boolo babali balobi. Baana banguu baa ali ni Simooni wu bali mu uta ti Peetero, na Andere mukee a nde. Bo bakidumunu siele mu mubu, mu ulobo. 19Yiisu aleeli kwaa bo: «Diduku me, na me sa yiisi beni bwa ulobo baata.» 20Nhaa-na-nhaa, bo babwoongili masiele ma bo na bamuduki. 21Bu abwiyene nha la-la, nde amoni baana bangu boolo bakimi ba babaala, Yaki na Yowani, baana ba Zebedaayi. Bo bali mutso bootu na Zebedaayi, taayi a bo, bo bakiloondo masiele ma bo. Yiisu wabateeri mbili. 22Nhaa-na-nhaa, bo basiisi bootu na taayi a bo, na baduki Yiisu.
Yiisu ayiisi baata na abeelisi babeeri
23Yiisu akidieenge mu Ngalili yoosi, nde akiyiisi mutso manzo ma makutunu ma Bayuudayo ma mu itinini kii. Nde akiyaabisa Ndaa Yimbwe ya Ipfumu kia Nziaambi, na akibeelese baata mu bibeeri bia bo bioosi, na bipii bia bo bioosi. 24Bayuyi mvuungu a nde mu tsi yoosi ya Siria, na bamubeyi boosi ba bali na bibeeri bia mupili na mupili, so a buu pe bali kutso kwaamisa ya mupili na mupili. Ni bangaa miheebili mimibi, ba bali ka na ibeeri kia sisi na baata bababobo binama. Na Yiisu wababeelisi. 25Makoongi mamalayi maduki nde: mo makimata ku Ngalili, na ku itinini kia Dekapole, tumake ku ngaanda ya Yeruselemi, ku itinini kia Yuuda na ku itinini kia ku simi la Yorodaani.
Actualmente seleccionado:
Mataayi 4: iyxYAK
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 (Active) Wycliffe Bible Translators, Inc. All rights reserved.